1 Corinthians 8
ရုပ်တုဘားမာ ပူဇော်စာ အစားအစာ အကြောင်း
1ရုပ်တုဘားမာ ပူဇော်စာ အစားအစာ အကြောင်းနပတ်သပ်ရို့ နင်ရို့ ငါ့ကို မီးလီကတ်တေ။ ငါ ဒေဂု ထိုအကြောင်းကို အဖြေပီးမည်။ ငါရို့ အားကုံးသူမာ ညာဏ်ပညာ ဟိရေဆိုစာကို ငါရို့ သိရေ။ အရာ ညာဏ်ပညာစာ လူရို့ကို ဘဝင်မြင့်အောင် လုပ်တေ၊ ယေကေလည်း ချစ်ခြင်းမေတ္တာစာ လူကို တိုးတက်အောင် လုပ်တေ။ 2လူတစ်ယောက်စာ ကိုယ့်ကိုကိုယ် အသိပညာ ဟိရေ ဟို့ မှတ်တေ၊ ယေကေလည်း ပြောလိုက်ဖို့ဆိုကေ သူစာ အများ မသိ။ 3ယေကေလည်း အသူမဆို ထာဝရဘုရားကို ချစ်တေဆိုကေ ထာဝရဘုရားစာ သူ့ကို သိရေ။ 4ငါ ဒေဂု ရုပ်တုဘားမာ ပူဇော်စာ အစားအစာ အကြောင်းကို ပြောရေ။ ငါရို့ သိရေ၊ လောကမာ ရုပ်တုဆိုစာ တစ်ခုလည်း တန်ဖိုး မဟိ အရာ ထာဝရဘုရား တစ်ပါးတည်းရာ ဟိရေ။ 5တစ်ယောက်တစ်ရီ မှတ်ကတ်တေ၊ ဂေါင်းခင်ဘုံမာမဆို၊ ကမ္ဘာမာမဆို နတ်ဘုရားဆိုစာ အများကြီး ဟိရေ။ ဟုတ်တေ၊ နတ်ဘုရားလည်း အများကြီး ဟိရေ အရာ အသျှင်လည်း အများကြီး ဟိရေ။ 6ယေကေလည်း ငါရို့အတွက် ထာဝရဘုရား တစ်ပါးတည်းရာ ဟိရေ။ သူစာ ငါရို့မာ အဖ ဖြစ်တေ။ သူစာ ဟိသမျ အားကုံးကို ဖန်ဆင်းလီရေ အရာ သူ့အတွက် ငါရို့ အသက်ရှင်နီကတ်တေ။ အရာ ငါရို့အတွက် အသျှင်လည်း တစ်ပါးတည်းရာ ဟိရေ။ သူစာ ယေရှုခရစ်တော် ဖြစ်တေ။ ထာဝရဘုရားစာ ခရစ်တော်ကနီရို့ ဟိသမျ အားကုံးကို ဖန်ဆင်းလီရေ အရာ ငါရို့ ခရစ်တော်ကနီရို့ အသက်ကို ရကတ်ပျာ။ 7ယေကေလည်း ထို ဟိသမျ ညာဏ်ပညာစာ ကျုံသူတိုင်းမာ မဟိ။ တစ်ယောက်တစ်ရီမာ ရုပ်တုကို ကိုးကွယ်ဖို့စာ အကျင့် ဟိလီရေ။ ယင်းအတွက်န သူရို့စာ ရုပ်တုဘားမာ ပူဇော်စာ အစားအစာကို စားသောက်ကတ်တေခါ သူရို့စာ ရုပ်တုကို ကိုးကွယ်ရေ ဟို့ မှတ်ကတ်တေ။ အရာ သူရို့မာ အသိညာဏ် အားနည်းရေအတွက်န သူရို့စာ ကိုယ်ရို့ကို အပြစ်သေ ဟို့ မှတ်ကတ်တေ။ 8ယေကေလည်း အစားအစာအကြောင်းန ငါရို့စာ ထာဝရဘုရား၏ နှစ်သက်ခြင်းကို မခံရ။ ယင်းအတွက်န ငါရို့ မစားမသောက်ဘိုင်းန နီကေလည်း ငါရို့မာ အရှုံးမဟိ၊ အရာ စားသောက်ကေလည်း ငါရို့မာ အမြတ်မဟိ။ 9ယေကေလည်း သတိထားကတ်! နင်ရို့ လွတ်မြောင့်ခြင်း အကြောင်းန ကျုံခြင်းတရား အားနည်းသူရို့ အပြစ်မာ မကျစီကတ်ကေ့။ 10အကြောင်းကား ရုပ်တု တစ်ခုလည်း တန်ဖိုး မဟိဆိုစာကို နင် သိရေ။ ကောင်းရေ၊ ယေကေလည်း အသိညာဏ် အားနည်းသူတစ်ယောက်စာ နင့်ကို ရုပ်တု ကျောင်းမာ ထိုင်ရို့ စားသောက်စာကို မြင်ရေဆိုကေ သူလည်းသောက် ရုပ်တုဘားမာ ပူဇော်စာ အစားအစာကို စားသောက်ဖို့ အားပါဖို့ မဟုတ်လော? 11ယင်းပိုင် နင့် ညာဏ်ပညာ အကြောင်းန အသိညာဏ် အားနည်းစာ ညီအစ်ကိုမောင်နမှရို့ ပျက်စီးခြင်းတို့ ရောက်ကတ်လိမည်။ ယေကေလည်း နင်ရို့ မှတ်ထားကတ်၊ ခရစ်တော်စာ သူရို့အတွက်ရာ အသီခံလီရေ။ 12ကျုံသူညီအစ်ကိုမောင်နမှရို့ မှားရေ ဟို့ မှတ်စာတိကို နင်ရို့ သူရို့ကို လုပ်ဖို့အတွက် အားပီးကတ်တေခါ နင်ရို့စာ သူရို့ကို ဆန့်ကျင်ရို့ ပြစ်မှားကတ်တေ။ အရာ ထိုပြစ်မှားခြင်းစာ ခရစ်တော်ကို ဆန့်ကျင်ရို့လည်း ပြစ်မှားခြင်း ဖြစ်တေ။ 13ယင်းအတွက်န ဇာ အစားအစာမဆို တစ်ခုအကြောင်းန ငါ့ ညီအစ်ကိုမောင်နမှရို့ အပြစ်မာ ကျရေဆိုကေ ထိုအစားအစာကို ငါ အရာ မစားဗျာ။ အရာ ငါ့ ညီအစ်ကိုမောင်နမှရို့ အပြစ်မာ မကျလတ်အောင် ငါ ဟင်းသား မစားဘိုင်းန စွန့်ဘိုက်လိုက်ဖို့ဗျာ။
Copyright information for
RmzSC