1 John 2

ယေရှု ငါရို့အတွက် ရှေ့နေနတူခြင်း

1ငါ့ အချစ်သားရို့၊ နင်ရို့ အပြစ် မလုပ်ရအောင်အတွက် ငါ ဒေ စာစောင်ကို ရွီးလိုက်စာ ဖြစ်တေ။ ယေကေလည်း အသူမဆို အပြစ် လုပ်ဘိုက်လိုက်တေဆိုကေ ငါရို့ဖက်က ဝင်ရို့ အဖထာဝရဘုရားဘားမာ တောင်းပန်ဖို့သူတစ်ပါး ဟိရေ။ သူစာ ယေရှုခရစ်တော် ဖြစ်တေ အရာ သူစာ အပြစ်နကင်းသူ ဖြစ်တေ။ 2ငါရို့မာ အပြစ်တိ ခွင့်ရွှတ်ခြင်းကို ရဖို့အတွက် ယေရှုခရစ်တော်စာ ကိုယ့်အသက်ကို ယဇ်ပူဇော်ရို့ ထာဝရဘုရားကို နှစ်သက်အောင် လုပ်လီရေ။ သက်သက် ငါရို့မာ အပြစ်တိ ခွင့်ရွှတ်ခြင်းကို ရဖို့အတွက် မဟုတ်သိ၊ ယင်းထက်မက ကမ္ဘာမာ ဟိသမျ လူရို့မာ အပြစ်တိ ခွင့်ရွှတ်ခြင်းကို ရဖို့အတွက်လည်းသောက် သူစာ ကိုယ့်အသက်ကို ယဇ်ပူဇော်လီစာ ဖြစ်တေ။

ယေရှုခရစ်တော်၏ ပညှတ်ချက်တိကို လိုက်နာခြင်း

3ငါရို့စာ ယေရှုခရစ်တော်၏ ပညှတ်ချက်တိကို လိုက်နာရေဆိုကေ ငါရို့ အမှန် သိရစာကား၊ ငါရို့စာ ယေရှုခရစ်တော်ကို သိရကတ်ပျာ။ 4အသူမဆို၊ “ငါ ယေရှုခရစ်တော်ကို သိရေ” ဟို့ ပြောရို့ပင်လည်း ယေရှုခရစ်တော်၏ ပညှတ်ချက်ကို မလိုက်နာဆိုကေ သူစာ မုတ်သားစကား ပြောသူ ဖြစ်တေ။ အရာ သူ့မာ မှန်ကန်ခြင်းဆိုစာ တစ်ခုလည်း မဟိ။ 5ယေကေလည်း အသူမဆို ခရစ်တော်၏ စကားတော်ကို လိုက်နာရေဆိုကေ သူစာ ထာဝရဘုရားကို အမှန် ချစ်တေ ဟို့ ဖေါ်ပြရေ။ ယင်းပိုင် ငါရို့ သိရစာကား၊ ငါရို့စာ ခရစ်တော်န တစ်ကိုယ်တည်း ဖြစ်ရို့ ဟိကတ်တေ။ 6အရာ အသူမဆို ခရစ်တော်န တစ်ကိုယ်တည်း ဖြစ်ရို့ ဟိရေ ဟို့ ပြောရေဆိုကေ သူစာ ခရစ်တော်ပိုင် နီထိုင်ရဖို့။

ပညှတ်ချက် အသစ်

7ငါ့ အချစ်သားရို့၊ ငါ နင်ရို့တို့ ပညှတ်ချက်အသစ် ရွီးလိုက်စာ မဟုတ်၊ ပထမဆုံးကပင် ဟိလီစာ ပညှတ်ချက်အဟောင်းကို နင်ရို့တို့ ရွီးလိုက်စာ ဖြစ်တေ။ ဒေ ပညှတ်ချက်အဟောင်းကို နင်ရို့ အယင်ကပင် ကြားရို့ လာကတ်ပျာ။ 8ယေကေလည်း ဒေ ပညှတ်ချက်စာ အဟောင်းဆိုကေလည်း အသစ် ဖြစ်တေ။ ဒေ ပညှတ်ချက်၏ မှန်ကန်ခြင်းစာ ယေရှုခရစ်တော်န နင်ရို့ ဘဝမာ မြင်ရရေ၊ အကြောင်းကား အမိုက်မှောင်စာ ကွယ်ပျောက်လားနီဗျာ အရာ အလင်းစာ ထွန်းတောက်နီရေ။

9အသူမဆို “ငါ အလင်းမာ ဟိရေ” ဟို့ ပြောရို့ပင်လည်း ကိုယ့်ကျုံသူညီအစ်ကိုကို မုန်းရေဆိုကေ သူစာ ဒေဂုလည်း အမိုက်မှောင်မာ ဟိသိရေ။ 10ယေကေလည်း အသူမဆို ကိုယ့်ညီအစ်ကိုကို ချစ်တေဆိုကေ သူစာ အလင်းမာ နီထိုင်ရေ အရာ သူစာ အခြားတစ်ယောက်ကို အပြစ်မာ ချဖို့ မဟုတ်။ 11ယေကေလည်း ကိုယ့်ညီအစ်ကိုကို မုန်းသူစာ အမိုက်မှောင်မာ ဟိသိရေ အရာ သူစာ အမိုက်မှောင်မာ လမ်းသျှောက်နီရေ။ အမိုက်မှောင်စာ သူ့မျက်စိကို ကန်းအောင် လုပ်ဘိုက်လိုက်တေအတွက်န သူစာ ကိုယ် ဇာတို့ လားရေလည်းဆိုစာကို ကိုယ် မသိ။

12သားသမီးရို့၊ နင်ရို့မာ အပြစ်တိစာ ခရစ်တော် အကြောင်းန ခွင့်ရွှတ်ခြင်းကို ရကတ်ပျာ။ ယင်းအတွက်န ငါ ဒေ စာစောင်ကို နင်ရို့တို့ ရွီးလိုက်တေ။ 13အဖရို့၊ ကိုယ်ဘင်ရို့စာ ပထမဆုံးကပင် ဟိလီသူကို သိကတ်ပျာ။ ယင်းအတွက်န အကျွန် ဒေ စာစောင်ကို ကိုယ်ဘင်ရို့တို့ ရွီးလိုက်တေ။ အရာ လူပျိုရို့၊ နင်ရို့စာ မာရ်နတ်ကို အနိုင်ယူကတ်ပျာ။ ယင်းအတွက်န ငါ ဒေ စာစောင်ကို နင်ရို့တို့ ရွီးလိုက်တေ။ 14သားသမီးရို့၊ နင်ရို့စာ အဖထာဝရဘုရားကို သိကတ်ပျာ။ ယင်းအတွက်န ငါ ဒေ စာစောင်ကို နင်ရို့တို့ ရွီးလိုက်လီရေ။ လူပျိုရို့၊ နင်ရို့စာ အားခွန်န ပြည့်စုံကတ်တေ အရာ ထာဝရဘုရား၏ စကားတော်ကို နင်ရို့ စိတ်နှလုံးထဲမာ ထားကတ်တေ အရာ နင်ရို့စာ မာရ်နတ်ကို အနိုင်ယူကတ်ပျာ။ ယင်းအတွက်န ငါ ဒေ စာစောင်ကို နင်ရို့တို့ ရွီးလိုက်လီရေ။ အရာ အဖရို့၊ ကိုယ်ဘင်ရို့ ပထမဆုံးကပင် ဟိလီသူကို သိကတ်ပျာ။ ယင်းအတွက်န အကျွန် ဒေ စာစောင်ကို ကိုယ်ဘင်ရို့တို့ ရွီးလိုက်လီရေ။

လောကကို မချစ်ကတ်ကေ့

15နင်ရို့ ဒေ လောကန လောကမာဟိစာ ပစ္စည်းဝန်ဆန်တိကို မချစ်ကတ်ကေ့။ အသူမဆို လောကကို ချစ်တေဆိုကေ သူစာ အဖကို မချစ်၊ 16အကြောင်းကား လောကမာ ဟိသမျ အားကုံး အဖက လာစာ မဟုတ်၊ ဒေ လောကက လာစာ ဖြစ်တေ။ ယင်းသျှင့်တိစာ ကိုယ်ခန္ဓာ၏ လိုအပ်ချက်၊ မျက်စိ လောဖတတ်ခြင်း အရာ အိမ်ထောင်ရေးကို ယူရို့ ဗန်းပြခြင်း ဖြစ်တေ။ 17ဒေ လောကန လောကမာဟိစာ လောဖတတ်ခြင်းတိစာ ကွယ်ပျောက်ဖို့ ပါးနီဗျာ၊ ယေကေလည်း ထာဝရဘုရား၏ အလိုတော်ကို လိုက်နာသူစာ ထာဝရပတ်လုံး အသက်ရှင်လိမည်။

ခရစ်တော်၏ ရန်သူ

18သားသမီးရို့၊ ဒေဂု နောက်ဆုံးကာလ ရောက်နီဗျာ။ ခရစ်တော်၏ ရန်သူ လာနီရေဆိုစာကို နင်ရို့ ကြားဖူးကတ်တေ၊ ယေကေလည်း ဒေဂုပင် ခရစ်တော်၏ ရန်သူ အများကြီး ရောက်နီကတ်ပျာ။ ယင်းအတွက်န ဒေဂု နောက်ဆုံးကာလ ရောက်နီဗျာဆိုစာကို ငါရို့ သိရကတ်တေ။ 19ထိုခရစ်တော်၏ ရန်သူရို့စာ ငါရို့ ကျုံသူရို့အထဲမာ ဟိလီကတ်တေ၊ ယေကေလည်း သူရို့စာ ငါရို့အထဲက ထွက်လားခလီရေ။ ယင်းအတွက်န ငါရို့ သိရစာကား၊ သူရို့စာ ငါရို့ လူမဟုတ်။ သူရို့စာ အမှန် ငါရို့ လူဖြစ်ကတ်ဖို့ဆိုကေ ငါရို့နအတူ ဟိကတ်ဖို့။

20ယေကေလည်း ခရစ်တော်စာ နင်ရို့ဘားမာ သန့်ရှင်းသောဝိညာဉ်တော်ကို သွန်ချလိုက်လီရေ။ ယင်းအတွက်န နင်ရို့ အားကုံးသူ မှန်ကန်ခြင်းကို သိရကတ်ပျာ။ 21နင်ရို့ မှန်ကန်ခြင်းကို မသိကတ်တေအတွက်န ငါ နင်ရို့တို့ စာရွီးလိုက်လီစာ မဟုတ်၊ ယေကေလည်း နင်ရို့ကား မှန်ကန်ခြင်းကို သိကတ်တေ အရာ မုတ်သားစာ မှန်ကန်ခြင်းက လာစာ မဟုတ်ဆိုစာကိုလည်း နင်ရို့ သိကတ်တေ။ ယင်းအတွက်န ငါ နင်ရို့တို့ စာရွီးလိုက်လီစာ ဖြစ်တေ။ 22အသူမဆို ယေရှုကို ခရစ်တော် မဟုတ် ဟို့ ပြောရေဆိုကေ သူစာ အမှန် မုတ်သားစကား ပြောရေ။ အရာ အဖန သားတော်ကို ငြင်းပယ်သူစာ ခရစ်တော်၏ ရန်သူ ဖြစ်တေ။ 23သားတော်ကို ငြင်းပယ်သူစာ အဖကိုလည်း ငြင်းပယ်ရေ အရာ သားတော်ကို ဝန်ခံသူစာ အဖကိုလည်း ဝန်ခံရေ။ 24ပထမဆုံးကပင် ကြားရို့ လာကတ်စာ သွန်သင်ချက်တိကို နင်ရို့ စိတ်နှလုံးမာ ထားကတ်။ ထိုသွန်သင်ချက်တိကို နင်ရို့ စိတ်နှလုံးမာ ထားရေဆိုကေ နင်ရို့စာ သားတော်န တစ်ကိုယ်တည်း ဖြစ်ရို့ ဟိကတ်လိမည် အရာ အဖနလည်း တစ်ကိုယ်တည်း ဖြစ်ရို့ ဟိကတ်လိမည်။ 25ခရစ်တော်န တစ်ကိုယ်တည်း ဖြစ်ခြင်းစာ ထာဝရအသက် ဖြစ်တေ။ ခရစ်တော်စာ ငါရို့ကို ထာဝရအသက် ပီးဖို့အတွက် ဂတိခံထားခလီရေ။

26နင်ရို့ကို မှားယွင်းစာလမ်းတို့ ဆောင်ယူလားဖို့ ကြိုးစားသူရို့ အကြောင်းနပတ်သပ်ရို့ ငါ ဒေ စကားတိကို နင်ရို့တို့ ရွီးလိုက်လီစာ ဖြစ်တေ။ 27ယေကေလည်း ခရစ်တော်စာ နင်ရို့ဘားမာ ကိုယ့်ဝိညာဉ်တော်ကို သွန်ချလိုက်လီရေ။ ထိုဝိညာဉ်တော်စာ နင်ရို့ စိတ်နှလုံးမာ ကျိန်းဝပ်နီရေ။ ယင်းအတွက်န နင်ရို့စာ အခြား သွန်သင်ချက်တိကို နားထောင်ဖို့ မလိုဗျာ။ သူစာ ဟိသမျ အားကုံးကို နင်ရို့ကို သွန်သင်ပီးနီရေ။ သူစာ မှန်ကန်ခြင်းန ပြည့်စုံရေ အရာ သူ့မာ မုတ်သားဆိုစာ တစ်ခုလည်း မဟိ။ ယင်းအတွက်န နင်ရို့ သူသွန်သင်ပီးရေအတိုင်း လိုက်နာရို့ နီကတ် အရာ ခရစ်တော်န တစ်ကိုယ်တည်း ဖြစ်ရို့ နီကတ်။

28သားသမီးရို့၊ ငါ နင်ရို့ကို အရာတစ်ပြန် ပြောရေ၊ နင်ရို့ ခရစ်တော်န တစ်ကိုယ်တည်း ဖြစ်ရို့ နီကတ်။ ယင်းပိုင်ဆိုကေ ခရစ်တော် ပြန်ရို့ ကြွလာရေခါ သူ့ရှိက ရပ်ဖို့အတွက် ငါရို့မာ ကြောက်လန့်ခြင်းန ရှက်ကြောက်ခြင်း ဟိဖို့ မဟုတ်ပျာ။ 29နင်ရို့စာ ခရစ်တော်ကို ရိုးသားသူတစ်ပါး ဖြစ်တေ ဟို့ သိကတ်တေ။ ယင်းပိုင်ဆိုကေ ကောင်းမြတ်စာ အလုပ်ကို လုပ်နီသူရို့စာ ထာဝရဘုရား၏ သားသမီး ဖြစ်တေဆိုစာကိုလည်း နင်ရို့ သိကတ်ရဖို့။