1 John 3

ထာဝရဘုရား၏ သားသမီးရို့

1အဖထာဝရဘုရား ငါရို့ကို ဇာလှောက် ချစ်တေလည်းဆိုစာကို နင်ရို့ ကြည့်ကတ်! သူစာ ငါရို့ကို ကိုယ့်သားသမီး ဟို့ ခေါ်ရေ။ ဟုတ်တေ၊ ငါရို့ အမှန် ထာဝရဘုရား၏ သားသမီး ဖြစ်ကတ်တေ။ ယင်းအတွက်န ဒေ လောကသားရို့စာ ငါရို့ကို မသိကတ်၊ အကြောင်းကား သူရို့စာ ထာဝရဘုရားကို မသိကတ်။ 2အချစ်သားရို့၊ ငါရို့ ဒေဂု ထာဝရဘုရား၏ သားသမီး ဖြစ်ကတ်ပျာ။ ယေရှုခရစ်တော် ပြန်ရို့ ကြွလာရေခါ ငါရို့ ဇာ ဖြစ်လာဖို့လည်းဆိုစာကို ငါရို့ အလှပ မသိရကတ်သိ။ ယေကေလည်း ငါရို့ သိရစာကား၊ ငါရို့စာ ယေရှုခရစ်တော် ကြွလာရေခါ သူ့မာ မျက်နှာအစစ်ကို ငါရို့ မြင်ရကတ်ဖို့။ ယင်းအတွက်န ငါရို့ သူနတတူတည်း ဖြစ်ကတ်ဖို့။ 3အသူမဆို ခရစ်တော်ကို ဒေပိုင် မျှော်လင်းနီရေဆိုကေ သူစာ ခရစ်တော် စင်ကြယ်စာပိုင် ကိုယ့်ကို စင်ကြယ်အောင် လုပ်နီရေ။

4အပြစ်လုပ်သူရို့စာ ထာဝရဘုရား၏ ပညှတ်တရားကို ဖျက်ကတ်တေ။ ထာဝရဘုရား၏ ပညှတ်တရားကို ဖျက်ခြင်းစာ အပြစ်လုပ်ခြင်း ဖြစ်တေ။ 5နင်ရို့ကား သိကတ်တေ၊ လူရို့အပြစ်တိကို နုတ်ယူလားဖို့အတွက် ခရစ်တော် ကြွလာလီရေ။ ခရစ်တော်မာ အပြစ်ဆိုစာ တစ်ခုလည်း မဟိ။ 6ယင်းအတွက်န အသူမဆို ခရစ်တော်န တစ်ကိုယ်တည်း ဖြစ်ရို့ နီရေဆိုကေ သူစာ အရာအပြစ်လုပ်ရို့ မနီဗျာ။ ယေကေလည်း အပြစ်လုပ်နီသူစာ ခရစ်တော်ကို မြင်လည်း မမြင်ဖူး အရာ သိလည်း မသိ။

7အချစ်သားရို့၊ နင်ရို့ကို တစ်ယောက်လည်း မှားယွင်းစာလမ်းတို့ ယူလားဖို့ မရလတ်အောင် နင်ရို့ သတိထားကတ်။ ခရစ်တော် သူတော်ကောင်း ဖြစ်စာပိုင် ကောင်းမြတ်စာ အလုပ်ကို လုပ်နီသူလည်း သူတော်ကောင်း ဖြစ်တေ။ 8ယေကေလည်း အပြစ်လုပ်နီသူစာ မာရ်နတ်၏ သားသမီး ဖြစ်တေ၊ အကြောင်းကား မာရ်နတ်စာ ပထမဆုံးကပင် အပြစ်လုပ်ရို့ လာလီရေ။ ယင်းအတွက်န မာရ်နတ်၏ အလုပ်ကို ဖျက်စီးဖို့အတွက် ထာဝရဘုရား၏ သားတော် ကြွလာလီရေ။

9ထာဝရဘုရား၏ သားသမီးရို့စာ အပြစ်လုပ်ရို့ မနီကတ်၊ အကြောင်းကား ထာဝရဘုရား၏ အကျင့်ဇာရိတ္တ သူရို့ဘားမာ ဟိရေ။ အရာ သူရို့စာ ထာဝရဘုရား၏ သားသမီး ဖြစ်တေအတွက်န အပြစ်လုပ်ရို့ နီဖို့ မနိုင်ကတ်။ 10ယင်းအတွက်န အသူရို့ ထာဝရဘုရား၏ သားသမီး ဖြစ်ကတ်တေ အရာ အသူရို့ မာရ်နတ်၏ သားသမီး ဖြစ်ကတ်တေဆိုစာကို ယင်းသျှင့်ကနီရို့ ငါရို့ သိရရေ။ ကောင်းမြတ်စာ အလုပ်ကို မလုပ်ဘိုင်းန နီသူရို့စာ အရာ ကျုံသူညီအစ်ကိုကို မချစ်သူရို့စာ ထာဝရဘုရား၏ သားသမီး မဟုတ်။ သူရို့စာ မာရ်နတ်၏ သားသမီး ဖြစ်ကတ်တေ။

တစ်ယောက်ကို တစ်ယောက် ချစ်ကတ်

11ပထမဆုံးကပင် နင်ရို့ ကြားဖူးကတ်စာ စကားတိ ဖြစ်တေကား၊ “ငါရို့ တစ်ယောက်ကို တစ်ယောက် ချစ်ကတ်ရဖို့။” 12နင်ရို့စာ ကာဣနပိုင် မဖြစ်စီကတ်ကေ့။ ကာဣနစာ မာရ်နတ်၏ အဖက်သား ဟိလီရေ အရာ သူစာ ကိုယ့်ညီကို သတ်ဘိုက်လီရေ။ သူစာ ဇာဖို့ ကိုယ့်ညီကို သတ်ဘိုက်လီရေလည်း? အကြောင်းကား သူစာ ဆိုးယုတ်စာ အလုပ်ကို လုပ်နီလီရေ အရာ သူ့မာ ညီစာ ကောင်းမြတ်စာ အလုပ်ကို လုပ်နီလီရေ။

13ညီအစ်ကိုမောင်နမှရို့၊ နင်ရို့ကို လောကသားရို့ မုန်းကတ်တေဆိုကေ နင်ရို့ မအံ့ဩကတ်ကေ့။ 14ငါရို့စာ ကိုယ်ရို့မာ ကျုံသူညီအစ်ကိုမောင်နမှရို့ကို ချစ်တေအတွက်န ငါရို့ အသီ မဟုတ်ပျာ၊ ယင်းထက်ပင် ငါရို့ အရှင် ဖြစ်တေဆိုစာကို ငါရို့ သိရကတ်တေ။ ယေကေလည်း ကိုယ့်ကျုံသူညီအစ်ကိုမောင်နမှရို့ကို မချစ်သူရို့စာ ဒေဂုလည်း သီရို့ ဟိကတ်သိရေ။ 15အသူမဆို ကိုယ့်မာ ကျုံသူညီအစ်ကိုကို မုန်းရေဆိုကေ သူစာ လူသတ်သမား တစ်ယောက် ဖြစ်တေ။ အရာ လူသတ်သမား တစ်ယောက်မာ ထာဝရအသက် မဟိဆိုစာကို နင်ရို့ သိကတ်တေ။

16ခရစ်တော်စာ ငါရို့အတွက် ကိုယ့်အသက်ကို စွန့်လီရေ။ ယင်းအတွက်န ငါရို့စာ အစစ် ချစ်ခြင်းမေတ္တာ အဓိပ္ပါယ် ဇာလည်းဆိုစာကို သိရကတ်ပျာ။ ယင်းပိုင်ဆိုကေ ငါရို့လည်း ကိုယ်ရို့မာ ညီအစ်ကိုမောင်နမှရို့အတွက် ကိုယ်ရို့အသက်ကို စွန့်ဖို့ သင့်ကတ်တေ။ 17ဒေ လောကမာ သူဌေးတစ်ယောက်စာ ကိုယ့်ညီအစ်ကိုမာ မလုံမလောက်စာကို မြင်ရို့အတိုင်းလည်း မကူညီဘိုင်းန နီရေဆိုကေ သူ့မာ ထာဝရဘုရားကို ချစ်ခြင်းမေတ္တာ ဇာပိုင်ပျင်ရို့ ဟိနိုင်ဖို့လည်း?

18အချစ်သားရို့၊ ငါရို့မာ ချစ်ခြင်းမေတ္တာကို သက်သက် ပစန ဖေါ်ပြရို့ မရ။ လာကတ်၊ ငါရို့မာ အစစ် ချစ်ခြင်းမေတ္တာကို ငါရို့ အလုပ်ကနီရို့ ဖေါ်ပြကတ်မည်။

19– 20ချစ်ခြင်းမေတ္တာ၏ အလုပ်ကနီရို့ ငါရို့ ကိုယ်တိုင် မှန်ကန်ခြင်း၏ သားသမီး ဖြစ်တေဆိုစာကို ငါရို့ သိရကတ်ဖို့။ ငါရို့ တစ်ခါတစ်ရီ ကိုယ်ရို့ကို အပြစ်သေ ဟို့ မှတ်ကတ်ကေလည်း ထာဝရဘုရားစာ ငါရို့မာ စဉ်းစားချက်ထက် ကြီးမြတ်တေ အရာ သူစာ ဟိသမျ အားကုံးကို သိရေ။ 21အချစ်သားရို့၊ ငါရို့ စိတ်နှလုံးစာ ငါရို့ကို အပြစ်မတင်ဆိုကေ ငါရို့စာ ထာဝရဘုရား၏ ရှိမာ ကြောက်လန့်ခြင်း မဟိဘိုင်းန ရပ်နိုင်ကတ်ဖို့။ 22ယင်းအတွက်န ထာဝရဘုရားက ငါရို့ တောင်းစာ အားကုံးကို ရကတ်ဖို့၊ အကြောင်းကား ထာဝရဘုရား၏ ပညှတ်ချက် အားကုံးကို ငါရို့ လိုက်နာနီကတ်တေ အရာ သူနှစ်သက်စာ အလုပ် အားကုံးကို ငါရို့ လုပ်နီကတ်တေ။ 23ထာဝရဘုရား ငါရို့ကို ပီးလီစာ ပညှတ်ချက် ဖြစ်တေကား၊ ငါရို့စာ သူ၏ သားတော် ယေရှုခရစ်တော်ကို ကျုံကတ်ရဖို့ အရာ ငါရို့ တစ်ယောက်ကို တစ်ယောက် ချစ်ကတ်ရဖို့။ 24အသူမဆို ထာဝရဘုရား၏ ပညှတ်ချက်တိကို လိုက်နာရေဆိုကေ သူစာ ထာဝရဘုရားန တစ်ကိုယ်တည်း ဖြစ်ရို့ နီရေ အရာ ထာဝရဘုရားလည်း သူန တစ်ကိုယ်တည်း ဖြစ်ရို့ ကျိန်းဝပ်နီရေ။ ထာဝရဘုရားစာ ငါရို့ကို သန့်ရှင်းသောဝိညာဉ်တော် ပီးလီရေ။ ငါရို့ စိတ်နှလုံးမာ ထာဝရဘုရား ကျိန်းဝပ်နီရေဆိုစာကို ထိုသန့်ရှင်းသောဝိညာဉ်တော် ငါရို့ဘားမာ ဖေါ်ပြလီရေ။