1 John 4
ဝိညာဉ် နှစ်မျိုးကို ခွဲခြားရို့ သိဖို့စာအကြောင်း
1အချစ်သားရို့၊ ဒေ လောကမာ အယောင်ဆောင် ဘုရားသတင်းပို့သူ အများကြီး ရောက်နီကတ်ပျာ။ ယင်းအတွက်န ဝိညာဉ်ဆိုတိုင်းကို နင်ရို့ မကျုံကတ်ကေ့။ ယေကေလည်း သူရို့ အားကုံးသူ ထာဝရဘုရားက လာစာ ဝိညာဉ် ဟုတ်လော မဟုတ်လောဆိုစာကို နင်ရို့ စစ်ဆေးရို့ ကြည့်ကတ်။ 2ထာဝရဘုရား၏ ဝိညာဉ်တော်ကို နင်ရို့ ဒေပိုင် သိရကတ်လိမည်၊ “ယေရှုခရစ်တော်စာ လူ့ဇာတိကို ခံယူရို့ ကြွလာလီရေ” ဟို့ ဝန်ခံစာ လူအထဲမာ ထာဝရဘုရား၏ ဝိညာဉ်တော် ဟိရေ။ 3ယေကေလည်း “ယေရှုခရစ်တော်စာ လူ့ဇာတိကို ခံယူရို့ ကြွမလာလီ” ဟို့ ပြောစာ လူအထဲမာ ထာဝရဘုရား၏ ဝိညာဉ်တော် မဟိ။ ထိုလူအထဲမာ ခရစ်တော်၏ ရန်သူ ဝိညာဉ် ဟိရေ။ ထိုဝိညာဉ် လာနီရေဆိုစာကို နင်ရို့ ကြားဖူးကတ်တေ။ ထိုဝိညာဉ်စာ ဒေဂုပင် ဒေ လောကမာ ရောက်ရို့ ဟိဗျာ။ 4ယေကေလည်း အချစ်သားရို့၊ နင်ရို့ကား ထာဝရဘုရား၏ လူရို့ ဖြစ်ကတ်တေ။ အရာ နင်ရို့စာ ထိုအယောင်ဆောင် ဘုရားသတင်းပို့သူရို့ကို အနိုင်ယူကတ်ပျာ၊ အကြောင်းကား နင်ရို့ စိတ်နှလုံးမာ ကျိန်းဝပ်နီစာ ဝိညာဉ်တော်စာ လောကသားရို့အထဲမာဟိစာ ဝိညာဉ်ထက် ပိုရို့ ကြီးမြတ်တေ။ 5ထိုအယောင်ဆောင်ရို့စာ ဒေ လောကသား ဖြစ်ကတ်တေ။ ယင်းအတွက်န သူရို့ ဒေ လောက အကြောင်းကို ပြောနီကတ်တေ အရာ လောကသားရို့စာ သူရို့ စကားကို နားထောင်ကတ်တေ။ 6ယေကေလည်း ငါရို့စာ ထာဝရဘုရား၏ လူရို့ ဖြစ်ကတ်တေ။ ထာဝရဘုရားကို သိသူစာ ငါရို့ စကားကို နားထောင်ရေ။ ယေကေလည်း ထာဝရဘုရား၏ လူမဟုတ်သူစာ ငါရို့စကားကို နားမထောင်။ ယင်းပိုင် မှန်ကန်စာ ဝိညာဉ်န လိမ်လှည့်စာ ဝိညာဉ်ကို ငါရို့ ခွဲခြားရို့ သိရရေ။ထာဝရဘုရားက လာစာ ချစ်ခြင်းမေတ္တာ
7အချစ်သားရို့၊ ငါရို့ တစ်ယောက်ကို တစ်ယောက် ချစ်ကတ်ရဖို့၊ အကြောင်းကား ချစ်ခြင်းမေတ္တာစာ ထာဝရဘုရားက လာရေ။ ယင်းအတွက်န အခြားတစ်ယောက်ကို ချစ်သူစာ ထာဝရဘုရား၏ သားသမီး ဖြစ်တေ အရာ သူစာ ထာဝရဘုရားကို သိရေ။ 8ယေကေလည်း အခြားတစ်ယောက်ကို မချစ်သူစာ ထာဝရဘုရားကို မသိ၊ အကြောင်းကား ထာဝရဘုရား ကိုယ်တိုင် ချစ်ခြင်းမေတ္တာ ဖြစ်တေ။ 9ထာဝရဘုရားစာ ကိုယ့် ချစ်ခြင်းမေတ္တာကို ငါရို့ဘားမာ ဒေပိုင် ဖေါ်ပြလီရေ။ ငါရို့စာ သားတော်ကနီရို့ အသက်ကို ရကတ်ပတ်စီအတွက် ထာဝရဘုရားစာ ကိုယ့်မာ တစ်ပါးတည်း သားတော်ကို ဒေ လောကတို့ ရွှတ်လိုက်လီရေ။ 10ငါရို့ ထာဝရဘုရားကို ချစ်လီစာ မဟုတ်၊ ယေကေလည်း ထာဝရဘုရား ငါရို့ကို ချစ်လီစာ ဖြစ်တေ။ ချစ်ခြင်းစာ ဒေပိုင်၊ ငါရို့ အပြစ်တိကို ယဇ်ပူဇော်ခြင်းကနီရို့ ခွင့်ရွှတ်ဖို့အတွက် ထာဝရဘုရားစာ ကိုယ့်သားတော်ကို လောကတို့ ရွှတ်လိုက်လီရေ။ 11အချစ်သားရို့၊ ထာဝရဘုရားစာ ငါရို့ကို ကောင်းကောင်း ချစ်လီရေ။ ယင်းအတွက်န ငါရို့လည်း တစ်ယောက်ကို တစ်ယောက် ချစ်ဖို့ သင့်ကတ်တေ။ 12တစ်ယောက်လည်း တစ်ခါပင် ထာဝရဘုရားကို မမြင်ဖူးကတ်။ ယေကေလည်း ငါရို့ တစ်ယောက်ကို တစ်ယောက် ချစ်တေဆိုကေ ထာဝရဘုရားစာ ငါရို့န တစ်ကိုယ်တည်း ဖြစ်ရို့ ကျိန်းဝပ်နီရေ အရာ ငါရို့ စိတ်နှလုံးမာ ထာဝရဘုရား၏ ချစ်ခြင်းမေတ္တာ ပြည့်စုံဗျာ။ 13ထာဝရဘုရားစာ ကိုယ့်ဝိညာဉ်တော်ကို ငါရို့ကို ပီးလီရေ။ ယင်းအတွက်န ငါရို့ သိရစာကား၊ ငါရို့စာ ထာဝရဘုရားန တစ်ကိုယ်တည်း ဖြစ်ရို့ နီကတ်တေ အရာ ထာဝရဘုရားလည်း ငါရို့န တစ်ကိုယ်တည်း ဖြစ်ရို့ ကျိန်းဝပ်နီရေ။ 14လောကသားရို့ကို ကယ်တင်ဖို့အတွက် အဖစာ သားတော်ကို ရွှတ်လိုက်လီရေ။ ယင်းသျှင့်ကို ငါရို့ မြင်ဖူးလီကတ်တေ အရာ ဒေဂု ငါရို့ သက်သီ ပီးနီကတ်တေ။ 15အသူမဆို ယေရှုကို ထာဝရဘုရား၏ သားတော် ဖြစ်တေ ဟို့ ဝန်ခံရေဆိုကေ ထာဝရဘုရားစာ သူန တစ်ကိုယ်တည်း ဖြစ်ရို့ ကျိန်းဝပ်နီရေ အရာ သူလည်းသောက် ထာဝရဘုရားန တစ်ကိုယ်တည်း ဖြစ်ရို့ နီရေ။ 16ထာဝရဘုရား ငါရို့ကို ချစ်တေဆိုစာကို ငါရို့ သိရေ အရာ ထိုချစ်ခြင်းမေတ္တာကို ငါရို့ ကျုံရေ။ ထာဝရဘုရား ကိုယ်တိုင် ချစ်ခြင်းမေတ္တာ ဖြစ်တေ။ ယင်းအတွက်န အသူ့မာမဆို ချစ်ခြင်းမေတ္တာ ဟိရေဆိုကေ သူစာ ထာဝရဘုရားန တစ်ကိုယ်တည်း ဖြစ်ရို့ နီရေ အရာ ထာဝရဘုရားစာ သူန တစ်ကိုယ်တည်း ဖြစ်ရို့ ကျိန်းဝပ်နီရေ။ 17ယင်းပိုင် ငါရို့ စိတ်နှလုံးမာ ထိုချစ်ခြင်းမေတ္တာ ပြည့်စုံရေဆိုကေ တရားစစ်ဆေးရေနိမာ ငါရို့ မကြောက်မလန့်ဘိုင်းန ထာဝရဘုရား၏ ရှိက ရပ်နိုင်ကတ်ဖို့၊ အကြောင်းကား ငါရို့စာ ဒေ လောကမာ ခရစ်တော်ပိုင် နီထိုင်ကတ်တေ။ 18ထာဝရဘုရား၏ ချစ်ခြင်းမေတ္တာ ဟိစာနေရာမာ ကြောက်လန့်ခြင်း တစ်ခုလည်း မဟိ။ ယင်းထက်ပင် ထာဝရဘုရား၏ ပြည့်စုံစာ ချစ်ခြင်းမေတ္တာစာ ကြောက်လန့်ခြင်းကို ပယ်ဘိုက်တေ။ အပြစ်ဒါဏ်ကို ခံရဖို့စာ စဉ်းစားချက်စာ လူကို ကြောက်လန့်စီရေ။ ယင်းအတွက်န အသူ့မာမဆို ကြောက်လန့်ခြင်းစိတ် ဟိရေဆိုကေ သူစာ ထာဝရဘုရား၏ ချစ်ခြင်းမေတ္တာကို အပြည့်အစုံ နားမလည်။ 19ထာဝရဘုရား ပထမဆုံး ငါရို့ကို ချစ်လီရေ။ ယင်းအတွက်န ငါရို့စာ ထာဝရဘုရားကို ချစ်ကတ်တေ။ 20အသူမဆို “ငါ ထာဝရဘုရားကို ချစ်တေ” ဟို့ ပြောရို့ပင်လည်း ကိုယ့်မာ ကျုံသူညီအစ်ကိုကို မုန်းရေဆိုကေ သူစာ မုတ်သားစကားကို ပြောသူ ဖြစ်တေ၊ အကြောင်းကား ကိုယ့်မျက်စိန မြင်ရစာ ညီအစ်ကိုကို မချစ်နိုင်သူစာ မမြင်ရစာ ထာဝရဘုရားကို ဇာပိုင်ပျင်ရို့ ချစ်နိုင်ဖို့လည်း? 21အကြောင်းကား ထာဝရဘုရားစာ ငါရို့ကို ဒေပိုင် ပညှတ်ချက် ပီးလီရေ၊ “အသူမဆို ထာဝရဘုရားကို ချစ်တေဆိုကေ သူစာ ကိုယ့်ညီအစ်ကိုကိုလည်း ချစ်ရဖို့။”
Copyright information for
RmzSC