1 John 5
ထာဝရဘုရား၏ သားသမီးရို့ လောကကို အနိုင်ရခြင်း
1ယေရှုကို ခရစ်တော် ဖြစ်တေ ဟို့ ကျုံသူရို့စာ ထာဝရဘုရား၏ သားသမီး ဖြစ်ကတ်တေ။ အရာ အဖကို ချစ်သူရို့စာ ထာဝရဘုရား၏ သားသမီးရို့ကိုလည်း ချစ်တေ။ 2ငါရို့စာ ထာဝရဘုရားကို ချစ်ရို့ သူ၏ ပညှတ်ချက်တိကို လိုက်နာရေဆိုကေ ထာဝရဘုရား၏ သားသမီးရို့ကို ချစ်တေဆိုစာကို ငါရို့ သိရရေ။ 3ထာဝရဘုရား၏ ပညှတ်ချက်ကို လိုက်နာခြင်းစာ ထာဝရဘုရားကို ချစ်ခြင်း ဖြစ်တေ။ ထာဝရဘုရား၏ ပညှတ်ချက် ဒေလှောက် ခက်ခဲစာ မဟုတ်၊ 4အကြောင်းကား ထာဝရဘုရား၏ သားသမီးရို့ အားကုံးသူ လောကမာ ဆိုးယုတ်ခြင်းကို အနိုင်ရကတ်ပျာ။ အရာ ငါရို့မာ ကျုံခြင်းတရားကနီရို့ လောကမာ ဆိုးယုတ်ခြင်းကို အနိုင်ရကတ်စာ ဖြစ်တေ။ 5ယေရှုကို ထာဝရဘုရား၏ သားတော် ဖြစ်တေ ဟို့ ကျုံသူရို့ရာ လောကကို အနိုင်ရသူရို့ ဖြစ်ကတ်တေ။သားတော် အကြောင်းကို သက်သီပီးခြင်း
6ယေရှုခရစ်တော် ကြွလာလီရေခါ ရီနှစ်မင်္ဂလာကို ခံယူလီရေ အရာ သူစာ ကားတိုင်ထက်မာ သွီးကို သွန်ရို့ အသီခံလီရေ။ သူစာ သက်သက် ရီနှစ်မင်္ဂလာ ခံယူလီစာ မဟုတ်၊ သူစာ ရီနှစ်မင်္ဂလာလည်း ခံယူလီရေ အရာ သွီးကိုလည်း သွန်လီရေ။ သန့်ရှင်းသောဝိညာဉ်တော်စာ မှန်ကန်စာ အသျှင် ဖြစ်တေ။ ယင်းအတွက်န သူစာ ထိုအကြောင်းကို သက်သီပီးနီရေ။ 7– 8ယေရှု အကြောင်းကို သက်သီပီးသူသုံးပါး ဟိရေ။ ထိုသုံးပါးစာ သန့်ရှင်းသောဝိညာဉ်တော်၊ ရီ အရာ သွီး ဖြစ်တေ။ သူရို့ သုံးပါးစုံ တစ်ညီတည်း သက်သီ ပီးနီကတ်တေ။ 9ငါရို့စာ လူရို့ပီးစာ သက်သီကို လက်ခံကတ်တေဆိုကေ ထာဝရဘုရားပီးစာ သက်သီကို အရာလည်း ပိုရို့ လက်ခံဖို့ သင့်ကတ်တေ၊ အကြောင်းကား ထာဝရဘုရားပီးစာ သက်သီစာ လူရို့ပီးစာ သက်သီထက် ကြီးမြတ်တေ။ အရာ ထာဝရဘုရားစာ ကိုယ့်သားတော် အကြောင်းကို သက်သီ ပီးလီရေ။ 10အသူမဆို ထာဝရဘုရား၏ သားတော်ကို ကျုံရေဆိုကေ သူစာ ထာဝရဘုရား၏ သက်သီ မှန်ရေဆိုစာကို ကိုယ့်စိတ်ထဲကပင် သိရေ။ ယေကေလည်း ထာဝရဘုရားကို မကျုံသူရို့စာ ထာဝရဘုရားကို မုတ်သားစကား ပြောရေ ဆိုပြီးကေ အပြစ်တင်ကတ်တေ၊ အကြောင်းကား ထာဝရဘုရား ကိုယ့်သားတော် အကြောင်းကို ပီးစာသက်သီကို သူရို့ မကျုံကတ်။ 11ထိုသက်သီ ဖြစ်တေကား ဒေပိုင်၊ ထာဝရဘုရားစာ ငါရို့ကို ထာဝရအသက် ပီးလီရေ အရာ ထိုထာဝရအသက်စာ ထာဝရဘုရား၏ သားတော်ဘားမာ ဟိရေ။ 12ယင်းအတွက်န ထာဝရဘုရား၏ သားတော်ကို ရသူစာ ထာဝရအသက်ကိုလည်း ရဗျာ။ ယေကေလည်း ထာဝရဘုရား၏ သားတော်ကို မရသူစာ ထာဝရအသက်ကိုလည်း မရသိ။ထာဝရအသက်ကို ရခြင်း
13နင်ရို့စာ ထာဝရဘုရား၏ သားတော်ကို ကျုံကတ်တေ။ နင်ရို့ ထာဝရအသက်ကို ရကတ်ပျာဆိုစာကို သိကတ်ပတ်စီအတွက် ငါ ဒေ စာစောင်ကို နင်ရို့တို့ ရွီးလိုက်စာ ဖြစ်တေ။ 14ငါရို့ စိတ်ချရို့ ရစာကား၊ ငါရို့စာ ဇာမဆိုတစ်ခု ထာဝရဘုရား၏ အလိုတော်အတိုင်း တောင်းရေဆိုကေ ထာဝရဘုရားစာ ငါရို့ ဆုတောင်းစာကို နားထောင်ရေ။ 15ငါရို့ ဆုတောင်းစာ အားကုံးကို ထာဝရဘုရား နားထောင်ရေဆိုစာကို ငါရို့ သိရေ။ ယင်းပိုင်ဆိုကေ ထာဝရဘုရားဘားမာ တောင်းစာ အားကုံးကို ငါရို့ ရကတ်ပျာဆိုစာကိုလည်း ငါရို့ သိနိုင်ကတ်ဖို့။အပြစ် နှစ်မျိုး
16အသူမဆို ကျုံသူညီအစ်ကို တစ်ယောက်ကို ဝိညာဉ်၏ အသက် မသီနိုင်စာ အပြစ်ကို လုပ်နီစာကို မြင်ရေဆိုကေ သူစာ ထိုအပြစ်လုပ်သူအတွက် ထာဝရဘုရားဘားမာ ဆုတောင်းရို့ ပီးရဖို့။ ယင်းပိုင်ဆိုကေ ထာဝရဘုရားစာ သူ့အပြစ်ကို ခွင့်ရွှတ်လိမည်။ ဝိညာဉ်၏ အသက် မသီနိုင်စာ အပြစ်ကို လုပ်သူရို့ အကြောင်းကို ငါ ပြောစာ ဖြစ်တေ။ ဝိညာဉ်၏ အသက် သီနိုင်စာ အပြစ်တိလည်း ဟိရေ၊ ယေကေလည်း ထိုအပြစ်ကို လုပ်နီသူရို့အတွက် ဆုတောင်းရို့ ပီးရဖို့ ဟို့ ငါ ပြောစာ မဟုတ်။ 17ဟိသမျ မတရား လုပ်ခြင်းစာ အပြစ် ဖြစ်တေ။ ယေကေလည်း ဟိသမျ အပြစ်တိစာ ဝိညာဉ်၏ အသက် မသီနိုင်။ 18ငါရို့ သိရေ၊ ထာဝရဘုရား၏ သားသမီး တစ်ယောက်စာ အပြစ်လုပ်ရို့ မနီနိုင်၊ အကြောင်းကား ထာဝရဘုရား၏ သားတော်စာ သူ့ကို ကာကွယ်ရို့ ထားရေ အရာ မာရ်နတ်စာ သူ့ကို ဘေးအန္တရာယ် မပီးနိုင်။ 19ငါရို့ အရာလည်း သိစာကား၊ မာရ်နတ်စာ တစ်လောကလုံးကို အုပ်ချုပ်ထားရေ၊ ယေကေလည်း ငါရို့စာ ထာဝရဘုရား၏ သားသမီး ဖြစ်ကတ်တေ။ 20မှန်ကန်စာ ထာဝရဘုရားကို ငါရို့ သိနိုင်ကတ်ပတ်စီအတွက် ထာဝရဘုရား၏ သားတော်စာ ကြွလာရို့ ငါရို့ကို ညာဏ်ပညာ ပီးလီရေ။ ငါရို့ ဒေဂု မှန်ကန်စာ ထာဝရဘုရားန တစ်ကိုယ်တည်း ဖြစ်ရို့ နီကတ်တေ၊ အကြောင်းကား သူ၏ သားတော် ယေရှုခရစ်တော်န တစ်ကိုယ်တည်း ဖြစ်ရို့ နီကတ်တေ။ ထိုသားတော် ယေရှုခရစ်တော်စာ မှန်ကန်စာ ထာဝရဘုရား ဖြစ်တေ အရာ သူစာ ထာဝရအသက်လည်း ဖြစ်တေ။ 21အချစ်သားရို့၊ နင်ရို့ မဟုတ်မမှန်စာ နတ်မိစ္ဆာတိကို ရှောင်ကတ်။
Copyright information for
RmzSC