1 Peter 2
ဟိသမျ ဆိုးယုတ်ခြင်းကို စွန့်ပယ်ဖို့စာ အကြောင်း
1ယင်းအတွက်န နင်ရို့ အခြားတစ်ယောက် ပျက်စီးဆုံးရှုံးလတ်အောင် ဟိသမျ မကောင်းစာ အလုပ်တိကို မလုပ်ကတ်ကေ့။ နင်ရို့ စိတ်နှလုံးထဲက ဟိသမျ မုတ်သားစကား ပြောခြင်း၊ ဟိသမျ လိမ်လှည့်ခြင်း၊ အယောင်ဆောင်ခြင်း၊ မနာလိုခြင်း အရာ ဟိသမျ ပုတ်ခတ်ရို့ စကား ပြောခြင်းကို စွန့်ဘိုက်လိုက်ကတ်။ 2ယင်းထက်ပင် နင်ရို့ ဒေဂု အသစ် မွီးဖွားစာ အသျှေပိုင် ဖြစ်ကတ် အရာ နင်ရို့ နှလုံးမာဟိစာ ဝိညာဉ်အတွက် နို့ရည်အစင်ကို ▼▼နို့ရည်အစင်ဆိုစာ အဓိပ္ပါယ်ကို တစ်ချိုးလူရို့စာ ထာဝရဘုရား၏ စကားတော်ကို ပြောစာ ဟို့ မှတ်ကတ်ပါရေ။
တောင်းတကတ်။ ယင်းပိုင်ဆိုကေ နင်ရို့မာ ဝိညာဉ်၏ အသက်စာ ကြီးပွါးလိမည် အရာ ကယ်တင်ခြင်းကို ရကတ်လိမည်။ နင်ရို့ ထိုနို့ရည်အတွက် ငိုကတ်၊ 3အကြောင်းကား နင်ရို့ကား ထာဝရဘုရား၏ ကျေးဇူးတော် အရသာကို ရကတ်ပျာ။ ခရစ်တော်စာ အသက်သျှင် ကျောက်လုံး
4– 5ထာဝရဘုရား ရွီးကောက်ယူလီစာ အသက်သျှင် ကျောက်လုံး တစ်လုံး ဟိရေ။ ယင်း ကျောက်လုံးစာ ထာဝရဘုရားဘားမာ ကောင်းကောင်း တန်ဖိုးဟိစာ ကျောက်လုံး ဖြစ်တေ၊ ယေကေလည်း လောကသားရို့စာ ထိုကျောက်လုံးကို ပယ်ဘိုက်လီကတ်တေ။ ထိုကျောက်လုံးစာ ခရစ်တော် ဖြစ်တေ။ နင်ရို့စာ ခရစ်တော်တို့ လာကတ်တေအတွက်န ထာဝရဘုရားစာ နင်ရို့ကိုလည်း အသက်သျှင် ကျောက်လုံးကိုပိုင် အသုံးပြုရို့ ကိုယ်ကျိန်းဝပ်ဖို့စာ ဝိညာဉ်၏ ကျောင်းတော်ကို ဆောက်လုပ်နီရေ။ ထိုကျောင်းတော်အထဲမာ ဝိညာဉ်၏ ယဇ်တိကို ပူဇော်ဖို့အတွက် နင်ရို့ကို ယဇ်ပုရောဟိတ်အဖြစ် သန့်ရှင်းအောင် လုပ်ထားဗျာ။ နင်ရို့စာ ယေရှုခရစ်တော် အကြောင်းန ထိုဝိညာဉ်၏ ယဇ်တိကို ပူဇော်ဖို့ ရကတ်တေ၊ အကြောင်းကား ယေရှုခရစ်တော် အကြောင်းနရာ ထာဝရဘုရား ထိုယဇ်ပူဇော်ခြင်းတိကို နှစ်သက်ရို့ လက်ခံရေ။ 6ထိုအကြောင်းကို ကျမ်းစာမာ ရွီးရို့ ဟိရေ၊ “ကြည့်ကတ်၊ တန်ဖိုးဟိစာ ကျောက်လုံး တစ်လုံးကို ငါ ရွီးကောက်ယူဗျာ။ ထိုကျောက်လုံးကို ဇိအုန်တောင်ထက်မာ ဒေါင့်ကတည်စာ ကျောက်လုံးအဖြစ် တည်ရို့ထားဗျာ။ သူ့ကို ကျုံသူစာ တစ်ခါလည်း စိတ်ပျက်လိမည် မဟုတ်။” 7ယင်းအတွက်န နင်ရို့ သူ့ကို ကျုံကတ်တေအတွက်န ထိုကျောက်လုံးစာ နင်ရို့ဘားမာ ကောင်းကောင်း တန်ဖိုး ဟိရေ၊ ယေကေလည်း မကျုံသူရို့အတွက် ကျမ်းစာမာ ရွီးထားစာ စကားန ကိုက်ညီရေ။ ကျမ်းစာမာ ရွီးရို့ ဟိရေ၊“လက်သမားရို့ ပယ်ဘိုက်လိုက်စာ ကျောက်လုံးစာ
ဒေါင့်ကတည်စာ အခြေခံကျောက်လုံး ဖြစ်လာရေ။” 8အရာတစ်ပြန် ကျမ်းစာမာ ဒေပိုင် ရွီးရို့ ဟိရေ၊
“ဒေ ကျောက်လုံးမာ လူရို့ ခလုံးတိုက်ကတ်လိမည်၊
အရာ ဒေ ကျောက်လုံး အကြောင်းန လူရို့ လဲကျကတ်လိမည်။”လူရို့စာ ထာဝရဘုရား၏ စကားတော်ကို မလိုက်နာရေအတွက်န ခလုံးတိုက်ကတ်တေ။ အရာ ဒေသျှင့်စာ အယင်ကပင် ထိုလူရို့အတွက် ထာဝရဘုရား၏ ရွယ်မှတ်ချက် ဖြစ်တေ။
ကျုံသူရို့ ကမ္ဘာမာ အခြားပြည်သားန အာဂန္တု ဖြစ်ခြင်း
9ယေကေလည်း နင်ရို့ကား ထိုလူရို့ပိုင် မဟုတ်။ ယင်းထက်ပင် နင်ရို့စာ ထာဝရဘုရား၏ ရွီးကောက်ခြင်းကို ခံရစာ လူမျိုး ဖြစ်ကတ်ပျာ၊ ထာဝရဘုရား၏ နိုင်ငံတော် ယဇ်ပုရောဟိတ် ဖြစ်ကတ်ပျာ၊ သန့်ရှင်းစာ လူမျိုး ဖြစ်ကတ်ပျာ အရာ ထာဝရဘုရားမာ ကိုယ့်အတွက် သန့်ရှင်းအောင် လုပ်ထားစာ လူရို့ ဖြစ်ကတ်ပျာ။ ထာဝရဘုရားစာ နင်ရို့ကို အမိုက်မှောင်ထဲကနီရို့ သူ၏ လှပစာအလင်းတို့ ထုတ်ယူခဗျာ။ ယင်းအတွက်န နင်ရို့စာ ထာဝရဘုရား၏ မင်္ဂလာသတင်းကို အခြားလူရို့ဘားမာ ဟောပြောကတ်။10တစ်ချိန်ခါ နင်ရို့စာ ထာဝရဘုရား၏ လူမဟုတ်ဘိုင်းန ဟိကတ်လီရေ၊
ယေကေလည်း ဒေဂု ထာဝရဘုရား၏ လူဖြစ်ကတ်ပျာ။
တစ်ချိန်ခါ နင်ရို့ ထာဝရဘုရား၏ ကရုဏာတော်ကို မခံရဘိုင်းန ဟိကတ်လီရေ၊
ယေကေလည်း နင်ရို့ ဒေဂု ထာဝရဘုရား၏ ကရုဏာတော်ကို ခံရကတ်ပျာ။ 11ချစ်ခင်စာ မိတ်ဆွေရို့၊ နင်ရို့ ဒေ ကမ္ဘာမာ အခြားပြည်သားန အာဂန္တု ဖြစ်ကတ်တေ။ ယင်းအတွက်န ငါ နင်ရို့ကို အရေးတကြီး မေတ္တာရပ်ခံရေ၊ နင်ရို့စာ လောက၏ အလိုဆန္ဒက ကိုယ်ရို့ကို အဝီးရှောင်ရို့ ထားကတ်။ 12အကြောင်းကား ယင်းသျှင့်တိစာ နင်ရို့ ဝိညာဉ်ကို ဆန့်ကျင်ရို့ အတိုက်အဆိုင် လုပ်တေ။ ထာဝရဘုရားကို မကျုံသူရို့အထဲမာ နင်ရို့ ရိုးရိုးသားသား နီထိုင်ကတ်။ ယင်းပိုင်ဆိုကေ နင်ရို့ မတရား လုပ်ကတ်တေ ဟို့ နင်ရို့ကို ပုတ်ခတ်ရို့ ပြောကတ်သူရို့စာ နင်ရို့မာ ကောင်းမြတ်စာ အလုပ်တိကို မြင်ရကတ်လိမည်။ အရာ တရားစစ်ဆေးရေနိခါ နင်ရို့မာ ကောင်းမြတ်စာ အလုပ်တိအတွက်န သူရို့စာ ထာဝရဘုရားကို ချီမွမ်းကတ်လိမည်။
အာဏာပိုင်သူရို့ အုပ်ချုပ်ခြင်းကို ခံယူကတ်
13အသျှင်၏ အလိုတော်အတိုင်း နင်ရို့ ဒေ လောကမာ အာဏာပိုင်သူရို့ အုပ်ချုပ်ခြင်းကို ခံယူကတ်။ အရေးကြီးဆုံး ဖြစ်တေကား၊ ဧကရာဇ်မင်း အုပ်ချုပ်ခြင်းကို နင်ရို့ ခံယူကတ်၊ အကြောင်းကား သူစာ မင်းပေါင်းတကာထက် အကြီးဆုံး မင်း ဖြစ်တေ။ 14လူဆိုးရို့ကို ဒါဏ်ပီးဖို့အတွက် အရာ လူကောင်းရို့ကို ချီမွမ်းဖို့အတွက် ဧကရာဇ်မင်းစာ အုပ်ချုပ်သူရို့ကို ခန့်ထားရေ။ နင်ရို့စာ သူရို့ အုပ်ချုပ်ခြင်းကိုလည်း ခံယူကတ်။ 15အရာ နင်ရို့ ကောင်းမြတ်စာ အလုပ်တိကို လုပ်ရို့ ပညာတုံးရို့မာ ပစကို ပိတ်ထားကတ်။ ထိုအလုပ်ကို ထာဝရဘုရား နှစ်သက်တေ။ 16နင်ရို့စာ လွတ်လပ်ခြင်း ရသူအဖြစ် နီထိုင်ကတ်၊ ယေကေလည်း ထိုလွတ်လပ်ခြင်းကို မတရားအလုပ်မာ အသုံးမပြုကတ်ကေ့။ ယင်းထက်ပင် နင်ရို့ ထာဝရဘုရား၏ ကျွန်အဖြစ် နီထိုင်ကတ်။ 17နင်ရို့ ဟိသမျ လူရို့ကို ရိုသေကတ်၊ ကျုံသူညီအစ်ကိုမောင်နမှရို့ကို ချစ်ကတ်၊ ထာဝရဘုရားကို ကြောက်ကတ် အရာ ဧကရာဇ်မင်းကို ရိုသေကတ်။ကျုံသူရို့အတွက် ခရစ်တော်၏ ပုံဥပမာ
18နင်ရို့အထဲမာ ကျွန်ရို့၊ နင်ရို့ ကိုယ်ရို့မာ အပိုင်သျှင်ရို့ကို ရိုသေကတ်ရဖို့ အရာ သူရို့ စကားကို လိုက်နာကတ်။ ယေကေလည်း သူရို့စာ သက်သက် သနားကြင်နာတတ်စာ အပိုင်သျှင်ရို့န စိတ်ကောင်းစာ အပိုင်သျှင်ရို့ စကားကို လိုက်နာဖို့စာ မဟုတ်သိ၊ ကြမ်းတမ်းခြင်းန ဆက်ဆံစာ အပိုင်သျှင်ရို့ စကားကိုလည်း လိုက်နာကတ်၊ 19အကြောင်းကား အသူမဆို မတရားသဖြင့် ဒုက္ခ-ဝေဒနာကို ခံရရေခါ ထာဝရဘုရားကို အာရုံပြုရို့ သည်းခံရေဆိုကေ ထာဝရဘုရား သူ့ကို နှစ်သက်တေ။ 20ယေကေလည်း နင်ရို့ မတရားစာ အလုပ်ကို လုပ်ရို့ အပြစ်ဒါဏ်ကို ခံရရေခါ သည်းခံနီရေဆိုကေ နင်ရို့အတွက် ချီမွမ်းစရာ တစ်ခုလည်း မဟိ။ ယေကေလည်း နင်ရို့စာ ကောင်းမြတ်စာ အလုပ်ကို လုပ်ရို့ ဒုက္ခ-ဝေဒနာကို ခံရရေခါ သည်းခံနီရေဆိုကေ ထာဝရဘုရား နှစ်သက်တေ။ 21ဒုက္ခ-ဝေဒနာကို ခံဖို့အတွက်နရာ ထာဝရဘုရား နင်ရို့ကို ခေါ်လီရေ၊ အကြောင်းကား နင်ရို့အတွက် ခရစ်တော် ပုံဥပမာတစ်ခု ထားဘိုက်ခရေ။ ထိုပုံဥပမာ ဖြစ်တေကား၊ သူစာ နင်ရို့အတွက် ဒုက္ခ-ဝေဒနာကို ခံယူလီရေ။ နင်ရို့ ဒေဂု သူ၏ ပုံဥပမာကို အမှီပြုကတ်။22သူစာ အပြစ် တစ်ခုလည်း မလုပ်ခလီ၊
အရာ မုတ်သားစကား တစ်ခွန်းလည်း မပြောခလီ။ 23လူရို့ သူ့ကို ပုတ်ခတ်ရို့ စကား ပြောလီကတ်တေခါ သူစာ ပြန်ရို့ သူရို့ကို ပုတ်ခတ်ရို့ စကား မပြောလီ။ အရာ သူစာ ဒုက္ခ-ဝေဒနာကို ခံရလီရေခါလည်း လက်စားဆပ်ဖို့ ဆိုပြီးကေ သူရို့ကို မခြောက်လီ။ ယေကေလည်း သူစာ ထာဝရဘုရားကို အားကိုးရို့ ကိုယ့်ကို သူ့ဘားမာ တင်အပ်လီရေ၊ အကြောင်းကား ထာဝရဘုရားစာ တရားသဖြင့် စစ်ဆေးရေ။ 24ခရစ်တော် ကိုယ်တိုင် ငါရို့မာ ဟိသမျ အပြစ်ကို ရွက်ရို့ ကားတိုင်မာ အသီခံလီရေ၊ အကြောင်းကား သူစာ ငါရို့ကို ကိုယ်ရို့အပြစ် အကြောင်းန သီရို့ ထာဝရဘုရား၏ အလိုတော်အတိုင်း နီထိုင်စီချင်လီရေ။ သူ၏ ခန္ဓာမာ အနာစာ ဒေဂု နင်ရို့ကို ကျန်းမာအောင် လုပ်ပျာ။ 25နင်ရို့စာ မှားယွင်းစာ လမ်းမာ လားစာ သိုးဆိတ်တိနတူကတ်တေ။ ယေကေလည်း ဒေဂု နင်ရို့ကို ကြည့်ရှုစောင့်သျှောက်စာ သိုးဆိတ်ကျောင်းသားတို့ နင်ရို့ ပြန်ရောက်ကတ်ပျာ။
Copyright information for
RmzSC