1 Peter 3
လင်န မယားကို ဩဝါဒ ပီးခြင်း
1ယင်းပိုင်တထန် မယားရို့၊ နင်ရို့ ကိုယ်ရို့မာ လင်ရို့ အုပ်ချုပ်ခြင်းကို ခံယူကတ်။ ယင်းပိုင်ဆိုကေ သူရို့စာ ပထမခါ ထာဝရဘုရား၏ စကားတော်ကို မကျုံကတ်ကေလည်း နင်ရို့စာ ကိုယ်ရို့မာ ကောင်းမြတ်စာ အကျင့်သီလန သူရို့ကို ကျုံခြင်းလမ်းတို့ ဆွေယူလာဖို့ နိုင်ကတ်လိမည်။ အရာ နင်ရို့ စကား တစ်ခွန်းလည်း ပြောဖို့ ကျကတ်လိမည် မဟုတ်၊ 2အကြောင်းကား နင်ရို့မာ သန့်ရှင်းစာ အကျင့်သီလန ထာဝရဘုရားကို ရိုသေကြောက်လန့်ခြင်းကို သူရို့ ကိုယ်တိုင် မြင်ရကတ်လိမည်။ 3နင်ရို့စာ ပြင်ဖက်က လှပခြင်း အကြောင်းကို မစဉ်းစားကတ်ကေ့။ ယင်းအဓိပ္ပါယ်ကား နင်ရို့မာ ဆံပင်ကို အမျိုးမျိုးပိုင် ထုန်းရို့၊ ရွှေတန်းဆာ ဝတ်ရို့ အရာ လှပစာ အဝတ်အစားတိကို ဝတ်ရို့ ကိုယ်ရို့ကို မဆင်ကတ်ကေ့။ 4ယေကေလည်း နုညံ့ခြင်းန ယဉ်ကျေးစာ အကျင့်ကို ထည့်ရို့ နင်ရို့ စိတ်နှလုံးကို လှပအောင် ဆင်ကတ်။ ထိုလှပခြင်းစာ တစ်ခါလည်း ပျက်စီးလိမည် မဟုတ် အရာ ယင်းသျှင့်စာ ထာဝရဘုရားဘားမာ ကောင်းကောင်း တန်ဖိုး ဟိရေ။ 5အယင်ကခါ ထာဝရဘုရားကို ရိုသေကြောက်လန့်စာ မိန်းမရို့စာ ထာဝရဘုရားကို မျှော်လင်းရို့ နီလီကတ်တေ အရာ သူရို့စာ ကိုယ်ရို့မာ လင်ရို့ အုပ်ချုပ်ခြင်းကို ခံယူခြင်းကနီရို့ ကိုယ်ရို့ကို လှပအောင် ဆင်လီကတ်တေ။ 6ပုံဥပမာအဖြစ် စာရာနာမည်န မိန်းမတစ်ယောက် အကြောင်းကို ပြောပြနိုင်ရေ။ စာရာစာ ကိုယ့်မာ လင် အာဗြဟံ၏ စကားကို ကိုင်ရို့ နီလီရေ အရာ သူစာ အာဗြဟံကို “အသျှင်” ဟို့ ခေါ်လီရေ။ ယင်းပိုင် နင်ရို့လည်းသောက် တစ်ခုမာလည်း မကြောက်မလန့်ဘိုင်းန ဟိသမျ ကောင်းမြတ်စာ အလုပ်တိကို လုပ်တေဆိုကေ နင်ရို့စာ အမှန် စာရာ၏ သမီး ဖြစ်ကတ်တေ။ 7ယင်းပိုင်တထန် လင်ရို့၊ နင်ရို့မာ မယားရို့စာ နင်ရို့ထက် အားနည်းကတ်တေဆိုစာကို စဉ်းစားဆင်ခြင်ရို့ သူရို့န အလှပ ဆက်ဆံကတ်။ အရာ နင်ရို့ သူရို့ကို ရိုသေကတ်၊ အကြောင်းကား သူရို့လည်း နင်ရို့နအတူ ထာဝရအသက်ကို ရကတ်လိမည်။ ထိုထာဝရအသက်စာ ထာဝရဘုရားပီးစာ ဆုကျေးဇူး ဖြစ်တေ။ နင်ရို့ ယင်းပိုင် လုပ်တေဆိုကေ နင်ရို့မာ ဆုတောင်းခြင်းစာ အတားအဆီး ဟိလိမည် မဟုတ်။ကောင်းမြတ်စာ အလုပ်အတွက် ဒုက္ခကို ခံရခြင်း
8အဆုံးခေါက် ပြောမည်၊ နင်ရို့ အားကုံးသူ တစ်စိတ်တည်း ဖြစ်ကတ်။ တစ်ယောက် ဒုက္ခ ကျရေခါ အရာ တစ်ယောက် ကူညီကတ်၊ တစ်ယောက်ကို တစ်ယောက် ညီအစ်ကိုပိုင် ချစ်ကတ် အရာ သနားကြင်နာမှုစိတ်န နုညံ့ခြင်းစိတ်ကို ထားကတ်။ 9အသူမဆို နင်ရို့ကို မတရားလုပ်တေဆိုကေ နင်ရို့ သူ့ကို ပြန်ရို့ မတရား မလုပ်လီကတ်ကေ့ အရာ အသူမဆို နင်ရို့ကို ဆေးရေဆိုကေ နင်ရို့လည်း သူ့ကို ပြန်ရို့ မဆေးလီကတ်ကေ့။ ယင်းထက်ပင် သူရို့ကို ကျေးဇူးပြုလီကတ် အရာ ပဿိ ပီးလီကတ်၊ အကြောင်းကား နင်ရို့ ပဿိကို ခံရဖို့အတွက် ထာဝရဘုရား နင်ရို့ကို ခေါ်လီရေ။ 10ကျမ်းစာမာ ရွီးရို့ ဟိရေ၊“ငငြိမ်းချချမ်း နီထိုင်ချင်သူစာ ကိုယ့်လျှာကို
ဆိုးယုတ်စာ စကား မပြောစီကေ့။
အရာ ရက်ကောင်း ရက်မြတ်ကို မြင်ချင်သူစာ
ကိုယ့်နခွန်းက မုတ်သားစကား မထွက်စီကေ့။
11သူစာ ဆိုးယုတ်စာ အလုပ်ကို စွန့်ရို့ ကောင်းမြတ်စာ အလုပ်ကိုလုပ်၊
အရာ ငြိမ်းချမ်းခြင်းကို ရဖို့အတွက် ကြိုးစားအားထုတ်။
12အကြောင်းကား အသျှင်စာ သူတော်ကောင်းရို့ကို မျက်စိ ချထားရေ၊
အရာ သူရို့ ဆုတောင်းချက်ကိုလည်း အမြဲတိုင်း နားထောင်ရေ။
ယေကေလည်း လူရို့ ဆိုးယုတ်စာ အလုပ်ကို လုပ်တေဆိုကေ
အသျှင်စာ သူရို့က မျက်နှာ လှည့်ရို့ ထားရေ။” 13နင်ရို့ အမြဲတိုင်း ကောင်းမြတ်စာ အလုပ်ကို လုပ်ရို့ နီချင်ရေဆိုကေ နင်ရို့ကို တစ်ယောက်လည်း ဘေးအန္တရာယ် ပီးလိမည် မဟုတ်။ 14နင်ရို့ ကောင်းမြတ်စာ အလုပ်အတွက်န ဒုက္ခ-ဝေဒနာကို ခံရကေလည်း ထာဝရဘုရားစာ နင်ရို့ကို ပဿိ ပီးလိမည်။ ယင်းအတွက်န နင်ရို့ကို ဒုက္ခ-ဝေဒနာ ပီးသူရို့ကို နင်ရို့ မကြောက်ကတ်ကေ့ အရာ ဒုက္ခ-ဝေဒနာကို ခံရရေခါ နင်ရို့ စိတ်မပူကတ်ကေ့။ 15ယေကေလည်း ခရစ်တော်ကို အသျှင်အဖြစ် နင်ရို့ စိတ်နှလုံးမာ နေရာ ပီးကတ်။ အသူမဆို နင်ရို့ ကျုံသူအနေန ဇာကို မျှော်လင်းနီကတ်တေလည်းဆိုစာ အကြောင်းကို မီးရေဆိုကေ သူ့ကို အဖြေပီးဖို့အတွက် အမြဲတိုင်း အဆင်သင့်နီကတ်။ 16ယေကေလည်း နင်ရို့စာ နုညံ့ခြင်းန ရိုသေခြင်းကို ထားရို့ အဖြေပီးကတ်၊ အရာ နင်ရို့မာ အသိညာဏ်ကို သသန့်ရှရှင်း ထားကတ်။ ယင်းပိုင်ဆိုကေ နင်ရို့ကို ပုတ်ခတ်ရို့ စကားပြောသူရို့စာ နင်ရို့ ကျုံသူအနေန လုပ်ကတ်စာ ကောင်းမြတ်စာ အလုပ်တိကို မြင်ရို့ ရှက်ကတ်လိမည်။ 17နင်ရို့ မှတ်ထားကတ်၊ နင်ရို့ မတရားအလုပ်ကို လုပ်ရို့ ဒုက္ခကို ခံရစာထက် ထာဝရဘုရား၏ အလိုတော်အတိုင်း ကောင်းမြတ်စာ အလုပ်ကို လုပ်ရို့ ဒုက္ခကို ခံရစာ ပိုရို့ ကောင်းရေ။ 18– 19အကြောင်းကား ခရစ်တော်လည်း လူရို့အပြစ်အတွက် တစ်ခေါက်တည်းရာ အသီခံလီရေ။ ထိုအပြစ်နကင်းသူစာ ငါရို့ အပြစ်သေရို့အတွက် အသီခံလီရေ၊ အကြောင်းကား သူစာ ငါရို့ကို ထာဝရဘုရားတို့ ယူလားချင်လီရေ။ သူ့ကို ကိုယ်ခန္ဓာဖက်က အသီသတ်ဘိုက်လီရေ၊ ယေကေလည်း သူစာ ဝိညာဉ်ဖက်က ပြန်ရှင်ထမြောင့်လီရေ။ ယင်းနောက် သူစာ အချုပ်ခံရို့ဟိစာ ဝိညာဉ်တိတို့ လားရို့ တရားဟောပြောလီရေ။ 20ထိုဝိညာဉ်တိစာ နှစ်ပေါင်းများစွာ အယင်က နောဧ သင်္ဘောဆင်လီရေခါ ဟိလီကတ်စာ လူရို့ ဝိညာဉ်တိ ဖြစ်တေ။ ယင်းခါ သူရို့စာ ထာဝရဘုရား၏ စကားတော်ကို ငြင်းပယ်လီကတ်တေ၊ ယေကေလည်း ထာဝရဘုရားစာ နောဧ သင်္ဘောဆင်ရို့ မပြီးသကြား သူရို့ကို သည်းခံရို့ စောင့်နီလီရေ။ နောက်ဆုံးပြီးမာ လူရှစ်ယောက်တည်းရာ ထိုသင်္ဘောမာ တက်ရို့ ရီမာ နစ်ရို့ သီဖို့စာက ရွတ်လီကတ်တေ။ 21ထို ရီစာ ဒေဂု နင်ရို့ကို ကယ်ဆယ်စာ ရီနှစ်မင်္ဂလာနတူရေ။ ရီနှစ်မင်္ဂလာစာ နင်ရို့ ခန္ဓာမာဟိစာ အညစ်တိကို စင်အောင် လုပ်စာ မဟုတ်သိ၊ နင်ရို့မာ အသိညာဏ်ကို သသန့်ရှရှင်း ထားဖို့အတွက် ထာဝရဘုရားဘားမာ တောင်းဆိုချက် တစ်ခု ဖြစ်တေ။ ယေရှုခရစ်တော်၏ ပြန်ရှင်ထမြောင့်ခြင်း အကြောင်းန ထို ရီနှစ်မင်္ဂလာစာ နင်ရို့ကို ကယ်တင်ရေ။ 22ယေရှု ဂေါင်းခင်ဘုံတို့ ကြွလားခရို့ ဒေဂု ထာဝရဘုရား၏ ညာဖက်က ဟိရေ အရာ သူစာ ဂေါင်းခင်နတ်သားရို့၊ အာဏာပိုင်သူရို့ အရာ အုပ်ချုပ်သူရို့ကို အုပ်စိုးနီရေ။
Copyright information for
RmzSC