1 Thessalonians 1

နှုတ်ဆက်ခြင်း

သို့၊ သက်သာလောနိတ်မြို့ အသင်းတော်။

1သိလ၊ တိမောသေ အရာ ငါ ပေါလုစာ နင်ရို့ သက်သာလောနိတ်မြို့ အသင်းတော်တို့ ဒေ စာစောင်ကို ရွီးလိုက်တေ။ နင်ရို့စာ အဖထာဝရဘုရားန အသျှင်ယေရှုခရစ်တော်၏ လူဖြစ်ကတ်တေ။ ငါရို့မာ အဖထာဝရဘုရားန အသျှင်ယေရှုခရစ်တော်စာ နင်ရို့ကို ကျေးဇူးတော်န ငြိမ်းချမ်းခြင်း ပီးပါစီ။

ထာဝရဘုရားကို ကျေးဇူးတင်ခြင်း

2ငါရို့ ဆုတောင်းကတ်တေခါ အမြဲတိုင်း နင်ရို့ အားကုံးသူကို တွက်ရနီကတ်တေ။ ယင်းအတွက်န ငါရို့ နင်ရို့ အားကုံးသူအတွက် ထာဝရဘုရားကို ကျေးဇူးတင်နီကတ်တေ။ 3နင်ရို့စာ ကိုယ်ရို့မာ ကျုံခြင်းတရားအကြောင်းန အလုပ်လုပ်နီကတ်တေ၊ ချစ်ခြင်းမေတ္တာအကြောင်းန ကြိုးစားအားထုတ်နီကတ်တေ အရာ ငါရို့မာ အသျှင်ယေရှုခရစ်တော်ကို မျှော်လင်းခြင်းအကြောင်းန စိတ်ရှည်သည်းခံရို့ နီကတ်တေ။ ထိုအကြောင်းတိကို ယူရို့ ငါရို့ အမြဲတိုင်း ငါရို့မာ အဖထာဝရဘုရား၏ ရှိမာ ဆုတောင်းနီကတ်တေ။

4ထာဝရဘုရား၏ ချစ်ခင်စာ ငါ့ညီအစ်ကိုမောင်နမှရို့၊ ထာဝရဘုရားစာ ကိုယ့်လူဖြစ်ဖို့အတွက် နင်ရို့ကို ရွီးကောက်ယူဗျာဆိုစာကို ငါရို့ သိရေ၊ 5အကြောင်းကား ငါရို့ ဟောပြောလီကတ်စာ သတင်းကောင်းစာ သက်သက် စကားကနီရို့ လာလီစာ မဟုတ်၊ ယေကေလည်း ထိုသတင်းကောင်းစာ တန်ခိုး၊ သန့်ရှင်းသောဝိညာဉ်တော် အရာ အပြည့်စုံ စိတ်ချခြင်းကနီရို့ လာလီစာ ဖြစ်တေ။ ငါရို့စာ နင်ရို့နအတူ ဟိလီကတ်တေခါ နင်ရို့ ကောင်းကျိုးရေးအတွက် ငါရို့ ဇာပိုင် နီလီကတ်တေလည်းဆိုစာကို နင်ရို့ သိကတ်တေ။ 6နင်ရို့ အများကြီး ညှဉ်းဆဲ-နှိပ်စက်ခြင်းကို ခံရကတ်တေခါလည်း သန့်ရှင်းသောဝိညာဉ်တော်ပီးစာ စိတ်အပျော်န ထိုသတင်းကောင်းကို လက်ခံလီကတ်တေ။ ယင်းပိုင် နင်ရို့စာ ငါရို့ပိုင် အရာ အသျှင်ပိုင် နီထိုင်ကတ်တေ။ 7ယင်းအတွက်န နင်ရို့စာ မာကေဒေါနိပြည်နယ်န အာခါယပြည်နယ်မာ ဟိကတ်စာ ဟိသမျ ကျုံသူရို့အတွက် ပုံဥပမာတစ်ခု ဖြစ်ကတ်ပျာ။ 8နင်ရို့ ဟောပြောကတ်စာ အသျှင်၏ စကားတော်စာ သက်သက် မာကေဒေါနိပြည်နယ်န အာခါယပြည်နယ်မာ ပြန့်ကျယ်လားခစာ မဟုတ်သိ။ ယင်းထက်ပင် နင်ရို့ ထာဝရဘုရားကို တတိုင်းမမြိုင်း ကျုံကတ်တေဆိုစာ အကြောင်းလည်း ဟိသမျ နေရာမာ ပြန့်ကျယ်လားခဗျာ။ ယင်းအတွက်န နင်ရို့မာ ကျုံခြင်းတရား အကြောင်းနပတ်သပ်ရို့ ငါရို့ စကားတစ်ခွန်းလည်း ပြောဖို့ အလိုမဟိ၊ 9အကြောင်းကား ငါရို့ကို နင်ရို့ ဇာပိုင် ကြိုဆိုလက်ခံလီကတ်တေလည်းဆိုစာကို လူရို့စာ ငါရို့ဘားမာ ပြောပြကတ်တေ။ အရာ နင်ရို့ နတ်ဘုရားတိကို စွန့်ရို့ အသက်သျှင်န မှန်ကန်စာ ထာဝရဘုရားကို ဝတ်ပြုဖို့အတွက် သူ့တို့ ဇာပိုင် ပြန်လာကတ်လီရေလည်းဆိုစာကို သူရို့စာ ငါရို့ဘားမာ ပြောပြကတ်တေ။ 10အရာ နင်ရို့စာ ဂေါင်းခင်ဘုံက ထာဝရဘုရား၏ သားတော် ကြွလာဖို့အတွက် စောင့်နီကတ်တေဆိုစာကိုလည်း သူရို့စာ ပြောပြကတ်တေ။ ထာဝရဘုရားစာ ထိုသားတော်ဆိုစာ ယေရှုကို သီရာက ပြန်ရှင်ထမြောင့်စီလီရေ။ အရာ ထိုယေရှုစာ ထာဝရဘုရား၏ အပြစ်ဒါဏ်ကို ခံရကတ်ဖို့စာက ငါရို့ကို ကယ်ဆယ်လိမည်။