1 Thessalonians 2
သက်သာလောနိတ်မြို့မာ ပေါလု သာသနာပြုခြင်း
1ညီအစ်ကိုမောင်နမှရို့၊ ငါရို့ နင်ရို့တို့ လားလီစာ အကြောင်းနပတ်သပ်ရို့ အကျိုးမဟိ မဖြစ်လီဆိုစာကို နင်ရို့ ကိုယ်တိုင် သိကတ်တေ။ 2ငါရို့စာ နင်ရို့တို့ မလာခင်အယင်က ဖိလိပ္ပိမြို့မာ ညှဉ်းဆဲခြင်းန အသရေရှုတ်ချခြင်းကို ခံရလီကတ်တေဆိုစာကိုလည်း နင်ရို့ သိကတ်တေ။ ထို ဟိသမျ တားဆီးခြင်း ဟိကေလည်းသောက် ငါရို့မာ ထာဝရဘုရားစာ ငါရို့ကို ရဲဝံ့သတ္တိ ပီးလီရေ။ ယင်းအတွက်န ငါရို့စာ ထာဝရဘုရား၏ သတင်းကောင်းကို နင်ရို့ဘားမာ ပပွင့်လလင်း ဟောပြောဖို့ ရကတ်လီရေ။ 3ငါရို့ ဟောပြောကတ်စာ တရားတော်စာ မှားယွင်းစာ သွန်သင်ချက်က လာစာ မဟုတ်၊ ညစ်ညူးစာ ရွယ်မှတ်ချက်က လာစာ မဟုတ် အရာ လိမ်လှည့်ခြင်းက လာစာလည်း မဟုတ်။ 4ယေကေလည်း ထာဝရဘုရားစာ ငါရို့ကို ထိုက်တန်သူအဖြစ် နင်ရို့ဘားမာ သတင်းကောင်းကို ဟောပြောဖို့အတွက် ငါရို့ကို တာဝန် ပီးလီရေ။ ယင်းပိုင် တာဝန် ရသူအဖြစ် ငါရို့စာ လူရို့ကို နှစ်သက်အောင် လုပ်ဖို့အတွက် သတင်းကောင်းကို ဟောပြောနီကတ်စာ မဟုတ်၊ ယေကေလည်း ငါရို့ စိတ်နှလုံးကို စစ်ဆေးရို့ ကြည့်စာ ထာဝရဘုရားကို နှစ်သက်အောင် လုပ်ဖို့အတွက်နရာ ငါရို့ ထိုသတင်းကောင်းကို ဟောပြောနီကတ်စာ ဖြစ်တေ။ 5နင်ရို့ သိကတ်တေ၊ ငါရို့စာ နင်ရို့ကို တစ်ခါလည်း မြှောင့်ပီးစာ စကားကို မပြောလီကတ် အရာ လောဖစိတ်ကို ဖုံးထားရို့ လိမ်လှည့်စာ စကားကို မပြောလီကတ်။ ဒေ အကြောင်းနပတ်သပ်ရို့ ထာဝရဘုရား ကိုယ်တိုင် သက်သီခံ ဖြစ်တေ။ 6ငါရို့စာ နင်ရို့က မဟုတ်ကေ အခြားလူရို့က ချီမွမ်းခြင်း ရဖို့စာကို မလိုလီ။ ငါရို့စာ ခရစ်တော်၏ တမန်တော်အနေန နင်ရို့က အများကြီး တောင်းဖို့စာ အခွင့်အာဏာ ငါရို့မာ ဟိလီရေ၊ ယေကေလည်း ငါရို့စာ ထိုအခွင့်အာဏာကို အသုံးမပြုကတ်လီ။ 7ယင်းထက်ပင် ငါရို့စာ နင်ရို့နအတူ ဟိလီကတ်တေခါ အမိတစ်ယောက် ကိုယ့်သားသမီးရို့ကို ကျွေးမွေးသုတ်သင်ရို့ ထားစာပိုင် ငါရို့စာ နင်ရို့ကို သနားကြင်နာခြင်းန ဆက်ဆံလီကတ်တေ။ 8နင်ရို့ကို သနားကြင်နာရေအတွက်န သက်သက် ထာဝရဘုရား၏ သတင်းကောင်းကို ဝီမျှရို့ ပီးလီကတ်စာ မဟုတ်သိ၊ နင်ရို့အတွက် ငါရို့ဘဝကိုလည်း ဝီမျှရို့ပီးလီကတ်တေ၊ အကြောင်းကား ငါရို့စာ နင်ရို့ကို ကောင်းကောင်း ချစ်ကတ်တေ။ 9ညီအစ်ကိုမောင်နမှရို့၊ ငါရို့ ကြိုးစားအားထုတ်ခြင်းန ပင်ပန်းခြင်း အကြောင်းကို နင်ရို့ မှတ်ထားကတ်တေ။ နင်ရို့အထဲက တစ်ယောက်ကလည်း အကူညီတောင်းဖို့ မကျလတ်အောင် ငါရို့စာ နင်ရို့ဘားမာ ထာဝရဘုရား၏ သတင်းကောင်းကို ဟောပြောလီရေခါ ညဉ့်ပါ-ရက်ပါ အလုပ်လုပ်ရို့ စားလီကတ်တေ။ 10နင်ရို့ ကျုံသူရို့န ငါရို့မာ ဆက်ဆံခြင်းစာ သန့်ရှင်းခြင်းန ရိုးသားခြင်း ဟိလီရေ အရာ အပြစ်တင်ခြင်းန ကင်းလီရေဆိုစာကို နင်ရို့လည်း သိကတ်တေ အရာ ထာဝရဘုရားလည်း သိရေ။ 11နင်ရို့ သိကတ်တေ၊ အဖတစ်ယောက်စာ ကိုယ့်သားသမီးရို့န ဆက်ဆံရေပိုင် ငါရို့လည်းသောက် နင်ရို့န ဆက်ဆံလီကတ်တေ။ 12ငါရို့စာ နင်ရို့ကို အားပီးချက်စကားန စိတ်ဖျော်စာစကားကို ပြောလီရေ အရာ နင်ရို့ကို အာဏာချလီရေ၊ အကြောင်းကား ငါရို့စာ နင်ရို့ကို ထာဝရဘုရား၏ လူအဖြစ် ထိုက်တန်စာ အကျင့်သီလန နီထိုင်စီချင်လီရေ။ ထာဝရဘုရားစာ ကိုယ့်နိုင်ငံတော်တို့ ယူလားဖို့အတွက် အရာ ကိုယ့်ဘုန်းတန်ခိုးကို ဝီမျှရို့ ပီးဖို့အတွက် နင်ရို့ကို ခေါ်လီရေ။ 13ငါရို့ အမြဲတိုင်း ထာဝရဘုရားကို ကျေးဇူးတင်နီကတ်တေ၊ အကြောင်းကား နင်ရို့စာ ငါရို့က ထာဝရဘုရား၏ စကားတော်ကို ကြားရို့ ကျုံလီကတ်တေ။ ယင်းခါ နင်ရို့စာ လူပြောစာ စကားအဖြစ် လက်ခံလီကတ်စာ မဟုတ်၊ ယေကေလည်း ထာဝရဘုရား၏ စကားတော် ဖြစ်တေ ဟို့ လက်ခံလီကတ်စာ ဖြစ်တေ။ ထိုစကားတော်စာ အမှန် ထာဝရဘုရား၏ စကားတော် ဖြစ်တေ။ ထိုစကားတော်စာ နင်ရို့ ကျုံသူရို့ စိတ်နှလုံးမာ အလုပ်လုပ်နီရေ။ 14ညီအစ်ကိုမောင်နမှရို့၊ ယုဒပြည်နယ်မာ ဟိကတ်စာ ခရစ်တော်ယေရှုန စုပေါင်းနီစာ ထာဝရဘုရား၏ အသင်းတော်တိလည်း နင်ရို့ပိုင် ညှဉ်းဆဲခြင်းကို ခံရနီကတ်တေ။ သူရို့စာ ယုဒလူမျိုးရို့အလက်မာ ဒုက္ခ-ဝေဒနာကို ခံရလီကတ်တေ။ ယင်းပိုင်တထန် နင်ရို့လည်းသောက် ကိုယ့်ပြည်သားရို့အလက်မာ တစ်ချက်တည်း ဒုက္ခ-ဝေဒနာကို ခံရလီကတ်တေ။ 15ထိုယုဒလူမျိုးရို့စာ အသျှင်ယေရှုန ဘုရားသတင်းပို့သူရို့ကို အသီသတ်လီကတ်တေ အရာ သူရို့စာ ငါရို့ကိုလည်း ညှဉ်းဆဲလီကတ်တေ။ သူရို့စာ ထာဝရဘုရားကို မနှစ်သက်အောင် လုပ်ကတ်တေ အရာ သူရို့စာ ဟိသမျ လူမျိုးရို့ကို ရန်သူ ဟို့ မှတ်ကတ်တေ။ 16သူရို့စာ ယုဒမဟုတ်သူရို့ဘားမာ ကယ်တင်ခြင်း ရဖို့စာ တရားတော်ကို မဟောပြောလတ်အောင် ငါရို့ကို တားဆီးကတ်တေ။ ယင်းပိုင် ထိုယုဒလူမျိုးရို့စာ အမြဲတိုင်း အပြစ်ထက်က အပြစ်ထပ်ရို့ လုပ်နီကတ်တေ။ ယင်းအတွက်န ဒေဂု ထာဝရဘုရား သူရို့ဘားမာ အငြိုဒေါသ သွန်ချဖို့ အဆင်သင့် ဟိရေ။ကျုံသူညီအစ်ကိုမောင်နမှရို့ကို အောက်မိခြင်း
17ညီအစ်ကိုမောင်နမှရို့၊ ငါရို့ တစ်ချက်သျှေအတွက် နင်ရို့န ခွဲခွါရို့ နီရကတ်တေ။ ယေကေလည်း ငါရို့မာ စိတ်နှလုံးစာ နင်ရို့နအတူ ဟိရေ။ ယင်းအတွက်န ငါရို့ အရာတစ်ပြန် နင်ရို့န အတွိခံဖို့အတွက် အောက်မိခြင်းစိတ်န ကြိုးစားလီကတ်တေ။ 18ယင်းအတွက်န ငါရို့ နင်ရို့တို့ လာဖို့ ကြိုးစားကတ်လီရေ၊ အရေးကြီးဆုံး ငါ ပေါလု ကိုယ်တိုင် အပြန်ပြန် နင်ရို့တို့ လာဖို့ ကြိုးစားလီရေ။ ယေကေလည်း မာရ်နတ် ငါရို့ကို တားဆီးရေအတွက်န ငါရို့ နင်ရို့တို့ လာဖို့ မရကတ်လီ။ 19ငါရို့မာ အသျှင်ယေရှု ကြွလာဖို့စာနိမာ ငါရို့ သူ့ရှိက ရပ်ကတ်တေခါ နင်ရို့စာ ငါရို့အတွက် မျှော်လင်းခြင်း၊ ဝမ်းသာခြင်း အရာ ဘုန်းကြီးစာ အောင်ဆုသရဖူ ဖြစ်ကတ်ဖို့။ 20ဟုတ်တေ၊ နင်ရို့ အမှန် ငါရို့အတွက် ဘုန်းတန်ခိုးန ဝမ်းသာခြင်း ဖြစ်ကတ်တေ။
Copyright information for
RmzSC