1 Thessalonians 3
1– 2နောက်ဆုံးပြီးမာ ငါရို့ ဆိုင်းနီဖို့ မနိုင်လီရေအတွက်န ငါရို့မာ ညီဖြစ်သူ တိမောသေကို နင်ရို့တို့ ရွှတ်လိုက်လီရေ အရာ ငါရို့စာ အာသင်မြို့မာ နီလိုက်ဖို့ဗျာ ဆိုပြီးကေ ဆုံးဖြတ်ကတ်လီရေ။ တိမောသေစာ ခရစ်တော်၏ အကြောင်း သတင်းကောင်းကို ဟောပြောဖို့စာမာ ထာဝရဘုရား၏ လုပ်ဖေါ်ကိုင်ဖက် တစ်ယောက် ဖြစ်တေ။ သူစာ နင်ရို့မာ ကျုံခြင်းတရားကို ခိုင်မာအောင် လုပ်ဖို့ ရလတ်အောင် အရာ နင်ရို့ကို အားပီးချက်စကား ပြောဖို့ ရလတ်အောင် ငါရို့စာ သူ့ကို နင်ရို့တို့ ရွှတ်လိုက်လီရေ။ 3ယင်းပိုင်ဆိုကေ ထိုညှဉ်းဆဲခြင်း အကြောင်းန နင်ရို့ ခရစ်တော်၏ လမ်းကို စွန့်ရို့ နောက်တို့ ပြန်လားကတ်လိမည် မဟုတ်။ ငါရို့ အမှန် ထိုဒုက္ခ-ဝေဒနာတိကို ခံရဖို့ဆိုစာကို နင်ရို့ ကိုယ်တိုင် သိကတ်တေ။ 4ငါရို့စာ နင်ရို့နအတူ ဟိလီရေခါ ဒုက္ခ-ဝေဒနာ ခံရဖို့စာအကြောင်းကို ငါရို့ အပြန်ပြန် ပြောလီကတ်တေ အရာ ငါရို့ ပြောရေအတိုင်း ဒေဂု ကျရောက်လာရေဆိုစာကို နင်ရို့ သိကတ်တေ။ 5ယင်းအတွက်န ငါရို့စာ ဆိုင်းနီဖို့ မနိုင်လီရေအတွက်န နင်ရို့မာ ကျုံခြင်းတရား ဇာပိုင်လည်းဆိုစာကို သိချင်ရို့ တိမောသေကို နင်ရို့တို့ ရွှတ်လိုက်လီရေ။ မာရ်နတ် နင်ရို့ကို အပြစ်မာ ချဖို့ ကြိုးစားဖို့စာကို အရာ ငါရို့မာ ဟိသမျ လုပ်ကိုင်ခြင်းတိ ပျက်ဆုံးလားလီဖို့စာကို ငါ ကောင်းကောင်း ကြောင်းကြလီရေ။ 6ယေကေလည်း တိမောသေ ဒေဂု နင်ရို့က ပြန်လာရို့ နင်ရို့ ချစ်ခြင်းမေတ္တာအကြောင်းန ကျုံခြင်းတရား အကြောင်းကို ငါရို့ဘားမာ ကောင်းစာ သတင်းကို ပီးလီရေ။ သူစာ ပြောလီစာကား၊ နင်ရို့စာ ချစ်ခြင်းမေတ္တာစိတ်န ငါရို့ကို အမြဲတိုင်း အောက်မိနီကတ်တေ။ အရာ ငါရို့စာ နင်ရို့ကို မြင်ချင်ကတ်စာပိုင် နင်ရို့လည်း ငါရို့ကို မြင်ချင်နီကတ်တေ။ 7ယင်းအတွက်န ညီအစ်ကိုမောင်နမှရို့၊ တိမောသေပစက နင်ရို့ ကျုံခြင်းတရား အကြောင်းကို ကြားရို့ ငါရို့ ဟိသမျ ဒုက္ခ-ဝေဒနာကို ခံရကတ်ကေလည်းသောက် ငါရို့ စိတ်အားရကတ်ပျာ။ 8အကြောင်းကား နင်ရို့စာ အသျှင်ဘားမာ တတိုင်းမမြိုင်း ကျုံခြင်းတရား ထားရေဆိုကေ ငါရို့အတွက် ဘဝအသစ်ကို ရစာနတူရေ။ 9ငါရို့စာ ထာဝရဘုရားတို့ လားကတ်တေခါ နင်ရို့ အကြောင်းန ငါရို့ ကောင်းကောင်း ဝမ်းသာကတ်တေ။ နင်ရို့အတွက် ထာဝရဘုရားကို ဇာပိုင် ကျေးဇူးတင်ရဖို့လည်းဆိုစာကို ငါရို့ မသိ။ 10ငါရို့စာ နင်ရို့ကို ကောင်းကောင်း မြင်ချင်ကတ်တေ အရာ နင်ရို့ ကျုံခြင်းတရားမာ ခေါင်းပါးစာတိကို ငါရို့ ပြည့်စုံအောင် လုပ်ချင်ရေ။ ယင်းအတွက်န ငါရို့ ဟိသမျ စိတ်နှလုံးန ညဉ့်ပါ-ရက်ပါ ထာဝရဘုရားဘားမာ ဆုတောင်းနီကတ်တေ။ 11ငါရို့မာ အဖထာဝရဘုရားန ငါရို့မာ အသျှင်ယေရှုစာ နင်ရို့တို့ လားဖို့အတွက် ငါရို့ကို လမ်းဖွင့်ရို့ ပီးပါစီ။ 12ငါရို့ နင်ရို့ကို ချစ်ကတ်စာပိုင် နင်ရို့လည်း တစ်ယောက်ကို တစ်ယောက် ချစ်လတ်အောင်၊ ယင်းထက်မက အားကုံးသူကို အရာလည်း ပိုရို့ ချစ်လတ်အောင် ငါရို့ ဆုတောင်းပီးကတ်တေ။ 13ယင်းပိုင်ဆိုကေ သူစာ နင်ရို့ စိတ်နှလုံးကို ခိုင်မာအောင် လုပ်လိမည်။ အရာ ငါရို့မာ အသျှင်ယေရှု ကိုယ့်လူရို့နအတူ ကြွလာရေခါ ငါရို့မာ အဖထာဝရဘုရား၏ ရှိက နင်ရို့စာ သန့်ရှင်းသူန အပြစ်နကင်းသူ ဖြစ်ကတ်လိမည်။
Copyright information for
RmzSC