1 Timothy 1

နှုတ်ဆက်ခြင်း

သို့၊ တိမောသေ။

1– 2ငါ ပေါလု၊ ငါ နင့်တို့ ဒေ စာစောင်ကို ရွီးလိုက်တေ။ နင်စာ ငါ့ပိုင် ခရစ်တော်ကို ကျုံရေအတွက်န ငါ့သားအရင်းနတူရေ။ ငါစာ ခရစ်တော်ယေရှု၏ တမန်တော် တစ်ယောက် ဖြစ်တေ။ ထာဝရဘုရားန ခရစ်တော်ယေရှုစာ ငါ့ကို တမန်တော်အဖြစ် ရွှတ်လိုက်လီရေ။ ထာဝရဘုရားစာ ငါရို့ကို ကယ်တင်ရေ အရာ ခရစ်တော်ယေရှုစာ ငါရို့ကို မျှော်လင်းချက် ပီးရေ။

ငါရို့မာ အဖထာဝရဘုရားန ငါရို့မာ အသျှင်ခရစ်တော်ယေရှု နင့်ကို ကျေးဇူးတော်၊ ကရုဏာတော် အရာ ငြိမ်းချမ်းခြင်း ပီးပါစီ။

မှားယွင်းစာ ဆရာရို့ကို သတိပီးခြင်း

3မာကေဒေါနိပြည်နယ်တို့ လားရေခါ ငါ နင့်ကို ပြောလီစာပိုင်တထန် ငါ ဒေဂုလည်း နင့်ကို ပြောရေ၊ နင် ဧဖက်မြို့မာ နီလီ၊ အကြောင်းကား ဧဖက်မြို့မာ တစ်ချိုးလူရို့စာ မှားယွင်းစာ အကြောင်းတိကို သွန်သင်ပီးနီကတ်တေ။ ယင်းအတွက်န သူရို့ မှားယွင်းစာ အကြောင်းတိကို သွန်သင်မပီးရအောင် နင် သူရို့ကို ဟန့်လီ။ 4အဖိုးအဖီးအစိုင်လာရို့ အကြောင်းနပတ်သပ်ရို့ စီစာဝတ္ထုတိကို ယူရို့ အချိန်မဖြုန်းဖို့အတွက် နင် သူရို့ကို ပြောလီ။ ထိုဝတ္ထုတိစာ သက်သက် အငြင်းအခုံ ပွါးစာ အကြောင်းတိ ဖြစ်တေ။ ထိုဝတ္ထုတိကနီရို့ ထာဝရဘုရား၏ အလုပ် အကြောင်းကို နားမလည်နိုင်၊ ယေကေလည်း ကျုံခြင်းတရားကနီရို့ရာ ထာဝရဘုရား၏ အလုပ် အကြောင်းကို နားလည်နိုင်ရေ။ 5ငါ ဒေ ပညှတ်ချက်ကို ပီးရေ၊ အကြောင်းကား နင်ရို့အထဲမာ တစ်ယောက်ကို တစ်ယောက် ချစ်ခြင်းမေတ္တာ ထားစာကို ငါ မြင်ချင်ရေ။ ဒေ ချစ်ခြင်းမေတ္တာစာ စင်ကြယ်စာ စိတ်နှလုံး၊ ဖြူစင်စာ အသိညာဏ် အရာ အစစ် ကျုံခြင်းတရားက လာရေ။ 6တစ်ချိုးလူရို့စာ ထိုသွန်သင်ချက်တိကို စွန့်ရို့ နောက်တို့ ဆုတ်လားခပြီးကေ တန်ဖိုးမဟိစာ စကားတိကို ပြောနီကတ်တေ။ 7သူရို့စာ ကိုယ်ရို့ ပြောနီကတ်စာ စကား အဓိပ္ပါယ်ကို ကိုယ်ရို့ နားမလည်ကတ်။ အရာ သူရို့ ကိုယ်တိုင် အားထုတ်ရို့ ပြောနီကတ်စာ အကြောင်းကိုလည်း သူရို့ နားမလည်ကတ်၊ ယေကေလည်း သူရို့စာ ကျမ်းဆရာ ဖြစ်ချင်ကတ်တေ။

8 ထိုပညှတ်တရားကို အသုံးပြုသင့်ရေအတိုင်း အသုံးပြုရေဆိုကေ ပညှတ်တရား ကောင်းရေဆိုစာကို ငါရို့ သိရေ။ 9– 10ငါရို့ ဒေသျှင့်ကိုလည်း သိရေ၊ ဘုရားသတင်းပို့သူ မောရှေစာ ဒေ ပညှတ်တရားကို သူတော်ကောင်းရို့အတွက် ပီးလီစာ မဟုတ်၊ လူဆိုးရို့အတွက် ပီးလီစာ ဖြစ်တေ။ ထိုလူဆိုးရို့ ဖြစ်တေကား၊ ထာဝရဘုရားကို ဆန့်ကျင်သူရို့၊ ပညှတ်တရားကို မလိုက်နာသူရို့၊ ထာဝရဘုရားကို ရိုသေကြောက်လန့်ခြင်း မဟိသူရို့၊ အပြစ်သေရို့၊ မသန့်ရှင်းသူရို့၊ ထာဝရဘုရားကို မုန်းသူရို့၊ အမိအဖကို ဘုတ်သူရို့၊ လူသတ်သမားရို့၊ ကာမဂုဏ် လိုက်စားသူရို့၊ မိန်းမချင်း မိန်းမ ယောက်ျားချင်း ယောက်ျား ပြစ်မှားသူရို့၊ ကျွန်ကို အရောင်းအဝယ်လုပ်သူရို့၊ လိမ်စားသူရို့၊ မုတ်သားသက်သီပီးသူရို့ အရာ ထာဝရဘုရား၏ မှန်ကန်စာ သွန်သင်ချက်ကို ဆန့်ကျင်စာ အလုပ်တိကို လုပ်နီသူရို့ ဖြစ်ကတ်တေ။ 11ဒေ သွန်သင်ချက်စာ မင်္ဂလာန ပြည့်စုံစာ ဘုန်းကြီးစာ ထာဝရဘုရား၏ သတင်းကောင်းက လာစာ ဖြစ်တေ။ ဒေ သတင်းကောင်းကို ဟောပြောဖို့အတွက် ထာဝရဘုရား ငါ့ကို တာဝန် ပီးလီရေ။

ထာဝရဘုရားကို ကျေးဇူးတင်ခြင်း

12ငါရို့မာ အသျှင်ခရစ်တော်ယေရှုစာ ငါ့ကို သစ္စာဟိသူ တစ်ယောက် မှတ်ရို့ ကိုယ့်အလုပ်အတွက် ရွီးကောက်ယူလီရေ အရာ သူစာ ငါ့ကို အားခွန် ပီးလီရေ။ ယင်းအတွက်န ငါ သူ့ကို ကျေးဇူးတင်ရေ။ 13ငါ သူ့ကို မကျုံခင်အယင်က သူ့ကို တရိုက်ရို့ စကား ပြောနီလီရေ၊ သူ၏ လူရို့ကို ညှဉ်းဆဲနီလီရေ အရာ သူ့ကို ဆန့်ကျင်ရို့ စကား ပြောနီလီရေ။ ယေကေလည်း ထာဝရဘုရားစာ ငါ့ကို သနားကြင်နာလီရေ၊ အကြောင်းကား ငါ ဇာလုပ်တေလည်းဆိုစာကို ငါ ကိုယ်တိုင် မသိလီ။ ယင်းခါ ငါ့မာ ကျုံခြင်းတရား မဟိရေအတွက်န ထိုအလုပ်တိကို လုပ်လီစာ ဖြစ်တေ။ 14ယေကေလည်း ငါရို့မာ အသျှင်စာ အဆုံးအတုံးမဟိစာ သနားကြင်နာခြင်းကို ငါ့ကို ပီးလီရေ။ အရာ ငါစာ ခရစ်တော်ယေရှုန တစ်ကိုယ်တည်း ဖြစ်တေခါ ကျုံခြင်းတရားန ချစ်ခြင်းမေတ္တာကို ရလီရေ။ ထိုကျုံခြင်းတရားစာ ခရစ်တော်ကို ကျုံခြင်းတရား ဖြစ်တေ အရာ ထိုချစ်ခြင်းမေတ္တာစာ အခြားလူရို့ကို ထားဖို့စာ ချစ်ခြင်းမေတ္တာ ဖြစ်တေ။

15အပြစ်သေရို့ကို ကယ်တင်ဖို့အတွက် ခရစ်တော်ယေရှု ဒေ လောကတို့ ကြွလာလီရေ။ ဒေ စကားစာ မှန်ရေ၊ နင်ရို့ ဒေ စကားကို လက်ခံဖို့ သင့်ရေ။ ငါစာ ထိုအပြစ်သေရို့အထဲမာ အားကုံးသူထက် အပြစ်ကြီးသူ တစ်ယောက် ဖြစ်တေ။ 16ယေကေလည်း ထာဝရဘုရားစာ ငါ့ကို သနားကြင်နာလီရေ။ ငါစာ အပြစ်သေရို့အထဲမာ အပြစ်ကြီးသူ တစ်ယောက် ဖြစ်ရို့ပင်လည်း ခရစ်တော်ယေရှုစာ အဆုံးအတုံးမဟိစာ သည်းခံစိတ်ရှည်ခြင်းကို ငါ့ဘားမာ ဖေါ်ပြလီရေ၊ အကြောင်းကား နောက်အနာဂါတ်မာ သူ့ကို ကျုံရို့ ထာဝရအသက်ကို ရဖို့သူရို့ဘားမာ ငါ့ကို ပုံဥပမာအဖြစ် တင်ပြချင်လီရေ။ 17ထာဝရဘုရား တစ်ပါးတည်းရာ ဟိရေ။ သူစာ ထာဝရမင်း ဖြစ်တေ အရာ သူစာ သီခြင်းနကင်းသူလည်း ဖြစ်တေ၊ သူ့ကို လူ့မျက်စိန မမြင်ရ။ သူ၏ ရိုသေခြင်းန ဘုန်းတန်ခိုး ထာဝရပတ်လုံး ဟိပါစီ။ အာမန်။

18ငါ့ အချစ်သား တိမောသေ၊ အယင်ခါ နင့် အကြောင်းနပတ်သပ်ရို့ ဟောပြောလီစာ အနာဂတ္တိစကားအတိုင်း ငါ နင့်ကို ဒေ ပညှတ်ချက် ပီးရေ။ နင် ကြိုးစားအားထုတ်ရို့ စစ်တိုက်လီ။ စစ်အောင်မြင်ဖို့အတွက် နင် ထိုအနာဂတ္တိစကားကို လက်နှက်အဖြစ် အသုံးပြုလီ။ 19ယင်းအတွက်န နင့်မာ ကျုံခြင်းတရားကို နနောင်းတည်းရို့ ထားလီ အရာ နင့်မာ ဖြူစင်စာ အသိညာဏ်ကို ထိန်းသိမ်းရို့ ထားလီ။ တစ်ချိုးလူရို့စာ ကိုယ်ရို့မာ အသိညာဏ် စကားကို နားမထောင်ကတ်။ ယင်းအတွက်န သူရို့မာ ကျုံခြင်းတရားစာ ပျက်လားခဗျာ။ 20ထိုလူရို့အထဲမာ ဟုမေနဲန အာလေဇန္ဒြုလည်း ပါရေ။ သူရို့စာ ထာဝရဘုရားကို တရိုက်ရို့ စကား မပြောဘိုင်းန နီကတ်ပတ်စီအတွက် ငါ သူရို့ကို အပြစ်ဒါဏ်အဖြစ် မာရ်နတ်အလက်မာ တင်အပ်လိုက်ပျာ။