1 Timothy 3
အသင်းတော် ဂေါင်းဆောင်အကြီးရို့ အကျင့်သီလ
1ဒေ စကား မှန်ရေ၊ အသူမဆို အသင်းတော် ဂေါင်းဆောင်အကြီး တစ်ယောက် ဖြစ်ချင်ရေဆိုကေ သူစာ ကောင်းမြတ်စာ အလုပ်ကို လုပ်ဖို့အတွက် တောင်းတရေ။ 2အသင်းတော် ဂေါင်းဆောင်အကြီး တစ်ယောက်စာ လူရို့ဘားမာ အပြစ်အတင်ခံသူ မဖြစ်ရ။ အသင်းတော် ဂေါင်းဆောင်အကြီးမာ မယားတစ်ယောက်တည်း ဟိရဖို့။ သူစာ ကိုယ့်စိတ်န ကိုယ့်အလုပ်ကို ထိန်းသိမ်းရဖို့၊ ယဉ်ကျေးမှု ဟိရဖို့၊ အာဂန္တုကို ပြုဇုဖို့ သဖေါဟိရဖို့။ အရာ သူစာ အခြားလူရို့ကို သွန်သင်ပီးဖို့ နိုင်ရဖို့။ 3သူစာ ယစ်မုန်းသူ မဖြစ်ရ၊ မာနကြီးသူ မဖြစ်ရ၊ သူ့မာ နုညံ့ခြင်းစိတ် ဟိရဖို့၊ ငြိမ်းချမ်းခြင်းကို နှစ်သက်သူ ဖြစ်ရဖို့ အရာ တန်းကား-ဖွေသျှာကို လောဖကြီးသူ မဖြစ်ရ။ 4သူစာ ကိုယ့်အိမ်ထောင်ကို အလှပ အုပ်ချုပ်ဖို့ နိုင်ရဖို့ အရာ ကိုယ့်သားသမီးရို့က ရိုသေလေးစားခြင်းကို ရလတ်အောင် သူရို့ကို သွန်သင် ပီးရဖို့၊ 5အကြောင်းကား ကိုယ့်အိမ်ထောင်ကို အုပ်ချုပ်ဖို့ မနိုင်သူစာ ထာဝရဘုရား၏ အသင်းတော်ကို ဇာပိုင်ပျင်ရို့ အုပ်ချုပ်နိုင်ဖို့လည်း? 6အရာ အသင်းတော် ဂေါင်းဆောင်အကြီး တစ်ယောက်စာ အသစ် ကျုံသူ မဖြစ်ရ။ အသင်းတော် ဂေါင်းဆောင်အကြီးစာ အသစ် ကျုံသူ ဖြစ်တေဆိုကေ ဘဝင်မြင့်လားနိုင်စရာ ဟိရေ အရာ သူစာ မာရ်နတ်ပိုင်တထန် ဘဝင်မြင့်ရေအတွက်န အပြစ်ဒါဏ်ကို ခံရလိမည်။ 7သူစာ အသင်းတော်ပြင်က အခြားလူရို့ဘားမာ ရိုသေခြင်းကို ခံရသူ ဖြစ်ရဖို့။ ယင်းပိုင်ဆိုကေ သူစာ လူရို့ဘားမာ အပြစ်တင်ခြင်းန မာရ်နတ် ကျော့ဂွင်းထဲက ရွတ်လိမည်။အသင်းတော်မာ ပြုဇုသူရို့ အကျင့်သီလ
8ယင်းပိုင်တထန် အသင်းတော်မာ ပြုဇုသူရို့လည်း ရိုသေခြင်းကို ခံရသူ ဖြစ်ကတ်ရဖို့၊ သူရို့စာ လျှာနှစ်ခွလူ မဖြစ်ရ၊ ယစ်မုန်းသူ မဖြစ်ရ အရာ သူရို့စာ အခြားလူရို့ စီးပွါးကို လိမ်လှည့်ရို့ ကိုယ်ချမ်းသာဖို့အတွက် မကြိုးစားရ။ 9သူရို့စာ ခရစ်ယာန်ဘာသာ အကြောင်းနပတ်သပ်ရို့ ထာဝရဘုရား ဖေါ်ပြစာ စကားတိကို စင်ကြယ်စာ အသိညာဏ်န နနောင်းတည်းရို့ ထားကတ်ရဖို့။ 10သူရို့ကို ပထမဆုံး စစ်ဆေးစုံစမ်းရို့ ကြည့်ရဖို့။ ယင်းနောက် သူရို့မာ အပြစ် တစ်ခုလည်း မဟိဆိုကေ သူရို့ကို အသင်းတော်မာ ပြုဇုသူအဖြစ် တာဝန်ကို ပီးနိုင်ရေ။ 11ယင်းပိုင်တထန် သူရို့မာ မယားရို့လည်း ရိုသေခြင်းကို ခံရသူ ဖြစ်ရဖို့။ သူရို့စာ အမျိုးမျိုး နေရာမာ လည်ပြီးကေ အခြားလူ အကြောင်းကို ယူရို့ နင်းမရွှင့်ရ။ သူရို့စာ ကိုယ့်ကိုကိုယ် ထိန်းသိမ်းရဖို့။ သူရို့ ဟိသမျ အကြောင်းအရာမာ သစ္စာတရား ဟိရဖို့။ 12အသင်းတော်ကို ပြုဇုသူရို့မာလည်း မယားတစ်ယောက်တည်း ဟိရဖို့။ သူရို့စာ ကိုယ့်သားသမီးရို့န ကိုယ့်အိမ်ထောင်ကို အုပ်ချုပ်ဖို့ နိုင်ရဖို့။ 13အသင်းတော်မာ ပြုဇုသူရို့စာ ကိုယ်ရို့ တာဝန်ကို အလှပ ထန်းဆောင်ရေဆိုကေ သူရို့စာ ရိုသေခြင်းကို ခံရကတ်တေ။ အရာ သူရို့စာ ယေရှုခရစ်တော် အကြောင်းန ကိုယ်ရို့ ကျုံခြင်းတရား အကြောင်းကို ရဲဝံ့သတ္တိအပြည့်န ပြောနိုင်ရေ။အသင်းတော်စာ ထာဝရဘုရား၏ မိသားစု
14– 15ငါ နင့်တို့ အယင် လာဖို့ ဆိုပြီးကေ မျှော်လင်းရို့ ဟိရေ၊ ယေကေလည်း တစ်ခုတစ်ခု အကြောင်းန ငါ လာဖို့ ကြာနိုင်စရာ ဟိရေ။ ယင်းအတွက်န ငါ ဒေ အကြောင်းတိကို ရွီးရို့ နင့်တို့ ပို့လိုက်စာ ဖြစ်တေ၊ အကြောင်းကား ထာဝရဘုရား၏ မိသားစုအထဲက လူရို့ ဇာပိုင်ပျင်ရို့ နီထိုင်ရဖို့လည်းဆိုစာကို ငါ နင့်ကို သိစီချင်ရေ။ ထိုမိသားစုစာ အသက်သျှင် ထာဝရဘုရား၏ အသင်းတော် ဖြစ်တေ။ ထိုအသင်းတော်စာ မှန်ကန်ခြင်းတရား၏ အုပ်မြစ်လည်း ဖြစ်တေ၊ အရာ ကျောက်တိုင်လည်း ဖြစ်တေ။ 16ငါရို့ ခရစ်ယာန်ဘာသာ မှန်ကန်ခြင်း အကြောင်းအရာတိစာ ကောင်းကောင်း ကြီးမြတ်တေ။ ယင်းသျှင့်တိကို ငါရို့ အားကုံးသူ သိရေ။ ထိုအကြောင်းအရာတိ ဖြစ်တေကား၊ခရစ်တော်စာ လူ့ဇာတိအဖြစ် မွီးဖွားခြင်းကို ခံယူရို့ ငါရို့ဘားမာ ဖေါ်ပြလီရေ၊
သူစာ အပြစ်နကင်းသူတစ်ပါး ဖြစ်တေဆိုစာကို သန့်ရှင်းသောဝိညာဉ်တော်စာ သက်သီပြလီရေ၊
ဂေါင်းခင်နတ်သားရို့စာ သူ့ကို မြင်ဖူးကတ်လီရေ။
တမန်တော်ရို့စာ အမျိုးမျိုးနေရာမာ ဟိကတ်စာ လူမျိုးရို့ဘားမာ သူ၏ သတင်းကောင်းကို ဟောပြောကတ်လီရေ၊
အရာ လူရို့စာ သူ့ကို ကျုံကတ်လီရေ။
သူစာ ဘုန်းတန်ခိုးကို ခံရဖို့အတွက် ထာဝရဘုရားစာ သူ့ကို ဂေါင်းခင်ဘုံတို့ တင်ယူလီရေ။
Copyright information for
RmzSC