1 Timothy 6
ခရစ်တော်ကို ကျုံစာ ကျွန်ရို့အတွက် ပညှတ်ချက်
1ကျွန်ရို့စာ ကိုယ်ရို့ အပိုင်သျှင်ရို့ကို ဟိသမျ ရိုသေလေးစားခြင်းကို ပီးကတ်ရဖို့။ သူရို့ ယင်းပိုင်လုပ်တေဆိုကေ ထာဝရဘုရား၏ နာမည်န ငါရို့ သွန်သင်ချက်ကို တစ်ယောက်လည်း ပုတ်ခတ်ရို့ စကားပြောဖို့ ရကတ်လိမည် မဟုတ်။ 2တစ်ချိုးကျွန်ရို့မာ ခရစ်တော်ကို ကျုံစာ အပိုင်သျှင်ရို့ ဟိကတ်တေ။ ယင်းအတွက်န ကျွန်ရို့န အပိုင်သျှင်ရို့စာ ကျုံသူညီအစ်ကို ဖြစ်ကတ်တေ။ ယင်းပိုင် ညီအစ်ကို ဖြစ်ကတ်ကေလည်းသောက် ကျွန်ရို့စာ ကိုယ်ရို့မာ အပိုင်သျှင်ရို့ကို အားမနာ မလုပ်ရ။ ယင်းထက်ပင် ကျွန်ရို့စာ ကိုယ်ရို့ အပိုင်သျှင်ရို့ကို အရာလည်း အလှပပျင်ရို့ ပြုဇုရဖို့၊ အကြောင်းကား ထိုအပိုင်သျှင်ရို့စာ ခရစ်တော်ကို ကျုံသူရို့ ဖြစ်ကတ်တေ အရာ ထာဝရဘုရားစာ သူရို့ကို ကောင်းကောင်း ချစ်တေ။မှားယွင်းစာ သွန်သင်ချက်န အမှန် ချမ်းသာခြင်း
နင် ထိုအကြောင်းတိကို သွန်သင်ပီးလီ။ 3ယေကေလည်း တစ်ချိုးလူရို့စာ မှားယွင်းစာ အကြောင်းတိကို သွန်သင်ပီးနီကတ်တေ။ သူရို့စာ ငါရို့မာ အသျှင်ယေရှုခရစ်တော်၏ မှန်ကန်စာ သွန်သင်ချက်ကို လက်မခံကတ် အရာ ခရစ်ယာန်ဘာသာတရား၏ သွန်သင်ချက်ကိုလည်း လက်မခံကတ်။ 4– 5သူရို့စာ ကောင်းကောင်း မာနကြီးသူရို့ ဖြစ်ကတ်တေ အရာ သူရို့စာ တစ်ခုကိုလည်း နားလည်ခြင်း မဟိ။ သူရို့စာ စကားလုံးကို ယူရို့ ရန်တွိဖို့စာန အငြင်းအခုံ လုပ်ဖို့စာကို အများ နှစ်သက်ကတ်တေ။ သူရို့မာ ဆိုးယုတ်စာ အကျင့်သီလတိအတွက်န အသင်းတော်မာ မနာလိုခြင်း၊ အသင်းခွဲခြင်း၊ ပုတ်ခတ်ရို့ စကားပြောခြင်း၊ မယုံသင်္ခါစိတ်ဟိခြင်း အရာ ရောင်းရင်းသပ်ခြင်း ဝင်လာရေ။ သူရို့မာ စိတ်ဆန္ဒစာ မကောင်း၊ သူရို့ စိတ်နှလုံးမာ ထာဝရဘုရား၏ မှန်ကန်ခြင်းတရား မဟိ အရာ သူရို့စာ ထာဝရဘုရားကို ဝတ်ပြုကိုးကွယ်ခြင်းစာ ချမ်းသာဖို့စာ နည်းလမ်းတစ်ခု ဖြစ်တေ ဟို့ မှတ်ကတ်တေ။ 6ယေကေလည်း လူတစ်ယောက်စာ ကိုယ့်မာ ဟိစာလှောက်န နှစ်သက်ခြင်းစိတ်ကို ထားရို့ ထာဝရဘုရားကို ဝတ်ပြုကိုးကွယ်ရေဆိုကေ အမှန် ကြီးမြတ်စာ ချမ်းသာခြင်းကို ရရေ။ 7အကြောင်းကား ငါရို့စာ ဒေ လောကတို့ လာရေခါ တစ်ခုလည်း မယူခကတ်လီ အရာ ဒေ လောကက ထွက်လားရေခါလည်း တစ်ခုလည်း ယူလားနိုင်ဖို့ မဟုတ်။ 8ယေကေလည်း စားစရာန ဝတ်စရာ ဟိရေဆိုကေ ငါရို့ နှစ်သက်ကတ်ဖို့။ 9ယေကေလည်း ချမ်းသာဖို့လိုသူရို့စာ အမျိုးမျိုး အပြစ်သွေးဆောင်ခြင်းန ကျော့ဂွင်းထဲမာ အငြိမ့်ခံရရေ။ အရာ သူရို့စာ မကောင်းစာ အလုပ်တိန မတရားစာ အလုပ်တိကို လုပ်ဖို့အတွက် စိတ်မာ စွဲနီကတ်တေ။ ထိုသူရို့ ဘဝမာ ဟိသမျ အားကုံး ပျက်စီးလိမည်။ 10ဟိသမျ မကောင်းစာ အလုပ်တိစာ တန်းကား-ဖွေသျှာကို လောဖတတ်ခြင်းက လာရေ။ တစ်ချိုးလူရို့စာ တန်းကား-ဖွေသျှာကို လောဖတတ်ရို့ ကိုယ်ရို့မာ ကျုံခြင်းတရားကို စွန့်ဘိုက်လိုက်ကတ်ပျာ အရာ သူရို့စာ ကိုယ်ရို့ကို အများကြီး ဒုက္ခ-ဝေဒနာမာ ချဘိုက်လိုက်ကတ်ပျာ။ကျုံခြင်းတရား၏ စစ်ကို တိုက်ရို့လား
11ယေကေလည်း နင်ကား ထာဝရဘုရား၏ လူတစ်ယောက် ဖြစ်တေအတွက်န ထို ဟိသမျ မကောင်းစာက အဝီး ရှောင်ရို့ နီလီ။ နင် အမှန်လမ်းမာ လားခြင်း၊ ထာဝရဘုရားကို ပြုဇုခြင်း၊ ကျုံခြင်းတရား၊ ချစ်ခြင်းမေတ္တာ၊ သည်းခံစိတ်ရှည်ခြင်း အရာ နုညံ့ခြင်းစိတ်ကို ရဖို့အတွက် မီအောင် ဗြီးရို့လိုက်လီ။ 12နင်စာ ကိုယ့်ကျုံခြင်းတရား အကြောင်းကို လူအများကြီး ရှိမာ သက်သီ ပီးလီရေ။ နင် ထိုကျုံခြင်းတရားအတွက်မာ ကြိုးစားအားထုတ်ရို့ ကောင်းမြတ်စာ စစ်ကို တိုက်ရို့လားလီ အရာ နင် ထာဝရအသက်ကို နနောင်းတည်းရို့ ထားလီ၊ အကြောင်းကား ထာဝရဘုရားစာ နင့်ကို ထိုထာဝရအသက်ကို ပီးဖို့အတွက် ခေါ်လီရေ။ 13– 14နင် မှတ်ထား၊ ထာဝရဘုရား ဟိသမျ အားကုံးကို အသက် ပီးနိုင်ရေ၊ အရာ ခရစ်တော်ယေရှုစာ အုပ်ချုပ်သူကြီး ပုန္တိပိလတ် ရှိမာ မကြောက်မလန့်ဘိုင်းန မှန်ကန်ခြင်း အကြောင်းကို သက်သီ ပီးလီရေ။ ထိုထာဝရဘုရားန ခရစ်တော်ယေရှု ရှိမာ နင် ဒေပိုင် အကျိန်သစ္စာ ကိုင်လီ။ နင် ငါရို့ အသျှင်ယေရှုခရစ်တော် ပြန်ရို့ ကြွမလာသကြား ငါပီးစာ ပညှတ်ချက်တိကို လိုက်နာရို့ နီလီ။ ယင်းပိုင်ဆိုကေ နင့်ကို တစ်ယောက်လည်း ပုတ်ခတ်ရို့ စကားပြောဖို့ ရကတ်လိမည် မဟုတ်။ 15မင်္ဂလာနပြည့်စုံစာ ထာဝရဘုရားစာ အချိန်တိုင်ရေခါ အသျှင်ယေရှုခရစ်တော်ကို ဖေါ်ပြလိမည်။ သူစာ အုပ်ချုပ်သူတစ်ပါး ဖြစ်တေ အရာ သူစာ မင်းရို့မာ မင်း၊ အသျှင်ရို့မာ အသျှင် ဖြစ်တေ။ 16ထိုထာဝရဘုရား တစ်ပါးတည်းရာ သီခြင်းနကင်းရေ။ အရာ သူစာ လူရို့ မဟတ်နိုင်စာ အလင်းရောင်မာ ကျိန်းဝပ်တေ။ ထိုထာဝရဘုရားကို တစ်ယောက်လည်း တစ်ခါပင် မမြင်ဖူးကတ်သိ အရာ မြင်လည်း မြင်ဖူးကတ်မည် မဟုတ်။ သူ၏ ရိုသေခြင်းန တန်ခိုးစာ ထာဝရပတ်လုံး ဟိပါစီ။ အာမန်။ 17ဒေ လောကမာ သူဌေးရို့ ဘဝင်မြင့်ခြင်းစိတ်ကို မထားဘိုင်းန အရာ မတည်မြဲစာ ပစ္စည်း-ဥစ္စာတိကို အားမကိုးဘိုင်းန ထာဝရဘုရားကို အားကိုးကတ်ပတ်စီအတွက် ပညှတ်ချက်ကို ပီးလီ၊ အကြောင်းကား ငါရို့စာ ပျော်ပါးခြင်းကို ခံရဖို့အတွက် ထာဝရဘုရားစာ ငါရို့မာ ဟိသမျ လိုအပ်စာထက်ပင် ပိုရို့ သွန်ပီးနီရေ။ 18ထိုသူဌေးရို့စာ အခြားလူရို့ကို ကူညီပီးကတ်ပတ်စီအတွက်၊ ကောင်းမြတ်စာ အလုပ်တိကို လုပ်ဖို့ ကြိုးစားကတ်ပတ်စီအတွက်၊ အလှူအတန်း ပီးဖို့ ဝါသနာဟိကတ်ပတ်စီအတွက် အရာ သူရို့မာ ပစ္စည်း-ဥစ္စာတိကို အခြားလူရို့ကို ဝီရို့ ပီးကတ်ပတ်စီအတွက် သူရို့ကို ပြောပြလီ။ 19သူရို့ ယင်းပိုင် လုပ်တေဆိုကေ နောင်ဘဝအတွက် ဂေါင်းခင်ဘုံမာ ပစ္စည်း-ဥစ္စာ အများကြီး စုဆောင်းစာနတူရေ။ ယင်းနောက် သူရို့စာ မှန်ကန်စာ အသက်ကို ပိုင်ဆိုင်ကတ်လိမည်။ 20 တိမောသေ၊ နင့်ကို ထာဝရဘုရား အပ်ပီးစာတိကို နင် အလှပပျင်ရို့ စောင့်သျှောက်လီ။ တန်ဖိုးမဟိစာ စကားတိန မကောင်းစာ သွန်သင်ချက်တိကို နင် လက်မခံလီကေ့။ 21တစ်ချိုးလူရို့စာ ထိုအကြောင်းအရာတိကို ညာဏ်ပညာ ဖြစ်တေ ဟို့ ပြောနီကတ်တေ။ ယင်းအတွက်န သူရို့စာ ခရစ်ယာန်ဘာသာကို စွန့်ရို့ အမှားလမ်းတို့ လားခကတ်ပျာ။ ထာဝရဘုရား၏ ကျေးဇူးတော် နင်ရို့နအတူ ဟိပါစီ။
Copyright information for
RmzSC