2 Corinthians 10
ကိုယ့်အလုပ်ကို ပေါလု ကာကွယ်ခြင်း
1ငါ ပေါလု ကိုယ်တိုင် ခရစ်တော်၏ နုညံ့ခြင်းန သနားကြင်နာခြင်းကနီရို့ နင်ရို့ကို တောင်းပန်ရေ။ တစ်ချိုးလူရို့ ပြောနီကတ်တေ၊ ငါ နင်ရို့ ရှိက ကျကေ နုညံ့ခြင်းန ယဉ်ကျေးမှု စကားကို ပြောရေ၊ ယေကေလည်း အဝီးမာ နီရေဆိုကေ ကြမ်းတမ်းစာ စကားကို ပြောရေ။ 2အရာ ငါရို့စာ လောကသားရို့ပိုင် လုပ်စားနီထိုင်ကတ်တေ ဆိုပြီးကေ တစ်ချိုးလူရို့ မှတ်ကတ်တေ။ ငါ သူရို့ကို ကြမ်းတမ်းစာ ရဲဝံ့သတ္တိကို ပြနိုင်ရေ၊ ယေကေလည်း ငါ ယင်းတို့ ရောက်တေခါ သူရို့ကို ကြမ်းတမ်းစာ ရဲဝံ့သတ္တိကို ပြဖို့ မကျလတ်အောင် ငါ ဒေဂု တောင်းပန်ရေ။ 3ငါရို့စာ လောကမာ နီထိုင်ကတ်ကေလည်း ငါရို့မာ စစ်တိုက်ခြင်းတိစာ လောကသားရို့ စစ်တိုက်ခြင်းနမတူ။ 4ငါရို့ စစ်တိုက်ဖို့အတွက် လောကသားရို့ အသုံးပြုကတ်စာ လက်နှက်တိကို အသုံးမပြုကတ်၊ ယေကေလည်း ထာဝရဘုရား၏ တန်ခိုး လက်နှက်တိကိုရာ အသုံးပြုကတ်တေ။ ထိုလက်နှက်တိစာ ရန်သူရို့မာ အကာကွယ်အဖြစ် ရန်ထားစာ အုပ်ထရန်ကို တိုင်အောင်ပင် ဖြိုချဘိုက်လိုက်နိုင်ရေ။ 5ငါရို့စာ လူရို့မာ ထာဝရဘုရားကို သိဖို့စာ ညာဏ်ပညာကို ဆန့်ကျင်ရို့ ဘော်ကြော့ကြင်းစာ ငြင်းခုံခြင်းတိကို ဖျက်စီးကတ်တေ။ အရာ ငါရို့စာ သူရို့မာ ဟိသမျ ဆန့်ကျင်စာ စဉ်းစားချက်တိကို ဖမ်းရို့ သူရို့ကို ခရစ်တော်၏ စကားတော်ကို နာခံစီကတ်တေ။ 6နင်ရို့ အပြည့်အစုံ နာခံကတ်တေခါလည်း မနာခံဘိုင်း ဟိသူရို့ကို ဒါဏ်ပီးဖို့အတွက် ငါရို့ အဆင်သင့် ဟိကတ်ဖို့။ 7နင်ရို့ သက်သက် လူမျက်နှာကို ကြည့်ရို့ တရားစစ်ဆေးဖို့ မသင့်၊ အကြောင်းကား နင်ရို့ ကိုယ်ရို့ကို ခရစ်တော်၏ လူဖြစ်တေ ဟို့ မှတ်ကတ်စာပိုင် ငါရို့လည်း ခရစ်တော်၏ လူဖြစ်ကတ်တေဆိုစာကို နင်ရို့ ဝန်ခံကတ်ရဖို့။ 8အသျှင်စာ ငါရို့ကို အခွင့်အာဏာ ပီးလီရေ၊ ယေကေလည်း နင်ရို့ကို ဖျက်စီးဖို့အတွက် ထိုအခွင့်အာဏာကို ပီးလီစာ မဟုတ်၊ နင်ရို့ကို တိုးတက်အောင် လုပ်ဖို့အတွက် ပီးလီစာ ဖြစ်တေ။ ငါရို့စာ ထိုအခွင့်အာဏာကို ယူရို့ ဘော်ကြော့ကြင်းနီကတ်ကေလည်း ငါရို့မာ ရှက်ဖို့စာ တစ်ခုလည်း မဟိ။ 9ငါ စာစောင်န နင်ရို့ကို ခြောက်တေ ဟို့ နင်ရို့ မမှတ်ကတ်ကေ့။ 10တစ်ချိုးလူရို့ ပြောနီကတ်တေ၊ “ပေါလု ရွီးစာ စာစောင်တိ ကောင်းကောင်း ကြမ်းတမ်းရေ အရာ တန်ခိုးနလည်း ပြည့်စုံရေ။ ယေကေလည်း သူစာ စကားပြောရေခါ သူ့မာ ရဲဝံ့ မဟိ အရာ သူပြောစာ စကားတိစာ တစ်ခုလည်း အဓိပ္ပါယ် မဟိ။” 11ငါရို့ ကိုယ်တိုင် ရောက်ရို့ မဟိဘိုင်း စာစောင်န ပြောစာ စကားတိပိုင်တထန် ရောက်လာရေခါလည်း လုပ်ဖို့ဆိုစာကို ယင်းပိုင်ဇတ် လူရို့ နားလည်ကတ်။ 12နင်ရို့အထဲမာ တစ်ချိုးလူရို့ ကိုယ့်ကိုကိုယ် ချီမွမ်းနီကတ်တေ။ ပြောလိုက်ဖို့ဆိုကေ ငါရို့စာ သူရို့အဖွဲ့မာ ကိုယ်ရို့ကို သွင်းဖို့ ထိုက်တန်ရေ ဟို့ မှတ်ဖို့လည်း မဝံ့ အရာ သူရို့န နှိုင်းယှဉ်ဖို့ ထိုက်တန်ရေ ဟို့ မှတ်ဖို့လည်း မဝံ့! သူရို့စာ ကောင်းကောင်း ပညာတုံးကတ်တေ! သူရို့စာ ကိုယ်ရို့အချင်းချင်း တစ်ယောက်န တစ်ယောက် နှိုင်းယှဉ်နီကတ်တေ အရာ ကိုယ်ရို့အချင်းချင်း တိုင်းထွာနီကတ်တေ။ 13ယေကေလည်း ငါရို့စာ ကိုယ်ရို့ အကြောင်းကို ယူရို့ ဘော်ကြော့ကြင်းဖို့ သင့်စာထက် ပိုရို့ ဘော်ကြော့မကြင်းကတ်။ ယင်းထက်ပင် ထာဝရဘုရား ငါရို့ကို ချပီးစာ လုပ်ငန်းကို ယူရို့ရာ ငါရို့ ဘော်ကြော့ကြင်းကတ်ဖို့ အရာ ထိုလုပ်ငန်းအထဲမာ နင်ရို့လည်း ပါကတ်တေ။ 14ယင်းအတွက်န နင်ရို့ အကြောင်းကို ယူရို့ ဘော်ကြော့ကြင်းရေခါ လုပ်ငန်းကို ကျော်ရို့ ဘော်ကြော့ကြင်းစာ မဟုတ်။ ငါရို့ နင်ရို့ဘားမာ တရားမဟောဘိုင်းန ဘော်ကြော့ကြင်းရေဆိုကေ လုပ်ငန်းကို ကျော်ရို့ ဘော်ကြော့ကြင်းစာ ဖြစ်ဖို့။ ယေကေလည်း တစ်ယောက်လည်း မလားခါပင် ငါရို့ အယင်ဆုံး နင်ရို့တို့ လားရို့ ခရစ်တော်၏ သတင်းကောင်းကို ဟောပြောလီကတ်တေ။ 15အခြားလူရို့ အလုပ်ကို ယူရို့လည်း ငါရို့ ဘော်ကြော့ မကြင်းကတ်၊ အကြောင်းကား ငါရို့ ဘော်ကြော့ကြင်းရေဆိုကေ ကိုယ့်လုပ်ငန်းကို ကျော်ရို့ ဘော်ကြော့ကြင်းစာနတူဖို့။ ယင်းထက်ပင် နင်ရို့မာ ကျုံခြင်းတရား တိုးပွါးရေချက်ချင်း ငါရို့စာ နင်ရို့ဘားမာ အရာလည်း အများကြီး အလုပ်လုပ်ဖို့ ရကတ်ဖို့ဆိုစာကို ငါရို့ မျှော်လင်းကတ်တေ။ 16ယင်းခါ ငါရို့စာ နင်ရို့က ထွက်ရို့ တစ်ခါလည်း သတင်းကောင်းကို မကြားဖူးစာနေရာတိမာ လားရို့ သတင်းကောင်းကို ဟောပြောဖို့ ရကတ်ဖို့။ ယင်းပိုင်ဆိုကေ အခြားတစ်ယောက် လုပ်ခစာ အလုပ်ကို ယူရို့ ဘော်ကြော့ကြင်းရေ ဟို့ ငါရို့ကို တစ်ယောက်လည်း ပြောဖို့ ရကတ်လိမည် မဟုတ်။ 17ယေကေလည်း ကျမ်းစာမာ ရွီးရို့ ဟိရေ၊ “ဘော်ကြော့ကြင်းချင်သူစာ အသျှင်၏ အကြောင်းကို ယူရို့ ဘော်ကြော့ကြင်း။” 18အကြောင်းကား ကိုယ့်ကိုကိုယ် ချီမွမ်းသူစာ အစစ် ချီမွမ်းခြင်းကို မခံရ၊ ယေကေလည်း ထာဝရဘုရား၏ ချီမွမ်းခြင်းကို ခံရသူရာ အစစ် ချီမွမ်းခြင်းကို ခံရရေ။
Copyright information for
RmzSC