2 Corinthians 12
ကိုယ်မြင်ဖူးစာ ကိုယ်ထင်ကို ပြောပြခြင်း
1ဘော်ကြော့ကြင်းရို့ ငါ့မာ တစ်ခုလည်း အမြတ် မဟိကေလည်း ငါ ဘော်ကြော့ကြင်းဖို့ ကျဖို့သိ။ အသျှင် ငါ့ကို ပြလီစာ ကိုယ်ထင်အကြောင်းန ငါ့ဘားမာ ဖေါ်ပြလီစာ အကြောင်းတိကို ငါ ဒေဂု ပြောပြဖို့။ 2ခရစ်တော်ကို ကျုံသူတစ်ယောက်ကို ငါ သိရေ။ သူစာ တစ်ဆယ့်လေးနှစ်အယင်က အမြင့်ဆုံး ဂေါင်းခင်ဘုံတို့ တင်ယူခြင်းကို ခံရလီရေ။ ယင်းခါ သူ့ခန္ဓာကို ယူလားခစာလော မဟုတ်ကေ သူ့ဝိညာဉ်ကို ယူလားခစာလောဆိုစာကို ငါ မသိ၊ ယေကေလည်း ထာဝရဘုရားရာ သိရေ။ 3– 4ထိုသူစာ ပရဒိသုဖုံတို့ တင်ယူခြင်းကို ခံရလီရေဆိုစာကို ငါ သိရေ။ ယင်းခါ ခန္ဓာကို ယူလားခစာလော၊ မဟုတ်ကေ ဝိညာဉ်ကို ယူလားခစာလောဆိုစာကို ငါ မသိ၊ ယေကေလည်း ထာဝရဘုရားရာ သိရေ။ သူစာ ပရဒိသုဖုံမာ တစ်ယောက်ဘားမာလည်း ဖွင့်ရို့ ပြောပြဖို့ အခွင့်မဟိစာ အံ့ဩဖွယ်ရာ အကြောင်းတိကို ကြားရလီရေ။ 5ယင်းအတွက်န ထိုလူအကြောင်းကို ယူရို့ ငါ ဘော်ကြော့ကြင်းဖို့၊ ယေကေလည်း ကိုယ့်အကြောင်းကို ယူရို့ ငါ ဘော်ကြော့မကြင်း။ သက်သက် ကိုယ့်အားနည်းခြင်း အကြောင်းကို ယူရို့ရာ ငါ ဘော်ကြော့ကြင်းဖို့။ 6ငါ ဘော်ကြော့ကြင်းလီရေဆိုကေလည်း ငါ လူဘောပိုင် ဖြစ်လီဖို့ မဟုတ်၊ အကြောင်းကား ငါ ဘော်ကြော့ကြင်းစာ စကားစာ မှန်ရေ။ ယေကေလည်း ငါ့အလုပ်န ငါ့စကားတိကို ကျော်ရို့ ငါ ဘော်ကြော့မကြင်း၊ အကြောင်းကား လူရို့ ငါ့ကို အကြီးအကျယ် မှတ်ဖို့စာကို ငါ မလို။ 7အရာ ငါ ကိုယ်ထင်မာ မြင်ရလီစာ အကြောင်းတိကို ယူရို့ အသျှင် ငါ့ကို ဘော်ကြော့မကြင်းစီချင်။ ယင်းအတွက်န သူစာ ငါ့ကို ဒုက္ခ-ဝေဒနာ ပီးဖို့အတွက် ငါ့ခန္ဓာမာ စူးတစ်ချောင်း သွင်းပီးလီရေ။ ထိုစူးစာ မာရ်နတ်၏ လက်ထောက်ပိုင် ငါ့ကို ဝေဒနာ ပီးရေ။ 8ဒေ ဝေဒနာကို ထုတ်ဘိုက်လိုက်ဖို့အတွက် အသျှင်ဘားမာ ငါ သုံးခေါက်တိုင်အောင် တောင်းပန်လီရေ။ 9ယေကေလည်း သူစာ ငါ့ကို ပြောလီရေ၊ “ငါ့သနားကြင်နာခြင်းစာ နင့်အတွက် လုံလောက်ပျာ၊ အကြောင်းကား နင့်မာ အားနည်းခြင်း ဟိရေခါ ငါ့တန်ခိုး နင့်ဘားမာ အပြည့်အစုံ ပေါ်ထွန်းရေ။” ယင်းအတွက်န ခရစ်တော်၏ တန်ခိုး ငါ့ကနီရို့ အလုပ်လုပ်လတ်အောင် ငါစာ စိတ်အပျော်န ကိုယ့်အားနည်းခြင်း အကြောင်းကို ယူရို့ ဘော်ကြော့ကြင်းဖို့။ 10ငါစာ ခရစ်တော်အကြောင်းန အားနည်းခြင်း၊ အသရေရှုတ်ချခြင်း၊ ညှဉ်းဆဲခြင်း၊ ဝေဒနာ အရာ အခက်ခဲကို ခံရရေဆိုကေ ငါ စိတ်ပျော်ရေ၊ အကြောင်းကား ငါ့မာ အားနည်းခြင်း ဟိခါရာ ငါ အားခွန်နပြည့်စုံရေ။ကောရိန္သုမြို့မာ ကျုံသူရို့အတွက် စိတ်ပူပင်ခြင်း
11ငါ လူဘောပိုင် ဖြစ်လားခဗျာ၊ ယေကေလည်း နင်ရို့ ငါ့ကို အားဒမ လူဘော ဖြစ်အောင် လုပ်လီကတ်တေ၊ အကြောင်းကား နင်ရို့ ငါ့ကို ချီမွမ်းဖို့ သင့်လီကတ်တေ။ ငါစာ တစ်ခုလည်း တန်ဖိုး မဟိ၊ ယေကေလည်း နင်ရို့မာ ထိုကြီးမြတ်စာ တမန်တော်ရို့ထက် ငါ တစ်ဖဲ့လည်း အောက်မကျ။ 12ငါ ကောင်းကောင်း စိတ်ရှည်သည်းခံခြင်းန နင်ရို့ဘားမာ အမျိုးမျိုး အံ့ဩဖွယ်-နိမိတ်လက္ခဏာ အလုပ်တိကို လုပ်လီရေ။ ထိုအလုပ်တိကနီရို့ ငါ ကိုယ့်ကိုကိုယ် တမန်တော် ဖြစ်တေ ဟို့ သက်သီပြလီရေ။ 13နင်ရို့ ငါ့ မျက်စိမာ အခြားအသင်းတော်တိန အရှိရှိ ဖြစ်ကတ်တေ၊ ယေကေလည်း တစ်ခုအကြောင်းအရာမာ နင်ရို့ အခြား ဖြစ်ကတ်တေ။ ယင်းသျှင့်စာ ငါ နင်ရို့က အကူညီ မတောင်းလီ။ ထိုအကြောင်းနပတ်သပ်ရို့ နင်ရို့ ငါ့ကို ခွင့်ရွှတ်ကတ်! 14ငါ နင်ရို့တို့ တတိယခေါက် လားဖို့အတွက် ဒေဂု အဆင်သင့်ဖြစ်ရို့ ဟိရေ။ ငါ နင်ရို့က အကူညီ မတောင်း၊ အကြောင်းကား ငါ နင်ရို့က တစ်ခုလည်း မလို၊ ငါ သက်သက် နင်ရို့ကိုရာ လိုရေ။ အမိအဖအတွက် တန်းကား-ဖွေသျှာ စုဆောင်းဖို့စာ သားသမီးရို့ တာဝန် မဟုတ်၊ ယေကေလည်း သားသမီးရို့အတွက် တန်းကား-ဖွေသျှာ စုဆောင်းဖို့စာ အမိအဖ တာဝန် ဖြစ်တေ။ 15ငါ ကောင်းကောင်း စိတ်ပျော်ရို့ ငါ့မာ ဟိသမျ အားကုံးကို နင်ရို့အတွက် ငါ အသုံးပြုဖို့၊ ယင်းထက်မက ငါ ကိုယ့်ကိုတိုင်အောင်ပင် ပီးလှူဖို့။ ငါ နင်ရို့ကို အများကြီး ချစ်တေဆိုကေ နင်ရို့ ငါ့ကို အနည်းသျှေ ချစ်ကတ်ဖို့လော? 16ဇာမဆို ဖြစ်စီ၊ ငါ နင်ရို့က အကူညီ မတောင်းလီဆိုစာ စကား မှန်ရေ၊ ယေကေလည်း ငါ ပရိယာယ်ဆင်ရို့ နင်ရို့က လိမ်စားရေ ဟို့ နင်ရို့အထဲက ငါ့ကို တစ်ယောက်တစ်ရီ ပြောနိုင်စရာ ဟိရေ။ 17ငါ ဇာပိုင် လိမ်စားလီရေလည်း? ငါ နင်ရို့တို့ ရွှတ်လိုက်သူရို့အထဲက အသူမဆိုတစ်ယောက် နင်ရို့ကို လိမ်စားလီရေလော? 18ငါ တိတုကို နင်ရို့တို့ လားဖို့အတွက် တောင်းပန်လီရေ အရာ သူနအတူ အခြား ညီအစ်ကို တစ်ယောက်ကိုလည်း ရွှတ်လိုက်လီရေ။ တိတု နင်ရို့ကို လိမ်လီရေလော? သူကား နင်ရို့ကို မလိမ်လီ။ ငါန တိတုစာ တစ်စိတ်တည်း ထားရို့ အလုပ်လုပ်နီကတ်တေဆိုစာကို နင်ရို့ သိကတ်တေ။ 19ကိုယ်ရို့ကို ကာကွယ်ဖို့အတွက် ငါရို့ ထိုစကားတိကို ပြောရေ ဟို့ နင်ရို့ ထင်ကတ်စာလော? ငါရို့စာ ခရစ်တော်န တစ်ကိုယ်တည်း ဖြစ်ရို့ ထာဝရဘုရား၏ ရှိက စကားပြောကတ်စာ ဖြစ်တေ။ ချစ်ခင်စာ မိတ်ဆွေရို့၊ နင်ရို့ကို ဝိညာဉ်ရေးဖက်က ခိုင်မာအောင် လုပ်ဖို့အတွက် ငါရို့ ထိုစကားတိကို ပြောကတ်စာ ဖြစ်တေ။ 20ငါ ကြောင်းကြနီစာကား၊ ငါ နင်ရို့တို့ လာရေခါ ငါ နင်ရို့ကို မြင်ချင်စာပိုင် မြင်ရဖို့ မဟုတ် အရာ နင်ရို့လည်း ငါ့ကို မြင်ချင်စာပိုင် မြင်ရကတ်ဖို့ မဟုတ်။ နင်ရို့အထဲမာ ရန်ဖြစ်ခြင်း၊ မနာလိုခြင်း၊ ဒေါသထွက်ခြင်း၊ အသင်းခွဲခြင်း၊ ပုတ်ခတ်ရို့ စကားပြောခြင်း၊ စကားတင်းပြောခြင်း၊ စိတ်နီမြင့်ခြင်း အရာ ရောင်းရင်းသပ်ခြင်း ဟိဖို့။ 21ငါ အရာလည်း ကြောင်းကြနီစာကား၊ ငါ နင်ရို့တို့ အရာတစ်ပြန် လာရေခါ ငါ့ထာဝရဘုရားစာ ငါ့ကို နင်ရို့ ရှိက အရှက်ချဖို့၊ အကြောင်းကား အယင်ခါ အပြစ်လုပ်လီသူရို့စာ သူရို့မာ မစင်ကြယ်ခြင်း၊ ကာမဂုဏ် လိုက်စားခြင်း အရာ ဆိုးယုတ်စာ အကျင့်သီလတိက စိတ်လှည့်ရို့ မလာလီကတ်သိ။ ယင်းခါ သူရို့ အကြောင်းန ငါ စိတ်ဒုက္ခ ရဖို့။
Copyright information for
RmzSC