2 Corinthians 2
ပေါလု ဝမ်းနည်းခြင်း
1ယင်းအတွက်န ငါ အရာတစ်ပြန် နင်ရို့ကို စိတ်ဒုက္ခ ပီးဖို့အတွက် နင်ရို့တို့ မလာဗျာ ဟို့ ဆုံးဖြတ်လီရေ။ 2အကြောင်းကား ငါ နင်ရို့ကို စိတ်ဒုက္ခ ပီးရေဆိုကေ ငါ့ကို အသူ စိတ်ဖျော်ပီးဖို့သိလည်း? ငါ့အကြောင်းန စိတ်ဒုက္ခ ရလီသူရို့ နင်ရို့စာ ငါ့ကို ဇာပိုင်ပျင်ရို့ စိတ်ဖျော်ပီးကတ်ဖို့လည်း? 3ငါ လားရေခါ ငါ အများကြီး ဝမ်းသာခြင်း ရဖို့ သင့်သူရို့က ငါ စိတ်ဒုက္ခ ရဖို့စာကို မလို။ ယင်းအတွက်န ငါ အခြားတစ်ခု စာစောင်ကို ▼▼အခြားတစ်ခု စာစောင်ဆိုစာ ကောရိန္သုဩဝါဒ ပထမ စာစောင် မဟုတ်ပါ။ ဒေ စာစောင်စာ ပျောက်လားခစာ စာစောင် ဖြစ်ပါရေ။
ရွီးလီစာ ဖြစ်တေ။ ငါ စိတ်ပျော်ရေဆိုကေ နင်ရို့လည်း စိတ်ပျော်ရေဆိုစာကို ငါ ကျုံရို့ စိတ်ချရေ။ 4ငါ ကောင်းကောင်း စိတ်ဆိုးဝမ်းနည်းရို့ မျက်ရည် ကျပြီးကေ နင်ရို့တို့ ထိုစာစောင်ကို ရွီးလိုက်လီရေ။ ငါ နင်ရို့ကို စိတ်ဒုက္ခ ပီးဖို့အတွက် နင်ရို့တို့ ထိုစာစောင်ကို ရွီးလိုက်လီစာ မဟုတ်၊ ယေကေလည်း ငါ နင်ရို့ကို ဇာလှောက် ချစ်တေလည်းဆိုစာကို နင်ရို့ သိကတ်ပတ်စီအတွက် ငါ ထိုစာစောင်ကို ရွီးလိုက်လီစာ ဖြစ်တေ။ မတရားလုပ်သူကို ခွင့်ရွှတ်ခြင်း
5နင်ရို့အထဲက တစ်ယောက် ငါ့ကို စိတ်ဒုက္ခ ပီးလီရေ၊ ယေကေလည်း သူစာ သက်သက် ငါ့ကို စိတ်ဒုက္ခ ပီးလီစာ မဟုတ်သိ။ ယင်းထက်ပင် သူစာ နင်ရို့ အားကုံးသူကို တစ်ဖဲ့သျှေဆိုကေလည်း စိတ်ဒုက္ခ ပီးလီရေ။ ငါ ဖြည့်သားထည့်ရို့ စကားပြောစာ မဟုတ်။ 6နင်ရို့အထဲက အများပြားလူရို့ ညှီရို့ ပီးလီကတ်စာ အပြစ်ဒါဏ်စာ သူ့အတွက် လုံလောက်ပျာ။ 7ယင်းအတွက်န နင်ရို့ ဒေဂု သူ့ကို ခွင့်ရွှတ်ရို့ စိတ်ဖျော်ပီးကတ်ဖိ။ ယင်းပိုင် မဟုတ်ဆိုကေ သူစာ အများကြီး ဝမ်းနည်းရို့ စိတ်ပျက်လားလီဖို့။ 8ယင်းအတွက်န နင်ရို့ သူ့ကို အမှန် ချစ်တေဆိုစာကို သိလတ်အောင် သက်သီပြဖို့အတွက် ငါ အရေးတကြီး နင်ရို့ကို တောင်းပန်ရေ။ 9နင်ရို့ အကြောင်းအရာတိုင်းမာ နာခံမှု ဟိရေလော မဟိလောဆိုစာကို စစ်ဆေးရို့ ကြည့်ဖို့အတွက် ငါ နင်ရို့တို့ ထိုစာစောင်ကို ရွီးလိုက်လီစာ ဖြစ်တေ။ 10နင်ရို့ အသူ့ကိုမဆို ခွင့်ရွှတ်တေဆိုကေ ငါလည်း သူ့ကို ခွင့်ရွှတ်တေ။ ငါ အသူ့ကိုမဆို ခွင့်ရွှတ်တေဆိုကေ နင်ရို့ ကောင်းကျိုးရေးအတွက် ခရစ်တော်၏ ရှိက ခွင့်ရွှတ်လီစာ ဖြစ်တေ။ 11ယင်းပိုင်ဆိုကေ မာရ်နတ် ငါရို့ကို အနိုင်ယူဖို့အခွင့် ရလိမည် မဟုတ်၊ အကြောင်းကား မာရ်နတ်၏ အကြံကိုကား ငါရို့ သိရေ။ခရစ်တော်ကနီရို့ အောင်မြင်ခြင်း
12ငါ ခရစ်တော်၏ သတင်းကောင်းကို ဟောပြောဖို့အတွက် တရောမြို့တို့ လားလီရေခါ အလုပ်လုပ်ဖို့အတွက် အသျှင် ငါ့ကို အခွင့်ရေးတစ်ခု ပီးလီရေ။ 13ယေကေလည်း ငါ စိတ်အီးချမ်းသာ မကျလီ၊ အကြောင်းကား ငါ့မာ ကျူံသူ ညီအစ်ကို တိတုစာ နင်ရို့ အကြောင်းနပတ်သပ်ရို့ သတင်းကို ယူရို့ တရောမြို့တို့ မရောက်လီ။ ယင်းအတွက်န ထိုမြို့သားရို့က ပြန်ခွင့်တောင်းရို့ တိတုကို တွိဖို့အတွက် ငါ မာကေဒေါနိပြည်နယ်တို့ လားခလီရေ။ 14ယေကေလည်း ထာဝရဘုရားကို ငါ ကျေးဇူးတင်ရေ၊ အကြောင်းကား သူစာ ခရစ်တော်န တစ်ကိုယ်တည်း ဖြစ်ခြင်းကနီရို့ အမြဲတိုင်း ငါရို့ကို အောင်မြင်ခြင်းလမ်းကို ပြပီးရေ။ ခရစ်တော်ကို သိရခြင်းစာ အမွှီးနံသာနတူရေ။ ထာဝရဘုရားစာ ဒေ အမွှီးနံသာကို ငါရို့ကနီရို့ ဟိသမျ နေရာမာ ဖြန့်ချယ်နီရေ။ 15ခရစ်တော်၏ ဘဝပိုင် ငါရို့ ဘဝလည်း ထာဝရဘုရားဘားမာ လှူစာ အမွှီးနံသာ ဖြစ်တေ။ ဒေ အမွှီးနံသာစာ ကယ်တင်ခြင်းကို ရနီသူရို့န ပျက်စီးခြင်းတို့ ရောက်နီသူရို့အထဲမာ အနံ့ချုံနီရေ။ 16ယေကေလည်း ဒေ အမွှီးနံသာစာ ပျက်စီးခြင်းတို့ ရောက်နီသူရို့အတွက် သီခြင်းတရား၏ အနံ့ ဖြစ်တေ အရာ ကယ်တင်ခြင်းကို ရနီသူရို့အတွက် အသက်ရှင်ခြင်း၏ အနံ့ ဖြစ်တေ။ ဒေပိုင် အလုပ်ကို လုပ်ဖို့အတွက် အသူ ထိုက်တန်ရေလည်း? 17ငါရို့စာ အခြားလူရို့ပိုင် ကိုယ်ရို့မာ အမြတ် ရဖို့အတွက် ထာဝရဘုရား၏ စကားတော်ကို အရောင်းအဝယ် မလုပ်။ ယေကေလည်း ငါရို့စာ ခရစ်တော်န တစ်ကိုယ်တည်း ဖြစ်ရို့ ထာဝရဘုရားက ရွှတ်လိုက်သူအဖြစ် ထာဝရဘုရား၏ ရှိက ဖြူစင်စာ စိတ်နှလုံးန ငါရို့ သူ၏ စကားတော်ကို ဟောပြောနီကတ်တေ။
Copyright information for
RmzSC