2 Corinthians 3
ထာဝရဘုရား၏ ဝတ်ပြုသူရို့အတွက် စာချုပ်အသစ်
1ငါရို့ ထိုစကားတိကို ပြောရို့ အရာတစ်ပြန် ကိုယ်ရို့ကို ချီမွမ်းကတ်စာလော? ငါရို့လည်း တစ်ချိုးလူရို့ပိုင် နင်ရို့ဘားမာ မဟုတ်ကေ နင်ရို့က ထောက်ခံချက် စာစောင်ကို အလိုဟိရေလော? တစ်ခါလည်း အလိုမဟိ! 2နင်ရို့ ကိုယ်တိုင် ငါရို့ စိတ်နှလုံးမာ ရွီးထားစာ ထောက်ခံချက် စာစောင် ဖြစ်ကတ်တေ။ ထိုထောက်ခံချက် စာစောင်ကို အားကုံးသူ သိကတ်တေ အရာ အားကုံးသူ ဖတ်ဖူးကတ်တေ။ 3နင်ရို့ ကိုယ်တိုင် ခရစ်တော် ရွီးစာ စာစောင် ဖြစ်ကတ်တေ အရာ ငါရို့ လုပ်စာအလုပ်၏ အကျိုး ဖြစ်ကတ်တေဆိုစာကို ပပွင့်လလင်း မြင်ရရေ။ ဒေ စာစောင်ကို မှင်ဆီန ရွီးလီစာ မဟုတ်၊ ယေကေလည်း အသက်သျှင် ထာဝရဘုရား၏ ဝိညာဉ်တော်န ရွီးလီစာ ဖြစ်တေ။ အရာ ဒေ စာစောင်ကို ကျောက်ပြက်မာ ရွီးလီစာ မဟုတ်၊ ယေကေလည်း လူရို့ စိတ်နှလုံးမာ ရွီးလီစာ ဖြစ်တေ။ 4ငါရို့စာ ခရစ်တော်ကနီရို့ ထာဝရဘုရားကို ကျုံရေအတွက်န ထို ဟိသမျ အကြောင်းအရာကို စိတ်ချရို့ ရကတ်ပျာ။ 5ယေကေလည်း ငါရို့စာ ကိုယ်ရို့ အားခွန်န ဇာအလုပ်မဆိုတစ်ခု လုပ်နိုင်ရေ ဟို့ ငါရို့ ပြောကတ်စာ မဟုတ်။ ယင်းထက်ပင် ငါရို့ ထိုအားခွန်ကို ထာဝရဘုရားကရာ ရကတ်တေ။ 6ထာဝရဘုရားစာ စာချုပ်အသစ်တစ်ခု အကြောင်းကို ဟောပြောဖို့အတွက် ငါရို့ကို ထိုက်တန်အောင် လုပ်လီရေ။ ဒေ စာချုပ်အသစ်စာ အက္ခရာန ရွီးထားစာ ပညှတ်တရား မဟုတ်၊ ယေကေလည်း သန့်ရှင်းသောဝိညာဉ်တော်၏ စာချုပ် ဖြစ်တေ၊ အကြောင်းကား ပညှတ်တရားစာ လူကို သီခြင်းတရားတို့ ယူလားရေ၊ ယေကေလည်း သန့်ရှင်းသောဝိညာဉ်တော်စာ လူကို အသက် ပီးရေ။ 7လူကို သီခြင်းတရားတို့ ယူလားစာ ကျောက်ပြက်မာ ရွီးထားစာ ပညှတ်တရားကို ပီးလီရေခါ ထာဝရဘုရား၏ ဘုန်းရောင်ခြေတော် ပေါ်ထွန်းလီရေ။ ယင်းခါ ထာဝရဘုရား၏ ဘုန်းရောင်ခြေတော်အကြောင်းန မောရှေ၏ မျက်နှာလည်း ထွန်းတောက်လီရေ။ ထိုဘုန်းရောင်ခြေတော်စာ နောက်က အသာအသာ ပြည်လားခကေလည်းသောက် ဣသရေလလူမျိုးရို့စာ မောရှေ၏ မျက်နှာတို့ ကြည့်ဖို့ မနိုင်ကတ်လီ။ 8ထိုပညှတ်တရားစာ ဒေလှောက် ဘုန်းတန်ခိုးန ပြည့်စုံရေဆိုကေ သန့်ရှင်းသောဝိညာဉ်တော်၏ အလုပ်စာ အရာလည်း ပိုရို့ ဘုန်းတန်ခိုးန ပြည့်စုံဖို့ မဟုတ်လော? 9လူကို အပြစ်တင်စာ ပညှတ်တရားစာ ဒေလှောက် ဘုန်းတန်ခိုးန ပြည့်စုံရေဆိုကေ လူကို သူတော်ကောင်း ဖြစ်အောင် လုပ်စာ သန့်ရှင်းသောဝိညာဉ်တော်၏ အလုပ်စာ အရာလည်း ပိုရို့ ဘုန်းတန်ခိုးန ပြည့်စုံရေ! 10အယင်က ပညှတ်တရားမာ အမှန် ဘုန်းတန်ခိုး အပြည့်အစုံ ဟိလီရေ။ ယေကေလည်း ဒေဂု ထိုပညှတ်တရားမာ ဘုန်းတန်ခိုး မဟိဗျာ၊ အကြောင်းကား ပညှတ်တရား၏ နည်းလမ်း ဘုန်းတန်ခိုးထက် သန့်ရှင်းသောဝိညာဉ်တော်၏ နည်းလမ်း ဘုန်းတန်ခိုးစာ အရာလည်း ပြည့်စုံရေ။ 11အကြောင်းကား ကွယ်ပျောက်လားခစာ ပညှတ်တရား၏ နည်းလမ်းစာ ဒေလှောက် ဘုန်းတန်ခိုးန ပြည့်စုံလီရေဆိုကေ ထာဝရပတ်လုံးတည်မြဲစာ သန့်ရှင်းသောဝိညာဉ်တော်၏ နည်းလမ်းစာ အရာလည်း ယင်းထက် ပိုရို့ ဘုန်းတန်ခိုးန ပြည့်စုံဖို့ မဟုတ်လော! 12ငါရို့မာ ယင်းပိုင် မျှော်လင်းချက် ဟိရေအတွက်န ငါရို့စာ ရဲဝံ့သတ္တိန စကား ပြောနိုင်ကတ်တေ။ 13ငါရို့စာ မောရှေပိုင် မဟုတ်၊ အကြောင်းကား သူစာ ကိုယ့်မျက်နှာက ဘုန်းရောင်ခြေတော် ပြည်လားခစာကို ဣသရေလလူမျိုးရို့ မမြင်လတ်အောင် ကိုယ့်မျက်နှာကို ဖုံးထားလီရေ။ 14ယေကေလည်း ထိုသူရို့မာ စိတ်နှလုံးစာ ထိုင်းလားခလီရေ။ ယင်းအတွက်န ဒေနိတိုင်အောင် စာချုပ်အဟောင်းကို ဖတ်ပြရေခါ သူရို့ စိတ်နှလုံးကို ဖုံးရို့ ဟိရေအတွက်န အနက်အဓိပ္ပါယ်ကို နားမလည်နိုင်ကတ်၊ အကြောင်းကား ခရစ်တော်န တစ်ကိုယ်တည်း ဖြစ်ခြင်းကနီရို့ရာ ထိုအဖုံး ပွင့်လားခရေ။ 15ယေကေလည်း ဒေနိတိုင်အောင် မောရှေ၏ ပညှတ်တရား ကျမ်းတိကို ဖတ်ပြရေခါ ဣသရေလလူမျိုးရို့မာ စိတ်နှလုံးစာ ဖုံးရို့ ဟိရေ။ 16ယေကေလည်း သူရို့အထဲက အသူမဆို စိတ်လှည့်ရို့ အသျှင်တို့ လာရေဆိုကေ သူ့မာ ထိုအဖုံးစာ ပွင့်လားခရေ။ 17ဒေ အသျှင်စာ သန့်ရှင်းသောဝိညာဉ်တော် ဖြစ်တေ အရာ အသျှင်၏ ဝိညာဉ်တော် ဟိစာနေရာမာ လွတ်မြောင့်ခြင်း ဟိရေ။ 18ယင်းအတွက်န ငါရို့ ခရစ်တော်ကို ကျုံသူရို့ အားကုံးသူ မျက်နှာကို ဖွင့်ရို့ မှန်မာ ကြည့်စာပိုင် အသျှင်၏ ဘုန်းရောင်ခြေတော်ကို ကြည့်ရို့ ကြည့်ရို့ ငါရို့ ကိုယ်တိုင်လည်း ဘုန်းရောင်ခြေတော်န ပြည့်စုံနီကတ်ပျာ။ အရာ ငါရို့စာ ပြောင်းလှဲပြီးကေ အသျှင်ပိုင် ဖြစ်နီကတ်ပျာ။ ထိုပြောင်းလှဲခြင်းစာ အသျှင် ဟို့ ခေါ်စာ သန့်ရှင်းသောဝိညာဉ်တော်၏ တန်ခိုးန ဖြစ်နိုင်ရေ။
Copyright information for
RmzSC