2 Corinthians 4
ခရစ်တော်စာ ထာဝရဘုရား၏ ပုံသဏ္ဍာန် ဖြစ်ခြင်း
1ထာဝရဘုရားစာ ငါရို့ကို သနားရို့ သာသနာပြုဖို့စာ တာဝန်ကို ပီးလီရေ။ ယင်းအတွက်န ငါရို့ တစ်ခါလည်း စိတ်မပျက်ကတ်။ 2အခြားလူရို့စာ အထဲမာအထဲ ရှက်ကောင်းဖွယ်ရာ အလုပ်တိကို လုပ်နီကတ်တေ၊ ယေကေလည်း ငါရို့စာ သူရို့ပိုင် ထိုရှက်ကောင်းဖွယ်ရာ အလုပ်တိကို တစ်ခါလည်း မလုပ်ကတ်။ အရာ ငါရို့စာ ပရိယာယ်ကို မသုံးကတ် အရာ ထာဝရဘုရား၏ စကားတော်ကို အမှား သွန်သင်မပီးကတ်။ ယင်းထက်ပင် ငါရို့စာ မှန်ကန်ခြင်းတရားကို ပပွင့်လလင်း ဟောပြောရို့ ထာဝရဘုရားန ဟိသမျ လူရို့ ရှိက ကိုယ်ရို့ ရိုးသားခြင်းကို ဖေါ်ပြကတ်တေ။ 3ယေကေလည်း ငါရို့ ဟောပြောကတ်စာ သတင်းကောင်းစာ ဖုံးရွှက်ရို့ ဟိရေဆိုကေ ပျက်စီးခြင်းတို့ ရောက်နီသူရို့ဘားမာရာ ဖုံးရွှက်ရို့ ဟိရေ။ 4ဒေ လောကကို အုပ်ချုပ်သူ မာရ်နတ်စာ မကျုံသူရို့ စိတ်ကို မှောင်မိုက်အောင် လုပ်ဘိုက်လိုက်ပျာ။ ယင်းအတွက်န သူရို့စာ သတင်းကောင်း၏ အလင်းကို မမြင်ရကတ်။ ဒေ သတင်းကောင်းစာ ခရစ်တော်၏ ဘုန်းတန်ခိုး အကြောင်း ဖြစ်တေ အရာ ခရစ်တော်စာ ထာဝရဘုရား၏ ပုံသဏ္ဍာန်နတတူတည်း ဖြစ်တေ။ 5ငါရို့ ကိုယ်ရို့ အကြောင်းကို ဟောပြောကတ်စာ မဟုတ်။ ယင်းထက်ပင် ယေရှုခရစ်တော်စာ အသျှင် ဖြစ်တေဆိုစာကို ငါရို့ ဟောပြောကတ်စာ ဖြစ်တေ။ အရာ ငါရို့စာ ယေရှု၏ အကြောင်းန နင်ရို့ ကျွန် ဖြစ်ကတ်ပျာ။ 6အကြောင်းကား ထာဝရဘုရားစာ၊ “အမိုက်မှောင်ထဲမာ အလင်း ဖြစ်စီ” ဟို့ ပြောလီရေ။ ထာဝရဘုရားစာ ငါရို့ စိတ်နှလုံးမာ ထိုအလင်းကို ထွန်းတောက်စီလီရေ၊ အကြောင်းကား ယေရှုခရစ်တော်၏ မျက်နှာမာ ထွန်းတောက်နီစာ ကိုယ့်ဘုန်းရောင်ခြေတော်ကို ငါရို့ကို သိစီချင်လီရေ။မြေအိုးထဲမာ ထည့်ထားစာ ဥစ္စာ
7ယေကေလည်း ထာဝရဘုရားစာ ထိုဥစ္စာဆိုစာ သတင်းကောင်း၏ အလင်းကို မြေအိုးထဲမာ ထည့်ထားလီရေ အရာ ငါရို့ ကိုယ်တိုင် ထိုမြေအိုး ဖြစ်ကတ်တေ။ ဒေ မဟာတန်ခိုးစာ ထာဝရဘုရားက လာလီရေ၊ ယေကေလည်း ငါရို့က လာလီစာ မဟုတ်ဆိုစာကို လူရို့ သိကတ်ပတ်စီအတွက် ထာဝရဘုရားစာ ထိုသတင်းကောင်း၏ အလင်းကို မြေအိုးထဲမာ ထည့်ထားလီရေ။ 8ငါရို့ ဟိသမျဖက်က ဒုက္ခကို ခံရကတ်ကေလည်း စိတ်မပျက်ကတ်။ အရာ ဇာလုပ်ရဖို့လည်း ဆိုပြီးကေ အကြံမရ ဖြစ်ကတ်ကေလည်း ငါရို့ အားမသျှော့ကတ်။ 9ငါရို့ ညှဉ်းဆဲခြင်းကို ခံရကတ်ကေလည်း ထာဝရဘုရားစာ ငါရို့ကို မစွန့်။ အရာ မြေပြင်မာ လဲကျအောင် အထိုး ခံကတ်ကေလည်း ငါရို့စာ မသီကတ်။ 10ငါရို့စာ အမြဲတိုင်း အသျှင်ယေရှု၏ အသီခံခြင်းကို ကိုယ်ရို့ ခန္ဓာမာ ဆောင်ယူလားနီကတ်တေ၊ အကြောင်းကား ငါရို့ ခန္ဓာမာ အသျှင်ယေရှု၏ ဘဝကိုလည်း ပေါ်ထွန်းစီချင်ရေ။ 11ငါရို့ အသက်အရှင် ဟိကတ်သူရို့စာ ယေရှုအတွက် အမြဲတိုင်း သီခြင်းတရားန ရင်ဆိုင်နီရကတ်တေ၊ အကြောင်းကား ငါရို့ သင်္ခါရ ခန္ဓာမာ ယေရှု၏ ဘဝကိုလည်း ပေါ်ထွန်းစီချင်ရေ။ 12နင်ရို့ ဝိညာဉ်၏ အသက်ကို ရကတ်ပတ်စီအတွက် ငါရို့စာ သီခြင်းတရားန ရင်ဆိုင်နီရကတ်တေ။ 13ကျမ်းစာမာ ရွီးရို့ ဟိရေ၊ “ငါ ကျုံရေအတွက်န စကားပြောစာ ဖြစ်တေ။” ယင်းပိုင်ထတန် ငါရို့လည်း ကျုံရေအတွက်န စကားပြောကတ်စာ ဖြစ်တေ၊ 14အကြောင်းကား အသျှင်ယေရှုကို ပြန်ရှင်ထမြောင့်စီလီစာ ထာဝရဘုရားစာ ငါရို့ကိုလည်း ယေရှုနအတူ ပြန်ရှင်ထမြောင့်စီဖို့ဆိုစာကို အရာ သူစာ နင်ရို့နအတူ ငါရို့ကိုလည်း ကိုယ့်ရှိက ရပ်စီဖို့ဆိုစာကို ငါရို့ သိရေ။ 15နင်ရို့ ကောင်းကျိုးရေးအတွက် ဟိသမျ အားကုံး ဖြစ်ပျက်လာစာ ဖြစ်တေ၊ အကြောင်းကား ထာဝရဘုရား၏ ကျေးဇူးတော်ကို ခံရသူ တစ်ခါထက် တစ်ခါ တိုးပွါးလာရေခါ ထာဝရဘုရားကို ကျေးဇူးတင်ခြင်းန ဘုန်းတန်ခိုးလည်း တစ်ခါထက် တစ်ခါ တိုးပွါးလာဖို့။ကျုံခြင်းတရားန နီထိုင်ခြင်း
16ယင်းအတွက်န ငါရို့စာ စိတ်မပျက်ကတ်၊ အကြောင်းကား ငါရို့မာ ကိုယ်ခန္ဓာစာ တစ်ဖွဲဖွဲ ကြုံကေလည်းသောက် ငါရို့အထဲမာ ဝိညာဉ်စာ တစ်ရက်ထက်တစ်ရက် အသစ် ဖြစ်နီရေ။ 17ဒေဂု ငါရို့ တစ်နားသျှေအတွက် တစ်ဖဲ့သျှေ ဒုက္ခ-ဝေဒနာကို ခံရနီကတ်တေ။ ယေကေလည်း ငါရို့ ခံရနီကတ်စာ ဒုက္ခ-ဝေဒနာအတွက် တိုင်းထွာရို့ မနိုင်စာ ဘုန်းတန်ခိုးကို ငါရို့ ထာဝရပတ်လုံး ရကတ်ဖို့။ 18ငါရို့စာ မြင်ရစာဖက်တို့ ကြည့်ကတ်စာ မဟုတ်၊ ယေကေလည်း မမြင်ရစာဖက်တို့ ကြည့်ကတ်စာ ဖြစ်တေ။ မြင်ရစာတိစာ တစ်နားသျှေရာ တည်မြဲရေ၊ ယေကေလည်း မမြင်ရစာတိစာ ထာဝရပတ်လုံး တည်မြဲရေ။
Copyright information for
RmzSC