2 Corinthians 6
1ယင်းအတွက်န ငါရို့စာ ထာဝရဘုရား၏ လုပ်ဖေါ်ကိုင်ဖက်အဖြစ် နင်ရို့ကို တောင်းပန်ရေ၊ နင်ရို့မာ ထာဝရဘုရားက ခံရလီကတ်စာ ကျေးဇူးတော်ကို အကျိုးမဟိ မဖြစ်စီကတ်ကေ့။ 2အကြောင်းကား ထာဝရဘုရားစာ ကျမ်းစာမာ ပြောလီရေ၊“ငါ ထိုက်တန်စာအချိန်မာ နင် ဆုတောင်းစာကို နားထောင်လီရေ၊
အရာ နင် ကယ်တင်ခြင်း ရဖို့စာနိမာ ငါ နင့်ကို ကူညီလီရေ။”နားထောင်၊ ဒေဂုပင် ထိုက်တန်စာအချိန် ဖြစ်တေ အရာ ဒေနိပင် ကယ်တင်ခြင်း ရဖို့စာနိ ဖြစ်တေ။
ဝတ်ပြုသူ အစစ် ဖြစ်တေဆိုစာကို သက်သီပြခြင်း
3ခရစ်တော် အကြောင်းနပတ်သပ်ရို့ ငါရို့ ဟောပြောကတ်စာ တရားတော်ကို အပြစ်တင်ခြင်းန ကင်းစီချင်ရေ။ ယင်းအတွက်န အခြားလူရို့ စိတ်မာ အဆီးအတား ဖြစ်ဖို့စာအလုပ် တစ်ခုကိုလည်း ငါရို့ မလုပ်။ 4ယင်းထက်ပင် ငါရို့ ဟိသမျ ဖက်က ထာဝရဘုရား၏ ဝတ်ပြုသူ ဖြစ်တေဆိုစာကို ငါရို့ သက်သီပြကတ်တေ။ ငါရို့စာ ညှဉ်းဆဲခြင်း၊ ဖီးဒုက္ခ အရာ အခက်ခဲ-ပင်ပန်းခံရို့ နီကတ်တေ။ 5ငါရို့ အခါပေါင်းများစွာ အဘုတ် ခံလီကတ်တေ၊ ထောင်မာ အထည့် ခံလီကတ်တေ၊ ရောင်းရင်းသပ်ခြင်းကို ခံလီကတ်တေ၊ မနားမနီဘိုင်းန ကြိုးစားအားထုတ်ရို့ အလုပ်လုပ်လီကတ်တေ၊ ညဉ့်ပေါင်းများစွာ မအိပ်ဘိုင်းန နီလီကတ်တေ အရာ ရက်ပေါင်းများစွာ မစားမသောက်ဘိုင်းန နီလီကတ်တေ။ 6– 7ယင်းသျှင့်ကိုအပယ် ငါရို့မာ သန့်ရှင်းခြင်း၊ ညာဏ်ပညာ၊ သည်းခံခြင်း၊ သနားကြင်နာခြင်း၊ သန့်ရှင်းသောဝိညာဉ်တော်ကို ရခြင်း၊ စင်ကြယ်စာ ချစ်ခြင်းမေတ္တာ၊ မှန်ကန်ခြင်းတရားကို ဟောပြောခြင်း အရာ ထာဝရဘုရား၏ တန်ခိုးကနီရို့လည်း ငါရို့စာ ထာဝရဘုရား၏ ဝတ်ပြုသူ ဖြစ်တေဆိုစာကို သက်သီပြကတ်တေ။ အရာ ရိုးသားစာ လက်နှက်ကို အလက်နှစ်ဖက်န ကိုင်ရို့ ငါရို့စာ ထာဝရဘုရား၏ ဝတ်ပြုသူ ဖြစ်တေဆိုစာကို သက်သီပြကတ်တေ။ 8လူရို့ ငါရို့ကို ရိုသေချင် မရိုသေ၊ အကောင်း ပြောချင်ကေပြော အဆိုး ပြောချင်ကေပြော၊ ယေကေလည်း ငါရို့စာ ထာဝရဘုရား၏ ဝတ်ပြုသူ ဖြစ်တေဆိုစာကို သက်သီပြကတ်တေ။ အရာ လူရို့စာ ငါရို့ကို ဘောရီးတတ် ဟို့ ပြောကတ်တေ၊ ယေကေလည်း ငါရို့ကား အမှန် စကားကို ပြောနီကတ်တေ။ 9လူရို့စာ ငါရို့ကို တမန်တော်အဖြစ် လက်မခံချင်ကတ်၊ ယေကေလည်း အားကုံးသူ ငါရို့ကို တမန်တော် ဖြစ်တေ ဟို့ သိကတ်တေ။ ငါရို့ သီဖို့စာပိုင် ဖြစ်နီကတ်ပျာ၊ ယေကေလည်း ငါရို့ မသီကတ်။ အရာ ငါရို့စာ အဘုတ်ခံနီကတ်တေ၊ ယေကေလည်း ငါရို့ကို အသီမသတ်။ 10ငါရို့ ကောင်းကောင်း စိတ်ဒုက္ခ ရနီကတ်တေ၊ ယေကေလည်း ငါရို့ စိတ်နှလုံးမာ ပျော်ပါးခြင်းန ပြည့်စုံနီရေ။ ငါရို့ ကိုယ်တိုင် ဆင်းရဲကတ်တေ၊ ယေကေလည်း ငါရို့စာ လူအများကြီးကို ချမ်းသာအောင် လုပ်နီကတ်တေ။ ငါရို့မာ တစ်ခုလည်း မဟိ၊ ယေကေလည်း ငါရို့ ဟိသမျ အားကုံးကို ပိုင်ဆိုင်ကတ်တေ။ ယင်းပိုင် ငါရို့စာ ထာဝရဘုရား၏ ဝတ်ပြုသူ ဖြစ်တေဆိုစာကို သက်သီပြကတ်တေ။ 11အိုး ကောရိန္သုမြို့မာဟိစာ ကျုံသူရို့၊ ငါရို့ နင်ရို့ဘားမာ ပပွင့်လလင်း စကား ပြောကတ်လီရေ အရာ ငါရို့မာ စိတ်နှလုံးစာ နင်ရို့အတွက် ဖွင့်ထားရို့ ဟိရေ။ 12နင်ရို့အတွက် ငါရို့ စိတ်နှလုံးမာ ချစ်ခြင်းမေတ္တာ မကုန်သိ၊ ယေကေလည်း ငါရို့အတွက် နင်ရို့ စိတ်နှလုံးမာ ချစ်ခြင်းမေတ္တာ နည်းလားခဗျာ။ 13ငါ့ သားသမီးအဖြစ် ငါ နင်ရို့ကို ပြောရေ၊ ငါရို့ နင်ရို့ကို ချစ်စာပိုင် နင်ရို့လည်း ငါရို့ကို ချစ်ကတ်။မကျုံသူရို့ အကြောင်းနပတ်သပ်ရို့ သတိပီးခြင်း
14နင်ရို့စာ မကျုံသူရို့န လက်တွဲရို့ တစ်ခုလည်း မလုပ်ကတ်ကေ့၊ အကြောင်းကား တရားအလုပ်စာ မတရားအလုပ်န ဇာပိုင် တူရေလည်း? အလင်းစာ အမိုက်မှောင်န ဇာပိုင် တူရေလည်း? 15ခရစ်တော်စာ ဗေလျာလ ဟို့ ခေါ်စာ မာရ်နတ်န ဇာပိုင် တူရေလည်း? အရာ ကျုံသူရို့စာ မကျုံသူရို့န ဇာပိုင် တူရေလည်း? 16အရာ ထာဝရဘုရား၏ ကျိန်းဝပ်စာ ကျောင်းတော်မာ ရုပ်တုအတွက် နေရာ ဇာမာလည်း? အကြောင်းကား ငါရို့ကား အသက်သျှင် ထာဝရဘုရား၏ ကျိန်းဝပ်စာ ကျောင်းတော် ဖြစ်ကတ်တေ။ ကျမ်းစာမာ ထာဝရဘုရားစာ ပြောလီရေ၊“ငါ ကိုယ့်လူရို့အထဲမာ ကျိန်းဝပ်ဖို့၊
သူရို့နအတူ လမ်းသျှောက်ဖို့။
ငါ သူရို့မာ ထာဝရဘုရား ဖြစ်ဖို့၊
သူရို့စာ ငါ့ လူဖြစ်ကတ်ဖို့။” 17ထာဝရဘုရားစာ အရာလည်း ပြောလီရေ၊
“ယင်းအတွက်န နင်ရို့ မကျုံသူရို့အထဲက ထွက်လာလတ်ကတ်၊
အရာ ကိုယ်ရို့ကို သန့်ရှင်းအောင် လုပ်ကတ်။
မစင်ကြယ်စာ ဝန်တိကို နင်ရို့ အလက်မတိုက်ကတ်ကေ့။
ယင်းပိုင်ဆိုကေ ငါ နင်ရို့ကို လက်ခံဖို့။” 18အရာတစ်ပြန်၊
“အနန္တတန်ခိုးနပြည့်စုံစာ အသျှင် ပြောလီရေ၊
‘ငါ နင်ရို့မာ အဖ ဖြစ်ဖို့၊
အရာ နင်ရို့ ငါ့သားသမီး ဖြစ်ကတ်ဖို့။’”
Copyright information for
RmzSC