2 Corinthians 7
1ချစ်ခင်စာ မိတ်ဆွေရို့၊ ထို ဟိသမျ ဂတိတော်တိစာ ငါရို့အတွက် ဖြစ်တေ။ ယင်းအတွက်န လာကတ်၊ ငါရို့ ခန္ဓာန စိတ်နှလုံးမာ ဟိသမျ မစင်ကြယ်စာတိကို စွန့်ရို့ ကိုယ်ရို့ကို စင်ကြယ်အောင် လုပ်ကတ်မည် အရာ ထာဝရဘုရားကို ရိုသေကြောက်လန့်ရို့ ကိုယ်ရို့ကို အပြည့်အစုံ သန့်ရှင်းအောင် လုပ်ကတ်မည်။ပေါလု ဝမ်းသာခြင်း
2ငါရို့အတွက် နင်ရို့ စိတ်နှလုံးကို ဖွင့်ထား၊ အကြောင်းကား ငါရို့ တစ်ယောက်ကိုလည်း မတရားလုပ်စာ မဟိ၊ ဖျက်စီးစာ မဟိ အရာ လိမ်လှည့်စာ မဟိ။ 3နင်ရို့ကို အပြစ်တင်ဖို့အတွက် ငါ ဒေ စကားကို ပြောစာ မဟုတ်။ ငါ အယင်လည်း ပြောလီဗျာ၊ ငါရို့စာ နင်ရို့ကို ကောင်းကောင်း ချစ်တေ။ ယင်းအတွက်န ငါရို့ သီသီ-ရှင်ရှင် နင်ရို့နအတူ ဟိကတ်တေ။ 4ငါ နင်ရို့ကို ကောင်းကောင်း ကျုံရို့ စိတ်ချရေ အရာ ငါ နင်ရို့ အကြောင်းကို ယူရို့ ကောင်းကောင်း ဘော်ကြော့ကြင်းနီရေ။ ငါရို့ ဟိသမျ ဒုက္ခ-ဝေဒနာကို ခံရရေအချိန်မာလည်း နင်ရို့စာ ငါရို့ကို အားပီးလီကတ်တေ။ ယင်းအတွက်န ငါ ကောင်းကောင်း စိတ်ပျော်ရေ။ 5မာကေဒေါနိပြည်နယ်မာ ရောက်ရို့လည်းသောက် ငါရို့မာ ကိုယ်ခန္ဓာစာ အနားမရလီ။ ယင်းထက်ပင် ငါရို့စာ အားကုံးစာဖက်က ညှဉ်းဆဲခြင်းကို ခံရလီကတ်တေ။ ပြင်ဖက်က တိုက်ဆိုင်ခြင်းန ရောင်းရင်းသပ်ခြင်း ဟိလီရေ အရာ ငါရို့ စိတ်နှလုံးထဲမာ ကြောက်လန့်ခြင်း ဟိလီရေ။ 6ယေကေလည်း ဒုက္ခသေရို့ကို ငြိမ်းသက်ခြင်းပီးစာ ထာဝရဘုရားစာ တိတု ရောက်လာခြင်းကနီရို့ ငါရို့ကို ငြိမ်းသက်ခြင်း ပီးလီရေ။ 7သက်သက် တိတု ရောက်လာရေအတွက်န မဟုတ်သိ၊ တိတု ကိုယ်တိုင် နင်ရို့က ငြိမ်းသက်ခြင်း ရခရေအတွက်န ငါရို့လည်း ငြိမ်းသက်ခြင်း ရကတ်လီရေ။ နင်ရို့စာ ငါရို့ကို ကောင်းကောင်း အောက်မိကတ်တေ၊ အရာ နင်ရို့အထဲမာ ဖြစ်လီစာ အကြောင်းအရာတိကို ယူရို့ နင်ရို့ စိတ်ဒုက္ခ ရနီကတ်တေဆိုစာကို သူစာ ငါရို့ဘားမာ ပြောပြလီရေ။ အရာ နင်ရို့ ငါ့ကို ကောင်းကောင်း ကြိုင်ညိုကတ်တေဆိုစာကိုလည်း သူစာ ငါရို့ဘားမာ ပြောပြလီရေ။ ယင်းအတွက်န ငါ အရာလည်း ကောင်းကောင်း စိတ်ပျော်လီရေ။ 8ငါ အယင် ရွီးရို့ ပီးလီစာ စာစောင်အကြောင်းန နင်ရို့ စိတ်ဒုက္ခ ရလီကတ်ကေလည်း ငါ ဝမ်းမနည်း။ ထိုစာစောင် အကြောင်းန တစ်နားသျှေအတွက်ဆိုကေလည်း နင်ရို့ စိတ်ဒုက္ခ ရလီကတ်တေဆိုစာကို ငါ သိရေခါ ငါ တစ်ဖဲ့ ဝမ်းနည်းလီရေ၊ ယေကေလည်း ငါ ဒေဂု စိတ်ပျော်ဗျာ။ 9နင်ရို့ စိတ်ဒုက္ခ ရကတ်လီရေအတွက်န ငါ စိတ်ပျော်စာ မဟုတ်၊ ယေကေလည်း နင်ရို့ စိတ်ဒုက္ခ ရပြီးကေ အပြစ်က စိတ်လှည့်ရို့ လာကတ်တေအတွက်န ငါ စိတ်ပျော်စာ ဖြစ်တေ။ နင်ရို့ ရလီကတ်စာ စိတ်ဒုက္ခစာ ထာဝရဘုရား၏ အလိုတော်အတိုင်း ဖြစ်တေ။ ယင်းအတွက်န နင်ရို့မာ ငါရို့အကြောင်းန တစ်ခုလည်း ဆုံးရှုံးခြင်း မဟိလီ။ 10ထာဝရဘုရားက လာစာ ဒုက္ခ-ဝေဒနာစာ လူကို အပြစ်က စိတ်လှည့်စီရေ အရာ စိတ်လှည့်ခြင်းစာ ကယ်တင်ခြင်းလမ်းတို့ ဆောင်ယူလားရေ။ ယင်းအတွက်န ထိုဒုက္ခ-ဝေဒနာ အကြောင်းန ဝမ်းနည်းဖို့ အလိုမဟိ။ ယေကေလည်း လောကက လာစာ ဒုက္ခ-ဝေဒနာစာ လူကို ပျက်စီးခြင်းတို့ ရောက်စီရေ။ 11စဉ်းစားကြည့်ကတ်၊ ထာဝရဘုရား နင်ရို့ကို ဒုက္ခ-ဝေဒနာ ပီးလီရေအတွက်န နင်ရို့မာ ဇာ ပြောင်းလှဲခြင်း ရောက်လာလီရေလည်း? နင်ရို့မာ ဝါသနာစိတ် ရောက်လီရေ။ နင်ရို့စာ ကိုယ်ရို့မာ အပြစ် မဟိဆိုစာကို ကောင်းကောင်း သက်သီ ပြချင်ကတ်လီရေ၊ အပြစ်ကို ကောင်းကောင်း မုန်းကတ်လီရေ၊ အပြစ် လုပ်စာအကျိုး ဇာ ဖြစ်ဖို့လည်းဆိုစာကို ကောင်းကောင်း ကြောက်ကတ်လီရေ၊ ငါ့ကို ကောင်းကောင်း အောက်မိကတ်လီရေ၊ ကောင်းကောင်း အလုပ်လုပ်ချင်ကတ်လီရေ အရာ အပြစ်သေကို ကောင်းကောင်း ဒါဏ် ပီးချင်ကတ်လီရေ။ ယင်းပိုင် ဟိသမျ အကြောင်းအရာတိမာ ကိုယ်ရို့ အပြစ်နကင်းသူ ဖြစ်တေဆိုစာကို နင်ရို့စာ အားကုံးစာဖက်က သက်သီ ပြကတ်လီရေ။ 12မတရားလုပ်သူန မတရားလုပ်ခြင်းကို ခံရသူအတွက် ငါ နင်ရို့တို့ ထိုစာစောင်ကို ရွီးလိုက်လီစာ မဟုတ်။ ယေကေလည်း နင်ရို့စာ ငါရို့ကို အမှန် ကြိုင်ညိုကတ်တေဆိုစာကို ထာဝရဘုရား၏ ရှိက ပေါ်ထွန်းပတ်စီအတွက် ငါ ထိုစာစောင်ကို ရွီးလိုက်လီစာ ဖြစ်တေ။ 13ယင်းအတွက်န ငါရို့စာ စိတ်အား ရကတ်လီရေ။ ယင်းသျှင့်ကိုအပယ် တိတု စိတ်ပျော်စာကို မြင်ရို့ ငါရို့လည်း ကောင်းကောင်း စိတ်ပျော်ကတ်လီရေ၊ အကြောင်းကား သူစာ နင်ရို့ အားကုံးသူက စိတ်အီးချမ်းသာ ရလီရေ။ 14နင်ရို့ကို ယူရို့ ငါ တိတုဘားမာ ဘော်ကြော့ကြင်းလီစာ အကြောင်းန ငါ အရှက်မကျလီ။ နင်ရို့ဘားမာ ဟောပြောလီစာ စကားတိ မှန်စာပိုင် နင်ရို့ အကြောင်းကို ယူရို့ သူ့ဘားမာ ဘော်ကြော့ကြင်းလီစာတိ မှန်ရေဆိုစာကို နင်ရို့ သက်သီပြလီကတ်တေ။ 15နင်ရို့ အားကုံးသူ ရိုသေကြောက်လန့်ခြင်းန သူ့ကို လက်ခံကတ်လီရေ အရာ သူ့စကားကို နာခံကတ်လီရေ။ ထို ဟိသမျ အားကုံးကို မြင်ရို့ သူစာ နင်ရို့ကို အရာလည်း ပိုရို့ ချစ်လီရေ။ 16ဟိသမျ အကြောင်းအရာမာ ငါ နင်ရို့ကို အားကိုးစိတ်ချရို့ ရရေအတွက်န ငါ ကောင်းကောင်း စိတ်ပျော်ရေ။
Copyright information for
RmzSC