စာရွီးဆရာ အကြောင်း

စာရွီးဆရာ နာမည် ယောဟန် ဖြစ်ပါရေ။ သူစာ ဒေ စာစောင်မာ ကိုယ့်ကို အသင်းတော် ဂေါင်းဆောင်အကြီး ဖြစ်တေ ဟို့ အသိပီးလီပါရေ (၂ယောဟန် ၁:၁)။ သူ့မာ အသက်အရွှယ်လည်း ကြီးလားခပါဗျာ။ အရာ သူ့ကို တမန်တော်ရို့အထဲမာ အသက်အရှည်ဆုံး ဖြစ်တေ ဟို့ တစ်ယောက်တစ်ရီ ပြောကတ်ပါရေ။ စာရွီးဆရာ အကြောင်းကို အလှပ သိချင်ရေဆိုကေ သျှင်ယောဟန်၏ သတင်းကောင်း နိဒါန်းမာ ကြည့်ပါ။

စာရွီးစာ အချိန်န နေရာ

ခရစ်သက္ကရာဇ် ၉၀-၉၅ နှစ်အထဲတွင်းမာ ဒေ စာစောင်ကို ရွီးလီစာ ဖြစ်နိုင်ပါရေ။ ဒေ စာစောင်ကို ဇာကနီရို့ ရွီးလီရေလည်းဆိုစာကို မသိရပါ။ ယေကေလည်း သမ္မာကျမ်းကို ကျွမ်းကျင်သူရို့အထဲက တစ်ယောက်တစ်ရီ ဒေ စာစောင်ကိုလည်း ဧဖက်မြို့ကနီရို့ ရွီးလီရေ ဟို့ ထင်ကတ်ပါရေ။

စာရွီးဆရာ၏ ရွယ်မှတ်ချက်

ခရစ်တော်၏ သတင်းကောင်းကို မှန်ကန်စာနည်းန ဟောပြောသူရို့ကို အိမ်တင်ခံရို့ ပြုဇုဖို့အတွက်၊ အရာ အယောင်ဆောင် ဆရာရို့ကို ရှောင်ဖို့အတွက် ဒေ စာစောင်ကို အာရှမိုင်နားဒေသမာ မိန်းမတစ်ယောက်တို့ ရွီးလီစာ ဖြစ်ပါရေ (၂ယောဟန် ၁:၇-၁၁)၊ အကြောင်းကား အယောင်ဆောင် ဆရာရို့စာ တန်းကား-ဖွေသျှာ ရဖို့အတွက် အရာ မှားယွင်းစာ သွန်သင်ချက်ကို ဖြန့်ချယ်ဖို့အတွက် အမျိုးမျိုး နေရာမာ လည်ရို့ တရားဟောပြောလီကတ်ပါရေ။

အခြားစာအုပ်န ဆက်သွေမှု

ဒေ စာစောင်မာ ယောဟန် အသျှင်ယေရှုက ရလီစာ ပညှတ်ချက်ကို အသင်းတော်ကို ပီးလီပါရေ (၂ယောဟန် ၁:၆)။ အသျှင်ယေရှုစာ ကိုယ့်တပည့်ရို့ကို ပြောလီပါရေ၊ “ငါစာ ငါ့အဖပီးစာ ပညှတ်ချက်တိကို လိုက်နာရို့ အဖ၏ ချစ်ခြင်းမေတ္တာမာ နီရို့လာဗျာ။ ယင်းပိုင်တထန် နင်ရို့လည်း ငါပီးစာ ပညှတ်ချက်တိကို လိုက်နာရေဆိုကေ ငါ့ချစ်ခြင်းမေတ္တာမာ နီကတ်လိမည်” (ယောဟန် ၁၅:၁၀)။

အကြောင်းအရာ အကျဉ်းချုပ်

(က) နှုတ်ဆက်ခြင်း ၁:၁-၃

(ခ) ချစ်ခြင်းမေတ္တာ ကြီးမြတ်ခြင်း ၁:၄-၆

(ဂ) အယောင်ဆောင် ဆရာရို့ အကြောင်းနပတ်သပ်ရို့ သတိပီးခြင်း ၁:၇-၁၁

(ဃ) ယောဟန်၏ မျှော်လင်းချက် ၁:၁၂-၁၃

2 John

နှုတ်ဆက်ခြင်း

သို့၊ မိန်းမန သူ့သားသမီးရို့။

1ငါ အသင်းတော် ဂေါင်းဆောင်အကြီး တစ်ယောက် ဖြစ်တေ။ ထာဝရဘုရား၏ ရွီးကောက်ခြင်းကို ခံရစာ မိန်းမန သူ့သားသမီးရို့တို့ ငါ ဒေ စာစောင်ကို ရွီးလိုက်တေ။ ငါစာ ထာဝရဘုရား၏ မှန်ကန်ခြင်းတရားကို သိရေအတွက်န နင်ရို့ အားကုံးသူကို ချစ်တေ။ ယေကေလည်း ငါ နူးချင်းတည်း နင်ရို့ကို ချစ်စာ မဟုတ်သိ၊ ထာဝရဘုရား၏ မှန်ကန်ခြင်းတရားကို သိသူရို့ အားကုံးသူလည်း နင်ရို့ကို ချစ်ကတ်တေ။ 2အကြောင်းကား ထိုမှန်ကန်ခြင်းစာ ငါရို့ စိတ်နှလုံးမာ ဟိရေအတွက်န ငါရို့စာ နင်ရို့ကို ချစ်ကတ်စာ ဖြစ်တေ အရာ ထိုမှန်ကန်ခြင်းစာ ထာဝရပတ်လုံး ငါရို့နအတူ ဟိဖို့။

3ငါရို့ မှန်ကန်ခြင်းန ချစ်ခြင်းမေတ္တာမာ နီသူရို့စာ ကျေးဇူးတော်၊ ကရုဏာတော် အရာ ငြိမ်းချမ်းခြင်းကို အဖထာဝရဘုရားန သားတော် ယေရှုခရစ်တော်က ရကတ်ဖို့။

မှန်ကန်ခြင်းန ချစ်ခြင်းမေတ္တာ

4ငါရို့ မှန်ကန်ခြင်းလမ်းမာ လားဖို့အတွက် အဖက ပညှတ်ချက်ကို ရလီကတ်တေ။ ထိုပညှတ်ချက်အတိုင်း ဒေဂု နင့်မာ သားသမီး လိုင်းကေယောက် မှန်ကန်ခြင်းလမ်းမာ လားနီကတ်တေ။ ငါ ယင်းသျှင့်ကို မြင်ရို့ ကောင်းကောင်း ဝမ်းသာရေ။ 5ချစ်ခင်စာ နမှ၊ ငါ နင့်ကို တောင်းပန်ချင်စာကား၊ ငါရို့ တစ်ယောက်ကို တစ်ယောက် ချစ်ကတ်ရဖို့။ ငါ နင်ရို့တို့ ပညှတ်ချက်အသစ်ကို ရွီးလိုက်စာ မဟုတ်။ ယေကေလည်း ဒေ ပညှတ်ချက်ကို ပထမဆုံးကပင် ငါရို့ ကြားရကတ်ပျာ။ 6ယင်းအတွက်န နင်ရို့ ပထမဆုံးကပင် ပညှတ်ချက်ကို ကြားရကတ်တေအတိုင်း ချစ်ခြင်းမေတ္တာမာ နီထိုင်ကတ်၊ အကြောင်းကား ထိုချစ်ခြင်းမေတ္တာ အဓိပ္ပါယ်စာ ထာဝရဘုရား၏ ပညှတ်ချက်ကို လိုက်နာခြင်း ဖြစ်တေ။

အယောင်ဆောင် ဆရာရို့ကို ရှောင်ဖို့စာ အကြောင်း

7ဒေ လောကမာ လိမ်စားသူ အများကြီး ရောက်နီကတ်ပျာ။ သူရို့စာ ယေရှုခရစ်တော် လူ့ဇာတိအဖြစ် ခံယူရို့ ကြွလာလီရေဆိုစာကို ငြင်းကတ်တေ။ ယင်းပိုင်ဇတ် လူရို့စာ အယောင်ဆောင် ဆရာန ခရစ်တော်၏ ရန်သူ ဖြစ်ကတ်တေ။ 8နင်ရို့စာ ကိုယ့်ရို့ကို သတိထားကတ်။ ယင်းပိုင်ဆိုကေ နင်ရို့ ကြိုးစားအားထုတ်ခြင်း၏ အကျိုးတိ မပျောက်ဆုံးဘိုင်းန အပြည့်အစုံ ဆုကို နင်ရို့ ရကတ်လိမည်။

9လူတစ်ယောက်စာ သက်သက် ခရစ်တော်၏ သွန်သင်ချက်တိကိုရာ လိုက်နာဖို့ သင့်ရေ၊ အကြောင်းကား ခရစ်တော်၏ သွန်သင်ချက်တိကို လိုက်နာသူစာ အဖန သားတော်ကို ရရေ။ ယေကေလည်း အသူမဆို ခရစ်တော်၏ သွန်သင်ချက်တိကို ပြောင်းလှဲရေဆိုကေ သူစာ အဖထာဝရဘုရားန အဆက်သွေ မဟိ။ 10ယင်းအတွက်န အသူမဆို ခရစ်တော်၏ သွန်သင်ချက် မပါဘိုင်းန နင်ရို့တို့ လာရေဆိုကေ သူ့ကို နင်ရို့ အိမ်တင် မခံလီကတ်ကေ့ အရာ နှုတ်လည်းမဆက်လီကတ်ကေ့၊ 11အကြောင်းကား သူ့ကို အိမ်တင်ခံသူစာ သူလုပ်စာ မကောင်းစာ အလုပ်မာ ပါဝင်စာနတူရေ။

12ငါ့မာ နင်ရို့ကို စကားပြောစရာ အရာလည်း အများကြီး ဟိသိရေ၊ ယေကေလည်း ငါ စက္ကူမာ ရွီးရို့ မပြောချင်။ ယင်းထက်ပင် ငါ နင်ရို့တို့ လာရို့ နင်ရို့န ရှိဆိုင်ထိုင်ပြီးကေ စကား ပြောဖို့ ဟို့ ငါ မျော်လင်းရို့ ဟိရေ။ ယင်းခါရာ ငါရို့မာ ပျော်ပါးခြင်း ပြည့်စုံဖို့။

13ထာဝရဘုရား၏ ရွီးကောက်ခြင်းကို ခံရကတ်စာ နင့် ညီမ သားသမီးရို့ နင့်ကို နှုတ်ဆက်ကတ်တေ။