2 Peter 1

နှုတ်ဆက်ခြင်း

သို့၊ ဟိသမျ ကျုံသူညီအစ်ကိုမောင်နမှရို့။

1ငါ ရှိမုန်-ပေတရု၊ ငါစာ ယေရှုခရစ်တော်၏ ကျွန်တစ်ယောက် ဖြစ်တေ အရာ သူ၏ တမန်တော် တစ်ယောက်လည်း ဖြစ်တေ။ ငါရို့ပိုင် တစ်ချက်တည်း တန်ဖိုးကြီးစာ ကျုံခြင်းတရားကို ခံရသူရို့တို့ ငါ ဒေ စာစောင်ကို ရွီးလိုက်တေ။ ငါရို့မာ ထာဝရဘုရားန ကယ်တင်သျှင် ယေရှုခရစ်တော်စာ ကောင်းကောင်း ရိုးသားရေ။ ယင်းအတွက်န ထာဝရဘုရားန ယေရှုခရစ်တော်စာ ထိုတန်ဖိုးကြီးစာ ကျုံခြင်းတရားကို နင်ရို့ကို ပီးလီရေ။ 2နင်ရို့ အားကုံးသူဘားမာ ကျေးဇူးတော်န ငြိမ်းချမ်းခြင်း ကျရောက်ပါစီ။ ထာဝရဘုရားန ငါရို့မာ အသျှင်ယေရှုခရစ်တော်ကို နင်ရို့ အလှပ သိခြင်းကနီရို့ နင်ရို့ အရာလည်း အများကြီး ကျေးဇူးတော်န ငြိမ်းချမ်းခြင်းကို ခံရပါစီ။

ကျုံသူရို့ကို ခေါ်ခြင်းန ရွီးကောက်ယူခြင်း

3ယေရှုစာ ထာဝရဘုရား၏ တန်ခိုးကို ခံရလီရေ။ ယင်းအတွက်န ငါရို့ ယေရှုကို သိခြင်းကနီရို့ သူစာ ကိုယ့်တန်ခိုးန ငါရို့မာ ဟိသမျ လိုအပ်ချက်ကို ဖြည့်ပီးလီရေ၊ အကြောင်းကား သူစာ ငါရို့ကို ထာဝရဘုရားကို ရိုသေကြောက်လန့်ခြင်းန နီထိုင်စီချင်ရေ။ ထိုယေရှုစာ ကိုယ့်ဘုန်းတန်ခိုးန ကိုယ့်ကောင်းမြတ်စာ ပါရမီကို ဝီမျှရို့ ပီးဖို့အတွက် ငါရို့ကို ခေါ်လီရေ။ 4အရာ ယေရှုစာ ကိုယ့်ဘုန်းတန်ခိုးန ကိုယ့်ကောင်းမြတ်စာ ပါရမီအကြောင်းန ငါရို့ဘားမာ တန်ဖိုးဟိစာန ကြီးမြတ်စာ ဂတိတော်တိကို ခံထားလီရေ၊ အကြောင်းကား သူစာ ငါရို့ကို ဆိုးယုတ်စာ လောကထဲက ထုတ်ယူခရို့ ထာဝရဘုရား၏ အကျင့်ဇာရိတ္တကို ပီးချင်လီရေ။ လောကမာ ဆိုးယုတ်ခြင်းတိစာ လူ၏ အပြစ်အလိုဆန္ဒ အကြောင်းန ဖြစ်လီရေ။

5– 6– 7ယင်းအတွက်န နင်ရို့ ဘဝမာ အခြား ပါရမီတိကို ပေါင်းဖို့စာကို အမြဲတိုင်း ကြိုးစားကတ်။ နင်ရို့မာ ကျုံခြင်းတရားနအတူ ကောင်းမြတ်စာ အကျင့်ဇာရိတ္တ၊ အသိပညာ၊ ကိုယ့်ကို ထိန်းသိမ်းခြင်း၊ သည်းခံခြင်း၊ ထာဝရဘုရားဘားမာ အပြည့်အစုံ တင်အပ်ခြင်း၊ ညီအစ်ကိုမောင်နမှရို့ကို ကြင်နာခြင်း အရာ ချစ်ခြင်းမေတ္တာကို ပေါင်းရို့ထား။ 8နင်ရို့မာ ထိုပါရမီတိ ဟိရေဆိုကေ အရာ ထိုပါရမီတိ အများကြီး တိုးပွါးနီရေဆိုကေ ငါရို့မာ အသျှင်ယေရှုခရစ်တော်ကို သိဖို့အတွက်မာ နင်ရို့ အောင်မြင်ကတ်လိမည်။ ယင်းအတွက်န နင်ရို့ ဘဝမာ အသီးသီးလိမည်။ 9လူတစ်ယောက်မာ ထိုပါရမီတိ မဟိဆိုကေ သူ့မာ ကောင်းကောင်း မျက်စိအားနည်းရေအတွက်န မျက်ကန်းနတူရေ၊ အကြောင်းကား သူ့မာ အယင်က ဟိလီစာ အပြစ်တိကို သန့်စင်အောင် လုပ်လီရေဆိုစာကို သူစာ မိလားခဗျာ။

10ယင်းအတွက်န ငါ့ ညီအစ်ကိုမောင်နမှရို့၊ ထာဝရဘုရားစာ အမှန် နင်ရို့ကို ခေါ်လီရေ အရာ ရွီးကောက်ယူလီရေဆိုစာကို သက်သီပြဖို့အတွက် ကြိုးစားအားထုတ်ကတ်။ ယင်းပိုင်ဆိုကေ နင်ရို့ တစ်ခါလည်း အမှားလမ်းတို့ လားကတ်လိမည် မဟုတ်။ 11ယင်းခါ နင်ရို့စာ ယေရှုခရစ်တော်၏ ထာဝရတည်မြဲစာ နိုင်ငံတော်ထဲတို့ ဝင်ခွင့်ကို ရကတ်လိမည်။ ယေရှုခရစ်တော်စာ ငါရို့မာ အသျှင်လည်း ဖြစ်တေ အရာ ကယ်တင်သျှင်လည်း ဖြစ်တေ။

12နင်ရို့ကား ထိုအကြောင်းတိကို သိကတ်တေ အရာ နင်ရို့ကို ပီးလီစာ မှန်ကန်ခြင်းကိုလည်း နင်ရို့ နနောင်းတည်းရို့ ထားကတ်တေ။ ယေကေလည်း ငါ အမြဲတိုင်း ထိုအကြောင်းတိကို နင်ရို့ကို အတွက်ချရို့ ပီးနီရေ။ 13အရာ ငါ ဒေ လောကမာ အသက်ရှင်ရို့ ဟိသရိကာလပတ်လုံး ထိုအကြောင်းတိကို ပြောရို့ နင်ရို့ကို နှိုးဆော်ရို့ ထားဖို့ သင့်ရေ ဟို့ ငါ ထင်ရေ၊ 14အကြောင်းကား ငါ အများ မကြာခင် ဒေ လောကကို စွန့်ရို့ လားရဖို့ဗျာဆိုစာကို ငါရို့မာ အသျှင်ယေရှုခရစ်တော် ငါ့ကို ရှရှင်းလလင်း ပြောပြလီရေ။ 15အရာ ငါ သီလားခကေလည်းသောက် ငါ့စကားတိကို အမြဲတိုင်း နင်ရို့ကို မှတ်ထားစီချင်ရေ။ ယင်းအတွက်န ငါ တတ်နိုင်သလှောက် နင်ရို့ကို အတွက်ဖေါ်ရို့ ပီးနီဖို့။

ထာဝရဘုရား၏ စကားတော် ကျုံဖို့ ထိုက်တန်ရေ

16ငါရို့မာ အသျှင်ယေရှုခရစ်တော်၏ တန်ခိုး အကြောင်းန သူကြွလာစာ အကြောင်းကို ငါရို့ နင်ရို့ဘားမာ ပြောပြလီကတ်တေ၊ အကြောင်းကား ငါရို့ ကိုယ်တိုင် သူ၏ ဘုန်းတန်ခိုးကို မြင်ဖူးလီကတ်တေ။ ယင်းအတွက်န နင်ရို့ဘားမာ ငါရို့ ပြောပြလီစာ စကားတိစာ အဓိပ္ပါယ်မဟိစာ ဝတ္ထု စကားတိ မဟုတ်။ 17– 18ငါရို့စာ ယေရှုနအတူ သန့်ရှင်းစာ တောင်မာ ဟိလီရေခါ သူစာ အဖထာဝရဘုရားက ရိုသေခြင်းန ဘုန်းတန်ခိုးကို ရလီရေ။ ယင်းခါ ဂေါင်းခင်ဘုံက ငါရို့ ဒေပိုင် စကားပြောသံကို ကြားရလီကတ်တေ၊ “ဒေသူ ငါ့အချစ်သား ဖြစ်တေ။ ငါ သူ့ကို ကောင်းကောင်း နှစ်သက်တေ။”

19ထိုတွိကြုံခြင်း အကြောင်းန ကျမ်းစာမာ ဘုရားသတင်းပို့သူရို့ ဟောပြောခစာ စကားတိကို အရာလည်း စိတ်ချရို့ ရကတ်ပျာ။ ထိုဘုရားသတင်းပို့သူရို့ ဟောပြောခစာ စကားတိကို နင်ရို့ စိတ်ဝင်စားကတ်တေဆိုကေ နင်ရို့အတွက် အကျိုး ဟိဖို့၊ အကြောင်းကား သူရို့ ဟောပြောခစာ စကားတိစာ အမိုက်မှောင်မာ ထွန်းထားစာ ဆီမီးခွက်နတူရေ။ ထိုဆီမီးခွက်စာ မိုးမလင်းသကြား အမိုက်မှောင်မာ ထွန်းတောက်နီရေ အရာ နင်ရို့ စိတ်နှလုံးထဲမာ မိုးသောက် ကြယ်ကြီး မပေါက်သကြားကို အမိုက်မှောင်မာ ထွန်းတောက်နီရေ။ 20ယေကေလည်း နင်ရို့ မှတ်ထားဖို့ သင့်စာကား၊ ကျမ်းစာမာ အနာဂတ္တိစကားတိစာ ဘုရားသတင်းပို့သူရို့ စိတ်က လာစာ စကားတိ မဟုတ်၊ 21အကြောင်းကား ဘုရားသတင်းပို့သူရို့စာ ကိုယ်ရို့ စိတ်တချင် ဟောပြောလီကတ်စာ မဟုတ်။ သူရို့စာ သန့်ရှင်းသောဝိညာဉ်တော်၏ ဆောင်ယူခြင်းကို ခံရရို့ ထာဝရဘုရား၏ စကားတော်ကို ဟောပြောလီကတ်စာ ဖြစ်တေ။