2 Peter 2
အယောင်ဆောင် ဆရာရို့ အကြောင်း
1ယေကေလည်း ဣသရေလလူမျိုးရို့အထဲမာ အယောင်ဆောင် ဘုရားသတင်းပို့သူရို့ ဟိလီရေပိုင် နင်ရို့အထဲမာလည်း အယောင်ဆောင် ဆရာရို့ ဝင်လာကတ်လိမည်။ သူရို့စာ မှားယွင်းစာ သွန်သင်ချက်ကို ပီးကတ်လိမည် အရာ ထိုသွန်သင်ချက်ကို လက်ခံသူရို့စာ ဆုံးရှုံးခြင်းကို ခံရကတ်လိမည်။ ထိုဆရာရို့စာ ဇာ သွန်သင်ပီးရေလည်းဆိုစာကို တစ်ယောက်လည်း မသိရအောင် လူရို့ဘားမာ ပရိယာယ်န သွန်သင် ပီးကတ်လိမည်။ ယင်းထက်မက သူရို့စာ ကိုယ်ရို့ကို လွတ်မြောင့်ခြင်းပီးစာ အသျှင်ကို တိုင်အောင်ပင် ငြင်းပယ်ကတ်လိမည်။ ယင်းပိုင် သူရို့စာ မကြာခင် ကိုယ်ရို့ကို ပျက်စီးခြင်းတို့ ရောက်စီလိမည်။ 2သူရို့မာ ညစ်ညူးစာ အကျင့်သီလတိကို မြင်ကတ်ရို့ လူအများကြီး သူရို့နောက်က လိုက်ကတ်လိမည်။ အရာ သူရို့ အကြောင်းန မှန်ကန်ခြင်းလမ်းစာ ပုတ်ခတ်ရို့ စကား အပြောခံလိမည်။ 3ထိုအယောင်ဆောင် ဆရာရို့စာ သက်သက် နင်ရို့က တန်းကား ရဖို့စာကို လိုချင်ကတ်လိမည်။ အရာ သူရို့စာ နင်ရို့ စိတ်ပျော်ပတ်စီအတွက် အချိုတိုက်ရို့ စကား ပြောကတ်လိမည်။ ယင်းအတွက်န ထာဝရဘုရားစာ ထိုဆရာရို့ကို အပြစ်ဒါဏ်ပီးဖို့အတွက် အယင်ကပင် အဆင်သင့် လုပ်ထားဗျာ။ ထာဝရဘုရား အမှန် သူရို့ကို ဖျက်စီးလိမည်။ 4အယင်ကခါ ဂေါင်းခင်နတ်သားရို့စာ ထာဝရဘုရားကို ဆန့်ကျင်ရို့ အပြစ် လုပ်လီကတ်တေ။ ယင်းခါ ထာဝရဘုရားစာ သူရို့ကို ခွင့်မရွှတ်လီ။ ယင်းထက်ပင် ထာဝရဘုရားစာ သူရို့ကို တရားစစ်ဆေးဖို့စာနိ တိုင်အောင် ငရဲပြည် အမိုက်မှောင်တွင်းထဲမာ ချိုင်ထားလိုက်လီရေ။ 5အရာ ထာဝရဘုရားစာ ကမ္ဘာအဟောင်းကိုလည်း ခွင့်မရွှတ်လီ။ ယင်းထက်ပင် ထာဝရဘုရားစာ ကိုယ့်ကို ဆန့်ကျင်သူရို့ကို ရီန ဖျက်စီးဘိုက်လီရေ။ ယေကေလည်း ထာဝရဘုရားစာ နောဧနအတူ အခြား ခုနစ်ယောက်ကို သီဘေးက ကယ်ဆယ်လီရေ။ ယင်းခါ နောဧစာ မှန်ကန်ခြင်းတရားအတိုင်း နီထိုင်ဖို့အတွက် လူရို့ဘားမာ တရားဟောပြောလီရေ။ 6ယင်းသျှင့်ကိုအပယ် ထာဝရဘုရားစာ သောဒုံမြို့န ဂေါမောရမြို့ကို မီးချရို့ ဖျက်စီးဘိုက်လီရေ အရာ ထိုနှစ်မြို့သားကို ယင်းပိုင် အပြစ်ဒါဏ် ပီးလီရေ။ ယင်းပိုင် လုပ်လီစာ အကြောင်းကား ထာဝရဘုရားကို ဆန့်ကျင်သူရို့ နောက်အနာဂါတ်မာ ဇာပိုင် အပြစ်ဒါဏ်ကို ခံရဖို့လည်းဆိုစာကို သူစာ ဒေပိုင် ပုံဥပမာ တင်ပြလီရေ။ 7ယေကေလည်း သူစာ လောတကို ထိုပျက်စီးခြင်းက ကယ်ဆယ်လီရေ၊ အကြောင်းကား လောတစာ သူတော်ကောင်း တစ်ယောက် ဟိလီရေ။ သူစာ ထိုလူရို့ ဆိုးယုတ်စာ အကျင့်သီလတိကို မြင်ရို့ ကောင်းကောင်း စိတ်ဒုက္ခ ရလီရေ။ 8လောတစာ သူတော်ကောင်း တစ်ယောက် ဖြစ်ရို့ပင်လည်း နိတိုင်း ဆိုးယုတ်သူရို့န နီထိုင်ရလီရေ။ သူစာ ထိုဆိုးယုတ်သူရို့ မတရားအလုပ်တိကို မြင်ရို့ အရာ ထိုအကြောင်းတိကို ကြားရို့ သူ့စိတ်နှလုံးမာ ကောင်းကောင်း ဝေဒနာကို ခံရလီရေ။ 9ထိုအကြောင်းအရာတိက သိရစာကား၊ ထာဝရဘုရားစာ ကိုယ့်ကို ရိုသေကြောက်လန့်သူရို့ကို ဒုက္ခက ကယ်တင်ဖို့ တတ်တေ။ အရာ ထာဝရဘုရားစာ ဆိုးယုတ်သူရို့ကို တရားစစ်ဆေးဖို့စာနိ တိုင်အောင် အပြစ်ဒါဏ်ပီးရို့ ထားဖို့လည်း တတ်တေ။ 10အရေးကြီးဆုံး ဖြစ်တေကား ထိုအပြစ်ဒါဏ်စာ သဘာဝန မကိုက်ညီစာ ညစ်ညူးစာ ကာမဂုဏ်အလိုဆန္ဒအတိုင်း နီထိုင်သူရို့အတွက် အရာ ထာဝရဘုရား၏ အုပ်ချုပ်ခြင်းကို မုန်းသူရို့အတွက် ဖြစ်တေ။ ထိုအယောင်ဆောင် ဆရာရို့စာ ကောင်းကောင်း ရဲဝံ့သတ္တိ ပြည့်ကတ်တေ။ အရာ သူရို့စာ ကိုယ်ရို့ စိတ်တချင် နီထိုင်ကတ်တေ။ ယင်းအတွက်န သူရို့စာ ဘုန်းကြီးစာ ဂေါင်းခင်ဘုံသားရို့ကို ပုတ်ခတ်ရို့ စကားပြောဖို့ မကြောက်ကတ်။ 11ဂေါင်းခင်နတ်သားရို့စာ ထိုဘုန်းတန်ခိုးကြီးစာ ဂေါင်းခင်ဘုံသားရို့ထက် ပိုရို့ တန်ခိုးအာဏာ ကြီးကတ်တေ၊ ယေကေလည်း သူရို့စာ ထိုဘုန်းတန်ခိုးကြီးစာ ဂေါင်းခင်ဘုံသားရို့ကို အသျှင်၏ ရှိက တရားမစစ်ဆေးကတ်။ 12ယေကေလည်း အယောင်ဆောင် ဆရာရို့စာ ကိုယ်ရို့ နားမလည်စာ အကြောင်းတိကို ပုတ်ခတ်ရို့ စကား ပြောနီကတ်တေ။ သူရို့စာ ဖမ်းရို့ လိုင်အလှီးခံဖို့အတွက် မွီးဖွားလာစာ အမိုက် တိရစ္ဆာန်တိနတူကတ်တေ။ သူရို့စာ နောက်ဆုံးပြီးမာ ပျက်စီးခြင်းကို ခံရကတ်ဖို့။ 13အယောင်ဆောင် ဆရာရို့စာ ဆိုးယုတ်စာ အလုပ်တိကို လုပ်တေအတွက်န ဒုက္ခကို ခံရကတ်လိမည်။ ယင်းသျှင့်စာ သူရို့ ရသင့်စာ အဖိုးအခ ဖြစ်တေ။ သူရို့စာ နိခင်းကြောင်တောင် သောက်ရို့စားရို့ ပျော်ဖို့စာကို နှစ်သက်ကတ်တေ။ သူရို့စာ နင်ရို့အတွက် ရှက်စရာန ညစ်ညူးစရာ ဖြစ်ကတ်တေ၊ ယင်းထက်မက သူရို့စာ နင်ရို့နအတူ စားပွဲမာ ထိုင်ရေခါလည်း ဟန်ဆောင်ကတ်တေ။ 14သူရို့စာ မိန်းမရို့ကို ကိလေသာစိတ်န ကြည့်ကတ်တေ။ သူရို့စာ အပြစ် မလုပ်ဘိုင်းန မနီနိုင်ကတ်။ အရာ သူရို့စာ စိတ်အားနည်းသူရို့ကို အလိမ်ချရို့ မှားယွင်းစာလမ်းတို့ ယူလားကတ်တေ။ သူရို့မာ စိတ်နှလုံးစာ သက်သက် လောဖကြီးဖို့ တတ်ကတ်တေ။ သူရို့စာ ထာဝရဘုရား၏ ကျိန်ဆဲခြင်းအောက်မာ ဟိကတ်တေ။ 15ထိုအယောင်ဆောင် ဆရာရို့စာ မှန်ကန်ခြင်းလမ်းကို စွန့်ရို့ အမှားလမ်းတို့ လားခကတ်ပျာ။ သူရို့စာ ဗောသော်သား ဗာလမ် လားစာလမ်းတို့ လိုက်လားခကတ်ပျာ။ ဗာလမ်စာ မတရားစာ အလုပ်ကို လုပ်ရို့ အခ ရဖို့စာကို ကြိုးစားလီရေ။ 16ယေကေလည်း သူစာ ထိုမတရားစာ အလုပ်အကြောင်းန ဝန်ရွက်မြင်းဘားမာ အဆေးခံလီရေ။ ထိုဝန်ရွက်မြင်းစာ လူပိုင် စကားပြောရို့ သူလုပ်စာ အရူးအလုပ်ကို တားဆီးလီရေ။ 17ထိုအယောင်ဆောင် ဆရာရို့စာ ရီခန်းလားခစာ ရီမျက်တွင်းနတူကတ်တေ အရာ လီမုန်တိုင်း တိုက်ရို့ ရွင့်လားခစာ မိုးရိပ်နတူကတ်တေ။ သူရို့ကို အပြစ်ဒါဏ် ပီးဖို့အတွက် မမဲမမျက် အမိုက်မှောင်နေရာကို အဆင်သင့် လုပ်ထားရို့ ဟိရေ။ 18သူရို့စာ အဓိပ္ပါယ်မဟိစာ စကားတိကို ယူရို့ ကိုယ်ရို့ကို ဘော်ကြော့ ကြင်းနီကတ်တေ။ အရာ သူရို့စာ မှားယွင်းစာလမ်းက ပြန်လာသူရို့ကို ညစ်ညူးစာ လောဖတတ်ခြင်းန ကာမဂုဏ် ပျော်ပါးခြင်းကို ပြရို့ အရာတစ်ပြန် အပြစ်လမ်းတို့ ယူလားကတ်တေ။ 19ထိုအယောင်ဆောင် ဆရာရို့စာ လူရို့ကို လွတ်လပ်ခြင်း ပီးဖို့ ဂတိခံကတ်တေ။ ယေကေလည်း သူရို့ ကိုယ်တိုင် ဆိုးယုတ်စာအလုပ်မာ ကျွန် ခံရနီကတ်တေ၊ အကြောင်းကား လူတစ်ယောက်စာ ဇာမဆိုတစ်ခု ဆောင်ယူခြင်းကို ခံရရေဆိုကေ သူစာ ယင်းသျှင့်ဘားမာ ကျွန် ဖြစ်တေ။ 20ယေရှုခရစ်တော်စာ ငါရို့မာ အသျှင်န ကယ်တင်သျှင် ဖြစ်တေ။ လူရို့စာ သူ့ကို သိရေခါ လောကမာ ဟိသမျ ဆိုးယုတ်ခြင်းက ထွက်ဗြီးလာရို့ လွတ်မြောင့်ခြင်းကို ရကတ်တေ၊ ယေကေလည်း သူရို့စာ ထိုဆိုးယုတ်ခြင်းတို့ ပြန်ရို့ ဝင်ရေဆိုကေ သူရို့မာ ပထမ အခြေအနေထက် နောက်ဆုံး အခြေအနေ ပိုရို့ ဆိုးလိမည်။ 21သူရို့စာ ကောင်းမြတ်စာ အသက်လမ်းကို သိလီကတ်တေ၊ ယေကေလည်း သူရို့စာ သန့်ရှင်းစာ ပညှတ်ချက်ကို ငြင်းပယ်လီကတ်တေ။ ယင်းပိုင်ဆိုကေ သူရို့အတွက် ထိုအသက်လမ်းကို သိရို့ ပြန်လားခစာထက် မသိလီစာ ပိုရို့ ကောင်းလီဖို့။ 22ငါရို့ ပြောနီကတ်စာ စကားဌာစာ သူရို့န ကိုက်ညီရေ၊ “ခွီးစာ ကိုယ့်အံဖတ်ကို ပြန်ရို့ စားရေ။” အရာ “ဝက်ကို ရီချိုးရို့ ရွှတ်လိုက်ကေလည်း ပြန်ရို့ ကျုပ်ပဲ့မာ ဆင်းရို့ လူးရေ။”
Copyright information for
RmzSC