2 Thessalonians 1

နှုတ်ဆက်ခြင်း

သို့၊ သက်သာလောနိတ်မြို့ အသင်းတော်။

1သိလ၊ တိမောသေ အရာ ငါ ပေါလုစာ နင်ရို့ သက်သာလောနိတ်မြို့ အသင်းတော်တို့ ဒေ စာစောင်ကို ရွီးလိုက်တေ။ နင်ရို့စာ အဖထာဝရဘုရားန အသျှင်ယေရှုခရစ်တော်၏ လူရို့ ဖြစ်ကတ်တေ။

2အဖထာဝရဘုရားန အသျှင်ယေရှုခရစ်တော်စာ နင်ရို့ကို ကျေးဇူးတော်န ငြိမ်းချမ်းခြင်း ပီးပါစီ။

ယေရှု ပြန်ရို့ ကြွလာဖို့စာ အကြောင်း

3ညီအစ်ကိုမောင်နမှရို့၊ နင်ရို့အတွက် ငါရို့ အမြဲတိုင်း ထာဝရဘုရားကို ကျေးဇူးတင်နီကတ်တေ အရာ ကျေးဇူးတင်ဖို့ ထိုက်တန်ရေ၊ အကြောင်းကား နင်ရို့မာ ကျုံခြင်းတရားစာ ကောင်းကောင်း တိုးပွါးနီရေ အရာ နင်ရို့ တစ်ယောက်ကို တစ်ယောက် ထားကတ်စာ ချစ်ခြင်းမေတ္တာလည်း တိုးပွါးနီရေ။ 4ယင်းအတွက်န ငါရို့စာ နင်ရို့ အကြောင်းကို ယူရို့ ထာဝရဘုရား၏ အသင်းတော်တိ ရှိက ဘော်ကြော့ကြင်းနီကတ်တေ၊ အကြောင်းကား နင်ရို့စာ ဟိသမျ ညှဉ်းဆဲခြင်းန ဒုက္ခ-ဝေဒနာတိကို ခံရကတ်တေခါလည်း စိတ်ရှည်ခြင်းန သည်းခံနီကတ်တေ အရာ ကိုယ်ရို့မာ ကျုံခြင်းတရားကို နနောင်းတည်းရို့ ထားကတ်တေ။

5– 6ထာဝရဘုရားစာ နင်ရို့ကို ကိုယ့်နိုင်ငံတော်ထဲတို့ ဝင်ဖို့ ထိုက်တန်သူ ဖြစ်စီချင်ရေ။ ယင်းအတွက်န နင်ရို့ ဒေလှောက် ဒုက္ခ-ဝေဒနာကို ခံရနီကတ်စာ ဖြစ်တေ။ ထိုဒုက္ခ-ဝေဒနာကို ခံရရေခါ နင်ရို့မာ သစ္စာတရားစာ ထာဝရဘုရား၏ တရားသဖြင့် စစ်ဆေးခြင်းကို ပပွင့်လလင်း သက်သီပြရေ။ အရာ ထာဝရဘုရားစာ တရားမျှတသူ ဖြစ်တေအတွက်န နင်ရို့ကို ဒုက္ခ ပီးသူရို့ကို ဒုက္ခ ပီးလိမည်၊ 7– 8အရာ နင်ရို့ ဒေဂု ဒုက္ခ-ဝေဒနာ ခံနီရသူရို့ကိုလည်း ထာဝရဘုရားစာ ငါရို့နအတူ ထိုဒုက္ခ-ဝေဒနာတိက ရွတ်စီလိမည်။ အသျှင်ယေရှုစာ ကိုယ့်မာ တန်ခိုးကြီးစာ ဂေါင်းခင်နတ်သားရို့နအတူ တောက်နီစာ မီးန ဂေါင်းခင်ဘုံက ဆင်းလာလိမည်။ ယင်းခါ သူစာ ထာဝရဘုရားကို မသိသူရို့န အသျှင်ယေရှု၏ အကြောင်း သတင်းကောင်းကို လက်မခံသူရို့ကို အပြစ်ဒါဏ် ပီးလိမည်။ 9– 10သူရို့စာ အသျှင်ထာဝရဘုရားနအတူ နီရကတ်လိမည် မဟုတ် အရာ ထာဝရဘုရား၏ ကြီးမြတ်စာ ဘုန်းတန်ခိုး ပြင်က အဝီးတို့ ထုတ်ထားခြင်းကို ခံရကတ်လိမည်။ အရာ ယင်းပိုင် သူရို့စာ ထာဝရပတ်လုံး ပျက်စီးခြင်းကို ခံရကတ်လိမည်။ သူစာ ကိုယ်ပြန်ရို့ ကြွလာရေနိမာ ကိုယ့်လူရို့ကနီရို့ ဘုန်းတန်ခိုးကို ခံရလိမည် အရာ ဟိသမျ ကျုံသူရို့က ချီမွမ်းခြင်းကို ခံရလိမည်။ နင်ရို့လည်း ထိုကျုံသူရို့အထဲမာ ပါကတ်တေ၊ အကြောင်းကား ငါရို့ ဟောပြောကတ်စာ တရားတော်ကို နင်ရို့ ကျုံကတ်ပျာ။

11ယင်းအတွက်န ငါရို့စာ နင်ရို့ကို ငါရို့မာ အဖထာဝရဘုရား၏ ခေါ်ခြင်းကို ခံထိုက်သူ ဖြစ်စီချင်ရေ။ နင်ရို့စာ ကျုံခြင်းတရားအကြောင်းန ကောင်းမြတ်စာ အလုပ်တိကို လုပ်ဖို့ တောင်းတနီကတ်တေ။ နင်ရို့ ထိုအလုပ်တိကို လုပ်ဖို့အတွက် နင်ရို့ကို ထာဝရဘုရားက တန်ခိုး ရစီချင်ရေ။ ယင်းအတွက်န ငါရို့ အမြဲတိုင်း နင်ရို့ အကြောင်းကို ယူရို့ ဆုတောင်းနီကတ်တေ။ 12ယင်းပိုင်ဆိုကေ ငါရို့မာ ထာဝရဘုရားန အသျှင်ယေရှုခရစ်တော်၏ ကျေးဇူးတော်အကြောင်းန ငါရို့မာ အသျှင်ယေရှု၏ နာမည်စာ နင်ရို့ကနီရို့ ချီမွမ်းခြင်းကို ခံရလိမည် အရာ နင်ရို့လည်း သူ့ကနီရို့ ချီမွမ်းခြင်းကို ခံရကတ်လိမည်။