2 Thessalonians 3
ဆုတောင်းပီးဖို့အတွက် တောင်းပန်ခြင်း
1ညီအစ်ကိုမောင်နမှရို့၊ အဆုံးခေါက်အနေန ငါ နင်ရို့ကို ပြောမည်၊ အသျှင်၏ စကားတော်စာ နင်ရို့အထဲမာ အယင်အမြန် ပြန့်ကျယ်လီရေ အရာ နင်ရို့စာ ထိုစကားတော်ကို ရိုသေရို့ လက်ခံကတ်လီရေ။ ယင်းပိုင်တထန် ဒေဂု ထိုစကားတော် အခြားနေရာမာလည်း အယင်အမြန် ပြန့်ကျယ်လတ်အောင် အရာ လူရို့ ရိုသေရို့ လက်ခံလတ်အောင် ငါရို့အတွက် ဆုတောင်းပီးကတ်။ 2အရာ ငါရို့စာ အသိညာဏ် မဟိသူရို့န လူဆိုးရို့အလက်က ရွတ်လတ်အောင်လည်း နင်ရို့ ဆုတောင်းပီးကတ်၊ အကြောင်းကား အားကုံးသူပင်လည်း ထာဝရဘုရားကို ကျုံကတ်စာ မဟုတ်။ 3ယေကေလည်း အသျှင်စာ သစ္စာနပြည့်စုံရေ။ သူစာ နင်ရို့ကို ခိုင်မာအောင် လုပ်လိမည် အရာ မာရ်နတ်အလက်က ကယ်ဆယ်လိမည်။ 4ငါရို့ ပီးလီကတ်စာ ပညှတ်ချက်အတိုင်း နင်ရို့ ဒေဂု လုပ်ကိုင်နီကတ်တေ အရာ လုပ်ကိုင်နီကတ်လိမည်ဆိုစာကို အသျှင်စာ နင်ရို့ အကြောင်းနပတ်သပ်ရို့ ငါရို့ကို စိတ်ချခြင်း ပီးရေ။ 5နင်ရို့ ထာဝရဘုရားကို ချစ်ကတ်ပတ်စီအတွက် အရာ ခရစ်တော်ပိုင်တထန် နင်ရို့ စိတ်ရှည်ခြင်းန သည်းခံနိုင်ကတ်ပတ်စီအတွက် အသျှင်စာ နင်ရို့ စိတ်နှလုံးကို အဆင်သင့် လုပ်ပါစီ။လူပျင်းရို့ကို သတိပီးခြင်း
6ညီအစ်ကိုမောင်နမှရို့၊ ငါရို့မာ အသျှင်ယေရှုခရစ်တော်နာမည်န ငါရို့စာ နင်ရို့ကို ပညှတ်ချက် ပီးရေ။ နင်ရို့အထဲမာ ကျုံသူညီအစ်ကိုတစ်ယောက် အပျင်းကြီးရို့ အလုပ် မလုပ်ဘိုင်းန ထိုင်နီရေဆိုကေ အရာ နင်ရို့ ငါရို့က သင်ယူလီကတ်စာ သွန်သင်ချက်ကို မလိုက်နာဆိုကေ နင်ရို့ ယင်းသူန မပေါင်းဖေါ်လီကတ်ကေ့။ 7အကြောင်းကား နင်ရို့လည်း ငါရို့ပိုင် နီထိုင်ဖို့ သင့်ရေဆိုစာကို နင်ရို့ ကိုယ်တိုင် သိကတ်တေ။ ငါရို့စာ နင်ရို့နအတူ ဟိလီရေခါ အပျင်းသသောန ထိုင်ရို့ မနီလီကတ်၊ 8အရာ တစ်ယောက်ကလည်း အခမဲ့ တောင်းရို့ မစားလီကတ်။ ယင်းထက်ပင် ငါရို့စာ နင်ရို့အထဲက တစ်ယောက်ကလည်း အကူညီ တောင်းဖို့ မကျလတ်အောင် ညဉ့်ပါ-ရက်ပါ ပင်ပန်းခံပြီးကေ ကြိုးစားအားထုတ်ရို့ အလုပ်လုပ်လီကတ်တေ။ 9နင်ရို့က အကူညီ တောင်းဖို့စာ အခွင့်အာဏာ ငါရို့မာ ဟိရေ၊ ယေကေလည်း နင်ရို့စာ ငါရို့ပိုင်တထန် နီထိုင်ကတ်ပတ်စီအတွက် ပုံဥပမာအဖြစ် ငါရို့ အလုပ်လုပ်ရို့ နင်ရို့ကို ပြလီစာ ဖြစ်တေ။ 10အကြောင်းကား ငါရို့စာ နင်ရို့နအတူ ဟိလီရေခါ၊ “အလုပ်လုပ်ဖို့ ပျင်းသူစာ မစားဘိုင်းန နီရဖို့” ဆိုပြီးကေ နင်ရို့ကို အာဏာ ပီးလီရေ။ 11နင်ရို့အထဲမာ တစ်ယောက်တစ်ရီ အပျင်းကြီးရို့ ထိုင်နီရေ အရာ အသျှင်းလည်း အလုပ် မလုပ်ဘိုင်းန အခြားတစ်ယောက် အကြောင်းကို ယူရို့ အလုပ် ရှုတ်နီရေဆိုစာကို ငါရို့ ကြားရရေ။ 12သူရို့စာ ငငြိမ်းချချမ်း အလုပ်လုပ်ရို့ ကိုယ်ရို့ဝမ်းစာကို ရှာကတ်ပတ်စီအတွက် ငါရို့မာ အသျှင်ယေရှုခရစ်တော်၏ လူအနေန ငါရို့ ယင်းပိုင်ဇတ် လူရို့ကို အာဏာပီးရေ အရာ ဩဝါဒ ပီးရေ။ 13ညီအစ်ကိုမောင်နမှရို့၊ နင်ရို့စာ ချင်ရာခါမဆို ကောင်းမြတ်စာ အလုပ်တိကို လုပ်ဖို့အတွက် အားမသျှော့ကတ်ကေ့။ 14အသူမဆို ငါရို့ ရွီးလိုက်စာ စာစောင်မာ ပါစာ စကားတိကို မလိုက်နာဆိုကေ နင်ရို့ ယင်းသူကို မှတ်ထားကတ်။ အရာ သူစာ အရှက်ကျလတ်အောင် နင်ရို့ ယင်းသူန မပေါင်းဖေါ်လီကတ်ကေ့။ 15ယေကေလည်း သူ့ကို ရန်သူပိုင် မမှတ်ဘိုင်းန ညီအစ်ကိုပိုင် မှတ်ရို့ သတိပီးကတ်။အဆုံးသတ်ချက် စကား
16ငြိမ်းချမ်းခြင်း၏ အသျှင် ကိုယ်တိုင် အမြဲတိုင်း အခြေအနေတိုင်းမာ နင်ရို့ကို ငြိမ်းချမ်းခြင်း ပီးပါစီ။ အသျှင် နင်ရို့ အားကုံးသူနအတူ ဟိပါစီ။ 17ဒေ နှုတ်ဆက်ခြင်း စကားကို ငါ ပေါလု ကိုယ်တိုင် ကိုယ့်အလက်န ရွီးလိုက်စာ ဖြစ်တေ။ ဒေသျှင့်စာ ငါ ရွီးစာ စာစောင်တိုင်းမာ အမှတ်တရ ဖြစ်တေ။ ငါ ဒေပိုင် ရွီးရို့ ပို့နီရေ။ 18ငါရို့မာ အသျှင်ယေရှုခရစ်တော်၏ ကျေးဇူးတော် နင်ရို့ အားကုံးသူနအတူ ဟိပါစီ။
Copyright information for
RmzSC