2 Timothy 1

နှုတ်ဆက်ခြင်း

သို့၊ တိမောသေ။

1– 2ငါ ပေါလု၊ ငါ့အချစ်သားဖြစ်သူ နင့်တို့ ငါ ဒေ စာစောင်ကို ရွီးလိုက်တေ။ ငါစာ ထာဝရဘုရား၏ အလိုတော်အတိုင်း ခရစ်တော်ယေရှု၏ တမန်တော် တစ်ယောက် ဖြစ်တေ။ ထာဝရဘုရားစာ ခရစ်တော်ယေရှုကနီရို့ ထာဝရအသက်ကို ပီးဖို့အတွက် ဂတိခံလီရေ။ ထိုဂတိတော် အကြောင်းကို လူရို့ဘားမာ ဟောပြောဖို့အတွက် ထာဝရဘုရား ငါ့ကို ရွှတ်လိုက်လီရေ။

အဖထာဝရဘုရားန ငါရို့မာ အသျှင်ယေရှုခရစ်တော် နင့်ကို ကျေးဇူးတော်၊ ကရုဏာတော် အရာ ငြိမ်းချမ်းခြင်း ပီးပါစီ။

တိမောသေကို အားပီးခြင်း

3ငါ အမြဲတိုင်း ညဉ့်ပါ-ရက်ပါ ဆုတောင်းရေခါ နင့်ကို အောက်မိနီရေ။ အရာ ငါ ဆုတောင်းရေခါ နင့်အတွက် ထာဝရဘုရားကို ကျေးဇူးတင်နီရေ။ ငါ့မာ အဖိုးအဖီးအစိုင်လာရို့ ထာဝရဘုရားကို ဝတ်ပြုကိုးကွယ်ရို့ နီလီကတ်စာပိုင် ငါလည်း စင်ကြယ်စာ အသိညာဏ်န ထာဝရဘုရားကို ဝတ်ပြုကိုးကွယ်ရို့နီရေ။ 4ငါရို့ တစ်ယောက်ကို တစ်ယောက် ပြန်ခွင့်တောင်းရို့ လားလီရေခါ နင်စာ မျက်ရည် ကျလီရေ။ ငါ ဒေဂု ယင်းသျှင့်ကို တွက်ရနီရေ။ ငါ့စိတ်နှလုံးမာ ပျော်ပါးခြင်း ပြည့်စုံဖို့အတွက် ငါ နင့်ကို ကောင်းကောင်း မြင်ချင်ရေ။ 5နင့်မာ အမှန် ကျုံခြင်းတရား ဟိရေဆိုစာကို ငါ မှတ်ထားရေ။ ထိုကျုံခြင်းတရားစာ နင့် အဘောင်မ လောဣန နင့် အမိ ဥနိတ်မာလည်း ဟိလီရေ။ သူရို့ ကျုံလီကတ်စာပိုင် ဒေဂု နင့် စိတ်နှလုံးမာလည်း ကျုံခြင်းတရား ဟိရေဆိုစာကို ငါ သိရေ။ 6ယင်းအတွက်န ငါ နင့်ကို အတွက်ဖေါ်ရို့ ပီးချင်စာကား၊ ထာဝရဘုရားက ပီးလီစာ ဆုကျေးဇူး နင့်ဘားမာ ဟိရေ။ ငါ နင့်အဂေါင်းမာ အလက်တင်ရို့ ဆုတောင်းလီရေခါ ထာဝရဘုရားစာ ထိုဆုကျေးဇူးကို နင့်ကို ပီးလီရေ။ နင် ဒေဂု ထိုဆုကျေးဇူးကို အသုံးပြုလီ အရာ ထိုဆုကျေးဇူး တစ်ရက်ထက်တစ်ရက် တိုးပွါးလတ်အောင် ကြိုးစားအားထုတ်လီ။ 7ထာဝရဘုရား ငါရို့ကို ကြောက်လန့်တတ်စာ ဝိညာဉ်ကို ပီးလီစာ မဟုတ်။ သူစာ အားခွန်၊ ချစ်ခြင်းမေတ္တာ အရာ ကိုယ့်ကို ထိန်းသိမ်းတတ်စာ ဝိညာဉ်ကို ပီးလီရေ။

8ယင်းအတွက်န ငါရို့ အသျှင်ယေရှု၏ အကြောင်းကို လူရို့ဘားမာ သက်သီပီးဖို့စာကို နင် မရှက်လီကေ့။ အရာ ငါ ဒေဂု အသျှင်၏ အကြောင်းန ထောင်အကျခံရို့ ဟိကေလည်း ငါ့အကြောင်းကို ယူရို့ နင် မရှက်လီကေ့၊ ယေကေလည်း သတင်းကောင်းအတွက်မာ နင် ငါနအတူ ဒုက္ခကို ခံယူ။ ထိုဒုက္ခကို ခံယူဖို့အတွက် ထာဝရဘုရား ငါရို့ကို အားခွန် ပီးနီရေ။ 9ထာဝရဘုရားစာ ငါရို့ကို ကယ်တင်လီရေ အရာ သသန့်ရှရှင်း နီထိုင်ဖို့အတွက် ငါရို့ကို ခေါ်လီရေ။ ငါရို့ ကောင်းမြတ်စာ အလုပ်ကို လုပ်တေအတွက်န ထာဝရဘုရား ယင်းပိုင် လုပ်လီစာ မဟုတ်။ ထာဝရဘုရားစာ ကမ္ဘာကို မဖန်ဆင်းခင်အယင်ကပင် ခရစ်တော်ယေရှုကို ရွှတ်လိုက်ရို့ ကိုယ့်ကျေးဇူးတော်ကို ငါရို့ဘားမာ ဖေါ်ပြချင်လီရေ။ 10ယေကေလည်း ဒေဂု ထိုကျေးဇူးတော်ကို ငါရို့မာ ကယ်တင်သျှင် ခရစ်တော်ယေရှု ကြွလာရို့ ငါရို့ဘားမာ ဖေါ်ပြလီရေ။ ယေရှုစာ သီခြင်းတရား၏ တန်ခိုးကို ဖျက်စီးလီရေ အရာ သူစာ သတင်းကောင်းကနီရို့ မပျက်စီးနိုင်စာ အသက်၏ စကားကို ဖေါ်ပြလီရေ။ 11ထိုသတင်းကောင်းကို ဟောပြောဖို့အတွက် ထာဝရဘုရားစာ ငါ့ကို တရားဟောသူ၊ တမန်တော် အရာ ဆရာအဖြစ် ရွီးကောက်ယူလီရေ။ 12ထိုသတင်းကောင်းကို ဟောပြောရေအတွက်န ငါ ဒေ ဒုက္ခ-ဝေဒနာကို ခံနီရရေ။ ယေကေလည်း ငါ မရှက်၊ အကြောင်းကား ငါ ကျုံစာ ထာဝရဘုရားကို ငါ သိရေ အရာ သူစာ ခရစ်တော် ကြွလာဖို့နိတိုင်အောင် ငါ့ဘားမာ အပ်ထားစာတိကို ကာကွယ်ရို့ ထားနိုင်ရေဆိုစာကိုလည်း ငါ သိရေ။

13နင် ငါ့က မှန်ကန်စာ သွန်သင်ချက်ကို သင်ယူလီရေ။ နင် ထိုသွန်သင်ချက်အတိုင်း လုပ်ကိုင်လီ။ အရာ ယေရှုခရစ်တော်က ရလီစာ ချစ်ခြင်းမေတ္တာန ကျုံခြင်းတရားကို နနောင်းတည်းရို့ ထားလီ။ 14ကာကွယ်ဖို့အတွက် နင့်ဘားမာ ထာဝရဘုရား အပ်ထားစာတိကို နင် အလှပပျင်ရို့ ကာကွယ်လီ။ ယင်းသျှင့်ကို သန့်ရှင်းသောဝိညာဉ်တော်၏ တန်ခိုးန ကာကွယ်လီ။ သန့်ရှင်းသောဝိညာဉ်တော်စာ ငါရို့ စိတ်နှလုံးမာ ကျိန်းဝပ်နီရေ။

ဩနေသိဖော်ရို့ မိသားစုအတွက် ဆုတောင်းခြင်း

15အာရှိပြည်နယ်မာ ဟိကတ်စာ ဖုဂေလုန ဟေရမောဂင် ငါ့ကို စွန့်ရို့ လားခကတ်ပျာ။ သူရို့နှစ်ယောက်ကို အပယ် များကား ကျုံသူရို့လည်း ငါ့ကို စွန့်ရို့ လားခကတ်ပျာဆိုစာကို နင် သိရေ။ 16ယေကေလည်း ဩနေသိဖော်စာ ထိုသူရို့ပိုင် မဟုတ်။ သူစာ ငါ့ကို အပြန်ပြန် အားပီးကူညီလီရေ။ အရာ သူစာ ငါ ထောင်အကျခံလီရေခါလည်း တစ်ခုလည်း ရှက်ကြောက်ခြင်းကို မထားလီ။ ယင်းအတွက်န သူရို့ မိသားစုကို အသျှင် သနားကြင်နာပါစီ ဟို့ ငါ ဆုတောင်းပီးနီရေ။ 17– 18အရာ ဩနေသိဖော်စာ ရောမမြို့တို့ ရောက်လီရေခါ ငါ့ကို မတွိတွိအောင် ရှာရို့ ငါန အတွိခံလီရေ။ သက်သက် ယင်းသျှင့် မဟုတ်သိ၊ သူစာ ဧဖက်မြို့မာလည်း ငါ့ကို ကောင်းကောင်း ကူညီလီရေ။ ယင်းသျှင့်ကို နင် အလှပ သိရေ။ ယင်းအတွက်န ခရစ်တော် ကြွလာဖို့စာနိမာ အသျှင် သူ့ကို သနားကြင်နာပါစီ ဟို့ ငါ ဆုတောင်းပီးနီရေ။