2 Timothy 3
နောက်ဆုံးကာလမာ ဖြစ်ပျက်လာဖို့စာ အကြောင်း
1ယေကေလည်း နင် မှတ်ထား၊ နောက်ဆုံးကာလမာ ကောင်းကောင်း ခဲယန်းစာအချိန် ရောက်လာလိမည်။ 2ယင်းချိန်ခါ လူရို့စာ သက်သက် ကိုယ့်ကို ချစ်ကတ်လိမည်၊ တန်းကား-ဖွေသျှာကို လောဖကြီးကတ်လိမည်၊ ကိုယ့်ကိုကိုယ် အကြီး မှတ်ကတ်လိမည်၊ သူရို့စာ အားကုံးသူကို အားမနာ လုပ်ကတ်လိမည် အရာ နင်းရွှင့်ကတ်လိမည်။ ယင်းသျှင့်တိကိုအပယ် သူရို့စာ အမိအဖ စကားကို ကိုင်ကတ်လိမည် မဟုတ်၊ လူကျေးဇူးကို သိကတ်လိမည် မဟုတ်၊ သန့်ရှင်းကတ်လိမည် မဟုတ်၊ 3သူရို့မာ သနားကြင်နာမှုစိတ် ဟိကတ်လိမည် မဟုတ်၊ အရာ အခြားတစ်ယောက်ကို ခွင့်ရွှတ်ခြင်းစိတ် ဟိကတ်လိမည် မဟုတ်၊ အခြားတစ်ယောက်ကို ပုတ်ခတ်ရို့ စကား ပြောကတ်လိမည် အရာ သူရို့စာ ကိုယ့်ကိုကိုယ် ထိန်းသိမ်းဖို့ နိုင်ကတ်လိမည် မဟုတ်။ သူရို့စာ ကောင်းကောင်း ရက်စက်ကြမ်းတမ်းကတ်လိမည် အရာ ကောင်းမြတ်စာတိကို မုန်းကတ်လိမည်။ 4နောက်ဆုံးကာလမာ လူရို့စာ သစ္စာဖေါက်ကတ်လိမည်၊ တစ်ခုလည်း မစဉ်းစားဘိုင်းန ဆိုးယုတ်စာ အလုပ်ကို လုပ်ကတ်လိမည်၊ စိတ်နီကြီးကတ်လိမည် အရာ ထာဝရဘုရားကိုထက်ပင် လောက၏ စဉ့်စိမ်ချမ်းသာခြင်းကို နှစ်သက်ကတ်လိမည်။ 5သူရို့စာ ဘာသာရေး ပညှတ်တရားကို လိုက်နာစာပိုင် ဟန်ဆောင်ရို့ နီကတ်လိမည်၊ ယေကေလည်း သူရို့စာ ကိုယ်ရို့ကို ရိုးသားအောင် လုပ်နိုင်စာ တန်ခိုးကို ငြင်းပယ်ကတ်လိမည်။ တိမောသေ၊ နင် ယင်းပိုင်ဇတ် လူရို့န မပေါင်းဖေါ်လီကေ့။ 6နောက်ဆုံးကာလမာ တစ်ချိုးလူရို့စာ အိမ်တိုင်း အိမ်တိုင်း ဝင်ရို့ စိတ်နှလုံး အားနည်းစာ မိန်းမရို့ကို လိမ်ကတ်တေ အရာ သူရို့ကို ကိုယ်ရို့ စိတ်တချင် မှားယွင်းစာလမ်းတို့ ဆောင်ယူလားကတ်တေ။ ထိုမိန်းမရို့စာ အမျိုးမျိုး အပြစ်တိကို လုပ်နီကတ်တေ အရာ အမျိုးမျိုး ကာမဂုဏ်အလိုဆန္ဒစာ သူရို့ကို မှားယွင်းစာလမ်းတို့ ဆောင်ယူလားရေ။ 7ထိုမိန်းမရို့စာ အမြဲတိုင်း သွန်သင်ချက် အသစ်တိကို သင်ယူဖို့ ကြိုးစားနီကတ်တေ၊ ယေကေလည်း သူရို့စာ ထာဝရဘုရား၏ မှန်ကန်ခြင်းတရားကို ရှရှင်းလလင်း နားမလည်နိုင်ကတ်။ 8အယင်ခါ ယန္နေန ယံဗြေ အကြောင်းကို မှတ်ထား၊ သူရို့စာ မောရှေကို ဆန့်ကျင်လီကတ်တေ။ ယင်းပိုင်တထန် ထိုမှားယွင်းစာ ဆရာရို့လည်း မှန်ကန်ခြင်းတရားကို ဆန့်ကျင်နီကတ်တေ။ သူရို့စာ အတိကျ စဉ်းစားဖို့ မနိုင်ကတ် အရာ သူရို့မာ အစစ် ကျုံခြင်းတရား မဟိ။ 9ယေကေလည်း သူရို့ လုပ်ကတ်စာ အလုပ်တိ အောင်မြင်ကတ်လိမည် မဟုတ်။ အရာ သူရို့မာ အသိညာဏ် မဟိဆိုစာကို အားကုံးသူ အရွယ်သျှေန သိရကတ်လိမည်။ ယန္နေန ယံဗြေလည်း ယင်းပိုင်တထန် ဟိလီကတ်တေ။ဟိသမျ ကျမ်းစာ ထာဝရဘုရားက လာခြင်း
10ယေကေလည်း နင် သူရို့ပိုင် မဟုတ်၊ အကြောင်းကား နင်စာ ငါ့ သွန်သင်ချက်၊ ငါ့ အကျင့်သီလ အရာ ငါ့ဘဝ၏ ရွယ်မှတ်ချက်ကို သိရို့ လာဗျာ။ ယင်းသျှင့်တိကိုအပယ် ငါ့ ကျုံခြင်းတရား၊ ငါ့ စိတ်ရှည်ခြင်း၊ ငါ့ ချစ်ခြင်းမေတ္တာ အရာ ငါ့ သည်းခံခြင်းကိုလည်း နင် လိုက်နာရို့ လာဗျာ။ 11အရာ ငါစာ အန္တိအုတ်မြို့၊ ဣကောနိမြို့ အရာ လုတ္တရမြို့တို့ လားလီရေခါ လူရို့စာ ငါ့ကို ကောင်းကောင်း ညှဉ်းဆဲပြီးကေ ဒုက္ခ-ဝေဒနာ ပီးကတ်လီရေဆိုစာကိုလည်း နင် သိရေ။ ယေကေလည်း အသျှင်စာ ထို ဟိသမျ ဒုက္ခ-ဝေဒနာတိက ငါ့ကို ကယ်ဆယ်လီရေ။ 12အမှန် ခရစ်တော်ယေရှုန တစ်ကိုယ်တည်း ဖြစ်ရို့ ထာဝရဘုရား၏ အလိုတော်အတိုင်း နီထိုင်ချင်သူရို့စာ ညှဉ်းဆဲခြင်းကို ခံရကတ်လိမည်။ 13ယေကေလည်း ဆိုးယုတ်သူရို့န လိမ်လှည့်သူရို့စာ တစ်ရက်ထက်တစ်ရက် ပိုရို့ ဆိုးလာကတ်လိမည်။ သူရို့စာ အခြားလူရို့ကို လိမ်လှည့်ရို့ မှားယွင်းစာလမ်းတို့ ဆောင်ယူလားကတ်လိမည် အရာ သူရို့လည်း လူရို့ဘားမာ အလိမ်ခံကတ်လိမည်။ 14ယေကေလည်း နင် သူရို့ပိုင် မလုပ်လီကေ့။ ယင်းထက်ပင် နင် သင်ယူလီစာ သွန်သင်ချက်တိကို အလှပပျင်ရို့ လိုက်နာရို့ နီလီ။ ထိုသွန်သင်ချက်တိ မှန်ရေဆိုစာကို နင် သိရေ၊ အကြောင်းကား နင့်ကို သွန်သင်ပီးလီသူရို့စာ သစ္စာ ဟိကတ်တေဆိုစာကိုလည်း နင် သိရေ။ 15အရာ နင် အသျှေကပင် ကျမ်းစာကို နားလည်ပြီးသား ဖြစ်တေ။ ထိုကျမ်းစာတိစာ နင့်ကို ပညာ ပီးနိုင်ရေ။ ထိုပညာစာ ကယ်တင်ခြင်း ရဖို့စာလမ်းကို ပြပီးနိုင်ရေ။ အသူမဆို ယေရှုခရစ်တော်ကို ကျုံရေဆိုကေ သူစာ ထိုကယ်တင်ခြင်းကို ရရေ။ 16ဟိသမျ ကျမ်းစာ ထာဝရဘုရားက လာလီရေ။ ထိုကျမ်းစာတိစာ လူရို့ကို သွန်သင်ပီးဖို့အတွက်၊ လူရို့ အပြစ်ကို ဖေါ်ပြဖို့အတွက်၊ လူရို့ အမှားတိကို ဖာပီးဖို့အတွက် အရာ ကောင်းမြတ်စာ အလုပ်တိကို လုပ်ရို့ နီထိုင်ဖို့အတွက်လည်း ကောင်းကောင်း အကျိုးပီးရေ။ 17ကျမ်းစာကို ယင်းပိုင် အသုံးပြုရေဆိုကေ ထာဝရဘုရား၏ လူရို့စာ ဟိသမျ ကောင်းမြတ်စာ အလုပ်ကို လုပ်ဖို့အတွက် အပြည့်အစုံ အဆင်သင့် ဖြစ်နိုင်ကတ်လိမည်။
Copyright information for
RmzSC