Acts 10

ကော်နေလိကို ဂေါင်းခင်နတ်သား ကိုယ်ထင်ပြခြင်း

1ကဲသရိမြို့မာ ဣတာလီပြည်က စစ်သရွဲတစ်ရာကိုပိုင်စာ စစ်ဗိုလ်တစ်ယောက် ဟိလီရေ။ သူ့နာမည်စာ ကော်နေလိ ဖြစ်တေ။ 2ကော်နေလိစာ ယုဒလူမျိုးမဟုတ်ကေလည်း ထာဝရဘုရားကို ရိုသေကြောက်လန့်သူတစ်ယောက် ဟိလီရေ။ ကော်နေလိန သူ့အိမ်သား အားကုံးသူ အမြဲတိုင်း ထာဝရဘုရားဘားမာ သတင်းဝင်နီလီကတ်တေ။ သူစာ ဆင်းရဲသားရို့ကိုလည်း တန်းကား-ဖွေသျှာ အများကြီး လှူရို့ နီလီရေ အရာ ထာဝရဘုရားဘားမာ ဆုတောင်းရို့ နီလီရေ။

3တစ်ရက်နိ နီကျသုံးနာရီမာ ထာဝရဘုရား၏ ဂေါင်းခင်နတ်သားတစ်ပါး ကိုယ့်တို့ လာစာကို သူစာ တတ်တတ်ရတ်ရတ် ကိုယ်ထင်မာ မြင်လီရေ။ အရာ ထိုဂေါင်းခင်နတ်သား၊ “ကော်နေလိ” ဟို့ ခေါ်စာကို သူစာ ကြားလီရေ။ 4ယင်းခါ ကော်နေလိစာ အကြောက်အားန ဂေါင်းခင်နတ်သားကို စစိတ်ကြည့်ရို့ ပြောလီရေ၊ “ပြောပါ အသျှင်။” ယင်းခါ ဂေါင်းခင်နတ်သားစာ ပြောလီရေ၊ “နင် အမြဲတိုင်း ထာဝရဘုရားဘားမာ ဆုတောင်းနီစာန ဆင်းရဲသားရို့ကို တန်းကား-ဖွေသျှာ အများကြီး လှူနီစာကို ထာဝရဘုရား လက်ခံရို့ မှတ်ထားဗျာ။ 5ဒေဂု နင် ယုပ္ပေမြို့တို့ လူရွှတ်လိုက်ရို့ ပေတရုနာမည်န လူတစ်ယောက်ကို ခေါ်ယူခ။ 6ပေတရုစာ ပင်လယ်နားမာ အရီကို အဆင်သင့် လုပ်သမား ရှိမုန် အိမ်မာ ဟိရေ။”

7– 8ကော်နေလိန စကားပြောလီစာ ဂေါင်းခင်နတ်သား ပြန်လားခရေခါ ကော်နေလိစာ ကိုယ့်ကျွန် နှစ်ယောက်န ကူညီသူ စစ်သားတစ်ယောက်ကို ခေါ်ရို့ ထိုဂေါင်းခင်နတ်သား ပြောခစာ စကား အားကုံးကို ပြောရို့ သူရို့ကို ယုပ္ပေမြို့တို့ ရွှတ်လိုက်လီရေ။ ထိုစစ်သားစာ ထာဝရဘုရားကို ရိုသေကြောက်လန့်သူ တစ်ယောက် ဟိလီရေ။

ပေတရု ကိုယ်ထင်မြင်ခြင်း

9နောက်တစ်ရက်နိ ကော်နေလိ ရွှတ်လိုက်စာ လူသုံးယောက်စာ မွန်းတည့်လှောက်မာ ယုပ္ပေမြို့တို့ ရောက်ကတ်လီရေ။ ယင်းအချိန်ခါ ပေတရုစာ ထာဝရဘုရားဘားမာ ဆုတောင်းဖို့အတွက် အိမ်ခေါင်ထက်တို့ တက်လီရေ။ 10ယင်းခါ ပေတရုစာ ကောင်းကောင်း အဝမ်းဆာလီရေအတွက်န တစ်ခုမသာ စားချင်လီရေ။ ထိုအိမ်သားရို့ စားသောက်ဖို့ စိစဉ်နီကတ်တေခါ ပေတရုစာ ငိုက်ရို့ ဟိလီရေ။ 11ပေတရု ငိုက်နီရေခါ ဂေါင်းခင် ပွင့်ရို့ ကိုယ်ရုံပိုင် တစ်ပိုင်း အကြီးပျင်ရို့ ဒေါင့်လေးဒေါင့်ကို ကိုင်ရို့ ကမ္ဘာတို့ ချပီးစာကို မြင်ရလီရေ။ 12ထိုကိုယ်ရုံမာ အမျိုးမျိုး အခြီလေး​ချောင်း တိရစ္ဆာန်၊ တွားရို့လားစာ တိရစ္ဆာန် အရာ ငှက်တိလည်း ဟိလီရေ။ 13ယင်းနောက် အသူလည်း မသိတစ်ယောက် ပြောစာ အသံကို ကြားလီရေ၊ “ပေတရု၊ ထရို့ သတ်စား။”

14ပေတရုစာ ပြောလီရေ၊ “မဖြစ်နိုင်ပါ အသျှင်၊ အကျွန် မသန့်ရှင်းစာန မစင်ကြယ်စာကို တစ်ခါလည်း မစားဖူးပါသိ။”

15ယင်းခါ ပေတရုစာ အရာတစ်ပြန် ပြောစာအသံကို ကြားလီရေ၊ “ထာဝရဘုရား သန့်စင်အောင် လုပ်စာကို နင် မသန့်စင် ဟို့ မပြောကေ့။” 16ယင်းပိုင် သုံးခေါက်တိုင်အောင် ဖြစ်ပြီးရေနောက် ထိုကိုယ်ရုံကို ဂေါင်းခင်တို့ တင်ယူလားခလီရေ။

17ထိုကိုယ်ထင်မြင်စာ အဓိပ္ပါယ် ဇာလည်းဆိုစာကို ပေတရု စဉ်းစားနီရေခါ ကော်နေလိ ရွှတ်လိုက်စာ လူရို့စာ ရှိမုန် အိမ်ကို ရှာရို့ရရို့ အိမ်လမ်းခဝမာ ရောက်လာကတ်လီရေ။ 18ယင်းခါ သူရို့စာ ခေါ်ရို့ မီးကတ်လီရေ၊ “ပေတရုနာမည်န လူတစ်ယောက် ဒေ အိမ်မာ ဟိပါရေလော?”

19ယင်းခါ ပေတရုစာ ကိုယ်ထင်မြင်စာကို စဉ်းစားရို့ ဟိလီရေ။ ယင်းအချိန်ခါ သန့်ရှင်းသောဝိညာဉ်တော်စာ ပေတရုကို ပြောလီရေ၊ “လူသုံးယောက် နင့်ကို ရှာရို့ လာကတ်တေ။ 20ထရို့ အောက်တို့ ဆင်းလီ။ သူရို့ကို ငါ ရွှတ်လိုက်တေအတွက်န နင် တစ်ခုလည်း မယုံသင်္ခါ မဟိဘိုင်း သူရို့နအတူ လိုက်လီ။”

21ယင်းခါ ပေတရုစာ အောက်တို့ ဆင်းလာရို့ ကော်နေလိ ရွှတ်လိုက်စာ လူရို့ကို ပြောလီရေ၊ “ကိုယ်ဘင်ရို့ ရှာကတ်စာလူ ငါရာ။ ကိုယ်ဘင်ရို့ ဇာဖို့ လာကတ်စာလည်း?”

22သူရို့စာ ပြောကတ်လီရေ၊ “စစ်သရွဲတစ်ရာကိုပိုင်စာ စစ်ဗိုလ် ဆရာကော်နေလိ အကျွန်ရို့ကို ရွှတ်လိုက်ပါရေ။ သူစာ သူတော်ကောင်း တစ်ယောက် ဖြစ်ပါရေ အရာ ထာဝရဘုရားကိုလည်း ရိုသေကြောက်လန့်ပါရေ။ ယုဒလူရို့ အားကုံးသူ သူ့ကို ချီမွမ်းကတ်ပါရေ။ ဆရာကော်နေလိ ကိုယ်ဘင်ကို ကိုယ့်အိမ်တို့ ခေါ်ယူရို့ ကိုယ်ဘင် ဟောပြောစာ တရားကို နားထောင်ဖို့ ရလတ်အောင် သန့်ရှင်းစာ ဂေါင်းခင်နတ်သားတစ်ပါး လာရို့ ဆရာကော်နေလိကို အာဏာပီးလီပါရေ။” 23ယင်းခါ ပေတရုစာ ထိုလူသုံးယောက်ကို အိမ်ထဲတို့ ခေါ်သွင်းရို့ စားသောက်ဖို့စာန နီဖို့စာနေရာကို စီစဉ်ရို့ ပီးလီရေ။

ပေတရု ကော်နေလိအိမ်တို့ ရောက်ခြင်း

နောက်တစ်ရက်နိ ထိုလူသုံးယောက်နအတူ ပေတရုစာ ကဲသရိမြို့တို့ လားလီရေ။ ယုပ္ပေမြို့က ကျုံသူ လိုင်းကေယောက်လည်း သူရို့နအတူ လိုက်ကတ်လီရေ။ 24နောက်တစ်ရက်နိမာ သူရို့စာ ကဲသရိမြို့တို့ ရောက်ကတ်လီရေ။ ယင်းချိန်ခါ ကော်နေလိစာ ကိုယ့်အမျိုးအဆွီရို့န ရင်းနီးစာ မိတ်ဆွေရို့ကို ခေါ်ရို့ သူရို့ လာဖို့အတွက် အိမ်မာ တစ်စုတည်းစုရို့ စောင့်ရို့နီကတ်လီရေ။ 25ပေတရုစာ ကော်နေလိအိမ်နားတို့ ရောက်တေခါ ကော်နေလိစာ ပေတရု နိုင်ဗြင်းတို့ လားရို့ အခြီရင်းမာ အပြားဝပ်ရို့ ထာဝရဘုရားကိုပိုင် ရိုသေရို့ ရှိခိုးလီရေ။ 26ယင်းခါ ပေတရုစာ ကော်နေလိကို ထူရို့ ပြောလီရေ၊ “ထပါ၊ အကျွန် ထာဝရဘုရား မဟုတ်ပါ။ ကိုယ်ဘင်ပိုင် အကျွန်လည်း လူတစ်ယောက် ဖြစ်ပါရေ။” 27ပေတရုစာ ကော်နေလိနအတူ စကားပြောရို့ အိမ်ထဲတို့ ဝင်ရေခါ အိမ်ထဲမာ လူအများကြီး စုရို့ဟိစာကို မြင်လီရေ။ 28ယင်းခါ ပေတရုစာ ထိုလူရို့ကို ပြောလီရေ၊ “ကိုယ်ဘင်ရို့ကား သိကတ်ပါရေ၊ ယုဒလူမျိုး တစ်ယောက် ယုဒမဟုတ်သူရို့န ပေါင်းဖေါ်ဖို့စာန အတွိခံဖို့စာ အကျွန်ရို့ ဘာသာရေး ပညှတ်တရားကို ဆန့်ကျင်ပါရေ။ ယေကေလည်း ထာဝရဘုရား အကျွန့်ကို ပြပီးစာကား တစ်ယောက်ကိုလည်း မသန့်ရှင်း-မစင်ကြယ် ဟို့ အကျွန့်မာ ပြောဖို့ မသင့်။ 29ယင်းအတွက်န ကိုယ်ဘင်ရို့ အကျွန့်ကို ခေါ်ဖို့ ရွှတ်လိုက်တေခါ အကျွန်လည်း မငြင်းဘိုင်းန ကိုယ်ဘင်ရို့တို့ လာပါဗျာ။ ဒေဂု အကျွန် ကိုယ်ဘင်ရို့ကို တစ်ခု မီးချင်စာကား၊ အကျွန့်ကို ဇာဖို့ ခေါ်ဖို့ ရွှတ်လိုက်ပါစာလည်း?” 30ယင်းခါ ကော်နေလိစာ ပြောလီရေ၊ “ရွန်ခရေ လေးရက်အယင်က ဒေနိခါ အချိန်ပိုင် နီကျသုံးနာရီမာ အကျွန် အိမ်မာ ဆုတောင်းရို့ ဟိလီပါရေ။ ယင်းခါ တောက်ပြောင်စာ အဝတ်ဖြူကို ဝတ်ရို့ လူတစ်ယောက် အကျွန့် ရှိက ရပ်ရို့ ပြောလီပါရေ၊ 31‘ကော်နေလိ၊ နင် အမြဲတိုင်း ထာဝရဘုရားဘားမာ ဆုတောင်းနီစာန ဆင်းရဲသားရို့ကိုလည်း တန်းကား-ဖွေသျှာ အများကြီး လှူနီစာကို ထာဝရဘုရားစာ လက်ခံရို့ မှတ်ထားဗျာ။ 32ယင်းအတွက်န ဒေဂု နင် ယုပ္ပေမြို့တို့ လူရွှတ်လိုက်ရို့ ပေတရုနာမည်န လူတစ်ယောက်ကို ခေါ်ယူခ။ သူစာ ပင်လယ်နားမာ အရီကို အဆင်သင့် လုပ်သမား ရှိမုန် အိမ်မာ ဟိရေ။’ 33ယင်းအတွက်န အကျွန် ချက်ချင်း ကိုယ်ဘင်ကို ခေါ်ယူခဖို့အတွက် လူရွှတ်လိုက်လီပါရေ။ အရာ ကိုယ်ဘင်လာရေအတွက်န ကောင်းကောင်း ကျေးဇူးတင်ပါရေ။ အသျှင် ကိုယ်ဘင်ကို အကျွန်ရို့ဘားမာ ဟောပြောဖို့ ခိုင်းစာ ဟိသမျ စကားကို နားထောင်ဖို့အတွက် အကျွန်ရို့ အားကုံးသူ ထာဝရဘုရား၏ ရှိက စောင့်ရို့ ဟိကတ်ပါရေ။”

ကော်နေလိအိမ်မာ သတင်းကောင်း ဟောပြောခြင်း

34ယင်းခါ ပေတရုစာ ပြောလီရေ၊ “ထာဝရဘုရား အားကုံးသူကို တစ်ညီတည်း မျက်စိန ကြည့်ရေဆိုစာကို အကျွန် ဒေဂု အမှန် သိရပါဗျာ။ 35ဟိသမျ လူမျိုးအထဲက ထာဝရဘုရားကို ရိုသေကြောက်လန့်သူရို့န ထာဝရဘုရား၏ မှန်ကန်ခြင်းတရားကို လိုက်နာသူရို့ကို ထာဝရဘုရား လက်ခံပါရေ။ 36ဣသရေလလူမျိုးဘားမာ ထာဝရဘုရားစာ ဒေ သတင်းကောင်းကို ပို့ပီးလီပါရေ။ ဒေ သတင်းကောင်းစာ ယေရှုခရစ်တော်ကနီရို့ရာ ငြိမ်းချမ်းခြင်းကို ရပါရေ။ ယေရှုခရစ်တော်စာ အားကုံးသူမာ အသျှင် ဖြစ်ပါရေ။ 37လူရို့ ရီနှစ်မင်္ဂလာ ခံယူရဖို့စာ အကြောင်းကို ယောဟန် ဟောပြောပြီးရေနောက် ဂါလိလဲပြည်နယ်ကပင်စရို့ ယုဒပြည်နယ်မာ ဟိသမျ နေရာမာ အမျိုးမျိုး ဖြစ်ပျက်ခြင်းတိကို ကိုယ်ဘင်ရို့ ကိုယ်တိုင် သိကတ်ပါရေ။ 38နာဇရက်မြို့သျှေသား ယေရှုစာ ထာဝရဘုရားက သန့်ရှင်းသောဝိညာဉ်တော်န တန်ခိုးကို ရလီရေဆိုစာကို ကိုယ်ဘင်ရို့ သိကတ်ပါရေ။ ထာဝရဘုရား ယေရှုနအတူ ဟိလီရေအတွက်န ယေရှုစာ အမျိုးမျိုး နေရာမာ လည်ရို့ ကောင်းမြတ်စာ အလုပ်တိကို လုပ်လီပါရေ၊ အရာ မာရ်နတ် ကိုင်ရို့ ဒုက္ခ ရနီကတ်စာ ဟိသမျ လူရို့ကိုလည်း ကောင်းအောင် လုပ်လီပါရေ။

39“ယုဒပြည်နယ်န ယေရုရှလင်မြို့မာ ယေရှု လုပ်ခလီစာ ဟိသမျ အလုပ်မာ အကျွန်ရို့ သက်သီခံ ဖြစ်ကတ်ပါရေ။ ယေကေလည်း ယေရုရှလင်မြို့န ယုဒပြည်နယ်သားရို့စာ ယေရှုကို ကားတိုင်မာ တင်ရို့ အသီသတ်ဘိုက်ကတ်လီပါရေ။ 40ယေကေလည်း ထာဝရဘုရားစာ သုံးရက်နိမာ ယေရှုကို သီရာက ပြန်ရှင်ထမြောင့်စီရို့ လူရို့ဘားမာ ပြလီပါရေ။ 41ယေကေလည်း အားကုံးသူဘားမာ မပြလီပါ။ သက်သီပီးဖို့အတွက် ထာဝရဘုရား အယင်ကပင် ရွီးကောက်ရို့ ထားသူရို့ကိုရာ ယေရှု ပြလီပါရေ။ အကျွန်ရို့စာ ယေရှု သီရာက ပြန်ရှင်ထပြီးရေနောက် သူနအတူ စားသောက်လီကတ်ပါရေ။ 42ယုဒလူရို့ဘားမာ တရားဟောပြောဖို့အတွက် ယေရှု အကျွန်ရို့ကို အာဏာပီးလီပါရေ၊ အရာ သီရို့ဟိသူရို့န အသက်အရှင်ဟိသူရို့ဘားမာ တရားသူကြီးအဖြစ် ထာဝရဘုရား သူ့ကို ခန့်ထားစာ အကြောင်းကို ဟောပြောဖို့အတွက်လည်း အာဏာပီးလီပါရေ။ 43ဟိသမျ ဘုရားသတင်းပို့သူရို့စာ ယေရှု အကြောင်းကို ဒေပိုင် သက်သီ ပီးနီကတ်ပါရေ၊ ‘ယေရှုကို ကျုံသူရို့ အားကုံးသူ သူ့နာမည်၏ တန်ခိုးန အပြစ် ခွင့်ရွှတ်ခြင်းကို ရကတ်တေ။’”

အခြားလူမျိုးရို့ သန့်ရှင်းသောဝိညာဉ်တော်ကို ရခြင်း

44ပေတရု စကားပြောနီတုံးမာ သူ့စကားကို နားထောင်ရို့ နီကတ်စာ လူရို့ အားကုံးသူဘားမာ သန့်ရှင်းသောဝိညာဉ်တော် ကျရောက်လီရေ။ 45– 46ယုဒမဟုတ်သူရို့စာ သန့်ရှင်းသောဝိညာဉ်တော်၏ ဆုကျေးဇူးကို ရရို့ အမျိုးမျိုး ဘာသာစကားပြောစာန ထာဝရဘုရား၏ ဘုန်းတန်ခိုးကို ချီမွမ်းနီကတ်စာကို ကြားကတ်လီရေ။ ယင်းအတွက်န ပေတရုနအတူ ပါလတ်စာ ကျုံသူယုဒလူရို့စာ အံ့ဩကတ်လီရေ။

ယင်းခါ ပေတရုစာ ပြောလီရေ၊ 47“ဒေ လူရို့ အကျွန်ရို့ပိုင် သန့်ရှင်းသောဝိညာဉ်တော်ကို ရကတ်တေအတွက်န ရီနှစ်မင်္ဂလာ ခံယူဖို့အတွက် တစ်ခုလည်း အဆီးအတား မဟိဗျာ။” 48ယင်းခါ ပေတရုစာ ထိုလူရို့ကို ယေရှုခရစ်တော်နာမည်န ရီနှစ်မင်္ဂလာ ခံယူဖို့အတွက် အာဏာပီးလီရေ။ ယင်းနောက် သူရို့စာ ပေတရုကို ကိုယ်ရို့ဘားမာ လိုင်းကေရက် နီဖို့အတွက် တောင်းပန်ကတ်လီရေ။