Acts 11

တမန်တော်ရို့န ပေတရု စကားပြောခြင်း

1ကဲသရိမြို့က ယုဒမဟုတ်သူရို့ ထာဝရဘုရား၏ စကားတော်ကို ကျုံရို့ လက်ခံကတ်တေဆိုစာကို ယုဒပြည်နယ်မာ ဟိသမျ တမန်တော်ရို့န ကျုံသူညီအစ်ကိုမောင်နမှရို့စာ ကြားရကတ်လီရေ။ 2ယင်းအတွက်န ကဲသရိမြို့ကနီရို့ ယေရုရှလင်မြို့တို့ ပေတရု ရောက်တေခါ ကျုံသူရို့အထဲက အရီဖျားလှီးမင်္ဂလာခံသူရို့စာ ပေတရုကို အပြစ်တင်ရို့ ပြောကတ်လီရေ၊ 3“နင် ဇာဖို့ အရီဖျားလှီးမင်္ဂလာ မခံသူရို့နအတူ စားသောက်ခီစာလည်း။”

4ယင်းခါ ပေတရုစာ ပထမကပင် ဖြစ်လီစာ အကြောင်းအရာ အားကုံးကို ပြောပြလီရေ၊ 5“ငါ ယုပ္ပေမြို့မာ ဆုတောင်းနီရေအချိန်မာ ငိုက်ရို့ ဟိလီရေ။ ယင်းခါ ငါ ကိုယ်ထင်တစ်ခု မြင်လီရေ။ ထိုကိုယ်ထင်မာ ကိုယ်ရုံပိုင် ဇာလည်း မသိတစ်ခု အကြီးပျင်ရို့ ဒေါင့်လေးဒေါင့်ကို ကိုင်ရို့ ဂေါင်းခင်က ငါ့တို့ ချပီးစာကို မြင်ရလီရေ။ 6အကျွန် စစိတ် ကြည့်လိုက်တေခါ ထိုကိုယ်ရုံမာ အမျိုးမျိုး အခြီလေး​ချောင်း တိရစ္ဆာန်၊ အရိုင်း တောတိရစ္ဆာန်၊ တွားရို့လားစာ တိရစ္ဆာန် အရာ ငှက်တိကို မြင်လီရေ။ 7ယင်းနောက် ‘ပေတရု၊ ထရို့ သတ်စား’ ဟို့ အသူလည်းမသိ တစ်ယောက် ပြောစာအသံကို ငါ ကြားရလီရေ။

8“ယင်းခါ ငါ ပြောလီရေ၊ ‘မဖြစ်နိုင်ပါ အသျှင်။ အကျွန် မသန့်ရှင်းစာန မစင်ကြယ်စာကို တစ်ခါလည်း မစားဖူးပါသိ။’

9“ယင်းနောက် ဂေါင်းခင်က အရာလည်း တစ်ခေါက် ပြောလီရေ၊ ‘ထာဝရဘုရား သန့်စင်အောင် လုပ်စာကို နင် မသန့်စင် ဟို့ မပြောကေ့။’ 10ယင်းပိုင် သုံးခေါက်တိုင်အောင် ဖြစ်ပြီးရေနောက် ထိုကိုယ်ရုံကို ဂေါင်းခင်တို့ တင်ယူလားခလီရေ။

11“ယင်းနောက် ငါနီစာ အိမ်တို့ ချက်ချင်း လူသုံးယောက် ရောက်လာကတ်လီရေ။ ထိုလူသုံးယောက်စာ ကဲသရိမြို့က ငါ့တို့ ရွှတ်လိုက်စာ လူရို့ ဖြစ်ကတ်တေ။ 12ယင်းခါ သန့်ရှင်းသောဝိညာဉ်တော်စာ ငါ့ကို ပြောလီရေ၊ ‘နင် တစ်ခုလည်း မယုံသင်္ခါ မဟိဘိုင်းန သူရို့နအတူ လိုက်လီ။’ ယုပ္ပေမြို့က ညီအစ်ကိုခြောက်ယောက်လည်း ငါနအတူ လိုက်ကတ်လီရေ။ ယင်းနောက် ငါ့ကို ခေါ်ဖို့ ရွှတ်လိုက်သူ အိမ်တို့ ငါရို့ အားကုံးသူ ဝင်ကတ်လီရေ။ 13ယင်းခါ ဂေါင်းခင်နတ်သားတစ်ပါး သူ့အိမ်တို့ လာရို့ စကားပြောလီစာ အကြောင်းကို သူစာ ငါရို့ဘားမာ ပြောပြလီရေ။ ထိုဂေါင်းခင်နတ်သားစာ သူ့ကို ပြောခလီရေ၊ ‘နင် ယုပ္ပေမြို့တို့ လူရွှတ်လိုက်ရို့ ပေတရုနာမည်န လူတစ်ယောက်ကို ခေါ်ယူခ။ 14နင့်ဘားမာ သူဟောပြောဖို့စာ တရားအကြောင်းန နင်န နင့် အိမ်သား အားကုံးသူ ကယ်တင်ခြင်းကို ရကတ်လိမည်။’

15“သန့်ရှင်းသောဝိညာဉ်တော် ငါရို့ဘားမာ ပထမ ကျရောက်လီစာပိုင် ငါ စကားပြောဖို့ စရေခါ သူရို့ဘားမာလည်း ကျရောက်လီရေ။ 16‘ယောဟန်ကား ရီမာ ရီနှစ်မင်္ဂလာကို ပီးနီလီရေ၊ ယေကေလည်း ကိုယ်ဘင်ရို့ သန့်ရှင်းသောဝိညာဉ်တော်န ရီနှစ်မင်္ဂလာ ခံရကတ်လိမည်’ ဟို့ အသျှင် ပြောလီစာ စကားကို ငါ တွက်ရလီရေ။ 17အသျှင်ယေရှုခရစ်တော်ကို ကျုံရို့ ထာဝရဘုရား ငါရို့ကို ပီးလီစာ ဆုကျေးဇူးကို ထိုလူရို့ကိုလည်း ပီးလီရေ။ ယင်းပိုင်ဆိုကေ ထာဝရဘုရားကို ဟန့်ဖို့နိုင်လတ်အောင် ငါ အသူလည်း?”

18ထိုစကားတိကို ကြားရို့ ကျုံသူယုဒလူရို့စာ သဖေါတူပြီးကေ ထာဝရဘုရားကို ချီမွမ်းရို့ ပြောကတ်လီရေ၊ “ထာဝရဘုရားစာ ယုဒမဟုတ်သူရို့ကိုလည်း ထာဝရအသက်ကို ရဖို့အတွက် အပြစ်က စိတ်လှည့်ဖို့ အခွင့်အရေး ပီးလီရေ။”

အန္တိအုတ်မြို့မာဟိစာ အသင်းတော်

19သတေဖန် အသီခံရစာအချိန်ကပင်စရို့ ကျုံသူရို့စာ ညှဉ်းဆဲခြင်းကို ခံရရို့ ကွဲကြင်းလားခကတ်လီရေ။ သူရို့အထဲမာ ကွဲကြင်းလားခသူရို့စာ ဖိနိတ်ပြည်နယ်၊ ကုပရုကျွန်း၊ ရှုရိပြည်နယ်မာဟိစာ အန္တိအုတ်မြို့တို့ တိုင်အောင် လားရို့ သက်သက် ယုဒလူမျိုးရို့ဘားမာ ထာဝရဘုရား၏ စကားတော်ကို ဟောပြောကတ်လီရေ။ 20ယေကေလည်း သူရို့အထဲက ကုပရုကျွန်းသားရို့န ကုရေနေမြို့သားရို့စာ အန္တိအုတ်မြို့တို့ လားရို့ ဂရိဘာသာစကား ပြောသူရို့ဘားမာ အသျှင်ယေရှု၏ သတင်းကောင်းကို ဟောပြောကတ်လီရေ။ 21သူရို့ဘားမာ ထာဝရဘုရား၏ တန်ခိုး ဟိလီရေ။ ယင်းအတွက်န လူအများကြီး အသျှင်ကို ကျုံရို့ အသျှင်တို့ စိတ်လှည့်ရို့ လာကတ်လီရေ။

22ထိုသတင်းကို ယေရုရှလင်မြို့မာ အသင်းတော် လူရို့စာ ကြားရို့ ဗာနဗကို အန္တိအုတ်မြို့တို့ ရွှတ်လိုက်ကတ်လီရေ။ 23ဗာနဗစာ အန္တိအုတ်မြို့တို့ ရောက်တေခါ လူရို့ကို ထာဝရဘုရား၏ သနားကြင်နာခြင်းကို မြင်ရို့ ကောင်းကောင်း ပျော်လီရေ။ အရာ သူရို့စာ အသျှင်ကို စိတ်နှလုံးကပင် ကျုံရို့ သစ္စာတည်လတ်အောင် သူရို့ အားလုံသူကို အားပီးလီရေ။ ယင်းခါ လူအများကြီး အသျှင်ကို ကျုံကတ်လီရေ။ 24ဗာနဗစာ လူကောင်းတစ်ယောက် ဟိလီရေ အရာ သူ့မာ သန့်ရှင်းသောဝိညာဉ်တော်န ကျုံခြင်းတရား အပြည့်အစုံ ဟိလီရေ။ ယင်းခါ အသျှင်စာ လူအများကြီးကို ကိုယ့်တို့ ယူလာလီရေ။

25ယင်းနောက် ဗာနဗစာ ရှောလုကို ရှာရို့ တာရှုမြို့တို့ လားလီရေ။ 26ဗာနဗစာ ရှောလုကို ရှာရို့ တွိရေခါ အန္တိအုတ်မြို့တို့ ခေါ်ယူခလီရေ။ ဗာနဗန ရှောလုစာ တစ်နှစ်ပတ်လုံး အသင်းတော် လူရို့နအတူ နီရို့ လူအများကြီးကို သွန်သင်ပီးကတ်လီရေ။ ယင်းအချိန်ခါ အန္တိအုတ်မြို့မာ ယေရှု၏ တပည့်ရို့ကို ခရစ်ယာန် ဟို့ ပထမအစ နာမည်မှည့်လီရေ။

27ယင်းခါ ဘုရားသတင်းပို့သူ လိုင်းကေယောက် ယေရုရှလင်မြို့ကနီရို့ အန္တိအုတ်မြို့တို့ လာကတ်လီရေ။ 28သူရို့အထဲမာ အာဂဗုနာမည်န လူတစ်ယောက် ရပ်ရို့ သန့်ရှင်းသောဝိညာဉ်တော် ဆောင်ယူခြင်းကို ခံရရို့ ပြောလီရေ၊ “ရောမတစ်နိုင်ငံလုံးမာ အစားအစာ ငတ်မွတ်ခေါင်းပါးခြင်း ကျဖို့။” (ထိုငတ်မွတ်ခေါင်းပါးခြင်းစာ ရောမဧကရာဇ်မင်း ကလောဒိ လက်ထက်မာ ပြည့်စုံလီရေ)။

29ယင်းအတွက်န တပည့်ရို့စာ ယုဒပြည်နယ်မာဟိစာ ကျုံသူညီအစ်ကိုမောင်နမှရို့ကို အကူညီပီးဖို့အတွက် သူရို့အားကုံးသူ ကိုယ်ရို့ နိုင်အားသလှောက်ကို တန်းကား-ဖွေသျှာ ပို့ပီးဖို့ စီစဉ်ကတ်လီရေ။ 30သူရို့စာ ထိုတန်းကား-ဖွေသျှာတိကို ဗာနဗန ရှောလုအလက်မာ အပ်ရို့ ယေရုရှလင်မြို့မာဟိစာ အသင်းတော် ဂေါင်းဆောင်အကြီးရို့တို့ ပို့လိုက်ကတ်လီရေ။