Acts 12

အသင်းတော်တိကို ဟေရုဒ်မင်း ညှဉ်းဆဲခြင်း

1ယင်းအချိန်ခါ ဟေရုဒ်မင်းစာ အသင်းတော်က ကျုံသူ လိုင်းကေယောက်ကို ညှဉ်းဆဲဖို့အတွက် ဖမ်းယူခလီရေ။ 2ဟေရုဒ်မင်းစာ ယောဟန်မာ အစ်ကိုသေ ယာကုပ်ကို ဒါးသျှေထိုးရို့ သတ်စီလီရေ။ 3ထိုဖြစ်ပျက်ခြင်းကို ယုဒလူရို့ ကောင်းကောင်း သဖေါကျစာကို ဟေရုဒ်မင်းစာ မြင်လီရေ။ ယင်းအတွက်န သူစာ တဆီးမထည့်စာမုန့်ပွဲနိမာ ပေတရုကိုလည်း ဖမ်းယူခဖို့ အာဏာချလီရေ။ 4– 5ဟေရုဒ်မင်း ပေတရုကို ဖမ်းရို့ ထောင်မာ ထည့်ပြီးရေနောက် စောင့်ဖို့အတွက် စစ်သား တစ်ဆယ့်ခြောက်ယောက်ကို လေးဖွဲ့ ဖွဲ့ရို့ တာဝန် ပီးလီရေ။ လွတ်မြောင့်ခြင်းပွဲ ရွန်ရေခါ ပေတရုကို ယုဒလူရို့ ရှိက တရားစစ်ရို့ ဒါဏ်ပီးဖို့အတွက် ဟေရုဒ်မင်း သူ့ကို ထောင်မာ ထည့်ရို့ ထားလီစာ ဖြစ်တေ။ ယင်းခါ အသင်းတော်မာ ကျုံသူရို့စာ ပေတရုအတွက် စိတ်ပါကိုယ်ပါ ထာဝရဘုရားဘားမာ ဆုတောင်းကတ်လီရေ။

ပေတရု ထောင်က ရွတ်ခြင်း

6ပေတရုကို လူရို့ ရှိက ဟေရုဒ်မင်း တရားမစစ်ခင်အယင်က ညဉ့်မာ ပေတရုစာ စစ်သားနှစ်ယောက် ကြားမာ အိပ်ရို့ ဟိလီရေ။ သူ့ကို သံကျိုက်ကြိုးနှစ်ပင်န ချိုင်ရို့ ထားလီရေ။ အရာ ထောင်လမ်းခဝမာလည်း အစောင့်သားရို့ စောင့်ရို့ ဟိကတ်လီရေ။ 7ယင်းနိညဉ့်မာ ဗြုန်းခနိုင်းပျင်ရို့ ထာဝရဘုရား၏ ဂေါင်းခင်နတ်သားတစ်ပါး ထောင်ထဲမာ လာရို့ ရပ်လီရေ။ ယင်းခါ ထောင်ထဲမာ အလင်းရောင် ချင်းလီရေ။ ယင်းနောက် ဂေါင်းခင်နတ်သားစာ ပေတရု ခန္ဓာကို အားန တိုးပြီးကေ နှိုးရို့ ပြောလီရေ၊ “ပေတရု၊ အယင် ထ။” ယင်းခါ ပေတရု အလက်နှစ်ဖက်မာ ချိုင်ရို့ဟိစာ သံကျိုက်ကြိုးစာ ပြီကျလားခလီရေ။

8ယင်းခါ ဂေါင်းခင်နတ်သားစာ ပေတရုကို ပြောလီရေ၊ “နင့် ခါးပန်းကို ပန်း အရာ ဖနပ်ကို စီး။” ပေတရုစာ ဂေါင်းခင်နတ်သား ပြောစာပိုင် လုပ်လီရေ။ ဂေါင်းခင်နတ်သားစာ သူ့ကို အရာလည်း ပြောလီရေ၊ “နင့် ကိုယ်ရုံကို ရုံရို့ ငါ့နောက်က လိုက်။” 9ပေတရုစာ ဂေါင်းခင်နတ်သား နောက်က နောက်က လိုက်ရို့ ထောင်ထဲက ပြင်တို့ ထွက်လာလီရေ၊ ယေကေလည်း ပေတရုစာ ဂေါင်းခင်နတ်သား လုပ်စာတိကို အတိကျ မသိဘိုင်းန ကိုယ်ထင်မြင်စာ ဟို့ ထင်လီရေ။ 10ယင်းနောက် ပေတရုန ဂေါင်းခင်နတ်သားစာ ပထမ အစောင့်သားရို့န ဒုတိယ အစောင့်သားရို့ကို ကျော်ရို့ မြို့သံလမ်းခဝအနားတို့ ရောက်ကတ်လီရေ။ ယင်းခါ ထိုလမ်းခဝစာ သူရို့အတွက် ကိုယ့်မာကိုယ် ပွင့်လားခလီရေ အရာ သူရို့စာ ထိုလမ်းခဝကနီရို့ ထွက်လားခကတ်လီရေ။ သူရို့နှစ်ယောက် လမ်းမာ လားကတ်တေခါ ဂေါင်းခင်နတ်သားစာ ဗြုန်းခနိုင်းပျင်ရို့ ပျောက်လားခလီရေ။

11ယင်းခါ ပေတရုစာ သတိရရို့ ပြောလီရေ၊ “ထာဝရဘုရားစာ ကိုယ့်ဂေါင်းခင်နတ်သားကို ငါ့တို့ ရွှတ်လိုက်ရို့ ငါ့ကို ဟေရုဒ်မင်းန ယုဒလူမျိုးရို့ ညှဉ်းဆဲဖို့ ကြံနီစာက ကယ်ဆယ်စာကို ငါ ဒေဂု အမှန် သိရဗျာ။”

12ယင်းသျှင့်ကို သိရို့ ပေတရုစာ မာကု ဟို့ ခေါ်သူ ယောဟန်အမိ မာရိအိမ်တို့ လားလီရေ။ ထိုအိမ်မာ ကျုံသူရို့စာ တစ်စုတည်းစုရို့ ထာဝရဘုရားဘားမာ ဆုတောင်းရို့ ဟိကတ်လီရေ။ 13ပေတရုစာ ထိုအိမ်တို့ ရောက်ရို့ လမ်းခဝကို ခေါက်လီရေ။ ယင်းအချိန်ခါ ရောဒေနာမည်န အငှါးသမ တစ်ယောက် လမ်းခဝကို ဖွင့်ဖို့ လာလီရေ။ 14ယင်းခါ ထိုအငှါးသမစာ ပေတရု အသံကို ကြားရို့ စိတ်အပျော်န လမ်းခဝကို မဖွင့်ဘိုင်း အိမ်ထဲတို့ ဗြီးရို့ ဝင်လားခလီရေ အရာ သူစာ၊ “ပေတရု လမ်းခဝအနားမာ ရောက်နီဗျာ” ဟို့ ထိုကျုံသူရို့ကို ပြောလီရေ။

15ယင်းခါ အိမ်ထဲမာ ဆုတောင်းရို့ ဟိသူရို့စာ ယင်းအငှါးသမကို “နင် ရူးဗျာ” ဟို့ ပြောကတ်လီရေ။ ယေကေလည်း အငှါးသမစာ အပြန်ပြန် အားတင်ရို့ ပြောလီရေ။ ယင်းအတွက်န ထိုကျုံသူရို့စာ ပြောကတ်လီရေ၊ “ယင်းသူ ပေတရုကို ကယ်ဆယ်စာ ကိုယ်စောင့်နတ် ဟိမည်။”

16သူရို့ စကားပြောနီရေခါ ပေတရုစာ အရာလည်း အိမ်လမ်းခဝကို ခေါက်ရို့ နီလီရေ။ ကျုံသူရို့စာ လမ်းခဝကို ဖွင့်ရို့ ကြည့်ကတ်တေခါ ပေတရုကို မြင်ရို့ အံ့မောကတ်လီရေ။ 17ယင်းခါ ပေတရုစာ သူရို့ကို ဆဆိတ်နီဖို့အတွက် လက်ရိပ် ပြလီရေ။ အရာ အသျှင် သူ့ကို ထောင်ထဲက ထုတ်ယူခလီစာ အကြောင်းကို ပြောပြလီရေ။ ယင်းနောက် ပေတရုစာ၊ “ဒေ အကြောင်းကို ယာကုပ်န အခြားညီအစ်ကိုမောင်နမှရို့ဘားမာလည်း ပြောပြလီကတ်” ဟို့ မှာဘိုက်ခရို့ အခြားနေရာတို့ ထွက်လားခလီရေ။

18မိုးလင်းရေခါ စောင့်စာ စစ်သားရို့စာ ပေတရု ဇာတို့ လားခရေလည်းဆိုစာကို မသိရို့ ကြောင်းကြရို့ ရောင်းရင်းသပ်ရို့ ဖြစ်ကတ်လီရေ။ 19ယင်းနောက် ဟေရုဒ်မင်းစာ ပေတရုကို ကောင်းကောင်း ရှာစီလီရေ။ သူစာ ရှာရို့ မတွိရေခါ ထိုစောင့်စာ စစ်သားရို့ကို တရားစစ်ဆေးရို့ အသီသတ်ဖို့ အာဏာချလီရေ။ ယင်းနောက် ဟေရုဒ်မင်းစာ ယုဒပြည်နယ်က ထွက်ရို့ ကဲသရိမြို့မာ လားရို့ လိုင်းကေရက် နီလီရေ။

ဟေရုဒ်မင်း သီခြင်း

20ယင်းအချိန်ခါ ဟေရုဒ်မင်းစာ တရုမြို့သားရို့န ဇိဒုန်မြို့သားရို့ကို ကောင်းကောင်း မန်ပါလီရေ။ ယင်းခါ ထိုနှစ်မြို့သား ဟေရုဒ်မင်းန တိုင်ဘင်ဖို့အတွက် ညှီရို့ လားကတ်လီရေ။ ယင်းမာ ရောက်ကတ်တေခါ ဟေရုဒ်မင်းမာ ရင်းနီးစာ အလုပ်သမား ဗလတ္တုနာမည်န လူတစ်ယောက်ကို သူရို့ဖက်က စကားပြောဖို့အတွက် ခေါ်ယူခလီရေ။ ထိုပြည်သားရို့စာ အမြဲတိုင်း လိုအပ်စာ အစားဆန်ရီတိကို ဟေရုဒ်မင်း၏ ပြည်က ရလီကတ်တေ။ ယင်းအတွက်န ဗလတ္တုကို ခေါ်ယူရို့ ဟေရုဒ်မင်းန ထိုင်ပြီးကေ ငြိမ်းချမ်းရေးအတွက် ဖြေရှင်းဖို့ ကြည့်ကတ်လီရေ။

21ဟေရုဒ်မင်းစာ လူအများကြီး ရှိက စကားပြောဖို့အတွက် ရက်တစ်ရက် ချိန်းထားလီရေ။ ယင်းနိခါ ဟေရုဒ်မင်းစာ မင်းဝတ်တန်းဆာကို ဝတ်ရို့ ပလ္လင်မာ ထိုင်ပြီးကေ လူအများကြီး ရှိက စကားပြောလီရေ။ 22ထိုလူရို့စာ ဟေရုဒ်မင်း စကားကို ကြားရို့ အော်ရို့ ချီမွမ်းကတ်လီရေ၊ “ဒေ စကားစာ လူပြောစာစကား မဟုတ်၊ ထာဝရဘုရား၏ စကား ဖြစ်တေ။” 23ဟေရုဒ်မင်းစာ ထာဝရဘုရား၏ ဘုန်းတန်ခိုးကို မချီမွမ်းဘိုင်းန ထိုလူရို့ စကားကို သဖေါကျလီရေ။ ယင်းအတွက်န ချက်ချင်း အသျှင်၏ ဂေါင်းခင်နတ်သားတစ်ပါး လာရို့ သူ့ခန္ဓာကို အနာပီးလီရေ။ ယင်းခါ သူစာ အဝမ်းမာ သံကိုက်ရောဂါ ဖြစ်ရို့ သီလားခလီရေ။

24ယင်းအချိန်ခါ ထာဝရဘုရား၏ စကားတော်စာ ပြန့်ကျယ်လီရေ။ ယင်းအတွက်န လူအများကြီး ထာဝရဘုရားကို ကျုံကတ်လီရေ။

25ဗာနဗန ရှောလုစာ ကိုယ်ရို့မာ အလုပ်အကိုင် ပြီးဆုံးရေခါ မာကု ဟို့ ခေါ်သူ ယောဟန်ကို ကိုယ်ရို့နအတူ ခေါ်ယူရို့ ယေရုရှလင်မြို့ကနီရို့ အိန္တိအုတ်မြို့တို့ ပြန်လားခကတ်လီရေ။