Acts 13

ဗာနဗန ရှောလုကို တရားဟောဖို့ ရွှတ်ခြင်း

1အန္တိအုတ်မြို့မာဟိစာ အသင်းတော်မာ ဘုရားသတင်းပို့သူ လိုင်းကေယောက်န ဆရာ လိုင်းကေယောက် ဟိကတ်လီရေ။ သူရို့နာမည် ဖြစ်တေကား၊ ဗာနဗ၊ နိဂါ ဟို့ ခေါ်သူ ရှိမုန်၊ ကုရေနေမြို့သား လုကိ၊ ရှောလု အရာ အုပ်ချုပ်သူ ဟေရုဒ်နအတူ ကြီးပြင်းလာသူ မောင်ဟန် ဖြစ်တေ။ 2ထိုကျုံသူရို့စာ အစားရှောင်ရို့ ထာဝရဘုရားကို ဝတ်ပြုရို့နီလီရေခါ သန့်ရှင်းသောဝိညာဉ်တော်စာ သူရို့ကို ပြောလီရေ၊ “ငါ ပီးစာအလုပ်တိကို လုပ်ဖို့အတွက် ဗာနဗန ရှောလုကို ဒေဂု နင်ရို့အထဲက ရွီးကောက်ရို့ အခြားခွဲထားကတ်။” 3ယင်းနောက် သူရို့စာ အစားရှောင်ရို့ ဗာနဗန ရှောလု အဂေါင်းမာ အလက်တင်ရို့ ဆုတောင်းကတ်လီရေ အရာ သူရို့နှစ်ယောက်ကို အလုပ်လုပ်ဖို့အတွက် ရွှတ်လိုက်ကတ်လီရေ။

ကုပရုကျွန်းမာ တရားဟောပြောခြင်း

4ဗာနဗန ရှောလုကို သန့်ရှင်းသောဝိညာဉ်တော်၏ ဆောင်ယူခြင်းန ရွှတ်လိုက်တေခါ သူရို့နှစ်ယောက်စာ သေလုကိမြို့တို့ ရောက်လားခကတ်လီရေ။ ယင်းနောက် သူရို့စာ သေလုကိမြို့က သင်္ဘောမာ တက်ရို့ ကုပရုကျွန်းတို့ လားခကတ်လီရေ။ 5ဗာနဗန ရှောလုစာ ကုပရုကျွန်းမာဟိစာ ရှာလမိမြို့တို့ ရောက်ကတ်လီရေ။ ယင်းခါ သူရို့စာ ယုဒလူမျိုး ဘာသာရေး တရားဇရပ်တိမာ လယ်ရို့ ထာဝရဘုရား၏ စကားတော်ကို ဟောပြောကတ်လီရေ။ ယင်းခါ မာကု ဟို့ ခေါ်သူ ယောဟန်စာ ကူညီသူအဖြစ် သူရို့နှစ်ယောက်ကို အကူညီပီးရို့ နီလီရေ။ 6ကုပရုကျွန်း တစ်ကျွန်းလုံးမာ လည်ရို့ ပြီးရေခါ သူရို့စာ ပါဖုမြို့တို့ လာကတ်လီရေ။ ယင်းမြို့မာ ဗာယေရှုနာမည်န ယုဒလူမျိုး မှိုင်းဆရာတစ်ယောက်ကို တွိကတ်လီရေ။ သူစာ အယောင်ဆောင် ဘုရားသတင်းပို့သူ တစ်ယောက် ဖြစ်တေ။ 7– 8ထိုအယောင်ဆောင် ဘုရားသတင်းပို့သူကို ဧလုမ ဟို့ ခေါ်ရေ။ ဧလုမ အဓိပ္ပါယ်ကား၊ မှိုင်းဆရာ ဟို့ ခေါ်ရေ။ ထိုမှိုင်းဆရာစာ အုပ်ချုပ်သူ သေရဂိ-ပေါလုမာ မိတ်ဆွေတစ်ယောက် ဖြစ်တေ။ အုပ်ချုပ်သူ သေရဂိ-ပေါလုစာ ပညာဟိသူတစ်ယောက် ဖြစ်တေ။ သူစာ ထာဝရဘုရား၏ စကားတော်ကို နားထောင်ချင်ရို့ ဗာနဗန ရှောလုကို ခေါ်ဖို့အတွက် လူရွှတ်လိုက်လီရေ။ ယေကေလည်း ဧလုမစာ ဗာနဗန ရှောလု လုပ်စာအလုပ်ကို ဆန့်ကျင်ရို့ ယေရှုကို ကျုံစာက အုပ်ချုပ်သူကို ပြန်ယူခဖို့ ကြိုးစားလီရေ။ 9ရှောလုကို ပေါလုလည်း ခေါ်ရေ။ ပေါလုစာ သန့်ရှင်းသောဝိညာဉ်တော်န ပြည့်စုံရို့ ဧလုမဖက်ကို စစိတ်ကြည့်ရို့ ပြောလီရေ၊ 10“နင် မာရ်နတ်၏ သားဖြစ်တေ အရာ မှန်ကန်ခြင်းတရား၏ ရန်သူလည်း ဖြစ်တေ။ နင် ပျာရို့ လိမ်စားသူတစ်ယောက် ဖြစ်တေ။ နင် ထိုအကျင့်တိကို တစ်ခါလည်း မဘိုက်ပျာလော? 11နားထောင်၊ ဒေဂု အသျှင်၏ အငြိုဒေါသ နင့်ဘားမာ ကျနီဗျာ။ နင့် မျက်စိ ကန်းလားခရို့ လိုင်းကေရက် နီအလင်းရောင်ကို မြင်ရလိမည် မဟုတ်။”

ယင်းခါ ချက်ချင်း နှင်းန အမိုက်မှောင်စာ ဧလုမကို ချုပ်ဘိုက်လိုက်လီရေ။ အရာ အသူမဆိုတစ်ယောက် သူ့အလက်ကို ကိုင်ရို့ ယူလားပတ်စီအတွက် သူစာ မျက်စိအကန်းန တွားရို့ ရှာနီလီရေ။ 12ယင်းပိုင် ဖြစ်စာတိကို မြင်ရို့ သေရဂိ-ပေါလုစာ အသျှင်ကို ကျုံလီရေ အရာ သူစာ အသျှင်၏ တရားတော်ကို ကြားရို့ ကောင်းကောင်း အံ့ဩလီရေ။

ပိသိဒိပြည်နယ် အန္တိအုတ်မြို့မာ တရားဟောခြင်း

13ယင်းနောက် ပေါလုန သူ့အဖက်သားရို့စာ ပါဖုမြို့က သင်္ဘောမာ တက်ရို့ ပံဖုလိပြည်နယ်မာဟိစာ ပေရဂေမြို့တို့ ရောက်ကတ်လီရေ။ ယင်းခါ မာကု ဟို့ ခေါ်သူ ယောဟန်စာ သူရို့ကို ထားရို့ ယေရုရှလင်မြို့တို့ ပြန်လားခလီရေ။ 14ယင်းနောက် ဗာနဗန ပေါလုစာ ပေရဂေမြို့ကနီရို့ ပိသိဒိပြည်နယ်မာဟိစာ အန္တိအုတ်မြို့တို့ ရောက်ကတ်လီရေ။ ယင်းနောက် သူရို့စာ သတင်းနိမာ ဘာသာရေး တရားဇရပ်တို့ ဝင်ရို့ ထိုင်ကတ်လီရေ။ 15မောရှေ၏ ပညှတ်တရားန ဘုရားသတင်းပို့သူရို့ စာအုပ်ကို ဖတ်ရို့ ပြီးရေခါ တရားဇရပ်မာ ဂေါင်းဆောင်ရို့စာ သူရို့နှစ်ယောက်တို့ လူရွှတ်လိုက်ရို့ ဒေပိုင် ပြောဖို့ ခိုင်းကတ်လီရေ။၊ “ညီအစ်ကိုရို့၊ လူရို့ကို အားပီးချက်စကား ပြောစရာ ဟိရေဆိုကေ ပြောကတ်။”

16ယင်းခါ ပေါလုစာ ရပ်ရို့ လက်ရိပ်ပြပြီးကေ ပြောလီရေ၊ “ဣသရေလလူရို့န ထာဝရဘုရားကို ရိုသေကြောက်လန့်စာ ယုဒမဟုတ်သူရို့ နားထောင်ကတ်ပါ။ 17– 18ဣသရေလလူမျိုးရို့မာ ထာဝရဘုရားစာ အကျွန်ရို့ အဖိုးအဖီးအစိုင်လာရို့ကို ရွီးကောက်ယူလီပါရေ။ ယင်းခါ သူရို့ကို အီဂျစ်ပြည်မာ လူမျိုးကြီးတစ်မျိုး လုပ်လီပါရေ။ အရာ သူရို့ကို မဟာတန်ခိုးန ထိုပြည်က ထုတ်ယူခပြီးကေ သဲကန္တာရတောပြင်မာ နှစ်ပေါင်းလေးဆယ်ပတ်လုံး သူရို့ မတရားလုပ်ခြင်းကို ထာဝရဘုရား သည်းခံရို့ နီလီပါရေ။ 19ယင်းနောက် ထာဝရဘုရားစာ ခါနန်ပြည်မာ လူမျိုး ခုနစ်မျိုးကို ဖျက်စီးရို့ ထိုပြည်ကို ကိုယ့်ပြည်အဖြစ် ပိုင်ဆိုင်ဖို့အတွက် ကိုယ့်ဣသရေလလူမျိုးရို့ကို ပီးလီပါရေ။ 20ဒေ ဟိသမျ အကြောင်းအရာ ဖြစ်ပျက်ဖို့စာ နှစ်ပေါင်း လေးရာနငါးဆယ် ကြာလီပါရေ။

“ယင်းနောက် ထာဝရဘုရားစာ ဘုရားသတင်းပို့သူ ရှမွေလ လက်ထက်တိုင်အောင် အုပ်ချုပ်သူ လိုင်းကေယောက်ကို ခန့်ထားလီပါရေ။ 21ယင်းနောက် လူရို့စာ မင်းတစ်ပါး တင်ဖို့အတွက် ရှမွေလဘားမာ တောင်းဆိုလီကတ်ပါရေ။ ယင်းခါ ထာဝရဘုရားစာ ဗင်္ယာမိန် အမျိုးအနွယ်သား ကိရှမာသား ရှောလုကို မင်း မြှောင့်လီပါရေ။ ရှောလု နှစ်ပေါင်းလေးဆယ်ပတ်လုံး အုပ်စိုးလီပါရေ။ 22ယင်းနောက် ထာဝရဘုရားစာ ရှောလုကို မင်းအရာက ချရို့ ဒါဝိဒ်ကို ဣသရေလလူမျိုးရို့ မင်းအဖြစ် မြှောင့်လီပါရေ။ ထာဝရဘုရားစာ ဒါဝိဒ် အကြောင်းကို ပြောလီရေ၊ ‘ယေရှဲမာသား ဒါဝိဒ်ကို ငါ့ စိတ်ပိုင် ရှာရို့ ရဗျာ။ သူစာ ငါ့စိတ်သဖေါအတိုင်း လုပ်ပီးဖို့သူတစ်ယောက် ဖြစ်တေ။’ 23ထာဝရဘုရားစာ ကိုယ်ခံထားစာ ဂတိတော်အတိုင်း ဣသရေလလူမျိုးရို့အတွက် ဒါဝိဒ်မင်း၏ အမျိုးအနွယ်အထဲက ကယ်တင်သျှင်တစ်ပါးကို ရွှတ်လိုက်လီပါရေ။ သူစာ ယေရှု ဖြစ်တေ။ 24ယေရှု ကြွမလာခင်အယင်က ယောဟန်စာ ဟိသမျ ဣသရေလလူမျိုးရို့ကို၊ ‘အပြစ်က စိတ်လှည့်ရို့ ရီနှစ်မင်္ဂလာကို ခံယူကတ်’ ဟို့ ဟောပြောလီပါရေ။ 25ယောဟန်စာ ကိုယ့်အလုပ် ပြီးဆုံးရေခါ ပြောလီပါရေ၊ ‘နင်ရို့ ငါ့ကို အသူ ထင်ကတ်တေလည်း? ငါ နင်ရို့ မျှော်လင်းနီကတ်စာ ခရစ်တော် မဟုတ်။ ထိုခရစ်တော်စာ ငါ့နောက်က ကြွလာလိမည် အရာ ငါစာ သူ့အခြီမာစီးစာ ဖနပ်ကြိုးကို တိုင်အောင်ပင် ဖြီဖို့ မထိုက်တန်။’

26“အာဗြဟံ၏ အမျိုးအနွယ် ဖြစ်ကတ်စာ အကျွန့် ညီအစ်ကိုမောင်နမှရို့န ထာဝရဘုရားကို ရိုသေကြောက်လန့်စာ ယုဒမဟုတ်သူရို့၊ ဒေ ကယ်တင်ခြင်း၏ သတင်းကို အကျွန်ရို့တို့ ပို့လိုက်လီပါရေ။ 27ယေရုရှလင်မြို့သားရို့န သူရို့မာ ဂေါင်းဆောင်ရို့စာ ယေရှုကို ကယ်တင်သျှင် ဖြစ်တေ ဟို့ မသိလီကတ်ပါ။ ယင်းသျှင့်ကိုအပယ် သူရို့စာ သတင်းနိတိုင်း ဘုရားသတင်းပို့သူရို့ ကျမ်းစာကို ဖတ်ရို့နီလီကတ်ပါရေ။ ယေကေလည်း သူရို့စာ ထိုစကား အဓိပ္ပါယ်ကို နားမလည်လီကတ်ပါ။ ယင်းအတွက်န သူရို့စာ ဘုရားသတင်းပို့သူရို့ ကျမ်းစာမာ ရွီးရို့ဟိစာ စကားကို ပြည့်စုံအောင် လုပ်ဖို့အတွက် ယေရှုကို အပြစ်ချရို့ သီဒါဏ် ပီးကတ်လီပါရေ။ 28သူရို့စာ ယေရှုကို သီဒါဏ်ပီးဖို့စာ အပြစ် မရလီကတ်ပါ၊ ယေကေလည်း သူရို့စာ ယေရှုကို သီဒါဏ်ပီးဖို့အတွက် အုပ်ချုပ်သူကြီးပိလတ်ဘားမာ တောင်းဆိုလီကတ်ပါရေ။ 29ယေရှုခရစ်တော် အကြောင်းကို ကျမ်းစာမာ ရွီးရို့ဟိလီစာပိုင်တထန် ဟိသမျ အားကုံး ပြည့်စုံပြီးရေနောက် တပည့်ရို့စာ ယေရှု၏ အကောင်တော်ကို ကားတိုင်က ချရို့ သင်္ဂြိုဟ်လီကတ်ပါရေ။ 30ယေကေလည်း ထာဝရဘုရားစာ ယေရှုကို သီရာက ပြန်ရှင်ထမြောင့်စီလီပါရေ။ 31ယင်းနောက် ဂါလိလဲပြည်နယ်ကနီရို့ ယေရုရှလင်မြို့တို့ ယေရှုနအတူ လိုက်လာသူရို့စာ ရက်ပေါင်းများစွာ ယေရှုကို မြင်ရကတ်လီပါရေ။ သူရို့စာ ဒေဂု အကျွန်ရို့ လူရို့ဘားမာ ထိုအကြောင်းကို သက်သီ ပီးနီကတ်ပါရေ။

32– 33“အကျွန်ရို့ ဒေ သတင်းကောင်းကို ကိုယ်ဘင်ရို့ဘားမာ ဟောပြောစာ ဖြစ်တေကား၊ ထာဝရဘုရားစာ အကျွန်ရို့ အဖိုးအဖီးအစိုင်လာရို့ဘားမာ ခံထားလီစာ ဂတိတော်အတိုင်း ယေရှုကို သီရာက ပြန်ရှင်ထမြောင့်စီရို့ သူရို့အမျိုးအနွယ်သားရို့အတွက် ထိုဂတိတော်ကို ပြည့်စုံအောင် လုပ်လီပါရေ။ ယင်းအဓိပ္ပါယ်ကား အကျွန်ရို့အတွက် ထိုဂတိတော်ကို ပြည့်စုံအောင် လုပ်လီပါရေ။ ထိုအကြောင်းကို ဆာလံကျမ်း ဒုတိယ ပုဒ်မမာ ဒေပိုင် ရွီးရို့ ဟိပါရေ၊
‘နင် ငါ့သား ဖြစ်တေ၊
ဒေနိကပင် ငါ နင့်အဖ ဖြစ်ပျာ။’

34“ထာဝရဘုရားစာ ယေရှုကို သီရာက ပြန်ရှင်ထမြောင့်စီလီပါရေ။ ယင်းအတွက်န သူစာ တစ်ခါလည်း မသီပါဗျာ။ ထိုစကားတိကို ထာဝရဘုရား ပြောလီရေ၊
‘ငါ ဒါဝိဒ်မင်းကို ပဿိ ပီးဖို့ ဂတိခံထားလီစာပိုင်
နင်ရို့ကိုလည်း သန့်ရှင်းစာန စိတ်ချရို့ရစာ ပဿိကို ငါ ပီးမည်။’

35ထိုအကြောင်းကို အရာတစ်ခု ပုဒ်မမာ ရွီးရို့ ဟိရေ၊
‘ကိုယ်တော်၏ သူတော်ကောင်း ခန္ဓာကို ပျက်စီးဖို့ ပီးမည် မဟုတ်ပါ။’

36“ဒါဝိဒ်မင်းစာ ကိုယ်အရှင်ဟိလီရေခါ လူရို့အထဲမာ ထာဝရဘုရား၏ ရွယ်မှတ်ချက်ကို ပြည့်စုံအောင် လုပ်လီပါရေ။ ယင်းနောက် သူစာ သီလားခလီပါရေ အရာ သူ့အကောင်တော်ကို သူ့အဖိုးအဖီးအစိုင်လာရို့ သင်္ချိုင်းမာ သင်္ဂြိုဟ်လီပါရေ။ ယင်းနောက် သူ့ခန္ဓာစာ ပျက်စီးလီပါရေ။ 37ယေကေလည်း ထာဝရဘုရားစာ ယေရှုကို သီရာက ပြန်ရှင်ထမြောင့်စီလီပါရေ၊ အရာ သူ့ခန္ဓာစာ မပျက်စီးလီပါ။ 38ယင်းအတွက်န ညီအစ်ကိုမောင်နမှရို့၊ ကိုယ်ဘင်ရို့ သိရဖို့စာကား၊ ယေရှုကနီရို့ အပြစ် ခွင့်ရွှတ်ခြင်းကို ရရေဆိုစာ အကြောင်းကို ကိုယ်ဘင်ရို့ဘားမာ ဟောပြောစာ ဖြစ်ပါရေ။ 39မောရှေ၏ ပညှတ်တရားကို လိုက်နာရို့ ကိုယ်ဘင်ရို့ အပြစ် ခွင့်ရွှတ်ခြင်းကို မရလီကတ်ပါ။ ယေကေလည်း ယေရှုကို ကျုံသူစာ အပြစ် ခွင့်ရွှတ်ခြင်းကို ရပါရေ။ 40ဘုရားသတင်းပို့သူရို့ ဟောပြောခစာတိ ကိုယ်ဘင်ရို့ဘားမာ မကျလတ်အောင် ကိုယ်ဘင်ရို့ သတိထားကတ်ပါ။ ဘုရားသတင်းပို့သူရို့စာ ဒေပိုင် ဟောပြောခလီပါရေ၊
41‘နင်ရို့အထဲမာ ထာဝရဘုရားကို အားမနာလုပ်သူရို့ နားထောင်ကတ်၊
နင်ရို့ အရှင်ဟိရေခါ ထာဝရဘုရား၏ အလုပ်တိကို တစ်ခုပိုင်လည်း ကျုံကတ်လိမည် မဟုတ်၊
အသူမဆို ပြောပြကေလည်း နင်ရို့ ကျုံကတ်လိမည် မဟုတ်။
ယင်းအတွက်န နင်ရို့ အံ့ဩရို့ သီလားလီကတ်။’”

42ပေါလုန ဗာနဗစာ ဘာသာရေး တရားဇရပ်က ထွက်လားကတ်တေခါ လူရို့စာ လာမည်သတင်းနိမာ ထိုအကြောင်းတိကို အရာလည်း ရှင်းရို့ပြဖို့အတွက် သူရို့ နှစ်ယောက်ကို တောင်းပန်ကတ်လီရေ။ 43လူရို့စာ ဘာသာရေး တရားဇရပ်က ထွက်လားခကတ်တေခါ ယုဒလူရို့န ယုဒဘာသာတရားကို ကျုံကတ်စာ ထာဝရဘုရားကို ရိုသေကြောက်လန့်သူရို့စာ ပေါလုန ဗာနဗ နောက်က လိုက်ကတ်လီရေ။ ယင်းခါ သူရို့ ထာဝရဘုရား၏ ကျေးဇူးတော်အောက်မာ တတိုင်းမမြိုင်း နီထိုင်ဖို့ နိုင်လတ်အောင် ပေါလုန ဗာနဗစာ သူရို့ကို အားပီးကတ်လီရေ။ 44နောက်သတင်းနိမာ တစ်မြို့လုံးက များကာ လူရို့စာ ထာဝရဘုရား၏ စကားတော်ကို နားထောင်ဖို့အတွက် လာရို့ စုကတ်လီရေ။ 45ထိုလူပရိတ်သပ်ရို့ကို မြင်ရို့ ယုဒလူရို့စာ ကောင်းကောင်း မနာလို ဖြစ်ကတ်လီရေ အရာ သူရို့စာ ပေါလု စကားကို ဆန့်ကျင်ရို့ အမျိုးမျိုးပိုင် ပုတ်ခတ်ရို့ ပြောကတ်လီရေ။ 46ယင်းခါ ပေါလုန ဗာနဗစာ ရဲဝံ့သတ္တိအပြည့်န သူရို့ကို ပြောလီရေ၊ “ထာဝရဘုရား၏ စကားတော်ကို အကျွန်ရို့ ပထမဆုံး ကိုယ်ဘင်ရို့ဘားမာ ပြောဖို့အလို ဟိလီပါရေ။ ယေကေလည်း ထိုစကားတော်ကို ကိုယ်ဘင်ရို့ဘားမာ ဟောပြောရေခါ ကိုယ်ဘင်ရို့ ငြင်းပယ်ကတ်ပါရေ အရာ ကိုယ်ဘင်ရို့ ကိုယ်ရို့ကိုယ် ထာဝရအသက် ရဖို့မထိုက်တန် ဟို့ မှတ်ကတ်ပါရေ။ ယင်းအတွက်န အကျွန်ရို့ ကိုယ်ဘင်ရို့က ထွက်ရို့ ယုဒမဟုတ်သူရို့တို့ လားပါဖို့ဗျာ။ 47အသျှင် အကျွန်ရို့ကို ဒေပိုင် မှာခလီပါရေ၊
‘အခြားလူမျိုးရို့ကို အလင်းပီးဖို့အတွက် ငါ နင်ရို့ကို ရွှတ်လိုက်တေ၊
အကြောင်းကား ကမ္ဘာမာ ဟိသမျ လူမျိုးရို့ကို ငါ ကယ်တင်ခြင်း ရစီချင်ရေ။’”

48ထိုစကားကို ကြားရို့ ယုဒမဟုတ်သူရို့စာ ကောင်းကောင်း ပျော်ကတ်လီရေ၊ အရာ သူရို့စာ အသျှင်၏ စကားတော်ကို ချီမွမ်းကတ်လီရေ။ ထာဝရအသက်ကို ရဖို့အတွက် ထာဝရဘုရား၏ ရွီးကောက်ခြင်းကို ခံရသူရို့ရာ ကျုံကတ်လီရေ။

49ထာဝရဘုရား၏ စကားတော်စာ ပံဖုလိပြည်နယ် တစ်လုံးမာ ပြန့်လားခလီရေ။ 50ယေကေလည်း ယုဒလူရို့စာ ထာဝရဘုရားကို ကိုးကွယ်စာ အကြီးအကျယ် မိန်းမရို့န မြို့မာဟိစာ လူကြီးရို့ကို စကားထိုးပီးရို့ ပေါလုန ဗာနဗကို ညှဉ်းဆဲကတ်လီရေ။ ယင်းနောက် သူရို့ နှစ်ယောက်ကို ယင်းနေရာက နှင်ထုတ်လိုက်ကတ်လီရေ။ 51ယင်းခါ ပေါလုန ဗာနဗစာ ထိုလူရို့ကို ဆန့်ကျင်ရို့ သတိပီးစာ အမှတ်တရအဖြစ် ကိုယ်ရို့ အခြီက ကျုပ်မုန့်ကို ခါချဘိုက်ခကတ်လီရေ။ ယင်းနောက် သူရို့စာ ဣကောနိမြို့တို့ လားခကတ်လီရေ။ 52ယေကေလည်း တပည့်ရို့မာ ဝမ်းသာခြင်းန သန့်ရှင်းသောဝိညာဉ်တော် ပြည့်စုံရို့ နီလီရေ။