Acts 14

ဣကောနိမြို့မာ တရားဟောပြောခြင်း

1ပေါလုန ဗာနဗ ဣကောနိမြို့မာ ဟိလီရေခါ သူရို့ အလည့်အတိုင်း ယုဒလူရို့ ဘာသာရေး တရားဇရပ်တို့ ဝင်ကတ်လီရေ။ ယင်းနေရာမာ သူရို့နှစ်ယောက် ဟောပြောစာ တရားကောင်းရေအတွက်န ယုဒလူရို့န ထာဝရဘုရားကို ရိုသေကြောက်လန့်စာ ယုဒမဟုတ်သူရို့အထဲက များကာ လူရို့ ယေရှုကို ကျုံကတ်လီရေ။ 2ယေကေလည်း ကျုံသူညီအစ်ကိုမောင်နမှရို့ကို ဆန့်ကျင်ဖက် လုပ်ဖို့အတွက် မကျုံစာ ယုဒလူရို့စာ ယုဒမဟုတ်သူရို့ကို စကားထိုးရို့ မန်တက်အောင် လုပ်ကတ်လီရေ။ 3ဣကောနိမြို့မာ ပေါလုန ဗာနဗစာ ရက်ပေါင်းများစွာနီရို့ သတ္တိအပြည့်န အသျှင်ယေရှု၏ အကြောင်းကို ဟောပြောရို့ နီလီရေ။ သူရို့နှစ်ယောက်စာ အသျှင်၏ ကျေးဇူးတော် အကြောင်းကို ဟောပြောရို့ နီလီရေ။ အရာ အသျှင်စာ ပေါလုန ဗာနဗ ဟောပြောစာ စကား မှန်ရေဆိုစာကို သူရို့ကနီရို့ အမျိုးမျိုး အံ့ဩဖွယ်အလုပ်တိကို လုပ်ရို့ သက်သီပြလီရေ။ 4ယင်းခါ ထိုမြို့မာ လူရို့စာ နှစ်တိုင် ကွဲလားခကတ်လီရေ။ တစ်ချိုးလူရို့စာ ယုဒလူရို့ဖက်တို့ ဝင်ကတ်လီရေ အရာ တစ်ချိုးလူရို့စာ တမန်တော်ရို့ဖက်တို့ ဝင်ကတ်လီရေ။ 5ယင်းခါ ပေါလုန ဗာနဗကို ညှဉ်းဆဲဖို့အတွက် အရာ ကျောက်ခဲ ဘိုက်ရို့ သတ်ဘိုက်ဖို့အတွက် ယုဒမဟုတ်သူရို့မာ ဂေါင်းဆောင်ရို့န ယုဒလူရို့မာ ဂေါင်းဆောင်ရို့ နှစ်ဖွဲ့ပေါင်းရို့ အကြံချကတ်လီရေ။ 6ယေကေလည်း သူရို့နှစ်ယောက်စာ ယင်းသျှင့်ကို သိရို့ လုကောနိပြည်နယ်မာဟိစာ လုတ္တရမြို့၊ ဒေရဗေမြို့ အရာ ထိုနှစ်မြို့နားမာဟိစာ အမျိုးမျိုး နေရာတို့ ထွက်ဗြီးရို့ နီကတ်လီရေ။ 7ယင်းနေရာတိမာ ထွက်ဗြီးရို့ နီရေအချိန်ခါ သူရို့စာ ယေရှု၏ သတင်းကောင်းကို ဟောပြောကတ်လီရေ။

လုတ္တရမြို့န ဒေရဗေမြို့မာ တရားဟောပြောခြင်း

8လုတ္တရမြို့မာ မွီးဖွားရေလှောက်ကပင် တစ်စိတ်နာရောဂါ ဖြစ်သူတစ်ယောက် ဟိလီရေ။ ယင်းအတွက်န သူစာ တစ်ခါလည်း လားဖို့မနိုင်ဘိုင်းန ထိုင်ရို့ ဟိလီရေ။ 9– 10ထိုတစ်စိတ်နာရောဂါ ဖြစ်သူစာ ပေါလု စကားကို နားထောင်ရို့ နီလီရေ။ ယင်းခါ ပေါလုစာ ထိုရောဂါသေ ကျုံစာကို မြင်ရို့ သူ့ဖက်တို့ စစိတ်ကြည့်ရို့ အားန အော်ရို့ ပြောလီရေ၊ “နင့်အခြီကို အားပြုရို့ ရပ်။” ယင်းခါ ချက်ချင်း ထိုတစ်စိတ်နာရောဂါ ဖြစ်သူစာ ခုံရို့ထပြီးကေ လားနီလီရေ။

11ယင်းခါ လူရို့စာ ပေါလု လုပ်စာ အံ့ဩဖွယ်အလုပ်ကို မြင်ရို့ လုကောနိဘာသာစကားန အော်ရို့ ပြောကတ်လီရေ၊ “နတ်တိ လူအရုပ်ဆောင်ရို့ ငါရို့တို့ ဆင်းလာကတ်ပျာ။” 12ယင်းအတွက်န သူရို့စာ ဗာနဗကို ဇုသနတ် ဟို့ ခေါ်ကတ်လီရေ၊ အရာ ပေါလုစာ ဟောပြောသူအကြီး တစ်ယောက်ပိုင် စကားပြောရေအတွက်န သူ့ကို ဟေရမေနတ် ဟို့ ခေါ်ကတ်လီရေ။ 13မြို့ပြင်က ဇုသနတ် ကျောင်း ဟိလီရေ။ ထိုနတ်ကျောင်းက ပုရောဟိတ်န ဟိသမျ လူရို့စာ ပေါလုန ဗာနဗဘားမာ ယဇ်ပူဇော်ဖို့အတွက် နွားတွီးတိန ပန်းသိန်တိကို မြို့လမ်းခဝတို့ ယူလာကတ်လီရေ။

14ယေကေလည်း ပေါလုန ဗာနဗစာ ယင်းပိုင် ပူဇော်ဖို့ လာစာကို သိကတ်တေခါ ကိုယ်ရို့အဝတ်ကို ဆုတ်ရို့ လူအကျိုင်ထဲတို့ ဗြီးလားကတ်လီရေ။ အရာ သူရို့စာ အားန အော်ရို့ ပြောကတ်လီရေ၊ 15“မိတ်ဆွေရို့၊ ကိုယ်ဘင်ရို့ ဇာဖို့ ဒေပိုင် လုပ်ကတ်ပါစာလည်း? အကျွန်ရို့လည်း ကိုယ်ဘင်ရို့ပိုင် လူဖြစ်ကတ်ပါရေ။ အကျွန်ရို့ ကိုယ်ဘင်ရို့ဘားမာ ဟောပြောဖို့ လာစာ သတင်းကောင်း ဖြစ်တေကား ဒေပိုင်၊ ကိုယ်ဘင်ရို့ ထိုတန်ဖိုးမဟိစာ နတ်ရုပ်တိကို စွန့်ရို့ အသက်သျှင် ထာဝရဘုရားတို့ စိတ်လှည့်ကတ်ပါ။ အသက်သျှင် ထာဝရဘုရားစာ ဂေါင်းခင်၊ ကမ္ဘာမြေ၊ သမုဒ္ဒရာ အရာ ထိုသုံးခုအထဲမာဟိစာ ဟိသမျ အားကုံးကို ဖန်ဆင်းလီပါရေ။ 16အယင်ကခါ ဟိသမျ လူမျိုးရို့ကို ထာဝရဘုရား စိတ်တချင် နီထိုင်ဖို့ ပီးလီပါရေ။ 17ယေကေလည်း ထာဝရဘုရားစာ ကိုယ့်အကြောင်းကို အမြဲတိုင်း သက်သီပီးလီပါရေ။ ထာဝရဘုရားစာ ကိုယ်ဘင်ရို့ကို သနားကြင်နာရို့ ဂေါင်းခင်က မိုးချပီးရို့ အချိန်တိုင်း အသီးအနှံသီးရို့ ပီးနီပါရေ၊ အရာ ကိုယ်ဘင်ရို့ စိတ်ပျော်ပတ်စီအတွက် အများကြီး စားစရာ ပီးနီပါရေ။” 18ပေါလုန ဗာနဗစာ ထိုအကြောင်းတိကို လူရို့ဘားမာ ပြောပြကတ်လီရေ၊ ယေကေလည်း သူရို့နှစ်ယောက်စာ ထိုလူရို့ ယဇ်မပူဇော်ဖို့အတွက်ကို တားဆီးစာ ကောင်းကောင်း ပင်ပန်းကတ်လီရေ။

19ယင်းနောက် အန္တိအုတ်မြို့န ဣကောနိမြို့က ယုဒလူလိုင်းကေယောက် လုတ္တရာမြို့တို့ လာကတ်လီရေ။ ယင်းခါ သူရို့စာ ပေါလုန ဗာနဗကို ဆန့်ကျင်ဖက် လုပ်ဖို့အတွက် လုတ္တရာမြို့မာဟိစာ လူရို့ကို မန်မြှောင့်ပီးကတ်လီရေ။ ယင်းနောက် သူရို့စာ ပေါလုကို ကျောက်ခဲ ဘိုက်ကတ်လီရေ။ ယင်းခါ သူရို့စာ ပေါလုကို သီလားခဗျာ ဟို့ ထင်ရို့ မြို့ပြင်တို့ ငင်ထုတ်ယူလားခကတ်လီရေ။ 20ယေကေလည်း ခရစ်တော်ကို ကျုံသူရို့စာ ပေါလု လေးဖက်လက်စိမာ စုကတ်တေခါ ပေါလုစာ ထရို့ မြို့အထဲတို့ ပြန်လားခလီရေ။ နောက်တစ်ရက်နိ ပေါလုန ဗာနဗစာ လုတ္တရာမြို့က ထွက်ရို့ ဒေရဗေမြို့တို့ လားခကတ်လီရေ။

ရှုရိပြည်နယ် အန္တိအုတ်မြို့တို့ ပြန်လာခြင်း

21ပေါလုန ဗာနဗစာ ဒေရဗေမြို့မာ သတင်းကောင်း ဟောပြောရေအတွက်န လူအများကြီး ယေရှု၏ တပည့် ဖြစ်ကတ်လီရေ။ ယင်းနောက် သူရို့နှစ်ယောက်စာ လုတ္တရမြို့၊ ဣကောနိမြို့ အရာ ပိသိဒိပြည်နယ်က ဝင်ရို့ အန္တိအုတ်မြို့တို့ ပြန်လာကတ်လီရေ။ 22သူရို့နှစ်ယောက် ထိုမြို့မာ ယေရှု၏ တပည့်ရို့မာ ကျုံခြင်းတရား ခိုင်မာလတ်အောင် အရာ တည်မြဲလတ်အောင် သူရို့ကို အားပီးကတ်လီရေ၊ “ငါရို့ အများကြီး ညှဉ်းဆဲခြင်းကို ခံရို့ ထာဝရဘုရား၏ နိုင်ငံတော်တို့ ဝင်ရကတ်ဖို့။” 23ယင်းနောက် ပေါလုန ဗာနဗစာ အသင်းတော်တိုင်းမာ လားရို့ ကျုံသူရို့အထဲက ဂေါင်းဆောင်အကြီးအဖြစ် ရွီးကောက်ကတ်လီရေ။ အရာ သူရို့နှစ်ယောက် အစားရှောင်ရို့ ဆုတောင်းပြီးကေ အသင်းတော်လူရို့ ကျုံကတ်စာ အသျှင်၏ အလက်မာ သူရို့ကို တင်အပ်ကတ်လီရေ။

24ယင်းနောက် ပေါလုန ဗာနဗစာ ပိသိဒိပြည်နယ်ထဲက ဝင်လားရို့ ပံဖုလိပြည်နယ်တို့ ရောက်ကတ်လီရေ။ 25သူရို့ နှစ်ယောက်စာ ပံဖုလိပြည်နယ်မာဟိစာ ပေရဂေမြို့မာ ထာဝရဘုရား၏ စကားတော်ကို ဟောပြောရို့ အတ္တလိမြို့တို့ လာကတ်လီရေ။ 26ယင်းနောက် သူရို့စာ အတ္တလိမြို့ကနီရို့ သင်္ဘောမာ တက်ရို့ ရှုရိပြည်နယ်မာဟိစာ အန္တိအုတ်မြို့တို့ ပြန်လာကတ်လီရေ။ ဒေ အန္တိအုတ်မြို့စာ သူရို့ လုပ်ရို့ပြီးဆုံးခစာ အလုပ်အတွက် သူရို့ကို ထာဝရဘုရား၏ အလက်မာ တင်အပ်ပြီးကေ ဆုတောင်းရို့ ရွှတ်လိုက်လီစာမြို့ ဖြစ်တေ။ 27ပေါလုန ဗာနဗစာ အန္တိအုတ်မြို့တို့ ရောက်တေခါ အသင်းတော်မာ ဟိသမျ လူရို့ကို ခေါ်ရို့ နေရာတစ်ခုမာ စုကတ်လီရေ။ အရာ သူရို့နှစ်ယောက်ကနီရို့ ထာဝရဘုရား လုပ်လီစာ ဟိသမျ အကြောင်းအရာကို ပြောပြကတ်လီရေ။ ယုဒမဟုတ်သူရို့ ခရစ်တော်ကို ကျုံဖို့ ရကတ်ပတ်စီအတွက် ထာဝရဘုရား အခွင့်အရေး ပီးလီစာ အကြောင်းကိုလည်း သူရို့ ပြောပြကတ်လီရေ။ 28ယင်းနောက် ပေါလုန ဗာနဗစာ ထိုမြို့မာ ယေရှု တပည့်ရို့နအတူ ရက်ပေါင်းများစွာ နီကတ်လီရေ။