Acts 17

သက်သာလောနိတ်မြို့မာ ပေါလုန သိလ

1ယင်းနောက် ပေါလုန သိလစာ အံဖိပေါလိမြို့န အာပေါလောနိမြို့ထဲက ဝင်ရို့ သက်သာလောနိတ်မြို့တို့ လားခကတ်လီရေ။ သက်သာလောနိတ်မြို့မာဟိစာ ယုဒလူရို့မာ ဘာသာရေး တရားဇရပ်တစ်ခု ဟိလီရေ။ 2ပေါလုစာ ကိုယ့်အလည့်အတိုင်း သတင်းနိတိုင်ကေ ထိုဘာသာရေး တရားဇရပ်တို့ လားရို့ သုံးသတင်း တိုင်အောင် ကျမ်းစာက ယူရို့ လူရို့န တိုင်ဘင်ကတ်လီရေ။ 3ယုဒလူရို့ဘားမာ ကျမ်းစာက ယူရို့ ရှင်းပြလီစာကား၊ ခရစ်တော် ဒုက္ခ-ဝေဒနာ ခံရဖို့ လိုလီရေ အရာ သီရာက ပြန်ရှင်ထမြောင့်ဖို့ လိုလီရေ။ ပေါလုစာ ပြောလီရေ၊ “ငါ ကိုယ်ဘင်ရို့ဘားမာ ယေရှု အကြောင်းကို ဟောပြောလီရေ။ ထိုယေရှုစာ ခရစ်တော် ဖြစ်တေ။” 4ပေါလု စကားကို ကြားရို့ ယုဒလူ လိုင်းကေယောက် ကျုံရို့ ပေါလုန သိလ အဖွဲ့မာ ဝင်ကတ်လီရေ။ သူရို့ကိုအပယ် အများကြီး ထာဝရဘုရားကို ရိုသေကြောက်လန့်စာ ဂရိလူမျိုးန ထိုမြို့မာဟိစာ နာမည်ကျော် မိန်းမရို့လည်း သူရို့အဖွဲ့မာ ဝင်ကတ်လီရေ။

5ထိုမြို့မာ ယုဒလူရို့စာ မနာလိုစိတ် ဖြစ်ရို့ ဈီးမာရွင့်နီကတ်စာ လူဆိုး လိုင်းကေယောက်ကို ခေါ်ယူခရို့ စုပြီးကေ မြို့ထဲမာ ရောင်းရင်းသပ်အောင် လုပ်ကတ်လီရေ။ ယင်းနောက် သူရို့စာ ပေါလုန သိလကို လူရို့ ရှိတို့ ဖမ်းယူခဖို့အတွက် ယာသုန် အိမ်မာ ဝင်ရို့ ထောင်းထင်းမရဖြီးရို့ ရှာကတ်လီရေ။ 6သူရို့စာ ယာသုန် အိမ်မာ ပေါလုန သိလကို ရှာရို့ မတွိရေခါ ယာသုန်န ကျုံသူ လိုင်းကေယောက်ကို ဖမ်းရို့ မြို့အုပ်ချုပ်သူရို့တို့ ယူလားခကတ်လီရေ။ ယင်းမာ ရောက်တေခါ သူရို့စာ အော်ရို့ ပြောကတ်လီရေ၊ “ဒေလူရို့ ကမ္ဘာတစ်လုံးမာ လည်ရို့ ဒုက္ခ ပီးနီကတ်ပါရေ။ သူရို့ ဒေဂု အကျွန်ရို့ မြို့တို့လည်း ရောက်နီကတ်ပါဗျာ။ 7ယာသုန်စာ သူရို့ကို အိမ်တင်ခံလီပါရေ။ သူရို့ အားကုံးသူ ရောမဧကရာဇ်မင်း အာဏာတိကို ဆန့်ကျင်ရို့ ယေရှုနာမည်န မင်းတစ်ပါး ဟိရေ ဟို့ ပြောနီကတ်ပါရေ။” 8ထိုစကားတိကို ပြောရို့ မြို့အုပ်ချုပ်သူရို့န ယင်းမာ စုရို့ ဟိကတ်စာ လူရို့ကို စိတ်အနှောက်သျှက် ဖြစ်အောင် လုပ်ကတ်လီရေ။ 9ယာသုန်န သူ့အဖက်သားရို့စာ ကိုယ်ရို့ကို ရွှတ်ပီးဖို့အတွက် တန်းကား ပီးကတ်လီရေ။ ယင်းနောက် မြို့အုပ်ချုပ်သူရို့စာ သူရို့ကို ရွှတ်လိုက်ကတ်လီရေ။

ဗေရိမြို့မာ တရားဟောခြင်း

10ယင်းနိ ညဉ့်မာ ကျုံသူညီအစ်ကိုမောင်နမှရို့စာ ပေါလုန သိလကို ချက်ချင်း ဗေရိမြို့တို့ ရွှတ်လိုက်ကတ်လီရေ။ သူရို့နှစ်ယောက် ထိုမြို့တို့ ရောက်တေခါ ယုဒလူရို့ ဘာသာရေး တရားဇရပ်တို့ လားကတ်လီရေ။ 11သက်သာလောနိတ်မြို့မာ ဟိကတ်စာ ယုဒလူရို့ထက် ဗေရိမြို့မာ ဟိကတ်စာ ယုဒလူရို့စာ အများကြီး လက်ခံဖို့ စိတ်သဖေါ ဟိကတ်လီရေ။ ယင်းအတွက်န သူရို့စာ ပေါလု ပြောပြစာ ထာဝရဘုရား၏ စကားတော်ကို ကြားရို့ သဖေါကျပြီးကေ လက်ခံကတ်လီရေ။ သူရို့စာ ပေါလုန သိလ ဟောပြောစာ စကားကို အမှားန အမှန်ကို သိဖို့လိုရို့ နိတိုင်း ကျမ်းစာက ရှာရို့ ဖတ်နီကတ်လီရေ။ 12ယင်းအတွက်န များကာ ယုဒလူရို့စာ ယေရှုကို ကျုံကတ်လီရေ အရာ ယင်းသျှင့်ကိုအပယ် ဂရိလူမျိုးအထဲက အများကြီး အကြီးအကျယ် မိန်းမရို့န ယောက်ျားရို့လည်း ကျုံကတ်လီရေ။

13ပေါလု ဗေရိမြို့မာ ထာဝရဘုရား၏ စကားတော်ကို ဟောပြောနီရေဆိုစာကို ကြားရို့ သက်သာလောနိတ်မြို့က ယုဒလူရို့စာ ဗေရိမြို့တို့ လာကတ်လီရေ။ အရာ သူရို့စာ ဗေရိမြို့မာလည်း လူရို့ကို မန်မြှောင့်ပီးရို့ ရောင်းရင်းသပ်အောင် လုပ်ကတ်လီရေ။ 14ယင်းခါ ကျုံသူရို့စာ ပေါလုကို ချက်ချင်း ပင်လယ်ကမ်းနားတို့ ပို့ဖို့ လိုက်ကတ်လီရေ။ ယေကေလည်း သိလန တိမောသေစာ ဗေရိမြို့မာ နီလိုက်ကတ်လီရေ။ 15ပေါလုကို ပို့ဖို့ လိုက်သူရို့စာ အာသင်မြို့တို့ တိုင်အောင် လိုက်ကတ်လီရေ။ ယင်းနောက် သူရို့ ပြန်လားကတ်ဖို့ခါ ပေါလုစာ သိလန တိမောသေကို အယင် ရွှတ်လိုက်ဖို့အတွက် သတင်းပီးလိုက်လီရေ။ အရာ သူရို့စာ ထိုသတင်းကို ယူရို့ ဗေရိမြို့တို့ ပြန်လားခကတ်လီရေ။

အာသင်မြို့မာ ပေါလု တရားဟောခြင်း

16ပေါလုစာ သိလန တိမောသေကို အာသင်မြို့မာ စောင့်ရို့ နီလီရေခါ ထိုမြို့မာ ရုပ်တု အများကြီးကို မြင်ရို့ ကောင်းကောင်း စိတ်ပူလီရေ။ 17ယင်းခါ ပေါလုစာ ဘာသာရေး တရားဇရပ်တို့ လားခလီရေ။ ယင်းမာ သူစာ ယုဒလူရို့န ထာဝရဘုရားကို ရိုသေကြောက်လန့်စာ ဂရိလူမျိုးရို့ကို ယူရို့ တိုင်ဘင်လီရေ။ သူရို့ကိုအပယ် ပေါလုစာ ဈီးတို့ လာသူရို့နလည်း နိတိုင်း တိုင်ဘင်ရို့ နီလီရေ။ 18ယင်းခါ ဧပိကုရုန သတောအိတ်ဒဿန အဖွဲ့က ဆရာလိုင်းကေယောက်စာ ပေါလုန အငြင်းအခုံ ဖြစ်ကတ်လီရေ။ သူရို့အထဲက လူလိုင်းကေယောက် ပြောကတ်လီရေ၊ “ဒေ ဘြောက်ကတတ် ဇာ ပြောချင်စာလည်း?” အရာ အခြားလူရို့စာ ပြောကတ်လီရေ၊ “ဒေလူ အခြားပြည်က နတ်အကြောင်းကို ဟောပြောစာ ဖြစ်မည်။” သူရို့ ဒေပိုင် ပြောလီစာ အကြောင်းကား ပေါလုစာ ယေရှု၏ အကြောင်းန သီသူရို့ ပြန်ရှင်ထမြောင့်ဖို့စာ အကြောင်းကို သူရို့ဘားမာ ဟောပြောလီရေ။ 19ယင်းခါ ထိုဆရာရို့စာ ပေါလုကို အာရေတောင်မာ တိုင်ဘင်စာတို့ ခေါ်ယူလားခကတ်လီရေ။ ယင်းမာ လူရို့စာ သူ့ကို မီးကတ်လီရေ၊ “ကိုယ်ဘင် သွန်သင်ပီးနီစာ အသစ် အကြောင်းအရာကား ဇာလည်း? အရာ ထိုအဓိပ္ပါယ်ကို ငါရို့ သိရဖို့လော? 20အကြောင်းကား ကိုယ်ဘင် စကားတိကို ငါရို့နားမာ ကောင်းကောင်း အထူးအဆန်း ကြားရေ။ ယင်းအတွက်န ကိုယ်ဘင် ပြောစာစကား အဓိပ္ပါယ် ဇာလည်းဆိုစာကို ငါရို့ သိချင်ရေ။” 21အာသင်မြို့သားရို့န ထိုမြို့မာ နီထိုင်ကတ်စာ အခြားပြည်သားရို့စာ အသစ်အသစ် စကားတိကို ပြောရို့ မဟုတ်ကေ နားထောင်ရို့ အချိန်ဖြုန်းရို့ နီလီကတ်တေ။

22ယင်းခါ ပေါလုစာ အာရေတောင်မာ တိုင်ဘင်စာ ရှိက ရပ်ရို့ ပြောလီရေ၊ “အာသင်မြို့သားရို့၊ အကျွန့် စကားကို နားထောင်ကတ်ပါ။ ကိုယ်ဘင်ရို့ အားကုံးစာထက်ပင် ဘာသာရေးကို လိုက်နာရို့ နီကတ်တေဆိုစာကို အကျွန် မြင်ပါရေ။ 23အကျွန် ကိုယ်ဘင်ရို့ မြို့မာ လည်ရို့ ကြည့်နီရေခါ သတင်းဝင်စာ နေရာမာ၊ ‘ငါရို့ မသိစာ ဘုရားအတွက်’ ဟို့ ရွီးရို့ဟိစာ ယဇ်ပလ္လင်တစ်ခုကို အကျွန် မြင်ခပါရေ။ ကိုယ်ဘင်ရို့ မသိဘိုင်းန သတင်းဝင်နီကတ်စာ ဘုရား အကြောင်းကို အကျွန် ဒေနိခါ ကိုယ်ဘင်ရို့ဘားမာ ဟောပြောပါမည်။

24“ဒေ ကမ္ဘာန ကမ္ဘာအထဲမာဟိစာ အားကုံးကို ထာဝရဘုရားရာ ဖန်ဆင်းလီပါရေ အရာ သူစာ ကမ္ဘာန ဂေါင်းခင်ဘုံကို ပိုင်ဆိုင်စာအသျှင် ဖြစ်တေအတွက်န လူအလက်န ဆောက်စာ ကျောင်းမာ မကျိန်းဝပ်ပါ။ 25ထာဝရဘုရားစာ ဟိသမျ လူရို့ကို ဇီဝအသက်၊ ရွှတ်သက်ငင်သက် အရာ အခြား ဟိသမျ အားကုံးကို ပီးပါရေ။ ထာဝရဘုရားမာ တစ်ခုလည်း ခေါင်းပါးခြင်း မဟိပါ။ ယင်းအတွက်န ထာဝရဘုရားစာ လူအလက်န ဆက်ကပ်-ပူဇော်စာကို အလိုမဟိပါ။ 26ထာဝရဘုရား ကမ္ဘာကို ဖန်ဆင်းဖို့ စလီရေခါ ပထမ လူတစ်ယောက်ကို ဖန်ဆင်းလီပါရေ။ ထိုလူတစ်ယောက်ကနီရို့ ကမ္ဘာမာ ဟိသမျ လူမျိုးရို့ကို ဖန်ဆင်းလီပါရေ အရာ သူရို့ကို ကမ္ဘာတစ်လုံးမာ အမျိုးမျိုး နေရာမာ နီထိုင်ဖို့ ပီးလီပါရေ။ သူရို့အတွက် ဇာခါ ဇာ နေရာမာ နီထိုင်ဖို့လည်းဆိုစာကို သူစာ စီစဉ်ရို့ ပီးလီပါရေ။ 27ထာဝရဘုရားကို ရဖို့ မျှော်လင်းရို့ လူရို့ မျက်ကန်းပိုင် စမ်းရို့ ရှာကတ်ပတ်စီအတွက် ထာဝရဘုရားစာ ဒေပိုင် လုပ်လီပါရေ။ ယေကေလည်း ထာဝရဘုရားစာ တစ်ယောက်ကလည်း အဝီး မနီပါ၊ 28အကြောင်းကား ထာဝရဘုရား၏ တန်ခိုးန အကျွန်ရို့ ရပ်တည်နီကတ်ပါရေ၊ နီထိုင်လုပ်စားကတ်ပါရေ အရာ အသက်ရှင်နီကတ်ပါရေ။ ကိုယ်ဘင်ရို့အထဲက စာရွီးဆရာ လိုင်းကေယောက်လည်း ပြောကတ်လီရေ၊ ‘ငါရို့လည်း ထာဝရဘုရား၏ သားသမီး ဖြစ်ကတ်တေ။’

29“အကျွန်ရို့ ထာဝရဘုရား၏ သားသမီး ဖြစ်ကတ်တေအတွက်န လူအလက်န လုပ်စာ အရာ လူညာဏ်ပညာန လုပ်စာ ရွှေရုပ်တု၊ ငွေရုပ်တု၊ အရာ ကျောက်ရုပ်တုကို ထာဝရဘုရားကိုပိုင် အကျွန်ရို့မာ မှတ်ဖို့ မသင့်ပါ။ 30အယင်ကခါ လူရို့ ဒေ အကြောင်းကို မသိရေအတွက်န ထာဝရဘုရားစာ လူရို့ကို မြင်ကေလည်း မမြင်စာပိုင် ထားလီပါရေ။ ယေကေလည်း ထာဝရဘုရားစာ ဒေဂု ဟိသမျ နေရာမာ ဟိသမျ လူရို့ကို အပြစ်က စိတ်လှည့်ဖို့အတွက် ခိုင်းလီပါရေ၊ 31အကြောင်းကား ထာဝရဘုရား ရွီးကောက်စာ လူတစ်ယောက်ကနီရို့ ကမ္ဘာမာ ဟိသမျ လူရို့ကို တရားသဖြင့် စစ်ဆေးဖို့အတွက် ရက်တစ်ရက် စီစဉ်ရို့ ထားပါရေ။ ထာဝရဘုရားစာ သူ့ကို သီရာက ပြန်ရှင်ထမြောင့်စီရို့ အားကုံးသူဘားမာ သက်သီပြလီပါရေ။”

32ပေါလု ပြောပြစာ သီရာက ပြန်ရှင်ထမြောင့်ဖို့စာ အကြောင်းကို ကြားရို့ လူရို့အထဲက လိုင်းကေယောက် ရယ်သွန်းပြုကတ်လီရေ။ ယေကေလည်း အခြား လိုင်းကေယောက်စာ ပြောလီရေ၊ “အကျွန်ရို့ ကိုယ်ဘင် ဟောပြောစာ စကားကို နောက်တစ်ရက် နားထောင်ဖို့သိ။” 33ယင်းခါ ပေါလုစာ ထိုတိုင်ဘင်စာအဖွဲ့က ထွက်လားခလီရေ။ 34ထိုတိုင်ဘင်စာအဖွဲ့ထဲက လူလိုင်းကေယောက်စာ ပေါလု စကားကို ကျုံရို့ သူ့ဖက်တို့ ဝင်ကတ်လီရေ။ ထိုကျုံသူရို့အထဲမာ ဒယောနုသိနာမည်န အာရေတောင် တိုင်ဘင်စာအဖွဲ့မာ လူကြီးတစ်ယောက် ဟိလီရေ။ သူ့ကိုအပယ် ဒမရိနာမည်န မိန်းမတစ်ယောက် ဟိလီရေ။ သူနအတူ အရာလည်း အခြား လိုင်းကေယောက် ဟိကတ်လီရေ။