Acts 18

ကောရိန္သုမြို့မာ ယေရှု အကြောင်းကို ဆွေးနေးခြင်း

1ယင်းနောက် ပေါလုစာ အာသင်မြို့ကနီရို့ ကောရိန္သုမြို့တို့ လားခလီရေ။ 2ပေါလု ကောရိန္သုမြို့တို့ ရောက်တေခါ ပုန္တုပြည်နယ်သား အာကုလနာမည်န ယုဒလူတစ်ယောက်ကို တွိလီရေ။ ကလောဒိမင်းကြီးစာ ရောမမြို့မာ ဟိသမျ ယုဒလူရို့ကို ထွက်လားဖို့ အာဏာချလီရေ။ ယင်းအတွက်န အာကုလန သူ့မာ မယား ပြစ်ကိလစာ လိုင်းကေရက် အယင်က ဣတာလီပြည်က ထွက်ရို့ ကောရိန္သုမြို့တို့ ရောက်ကတ်လီရေ။ ပေါလုစာ သူရို့တို့ လားလီရေ။ 3အာကုလန သူ့မာ မယားစာ တဲခုတ် လုပ်သမား ဖြစ်ကတ်တေ။ ပေါလုလည်း သူရို့နအတူ တဲခုတ် အလုပ်ကိုလုပ်ရို့ နီလီရေ။ 4ပေါလုစာ သတင်းနိတိုင်ကေ တရားဇရပ်တို့ လားရို့ အသျှင်ယေရှု၏ အကြောင်းကို ယူရို့ တိုင်ဘင်ရို့ နီလီရေ။ အရာ ယုဒလူမျိုးန ဂရိလူမျိုးရို့ အသျှင်ယေရှုကို ကျုံလတ်အောင် သူစာ ကြိုးစားအားထုတ်ရို့ ဟောပြောရို့ နီလီရေ။

5သိလန တိမောသေစာ မာကေဒေါနိပြည်နယ်ကနီရို့ ပေါလုဟိစာ ကောရိန္သုမြို့တို့ ရောက်ကတ်လီရေ။ ယင်းခါ ပေါလုစာ သက်သက် ထာဝရဘုရား၏ စကားတော်ကို ဟောပြောရို့ နီလီရေ။ အရာ ယေရှုစာ ခရစ်တော် ဖြစ်တေဆိုစာ အကြောင်းကို သူစာ ယုဒလူမျိုးရို့ဘားမာ သက်သီပီးလီရေ။ 6ထိုစကားကို ကြားရို့ ယုဒလူမျိုးရို့စာ ပေါလုကို ဆန့်ကျင်ရို့ အရှက်ချကတ်လီရေ။ ယင်းအတွက်န ပေါလုစာ ကိုယ့်အဝတ်က ကျုပ်မုန့်ကို ခါချရို့ ပြောလီရေ၊ “ကိုယ်ဘင်ရို့ အပြစ်အကြောင်းန အသီခံရရေဆိုကေ ကိုယ်ဘင်ရို့ တာဝန် ဟိလီမည်။ ဒေသျှင့် အကြောင်းနပတ်သပ်ရို့ ငါ့မာ တစ်ခုလည်း တာဝန် မဟိဗျာ။ ဒေဂုကပင် ငါ ယုဒမဟုတ်သူရို့ဘားမာ တရားဟောဖို့ လားဗျာ။”

7ယင်းနောက် ပေါလုစာ တရားဇရပ်က ထွက်ရို့ တိတု-ယုတ္တုနာမည်န ယုဒမဟုတ်သူတစ်ယောက် အိမ်တို့ လားခလီရေ။ သူစာ ယုဒလူမျိုးမဟုတ်ကေလည်း ထာဝရဘုရားကို ကိုးကွယ်သူတစ်ယောက် ဖြစ်တေ။ အရာ သူ့အိမ်စာ ဘာသာရေး တရားဇရပ်နအပါး ဟိလီရေ။ 8ကရိပ္ပုနာမည်န တရားဇရပ်မာ ဂေါင်းဆောင်တစ်ယောက် ဟိလီရေ။ ကရိပ္ပုန သူ့အိမ်သား အားကုံးသူ အသျှင်ယေရှုကို ကျုံကတ်လီရေ။ သူရို့ကိုအပယ် ကောရိန္သုမြို့မာဟိစာ လူအများကြီးလည်း ပေါလု စကားကို ကျုံရို့ ရီနှစ်မင်္ဂလာ ခံယူကတ်လီရေ။

9– 10တစ်ရက်နိ ညဉ့်သိုင်ခေါင်မာ အသျှင်စာ ပေါလုကို ကိုယ်ထင်ပြရို့ ပြောလီရေ၊ “ပေါလု၊ မကြောက်ကေ့၊ ငါ နင်နအတူ ဟိရေ။ တရားဟောပြောရို့နီ၊ တိန်းရို့ မနီကေ့။ ဒေမြို့မာ ငါ့ကို ကျုံသူ အများကြီး ဟိကတ်တေ။ ယင်းအတွက်န နင့်ကို တစ်ယောက်လည်း မတရားလုပ်ရို့ ဖီးဒုက္ခမာ ချဖို့ရမည် မဟုတ်။” 11ယင်းအတွက်န ပေါလုစာ ကောရိန္သုမြို့မာ တစ်နှစ်ခွဲ နီရို့ လူရို့ဘားမာ ထာဝရဘုရား၏ စကားတော်ကို ဟောပြောလီရေ။

12– 13ဂါလျုန်စာ အာခါယပြည်နယ်ကို အုပ်ချုပ်သူ ဖြစ်ရို့ ဟိလီရေခါ ယုဒလူရို့ အားကုံးသူ တစ်ညီတည်း ညှီပြီးကေ ပေါလုကို ဖမ်းရို့ တရားစစ်ဆေးဖို့အတွက် တရားယုံးတို့ ယူခရို့ ပြောကတ်လီရေ၊ “ဒေသူ အကျွန်ရို့ ပညှတ်တရားကို ဆန့်ကျင်ရို့ ထာဝရဘုရားကို အခြားနည်းန ကိုးကွယ်ဖို့အတွက် လူရို့ကို ကိုယ့်ဖက်တို့ ဆောင်ယူလားနီပါရေ။”

14ပေါလု စကားမပြောခင်အယင်က ဂါလျုန်စာ သူရို့ကို ပြောလီရေ၊ “ယုဒလူရို့၊ ဒေ အကြောင်းစာ ဆိုးယုတ်စာ မဟုတ်ကေ မတရားအလုပ် ဖြစ်လီဖို့ဆိုကေ နင်ရို့ စကားကို ငါ နားထောင်ဖို့ သင့်လီရေ။ 15ယေကေလည်း ဒေ စကားန လူနာမည်အကြောင်းတိ နင်ရို့မာ ပညှတ်တရားနဆိုင်ရေအတွက်န ဒေ အကြောင်းကို နင်ရို့ ကိုယ်တိုင် ဖြေရှင်းလိုက်ကတ်။ ငါ ဒေ အကြောင်းကို မဖြေရှင်းနိုင်။” 16ဒေပိုင် ပြောရို့ ယုဒလူရို့ကို တရားယုံးထဲက နှင်ထုတ်လိုက်လီရေ။ 17ယုဒလူရို့စာ ဘာသာရေး တရားဇရပ်မာ ဂေါင်းဆောင် သုဿင်ကို တရားယုံး ရှိက ဖမ်းရို့ ဘုတ်ကတ်လီရေ။ ယေကေလည်း ဂါလျုန်စာ အရေးမစိုက်လီ အရာ ပြန်ရို့ပင် မကြည့်လီ။

ကျုံသူရို့ကို ပေါလု အားပီးနှိုးဆော်ခြင်း

18ပေါလု ကောရိန္သုမြို့မာ လိုင်းကေရက် နီပြီးရေခါ ကျုံသူညီအစ်ကိုမောင်နမှရို့က ပြန်ခွင့်တောင်းရို့ ရှုရိပြည်နယ်တို့ ခရီးထွက်လီရေ။ အရာ အာကုလန ပြစ်ကိလ လင်မယားလည်း ပေါလုနအတူ လိုက်ကတ်လီရေ။ ပေါလုစာ ထာဝရဘုရားဘားမာ ဂတိသစ္စာခံရို့ ဟိလီရေ။ ယင်းအတွက်န သူစာ သင်္ဘောမာ မတက်ခင်အယင်က ကင်ခြေမြို့ သင်္ဘောဆိပ်မာ ဆံပင် ရိတ်ဘိုက်ခလီရေ။ 19သူရို့ သုံးယောက်စာ ဧဖက်မြို့မာ ရောက်ကတ်လီရေ။ ယင်းနောက် ပေါလုစာ ပြစ်ကိလန အာကုလကို ထိုမြို့မာ ထားဘိုက်ခရို့ သူနူးချင်းတည်း တရားဇရပ်တို့ လားခလီရေ။ ယင်းမာ အသျှင်ယေရှု၏ အကြောင်းကို ယူရို့ ယုဒလူရို့န တိုင်ဘင်လီရေ။ 20ယင်းနောက် ယုဒလူရို့စာ ပေါလုကို သူရို့နအတူ လိုင်းကေရက် နီဖို့အတွက် တောင်းပန်ကတ်လီရေ။ ယေကေလည်း ပေါလုစာ သူရို့ တောင်းပန်ချက်ကို လက်မခံလီ။ 21သူစာ ဧဖက်မြို့က ထွက်ရို့ လားရေခါ သူရို့ကို ပြောလီရေ၊ “ထာဝရဘုရား အလိုဟိရေဆိုကေ ငါ ကိုယ်ဘင်ရို့တို့ အရာတစ်ခေါက် ပြန်လာမည်။” ယင်းနောက် ပေါလုစာ ဧဖက်မြို့ကနီရို့ သင်္ဘောမာ တက်ရို့ လားခလီရေ။

22ပေါလုစာ ကဲသရိမြို့မာ ရောက်တေခါ သင်္ဘောက ဆင်းရို့ ယေရုရှလင်မြို့တို့ လားခလီရေ။ သူစာ ထိုမြို့မာ အသင်းတော် လူရို့ကို နှုတ်ဆက်ရို့ အန္တိအုတ်မြို့တို့ လားခလီရေ။ 23သူစာ အန္တိအုတ်မြို့မာ လိုင်းကေရက် နီပြီးရေခါ ဂါလာတိပြည်နယ်န ဖြူဂိပြည်နယ်တို့ လားခလီရေ။ အရာ သူစာ ထိုနှစ်ပြည်နယ်မာဟိစာ အမျိုးမျိုး နေရာမာ လည်ရို့ တပည့်ရို့ကို ကျုံခြင်းတရား ခိုင်မာလတ်အောင် အားပီးချက်စကား ပြောလီရေ။

ဧဖက်မြို့မာ အာပေါလု တရားဟောခြင်း

24ယင်းအချိန်ခါ အာပေါလုနာမည်န ယုဒလူမျိုးတစ်ယောက် ဧဖက်မြို့တို့ လာလီရေ။ သူစာ အာလေဇန္ဒြူယမြို့သား ဖြစ်တေ။ သူစာ ပညာတတ် တစ်ယောက် ဖြစ်တေ အရာ ကျမ်းစာကိုလည်း ကောင်းကောင်း ကျွမ်းကျင်သူ ဖြစ်တေ။ 25အာပေါလုစာ အသျှင်၏ အကြောင်းကို သွန်သင်ချက် ရလီရေ။ သူစာ ယေရှု၏ အကြောင်းကို မှန်ကန်စာနည်းန သွန်သင်ရို့ နီလီရေ။ ယေကေလည်း သူစာ ယောဟန်၏ ရီနှစ်မင်္ဂလာကို ပယ်ရို့ အခြား ရီနှစ်မင်္ဂလာ အကြောင်းကို မသိလီ။ 26အာပေါလုစာ တရားဇရပ်မာ လားရို့ လူရို့ကို သတ္တိအပြည့်န ဟောပြောဖို့ စလီရေ။ ယင်းခါ ပြစ်ကိလန အာကုလစာ သူဟောပြောစာ တရားကို ကြားရို့ အာပေါလုကို ကိုယ့်အိမ်တို့ ခေါ်ယူခလီရေ။ အရာ သူရို့စာ ထာဝရဘုရား၏ အကြောင်းအရာကို အလှပ နားလည်လတ်အောင် အာပေါလုဘားမာ အရာလည်း ပပွင့်လလင်း ရှင်းပြကတ်လီရေ။

27ယင်းနောက် အာပေါလုစာ အာခါယပြည်နယ်တို့ လားဖို့ ကြည့်လီရေ။ အာခါယပြည်နယ်မာဟိစာ ကျုံသူရို့ အာပေါလုကို လက်ခံပတ်စီအတွက် ဧဖက်မြို့က ကျုံသူညီအစ်ကိုရို့စာ မိတ်ဆက် စာတစ်ရွက် ရွီးရို့ ထိုပြည်နယ်မာဟိစာ ကျုံသူရို့တို့ ပီးလိုက်ကတ်လီရေ။ အာပေါလုစာ အာခါယပြည်နယ်မာ ရောက်တေခါ ထာဝရဘုရား၏ ကျေးဇူးတော် အကြောင်းန ကျုံသူရို့ကို အများကြီး ကူညီလီရေ။ 28ယေရှုစာ ခရစ်တော် ဖြစ်တေဆိုစာ အကြောင်းကို အာပေါလုစာ ကျမ်းစာက ယူရို့ ရှင်းပြပြီးကေ လူရို့ရှိက ယုဒလူမျိုးရို့ ပြောကတ်စာ စကားကို အငြင်းအခုံ လုပ်ရို့ အနိုင်ယူလီရေ။