Acts 19

ဧဖက်မြို့မာ လူရို့န တိုင်ဘင်ခြင်း

1အာပေါလု အာခါယပြည်နယ် ကောရိန္သုမြို့မာ ဟိလီရေခါ ပေါလုစာ အာရှိပြည်နယ်ထဲက ဝင်ရို့ ဧဖက်မြို့တို့ လာလီရေ။ 2ပေါလုစာ ဧဖက်မြို့မာ တပည့် လိုင်းကေယောက်န တွိရို့ သူရို့ကို မီးလီရေ၊ “ကိုယ်ဘင်ရို့ အသျှင်ယေရှုကို ကျုံလီရေခါ သန့်ရှင်းသောဝိညာဉ်တော်ကို ရလီကတ်တေလော?”

ယင်းခါ ထိုတပည့်ရို့စာ ပြောကတ်လီရေ၊ “သန့်ရှင်းသောဝိညာဉ်တော် ဟိရေဆိုစာကို အကျွန်ရို့ မကြားဖူးကတ်ပါ။”

3ယင်းခါ ပေါလုစာ ပြောလီရေ၊ “ယင်းပိုင်ဆိုကေ ကိုယ်ဘင်ရို့ ဇာပိုင်ဇာတ် ရီနှစ်မင်္ဂလာကို ခံယူလီကတ်စာလည်း?”

သူရို့စာ ပြောကတ်လီရေ၊ “အကျွန်ရို့ ယောဟန်ပီးစာ ရီနှစ်မင်္ဂလာကို ခံယူလီကတ်ပါရေ။”

4ယင်းခါ ပေါလုစာ ပြောလီရေ၊ “ယောဟန်ပီးစာ ရီနှစ်မင်္ဂလာကား အပြစ်က စိတ်လှည့်သူရို့အတွက် ဖြစ်တေ။ ယောဟန် လူရို့ကို ပြောလီစာကား၊ ‘ငါ့နောက်က ကြွလာဖို့စာ အသျှင်ကို ကျုံရဖို့။’ ထိုအသျှင်စာ ယေရှု ဖြစ်တေ။”

5သူရို့စာ ပေါလု ပြောစာစကားကို ကြားရို့ အသျှင်ယေရှုနာမည်န ရီနှစ်မင်္ဂလာကို ခံယူကတ်လီရေ။ 6ပေါလုစာ တပည့်ရို့ အဂေါင်းမာ အလက်တင်ရေခါ သူရို့ဘားမာ သန့်ရှင်းသောဝိညာဉ်တော် ကျရောက်လီရေ။ ယင်းနောက် သူရို့စာ အမျိုးမျိုး ဘာသာစကားကို ပြောကတ်လီရေ အရာ ဘုရားသတင်းပို့သူပိုင် ထာဝရဘုရား၏ စကားတော်ကို ဟောပြောကတ်လီရေ။ 7ထိုတပည့်ရို့စာ တစ်ဆယ့်နှစ်ယောက်လှောက် ဟိကတ်လီရေ။

8ယင်းနောက် ပေါလု သုံးလတိုင်အောင် တရားဇရပ်မာ လားရို့ သတ္တိအပြည့်န လူရို့ နားလည်လတ်အောင် ထာဝရဘုရား၏ နိုင်ငံတော် အကြောင်းကို မှန်ကန်စာနည်းန ဟောပြောနီလီရေ။ 9ယေကေလည်း တရားဇရပ်မာဟိစာ လူရို့အထဲက လူလိုင်းကေယောက် စိတ်ကျန်းရေအတွက်န မယုံသင်္ခါဖြစ်ရို့ လူအများကြီး ရှိက အသျှင်ယေရှု၏ တရားလမ်းကို ပုတ်ခတ်ရို့ စကား ပြောကတ်လီရေ။ ယင်းခါ ပေါလုစာ သူရို့က ထွက်လားခလီရေ။ ယင်းနောက် သူစာ တပည့်ရို့ကို ကိုယ်နအတူ ခေါ်ရို့ တုရန္နုနာမည်န လူတစ်ယောက်မာ ပညာသင်ခန့် တစ်ခုတို့ လားရို့ နိတိုင်း တိုင်ဘင်လီရေ။ 10ပေါလု နှစ်နှစ်ပတ်လုံး ဟောပြောနီလီရေအတွက်န အာရှိပြည်နယ်မာ နီထိုင်ကတ်စာ ယုဒလူမျိုးရို့န ဂရိလူမျိုးရို့ အားကုံးသူ အသျှင်၏ စကားတော်ကို ကြားရကတ်လီရေ။

ဂိုင်းဆရာရို့ နတ်ဆိုးအလက်မာ အဘုတ်ခံခြင်း

11ထာဝရဘုရားစာ ပေါလုကနီရို့ အကြီးအကျယ် အံ့ဩဖွယ်အလုပ်တိကို လုပ်လီရေ။ 12ယင်းထက်မက ပေါလု အသုံးပြုစာ ကိုယ်သုတ်န အဝတ်တိကို ရောဂါသေရို့တို့ ယူလာရို့ သူရို့ခန္ဓာမာ တင်ရေဆိုကေ ရောဂါကောင်းလားခလီရေ အရာ နတ်ဆိုးကိုင်သူရို့ ခန္ဓာက နတ်ဆိုးရို့လည်း ထွက်လားခကတ်လီရေ။

13ဂိုင်းဆရာ လုပ်ရို့ လည်နီကတ်စာ ယုဒလူမျိုး လိုင်းကေယောက်စာ နတ်ဆိုးကိုင်သူရို့က နတ်ဆိုးတိကို အသျှင်ယေရှုနာမည်န နှင်ထုတ်ဖို့ ကြိုးစားကတ်လီရေ။ သူရို့စာ နတ်ဆိုးတိကို ပြောကတ်လီရေ၊ “ပေါလု တရား ဟောပြောစာ ယေရှုနာမည်န ငါ နင်ရို့ကို အာဏာပီးရေ၊ ဒေဂု ထွက်လားလီ!”

14ယုဒလူရို့မာ သကေဘာနာမည်န ယဇ်ပုရောဟိတ်အကြီး တစ်ယောက် ဟိလီရေ။ သကေဘာမာ သား ခုနစ်ယောက်လည်း ယင်းပိုင် ဂိုင်းဆရာ လုပ်ရို့ ဟိကတ်လီရေ။ 15သူရို့ နတ်ဆိုး နှင်ထုတ်နီကတ်တေခါ နတ်ဆိုးကိုင်သူစာ ပြောလီရေ၊ “ငါ ယေရှုကိုလည်း သိရေ အရာ ပေါလုကိုလည်း သိရေ၊ ယေကေလည်း နင်ရို့ အသူလည်း?” 16ယင်းနောက် နတ်ဆိုးကိုင်သူစာ ထိုခုနစ်ယောက်ကို ခုန်ရို့ ဆွဲငင်လီရေ။ ယင်းခါ သူရို့စာ အနာရရို့ အဝတ်အစား မဟိဘိုင်းန တတုံးလလက် ထိုအိမ်က ထွက်ဗြီးလားခကတ်လီရေ။

ဧဖက်မြို့သားရို့ ထာဝရဘုရားကို ချီမွမ်းခြင်း

17ထိုအကြောင်းအရာကို ဧဖက်မြို့မာ နီထိုင်ကတ်စာ ယုဒလူရို့န ဂရိလူမျိုးရို့ ကြားရို့ ကြောက်ပြီးကေ အသျှင်ယေရှု၏ နာမည်ကို ကောင်းကောင်း ချီမွမ်းကတ်လီရေ။ 18ယင်းခါ ယေရှုကို ကျုံသူ လူအများကြီး လာရို့ ကိုယ်ရို့မာ မတရားလုပ်ခြင်းတိကို ပပွင့်လလင်း ပြောရို့ ဝန်ခံကတ်လီရေ။ 19အရာ မှိုင်းဆရာရို့လည်း သူရို့မာ မှိုင်းစာအုပ်တိကို ယူလာရို့ လူရို့အလယ်မာ စုရို့ မီးတိုက်ကတ်လီရေ။ ထိုစာအုပ်တိ တန်ဖိုးကို တွက်ကြည့်ရေခါ ငွေသားတန်းကား ထောင်ပေါင်းငါးဆယ်ဖိုးလှောက် ဟိလီရေ။ 20အသျှင်၏ စကားတော်စာ ယင်းပိုင် လူရို့ဘားမာ ပြန့်ကျယ်လီရေ အရာ ကျုံသူရို့ လူဦရေလည်း အများကြီး ပွါးလာလီရေ။

21ဒေပိုင် ဖြစ်ပြီးရေနောက် ပေါလုစာ မာကေဒေါနိပြည်နယ်န အာခါယပြည်နယ်က ဝင်ရို့ ယေရုရှလင်မြို့တို့ လားဖို့ ဆိုပြီးကေ စဉ်းစားရို့ ပြောလီရေ၊ “ထိုမြို့တို့ ရောက်တေခါ ငါ ရောမမြို့တို့လည်း လားရဖို့။” 22ယင်းနောက် ပေါလုစာ ကိုယ့်ကို ကူညီသူ တိမောသေန ဧရတ္တုကို မာကေဒေါနိပြည်နယ်တို့ ရွှတ်လိုက်လီရေ။ အရာ သူစာ အာရှိပြည်နယ်မာ အရာလည်း လိုင်းကေရက် နီလီရေ။

ဧဖက်မြို့မာ ရောင်းရင်းသပ်ခြင်း

23– 24ယင်းအချိန်ခါ ဧဖက်မြို့မာ ယေရှု၏ တရားလမ်း အကြောင်းနပတ်သပ်ရို့ ကောင်းကောင်း ရောင်းရင်းသပ်ရို့ ဖြစ်လီရေ။ ဒေမေတရိနာမည်န ပန်းထိမ်တစ်ယောက်စာ အာတေမိနတ်မ အိမ်ပိုင် ငွေန အိမ်သျှေ အိမ်သျှေ ပျင်ရို့ နတ်အိမ်သျှေတိ ဆောက်လီရေ။ ယင်းအချိန်ခါ ပန်းထိမ်ရို့မာ တန်းကား အများကြီး အမြတ်ရကတ်လိရေ။ 25ဒေမေတရိစာ ကိုယ့်လက်သမားရို့န သူရို့ပိုင် အခြားလက်သမားရို့ကို နေရာတစ်ခုတို့ ခေါ်ယူလားရို့ ပြောလီရေ၊ “ညီအစ်ကိုရို့၊ ငါရို့မာ စီးပွါးရေးလမ်းစာ ဒေ အလုပ်န ပြောင့်ရေဆိုစာကို ကိုယ်ဘင်ရို့ သိကတ်တေ။ 26ယေကေလည်း ပေါလုနာမည်န လူတစ်ယောက်စာ ငါရို့ ဧဖက်မြို့န အာရှိပြည်နယ် တစ်လုံးမာ၊ ‘လူအလက်န လုပ်စာ နတ်ရုပ်တုတိကို ဘုရား မဟုတ်’ ဟို့ လူအများကြီးကို ကျုံလတ်အောင် ဟောပြောရို့ မှားယွင်းစာလမ်းတို့ ယူလားနီရေဆိုစာကို ကိုယ်ဘင်ရို့ မြင်ရကတ်တေ အရာ ကြားရကတ်တေ။ 27ယင်းအတွက်န သက်သက် ငါရို့မာ စီးပွါးရေး နင်းပျက်လားဖို့စာ မဟုတ်သိ၊ အာရှိပြည်နယ်န ကမ္ဘာတစ်လုံးသား ကိုးကွယ်စာ မဟာအာတေမိနတ်မ၏ နာမည် ပျက်လားလီဖို့။ အရာ သူ့အိမ်ကိုလည်း လူရို့စာ အရေးမစိုက်ဘိုင်းန နီကတ်ဖို့။”

28ဒေမေတရိ စကားကို ကြားရို့ ထိုလူရို့စာ ကောင်းကောင်း ဒေါသထွက်ပြီးကေ အားန အော်ရို့ ပြောကတ်လီရေ၊ “ဧဖက်မြို့မာဟိစာ အာတေမိနတ်မ ကြီးမြတ်ပါရေ။” 29ယင်းပိုင် အော်ကတ်တေခါ တစ်မြို့လုံးမာ ရောင်းရင်းသပ်ရို့ ဖြစ်လီရေ။ ယင်းခါ ထိုလူရို့စာ ပေါလု နောက်လိုက် မာကေဒေါနိပြည်နယ်သား ဂါယုန အာရိတ္တာခုကို ဖမ်းရို့ တိုင်ဘင်စာနေရာတို့ အားဒမ ငင်ယူလားခကတ်လီရေ။ 30ယင်းခါ ပေါလုစာ ထိုလူကျိုင်ထဲတို့ လားဖို့ ကြည့်လီရေ။ ယေကေလည်း တပည့်ရို့စာ သူ့ကို လားဖို့ မပီးလီ။ 31ထိုပြည်နယ်မာ ပေါလု မိတ်ဆွေ အစိုးရအရာဟိ လိုင်းကေယောက် ဟိကတ်လီရေ။ သူရို့လည်း ပေါလု ဖီးဒုက္ခမာ ကျဖို့စာကို မြင်ရို့ သူ့ကို၊ “ထိုလူကျိုင်ထဲတို့ မလားကေ့” ဟို့ လူန သတင်းပို့ရို့ ဟန့်လိုက်ကတ်လီရေ။

32ယင်းအချိန်ခါ တိုင်ဘင်စာမာ ရောင်းရင်းသပ်ရို့ ဖြစ်နီလီရေ။ လူရို့စာ တစ်ယောက် တစ်မျိုးစီ အော်ရို့ ပြောနီကတ်လီရေ။ ထိုလူရို့အထဲမာ များကာ လူရို့စာ ယင်းတိုင်ဘင်စာ နေရာမာ ဇာဖို့ ရောက်လာကတ်တေဆိုစာကို မသိလီကတ်။ 33ယုဒလူမျိုး လိုင်းကေယောက်စာ အာလေဇန္ဒြုနာမည်န လူတစ်ယောက်ကို စကားပြောဖို့ အကြံပီးရို့ လူရို့ရှိက ရပ်စီလီရေ။ ယင်းခါ အာလေဇန္ဒြုစာ ဆဆိတ်နီဖို့အတွက် လက်ရိပ်ပြရို့ လူရို့ရှိက စကားပြောဖို့ ကြည့်လီရေ။ 34ယေကေလည်း လူရို့စာ အာလေဇန္ဒြုကို ယုဒလူမျိုး ဖြစ်တေဆိုစာကို သိကတ်လီရေ။ ယင်းခါ တိုင်ဘင်စာနေရာမာ အားကုံးသူ၊ “ဧဖက်မြို့မာဟိစာ အာတေမိနတ်မ ကြီးမြတ်ပါရေ” ဟို့ နှစ်နာရီတိုင်အောင် အော်ရို့ ပြောနီကတ်လီရေ။

35နောက်ဆုံးပြီးမာ အစိုးရအရာဟိ အကြီးတစ်ယောက်စာ လူရို့ကို တတိန်းနီဖို့ ခိုင်းရို့ ပြောလီရေ၊ “ဧဖက်မြို့သားရို့၊ ဧဖက်မြို့စာ မဟာအာတေမိနတ်မ အိမ်န ဂေါင်းခင်ထက်က ကျလာစာ ရုပ်တုကျောက်လုံးကို စောင့်ထိမ်းစာ မြို့တစ်မြို့ ဖြစ်တေဆိုစာကို အားကုံးသူ သိကတ်တေ။ 36ဒေ စကားကို တစ်ယောက်လည်း ငြင်းဖို့ ရမည် မဟုတ်။ ယင်းအတွက်န နင်ရို့ ဥနှောက်မဟိသူပိုင် တစ်ခုလည်း မလုပ်ဘိုင်းန တိန်းနီဖို့ သင့်ကတ်တေ။ 37ဒေ သူရို့စာ နတ်အိမ်ထဲတို့ ဝင်ရို့ တစ်ခုလည်း ခိုးရို့ မယူလီကတ် အရာ ငါရို့ ကိုးကွယ်စာ အာတေမိနတ်မကိုလည်း တရိုက်ရို့ စကားမပြောလီကတ်။ နင်ရို့ ဒေသူရို့ နှစ်ယောက်ကို ဇာဖို့ ဖမ်းယူခကတ်စာလည်း။ 38ဒေမေတရိန သူ့အဖက်သားရို့ အသူ့ကိုမဆို တရားလိုချင်ရေဆိုကေ တရားယုံးမာ တရားသူကြီးရို့လည်း ဟိကတ်တေ။ ယင်းမာ လားရို့ တရားစွဲခီကတ်။ 39ယေကေလည်း နင်ရို့မာ အရာလည်း အခြား ပြောစရာ စကား ဟိရေဆိုကေ အမြဲတိုင်း တရားစစ်စာအဖွဲ့တို့ လားရို့ ဖြေရှင်းရဖို့။ 40ဒေနိခါ ရောင်းရင်းသပ်ရို့ ဖြစ်နီစာတိ ငါရို့အကြောင်းန ဖြစ်တေ ဟို့ အပြစ်ချနိုင်စရာ ဟိရေ။ ဒေပိုင် ရောင်းရင်းသပ်ရို့ ဖြစ်နီဖို့ မလို။ ရောင်းရင်းသပ်ရို့ ဖြစ်တေဆိုကေ ငါရို့မာ တစ်ခုလည်း အကြောင်းပြစရာ ဟိဖို့ မဟုတ်။” 41ထိုအစိုးရအရာဟိအကြီးစာ ယင်းပိုင် စကားကို ပြောရို့ လူရို့ကို ယင်းနေရာက ရွှတ်လိုက်လီရေ။