Acts 2

သန့်ရှင်းသောဝိညာဉ်တော် ရခြင်း

1ယုဒလူမျိုးရို့မာ ရက်ပေါင်းငါးဆယ်နာမည်န ကျင့်ပစာပွဲတစ်ပွဲ ဟိလီရေ။ ယင်းပွဲနိမာ တမန်တော်ရို့န တပည့်-တပည့်မရို့စာ တစ်စုတည်း စုကတ်လီရေ။ 2ယင်းခါ ဗြုန်းခနိုင်းပျင်ရို့ ဂေါင်းခင်က လီဆူစာအသံပိုင် အသံတစ်ခု လာရို့ ကျလီရေ။ သူရို့ ဟိလီစာအိမ်မာ ထိုအသံစာ ပြည့်လီရေ။ 3ဇာပိုင်မသိ မီးညွန့်တိပိုင် ဆင်းလာရို့ အားကုံးသူဘားမာ ကြင်းရို့ကျစာကို သူရို့ မြင်ရကတ်လီရေ။ 4ယင်းအတွက်န သူရို့ အားကုံးသူ သန့်ရှင်းသောဝိညာဉ်တော်၏ တန်ခိုးန ပြည့်စုံကတ်လီရေ။ ထိုဝိညာဉ်တော်စာ အသူ့ကို ဇာပိုင် စကားပြောဖို့ တန်ခိုးပီးရေလည်း ယင်းပိုင် အမျိုးမျိုး ဘာသာစကားကို ပြောကတ်လီရေ။

5ယင်းအချိန်ခါ လောကမာဟိစာ အမျိုးမျိုးပြည်က ထာဝရဘုရားကို ရိုသေကြောက်လန့်စာ ယုဒလူမျိုးရို့ လာရို့ ယေရုရှလင်မြို့မာ လုပ်စားကတ်လီရေ။ 6ထိုအသံကို ကြားရို့ လူရို့စာ စုကတ်လီရေ။ အမျိုးမျိုးပြည်က လာသူရို့စာ တပည့်ရို့ပစက ကိုယ်ရို့ မိမိဘာသာစကားကို ကြားရကတ်လီရေ။ ယင်းအတွက်န သူရို့စာ တစ်ခုလည်း စဉ်းစားရို့ မရကတ်လီ။ 7သူရို့စာ ကောင်းကောင်း အံ့ဩရို့ ပြောကတ်လီရေ၊ “စကား ပြောနီကတ်စာ လူရို့ အားကုံးသူ ဂါလိလဲပြည်နယ်သား မဟုတ်လော? 8ယင်းပိုင်ဆိုကေ ဇာပိုင်ပျင်ရို့ ငါရို့ အားကုံးသူ ကိုယ်ရို့ မိမိဘာသာစကားကို ထိုသူရို့ပစက ကြားရကတ်စာလည်း? 9ငါရို့စာ ပါသိပြည်၊ မေဒိပြည်၊ ဧလံပြည်၊ မေသောပေါတာမိပြည်၊ ယုဒပြည်နယ်၊ ကပ္ပဒေါကိပြည်၊ ပုန္တုပြည်နယ်၊ အာရှိပြည်နယ်၊ 10ဖြူဂိပြည်နယ်၊ ပံဖုလိပြည်နယ်၊ အီဂျစ်ပြည်၊ လိဗုပြည် အရာ ကုရေနေမြို့က လာကတ်စာ လူရို့ ဖြစ်ကတ်တေ။ တစ်ချိုးလူရို့စာ ရောမမြို့က လာကတ်စာ ယုဒလူရို့န ယုဒဘာသာဝင်သူရို့ ဖြစ်ကတ်တေ။ 11အရာ တစ်ချိုးလူရို့စာ ကရေတေကျွန်းသားရို့န အာရပ်လူမျိုးရို့ ဖြစ်ကတ်တေ၊ ယေကေလည်း ငါရို့စာ ထာဝရဘုရားလုပ်စာ အံ့ဩဖွယ်အလုပ်တိကို ငါရို့ မိမိဘာသာစကားန ပြောနီကတ်စာကို ကြားရကတ်တေ။”

12သူရို့စာ အံ့ဩပြီးကေ စဉ်းစားရို့ မရဖြစ်ရို့ တစ်ယောက်ကို တစ်ယောက် မီးကတ်လီရေ၊ “ဒေ အဓိပ္ပါယ် ဇာလည်း?” 13အခြားလူရို့စာ တပည့်ရို့ကို ကဲရဲရို့ ပြောကတ်လီရေ၊ “သူရို့ အရက်သောက်ရို့ ယစ်နီကတ်စာရာ။”

ပထမ အသင်းတော် တည်ဆောက်ခြင်း

14ယင်းအတွက်န ပေတရုစာ တမန်တော် တစ်ဆယ့်တစ်ယောက်နအတူ ရပ်ရို့ ဟိသမျ လူရို့ကို အားန အော်ရို့ ပြောလီရေ၊ “ယုဒလူမျိုးရို့န ယေရုရှလင်မြို့မာ နီထိုင်ကတ်သူရို့၊ ကိုယ်ဘင်ရို့ အကျွန့်စကားကို စိတ်ထည့်ရို့ နားထောင်ကတ်။ 15ကိုယ်ဘင်ရို့ ဒေ လူရို့ကို အရက်သောက်ရို့ ယစ်နီကတ်ပျာ ဟို့ ထင်ကတ်တေ၊ ယေကေလည်း ကိုယ်ဘင်ရို့ ထင်ကတ်စာပိုင် မဟုတ်၊ အကြောင်းကား ဒေဂု မိုးသောက် ကိုးနာရီရာ တီးသိရေ။ ဒေအချိန်စာ အရက်သောက်ဖို့စာအချိန် မဟုတ်။ 16ထိုဖြစ်ပျက်ခြင်းတိကို ထာဝရဘုရားစာ ဘုရားသတင်းပို့သူ ယောလကနီရို့ ပြောလီရေ၊
17‘နောက်ဆုံးကာလမာ ငါ ကိုယ့်ဝိညာဉ်တော်ကို ဟိသမျ လူရို့ဘားမာ မတိုင်းမထွာဘိုင်း သွန်ပီးဖို့၊
ယင်းခါ နင်ရို့မာ သားရို့န သမီးရို့စာ ထာဝရဘုရား၏ စကားတော်ကို ဟောပြောကတ်လိမည်။
လူပျိုရို့န အပျိုမရို့စာ ထာဝရဘုရားက ကိုယ်ထင် မြင်ရကတ်လိမည်၊
အရာ ဝါကြီးရို့န ဝါကြီးမရို့စာ အမျိုးမျိုး အိပ်မက်တိကို မြင်ရကတ်လိမည်။
18ယင်းထက်မက ယင်းအချိန်ခါ ငါ့ ကျွန်ရို့န ကျွန်မရို့ဘားမာ၊
ငါ ကိုယ့်ဝိညာဉ်တော်ကို မတိုင်းမထွာဘိုင်း သွန်ပီးဖို့၊
အရာ သူရို့လည်း ထာဝရဘုရား၏ စကားတော်ကို ဟောပြောကတ်လိမည်။
19ဂေါင်းခင်မာ ငါ၏ အံ့ဩဖွယ်အရာတိကို ပြဖို့၊
အရာ ဒေ ကမ္ဘာမာ အမျိုးမျိုး နိမိတ်လက္ခဏာကို ပြဖို့၊
ယင်းအဓိပ္ပါယ်ကား သွီး၊ မီးညွန့် အရာ မီးခိုး အများကြီး ပြဖို့။
20ထာဝရဘုရား၏ ရက်ကြီးရက်မြတ် ပြည့်စုံဖို့နိ အယင်က နီစာ မှိုင်းလားလိမည်၊
အရာ လစာ သွီးပိုင် အနီ ဖြစ်လားလိမည်။
21ယင်းခါ အသူမဆို အသျှင်ထာဝရဘုရားကို ခေါ်ရေဆိုကေ သူစာ ကယ်တင်ခြင်းကို ရလိမည်။’

22“အိုး ဣသရေလလူမျိုးရို့၊ အကျွန့်စကားကို နားထောင်ကတ်။ ထာဝရဘုရားစာ ကိုယ်ဘင်ရို့ဘားမာ အံ့ဩဖွယ်အလုပ်တိန နိမိတ်လက္ခဏာတိကို နာဇရက်မြို့သျှေသား ယေရှုကနီရို့ သက်သီပြလီရေ။ ယင်းအတွက်န ယေရှုစာ ထာဝရဘုရား၏ တန်ခိုးအာဏာန ပြည့်စုံသူတစ်ပါး ဖြစ်တေဆိုစာကို ကိုယ်ဘင်ရို့ ကိုယ်တိုင် သိကတ်တေ။ 23ထာဝရဘုရားစာ အယင်ကပင် ဟိသမျ အားကုံးကို သိရေ။ သူစာ ယေရှုကို ကိုယ်ဘင်ရို့အလက်မာ အပ်ပီးဖို့အတွက် အယင်ကပင် အဆင်အသင့်လုပ်ရို့ ထားလီရေ။ အရာ ကိုယ်ဘင်ရို့လည်း သူ့ကို လူဆိုးရို့အလက်မာ အပ်ရို့ ကားတိုင်မာ တင်ရို့ သတ်စီကတ်လီရေ။ 24ယေကေလည်း ထာဝရဘုရားစာ ယေရှုကို သီခြင်း၏ ဝေဒနာက ကယ်တင်ရို့ အရှင် လုပ်လီရေ၊ အကြောင်းကား သူ့ကို တည်းထားဖို့အတွက် သီခြင်းတရားမာ တန်ခိုး မဟိလီ။ 25ယေရှု အကြောင်းကို ယူရို့ ဒါဝိဒ်မင်း ပြောလီရေ၊
‘အသျှင် အမြဲတိုင်း ငါ့ရှိက ဟိရေ၊
သူစာ ငါ့ညာဖက်က ဟိရေအတွက်န ငါ့မာ ကြောက်ဖို့ မဟိ။
26ယင်းအတွက်န ငါ့စိတ်နှလုံးစာ ပျော်ပါးခြင်းန ပြည့်စုံနီရေ၊
ငါ့ပစစာ အပျော်စကား ပြောရေ၊
အရာ ငါ့ခန္ဓာလည်း မျှော်လင်းချက်န အသက်ရှင်နီဖို့။
27အကြောင်းကား ကိုယ်တော် အကျွန့်ကို သီသူရို့နိုင်ငံမာ ဘိုက်ထားမည် မဟုတ်ပါ၊
ကိုယ်တော်၏ သန့်ရှင်းသူ ခန္ဓာကို ပျက်စီးဖို့ ပီးမည် မဟုတ်ပါ။
28ထာဝရအသက် ရဖို့စာလမ်းကို ကိုယ်တော် အကျွန့်ကို ပြပါဗျာ။
ကိုယ်တော် အကျွန်နအတူ ဟိပါရေ၊
ယင်းအတွက်န အကျွန့်မာ ကောင်းကောင်း ဝမ်းသာခြင်းန ပြည့်စုံပါရေ။’

29“ညီအစ်ကိုမောင်နမှရို့၊ မင်းအမျိုးအနွယ်က ဒါဝိဒ်မင်း သီစာအကြောင်းကို အကျွန် အမှန် ပြောနိုင်စာကား၊ သူ့ကို သင်္ဂြိုဟ်လီရေ အရာ သူ့သင်္ချိုင်းစာ ဒေဂုလည်း ဒေမာ ဟိသိရေ။ 30ဒါဝိဒ်မင်းစာ ဘုရားသတင်းပို့သူ တစ်ပါး ဟိလီရေ။ အရာ ကိုယ့်အမျိုးအနွယ်က တစ်ယောက်ကို ထာဝရဘုရား သူ၏ ပလ္လင်မာ ထိုင်စီဖို့ ဆိုပြီးကေ ထာဝရဘုရား သစ္စာကိုင်ရို့ ဂတိခံထားလီစာကို သူစာ သိလီရေ။ 31နောက်အနာဂါတ်မာ ဇာဖြစ်ဖို့လည်းဆိုစာကို ဒါဝိဒ်မင်းစာ မြင်လီရေ။ ယင်းအတွက်န ခရစ်တော်ကို သီစာနေရာမာ ဘိုက်ရို့ မထားလီ အရာ သူ့ခန္ဓာကိုလည်း မပျက်စီလီ ဟို့ ခရစ်တော် သီရာက ပြန်ရှင်ထမြောင့်ဖို့စာ အကြောင်းကို ဒါဝိဒ်မင်း ဟောပြောခလီရေ။ 32ထာဝရဘုရားစာ ထိုယေရှုကို သီရာက ပြန်ရှင်ထမြောင့်စီလီရေ။ ထိုအကြောင်းမာ အကျွန်ရို့ အားကုံးသူ သက်သီခံ ဖြစ်ကတ်တေ။ 33အသျှင်ယေရှုစာ ထာဝရဘုရား၏ ညာဖက်က ထိုင်ဖို့စာ ဘုန်းသိက္ခာကို ရလီရေ အရာ သူစာ ပီးဖို့ ဂတိခံထားစာ သန့်ရှင်းသောဝိညာဉ်တော်ကို အဖထာဝရဘုရားက ရလီရေ။ ဒေဂု ကိုယ်ဘင်ရို့ မြင်ရကတ်စာန ကြားရကတ်စာ ဝိညာဉ်တော်ကို ယေရှုခရစ်တော် အကျွန်ရို့ဘားမာ သွန်ပီးလီရေ။ 34– 35ဒါဝိဒ်မင်း ကိုယ်တိုင် ဂေါင်းခင်ဘုံတို့ မတက်ဖူးလီ၊ ယေကေလည်း သူစာ ပြောလီရေ၊
‘အသျှင်စာ ငါ့အသျှင်ကို ပြောလီရေ၊
ငါ နင့် ရန်သူရို့ကို နင့် တန်ခိုးအောက်မာ
မထားသကြား နင် ငါ့ညာဖက်က ထိုင်နီ။’

36“ယင်းအတွက်န ဣသရေလလူမျိုး အားကုံးသူ ဒေ စကားကို အမှန် သိထားကတ်၊ ကိုယ်ဘင်ရို့ ယေရှုကို ကားတိုင်မာ တင်ရို့ သတ်ဘိုက်ကတ်လီရေ။ ယေကေလည်း ထာဝရဘုရားစာ သူ့ကို အသျှင်န ခရစ်တော် နှစ်ခုအရာမာ မြှောင့်လီရေ။”

37လူရို့စာ ထိုစကားတိကို ကြားရို့ စိတ်ဒုက္ခ ရကတ်လီရေ။ သူရို့စာ ပေတရုန အခြားတမန်တော်ရို့ကို မီးကတ်လီရေ၊ “ညီအစ်ကိုရို့၊ အကျွန်ရို့ ဇာ လုပ်ရဖို့လည်း?”

38ပေတရုစာ အဖြေပီးလီရေ၊ “ကိုယ်ဘင်ရို့ အားကုံးသူ အပြစ် ခွင့်ရွှတ်ခြင်းကို ရဖို့အတွက် စိတ်လှည့်ရို့ လာကတ် အရာ ယေရှုခရစ်တော်နာမည်န ရီနှစ်မင်္ဂလာ ခံယူကတ်။ ယင်းပိုင်ဆိုကေ ကိုယ်ဘင်ရို့ သန့်ရှင်းသောဝိညာဉ်တော်ကို ရကတ်လိမည်။ 39ထာဝရဘုရား ပီးဖို့ ဂတိခံထားလီစာ ထိုဆုကျေးဇူးစာ ကိုယ်ဘင်ရို့အတွက်၊ ကိုယ်ဘင်ရို့မာ သားသမီးရို့အတွက်၊ အဝီးမာ နီထိုင်သူရို့အတွက်၊ အရာ စကား တစ်ခွန်းတည်းန ပြောလိုက်ဖို့ဆိုကေ ကိုယ့်လူအဖြစ် ထာဝရဘုရား၏ ခေါ်ခြင်းကို ခံရသူရို့အတွက် ဖြစ်တေ။”

40ယင်းသျှင့်ကိုအပယ် ပေတရု အရာလည်း စကားအများကြီး ပြောရို့ သက်သီပြလီရေ။ ပေတရုစာ သူရို့ကို ဒေပိုင် ပြောရို့ နားလည်ပြဖို့ ကြည့်လီရေ၊ “ဒေခိုက်မာ လူဆိုးလူယုတ်ရို့က ကိုယ်ရို့ကို ကယ်ဆယ်ကတ်။” 41ပေတရုစကားကို ကျုံသူရို့စာ ရီနှစ်မင်္ဂလာ ခံယူကတ်လီရေ အရာ ထာဝရဘုရားစာ ယင်းနိခါ အနည်းအများ လူပေါင်းသုံးထောင်ကို တပည့်ရို့အဖွဲ့မာ သွင်းလီရေ။

ကျုံသူရို့ လုပ်ကိုင်ခြင်း

42သူရို့စာ စိတ်ပါကိုယ်ပါ တမန်တော်ရို့ သွန်သင်ပီးစာကို နားထောင်ရို့ နီလီကတ်တေ၊ တစ်စုတည်းစုရို့ နီလီကတ်တေ၊ အသျှင်၏ ပွဲတော်မင်္ဂလာကို စားသောက်ရို့ နီလီကတ်တေ အရာ ဆုတောင်းရို့ နီလီကတ်တေ။ 43တမန်တော်ရို့စာ အများကြီး နိမိတ်လက္ခဏာအလုပ်န အံ့ဩဖွယ်အလုပ်ကို လုပ်လီကတ်တေ။ ယင်းအတွက်န ဟိသမျ လူရို့စာ ယင်းသျှင့်ကို မြင်ရို့ ရိုသေကြောက်လန့်ကတ်လီရေ။ 44ခရစ်တော်ကို ကျုံသူရို့ အားကုံးသူ တစ်စုတည်းစုရို့ နီလီကတ်တေ အရာ သူရို့စာ ဟိသမျ အားကုံးကို ကိုယ်လိုစာပိုင် အသုံးပြုလီကတ်တေ။ 45သူရို့စာ ကိုယ်ရို့မာ ဟိသမျ အမွီဥစ္စာတိကို ရောင်းရို့ ရစာတန်းကားတိကို အသူ ဇာလှောက် လိုရေလည်း ယင်းသူကို ယင်းလှောက် ဝီပီးလီကတ်တေ။ 46သူရို့စာ ဝိပဿနာကျောင်းမာ နိတိုင်း တစ်စုတည်းစုရို့ နီလီကတ်တေ အရာ စိတ်အပျော်န အိမ်တိုင်း အိမ်တိုင်း လားရို့ စိတ်ပါကိုယ်ပါ တစ်စုတည်း စားသောက်ရို့ နီလီကတ်တေ။ 47သူရို့စာ အမြဲတိုင်း ထာဝရဘုရားကို ချီမွမ်းရို့ နီလီကတ်တေ အရာ ဟိသမျ လူရို့စာ သူရို့ကို ရိုသေလီကတ်တေ။ ကယ်တင်ခြင်း ရသူရို့ကို အသျှင်စာ တပည့်ရို့အဖွဲ့မာ နိတိုင်း သွင်းပီးလီရေ။