Acts 23

1ယင်းခါ ပေါလုစာ မဟာတိုင်ဘင်အဖွဲ့သားရို့ကို စစိတ်ကြည့်ရို့ ပြောလီရေ၊ “ညီအစ်ကိုရို့၊ အကျွန် ဒေနိတိုင်အောင် ထာဝရဘုရား၏ ရှိက ဖြူစင်စာ စိတ်နှလုံးန နီထိုင်ပါရေ။” 2ထိုစကားကို ကြားရို့ အာနနိနာမည်န မဟာယဇ်ပုရောဟိတ်စာ မန်တက်ရို့ ပေါလုကို ပါးသတ်ဖို့အတွက် သူ့အနားမာ ရပ်ရို့ဟိစာ လူရို့ကို အာဏာချလီရေ။ 3ယင်းခါ ပေါလုစာ အာနနိကို ပြောလီရေ၊ “အယောင်ဆောင်! ကိုယ်ဘင်ကိုလည်း ထာဝရဘုရား သတ်လိမည်။ ကိုယ်ဘင် အကျွန့်ကို တရားဥပဒေအတိုင်း တရားစစ်ဆေးဖို့အတွက် ဒေ ပလ္လင်မာ ထိုင်နီပါရေ၊ ယေကေလည်း အကျွန့်ကို ပါးသတ်ဖို့အတွက် အာဏာချရို့ ကိုယ်ဘင် ကိုယ်တိုင် တရားဥပဒေကို ဖျက်ပါရေကား!”

4ပေါလုအနားမာ ရပ်ရို့ ဟိသူရို့စာ ပြောကတ်လီရေ၊ “နင် ထာဝရဘုရား၏ မဟာယဇ်ပုရောဟိတ်ကို ဒေပိုင် စကားပြောဖို့ မသင့်။ နင် မဟာယဇ်ပုရောဟိတ် တစ်ယောက်ကို တရိုက်တေကား!”

5ယင်းခါ ပေါလုစာ ပြောလီရေ၊ “ညီအစ်ကိုရို့၊ ဒေလူ မဟာယဇ်ပုရောဟိတ် တစ်ယောက် ဖြစ်တေဆိုစာကို အကျွန် မသိလီပါ။ သိလီဖို့ဆိုကေ အကျွန် ဒေပိုင် စကားကို ပြောလီဖို့ မဟုတ်ပါ။ ကျမ်းစာမာ ရွီးရို့ ဟိပါရေ၊ ‘နင်ရို့ ကိုယ့်လူမျိုး ဂေါင်းဆောင်ကို မတရိုက်ကတ်ကေ့။’”

6မဟာတိုင်ဘင်အဖွဲ့သားရို့အထဲမာ ဖာရိရှဲတစ်ဖွဲ့န ဇဒ္ဒုကဲတစ်ဖွဲ့ ဟိရေဆိုစာကို ပေါလုစာ သိလီရေ။ ယင်းခါ သူစာ အော်ရို့ ပြောလီရေ၊ “ညီအစ်ကိုရို့၊ အကျွန် ဖာရိရှဲအဖွဲ့သား တစ်ယောက် ဖြစ်ပါရေ အရာ ဖာရိရှဲအဖွဲ့သားမာ သားတစ်ယောက် ဖြစ်ပါရေ။ သီသူရို့ ပြန်ရှင်ထမြောင့်ဖို့စာ အကြောင်းကို ကျုံရေအတွက်န အကျွန် ဒေဂု တရားစစ်ဆေး ခံနီရပါရေ။” 7– 8ဇဒ္ဒုကဲအဖွဲ့သားရို့စာ သီသူရို့ ပြန်ရှင်ထမြောင့်ဖို့ဆိုစာကို မကျုံကတ်။ ယင်းသျှင့်ကိုအပယ် ဂေါင်းခင်နတ်သားန ဝိညာဉ် ဟိရေဆိုစာကိုလည်း မကျုံကတ်။ ယေကေလည်း ဖာရိရှဲအဖွဲ့သားရို့စာ ထိုအားကုံးကို ကျုံကတ်တေ။ ပေါလု ထိုအကြောင်းတိကို ပြောလီရေအတွက်န ဖာရိရှဲအဖွဲ့သားရို့န ဇဒ္ဒုကဲအဖွဲ့သားရို့စာ ရန်ဖြစ်ရို့ မဟာတိုင်ဘင်အဖွဲ့သားရို့အထဲမာ နှစ်ဖွဲ့ ကွဲလားခကတ်လီရေ။

9ယင်းခါ သူရို့နှစ်ဖွဲ့အထဲမာ ရောင်းရင်းသပ်ရို့ ဖြစ်ကတ်လီရေ၊ အရာ ဖာရိရှဲအဖွဲ့သားရို့အထဲက ကျမ်းဆရာ လိုင်းကေယောက် ထပြီးကေ အားန အော်ရို့ အငြင်းခုံ လုပ်ဖို့ စကတ်လီရေ။ သူရို့စာ ပြောကတ်လီရေ၊ “ငါရို့ ဒေသူမာ အပြစ် တစ်ခုလည်း မမြင်။ ဒမာသက်မြို့တို့ လားရေလမ်းမာ ဝိညာဉ် မဟုတ်ကေ ဂေါင်းခင်နတ်သားတစ်ပါး ယင်းသူန စကားပြောလီစာ ဟိမည်။”

10ထို ရန်ဖြစ်ခြင်းစာ ပွါးလာရေခါ ရောင်းရင်းသပ်ရို့ ဘုတ်ဖို့ သတ်ဖို့စာပိုင် ဖြစ်ကတ်လီရေ။ ယင်းခါ လူရို့ ပေါလုကို ငင်ရို့ အတိုက်အတိုက် လုပ်ဘိုက်လိုက်ဖို့စာကို စစ်ဗိုလ်ကြီးစာ ကြောင်းကြလီရေ။ ယင်းအတွက်န လူကျိုင်ထဲက ပေါလုကို ထုတ်ယူခရို့ စစ်တပ်တို့ ယူလားဖို့အတွက် သူစာ စစ်သားရို့ကို အာဏာချလီရေ။

11နောက်တစ်ရက်နိ ညဉ့်မာ အသျှင်ယေရှုစာ ပေါလုအနားမာ ရပ်ရို့ ပြောလီရေ၊ “ပေါလု၊ နင် မကြောက်ကေ့။ နင် ငါ့အကြောင်းကို ယေရုရှလင်မြို့မာ သက်သီပီးစာပိုင် ရောမမြို့မာလည်း သက်သီပီးရဖို့။”

ပေါလုကို အသီသတ်ဖို့ ကြံခြင်း

12– 13နောက်တစ်ရက်နိ မိုးသောက်စောစောက ယုဒလူမျိုး လူပေါင်းလေးဆယ်ကျော် တစ်စုတည်းစုရို့ ပေါလုကို အသီသတ်ဖို့ ကြံကတ်လီရေ။ ယင်းခါ သူရို့စာ၊ “ငါရို့ ပေါလုကို အသီသတ်ဖို့ မရသကြား တစ်ခုလည်း မစားမသောက်ဘိုင်းန နီဖို့” ဟို့ အကျိန်သစ္စာ ကိုင်ကတ်လီရေ။ 14သူရို့စာ ယဇ်ပုရောဟိတ်အကြီးရို့န ဂေါင်းဆောင်ဝါကြီးရို့တို့ လားရို့ ပြောကတ်လီရေ၊ “အကျွန်ရို့ ပေါလုကို အသီသတ်ဖို့ မရသကြား တစ်ခုလည်း မစားမသောက်ဘိုင်းန နီဖို့ ဆိုပြီးကေ အကျိန်သစ္စာ ကိုင်ရို့ ဟိကတ်ပါရေ။ 15တရားစစ်ဆေးဖို့ အဟန်ပြရို့ ပေါလုကို ကိုယ်ဘင်ရို့တို့ ယူခဖို့အတွက် ဒေဂု ကိုယ်ဘင်ရို့ မဟာတိုင်ဘင်အဖွဲ့သားရို့နအတူ လားရို့ ရောမစစ်ဗိုလ်ကြီးက အခွင့်တောင်းခီကတ်ပါ။ ကိုယ်ဘင်ရို့ အရာလည်း ပေါလုကို စစ်ဆေးရို့ ကြည့်ချင်ရေ ဟို့ ရောမစစ်ဗိုလ်ကြီးကို ပြောခီကတ်ပါ။ ပေါလုကို ကိုယ်ဘင်ရို့တို့ ယူလာရို့ မရောက်ခင်အယင်က အကျွန်ရို့ သူ့ကို အသီသတ်ဖို့အတွက် အဆင်သင့် စောင့်နီကတ်ပါရေ။”

16ယေကေလည်း ပေါလုမာ တူသျှေစာ သူရို့ ကြံနီစာကို သိရေခါ စစ်တပ်တို့ လားရို့ ထိုအကြောင်းကို ပေါလုဘားမာ ပြောပြလီရေ။ 17ယင်းခါ ပေါလုစာ စစ်သရွဲတစ်ရာကိုပိုင်စာ စစ်ဗိုလ်တစ်ယောက်ကို ခေါ်ရို့ ပြောလီရေ၊ “ဒေသူကို စစ်ဗိုလ်ကြီးတို့ ခေါ်ရို့ ယူလားလီပါ။ ဒေသူမာ စစ်ဗိုလ်ကြီးကို စကား တစ်ခွန်းနှစ်ခွန်း ပြောဖို့ ဟိရေ ဟို့ ပြောပါရေ။”

18ယင်းခါ စစ်သရွဲတစ်ရာကိုပိုင်သူစာ ပေါလုမာ တူသျှေကို စစ်ဗိုလ်ကြီးတို့ ခေါ်ယူလားရို့ ပြောလီရေ၊ “အချုပ်ခံနီရစာ ပေါလု အကျွန့်ကို ခေါ်ရို့ ဒေသူကို ကိုယ်ဘင်တို့ ပို့ဖို့ ရွှတ်လိုက်ပါရေ။ ဒေသူမာ ကိုယ်ဘင်န စကား တစ်ခွန်းနှစ်ခွန်း ပြောဖို့ ဟိရေ ဟို့ ပြောလိုက်ပါရေ။”

19ယင်းခါ စစ်ဗိုလ်ကြီးစာ ပေါလု တူသျှေအလက်ကို ကိုင်ရို့ နေရာတစ်ခုတို့ ခေါ်ယူလားရို့ မီးလီရေ၊ “နင် ငါ့ကို ဇာ ပြောချင်စာလည်း?”

20ပေါလု တူသျှေစာ ပြောလီရေ၊ “ယုဒလူမျိုးရို့ ပေါလု အကြောင်းကို ယူရို့ အရာတစ်ပြန် စစ်ဆေးဖို့ အဟန်ပြရို့ သူ့ကို မဟာတိုင်ဘင်အဖွဲ့သားရို့တို့ ခေါ်ယူလားဖို့အတွက် နှက်ဖြန်ခါ ကိုယ်ဘင်ကို တောင်းဆိုကတ်ပါဖို့။ 21ပေါလုကို အသီသတ်ဖို့အတွက် လူပေါင်းလေးဆယ်ကျော် လမ်းမာ ခိုရို့ စောင့်နီကတ်ပါရေ။ ပေါလုကို အသီသတ်ဖို့ မရသကြား သူရို့ တစ်ခုလည်း မစားမသောက်ဘိုင်းန နီဖို့ ဟို့ အကျိန်သစ္စာ ကိုင်ရို့ ဟိကတ်ပါရေ။ ဒေဂု သူရို့စာ ပေါလုကို ယူလားဖို့အတွက် ကိုယ်ဘင် သဖေါတူချက်ကို စောင့်ရို့ ဟိကတ်ပါရေ။ ယင်းအတွက်န ကိုယ်ဘင် သူရို့ တောင်းဆိုချက်ကို လက်မခံပါကေ့။”

22ပေါလု တူသျှေ ပြန်လားဖို့ခါ စစ်ဗိုလ်ကြီးစာ ဒေပိုင် ဟန့်လိုက်လီရေ၊ “နင် ငါ့တို့ လာရို့ တိုက်ပြောစာ အကြောင်းကို တစ်ယောက်ဘားမာလည်း မပြောလီကေ့။”

ပေါလုကို အုပ်ချုပ်သူကြီး ဖေလဇ်တို့ ပို့ခြင်း

23ယင်းနောက် စစ်ဗိုလ်ကြီးစာ စစ်သရွဲတစ်ရာကိုပိုင်စာ စစ်ဗိုလ် နှစ်ယောက်ကို ခေါ်ရို့ အာဏာချလီရေ၊ “ဒေနိညဉ့် ကိုးနာရိအချိန်မာ ကဲသရိမြို့တို့ လားဖို့အတွက် မြင်းတပ်စစ်သား ခုနစ်ဆယ်၊ ရိုးရိုးစစ်သား နှစ်ရာ အရာ လှံတပ်စစ်သား နှစ်ရာကို အဆင်သင့် လုပ်ထားကတ်။ 24ပေါလုကို အုပ်ချုပ်သူကြီး ဖေလဇ်တို့ ကာကွယ်ရို့ ယူလားဖို့ ရလတ်အောင် သူ့အတွက်လည်း မြင်းတစ်ကောင် အဆင်သင့် လုပ်ထားကတ်။”

25ယင်းနောက် စစ်ဗိုလ်ကြီးစာ ဒေပိုင် စာတစ်ရွက် ရွီးလီရေ၊ 26“ဆရာ ဖေလဇ်တို့ အကျွန် ကလောဒိလုသိ ရိုသေလေးစားရို့ စာရွီးလိုက်ပါရေ။

27“ယုဒလူမျိုးရို့စာ ဒေသူကို ဖမ်းရို့ အသီသတ်ဖို့ ပျင်လီကတ်ပါရေ။ ယေကေလည်း ဒေသူစာ ရောမနိုင်ငံသား တစ်ယောက် ဖြစ်တေဆိုစာကို အကျွန် သိလီပါရေ။ ယင်းအတွက်န အကျွန်စာ စစ်သားရို့နအတူ လားရို့ သူ့ကို ကယ်ဆယ်ရို့ ယူခလီပါရေ။ 28ယုဒလူမျိုးရို့ သူ့ကို ဇာဖို့ အပြစ်တင်ကတ်တေလည်းဆိုစာကို အကျွန် သိချင်ရို့ ယုဒလူမျိုးရို့မာ မဟာတိုင်ဘင်အဖွဲ့သားရို့ ရှိတို့ သူ့ကို ခေါ်ယူလားခလီပါရေ။ 29ယုဒလူမျိုးရို့စာ ကိုယ်ရို့ ဘာသာရေး ပညှတ်တရား အကြောင်းန ဒေသူကို အပြစ်တင်ကတ်တေဆိုစာကို အကျွန် သိရလီပါရေ၊ ယေကေလည်း အကျွန် ဒေသူမာ သီဒါဏ်ခံဖို့စာန ထောင်ကျခံဖို့စာ အပြစ် တစ်ခုလည်း မမြင်ပါ။ 30ယုဒလူမျိုးရို့ ဒေသူကို အထဲမာအထဲ အသီသတ်ဖို့ ကြံနီကတ်စာကို အကျွန် သိရေခါ ချက်ချင်း ဆရာတို့ ပို့လိုက်စာ ဖြစ်ပါရေ။ ထိုအကြောင်းတိကို ဆရာ ရှိက တင်ပြဖို့အတွက် ဒေသူကို အပြစ်တင်ကတ်စာ လူရို့ကိုလည်း အကျွန် အာဏာချလိုက်လီပါရေ။ အကျွန် ကိုယ်ဘင်ကို ရှိခိုးရို့ ဒေလှောက်န အဆုံးသတ်လိုက်ပါရေ။ ကျန်းမာပါစီ ဆရာ။”

31ယင်းခါ စစ်သားရို့စာ စစ်ဗိုလ်ကြီး အာဏာအတိုင်း ယင်းနိညဉ့်မာ ပေါလုကို ယူရို့ အန္တိပတရိမြို့တို့ တရောက် လားခကတ်လီရေ။ 32နောက်တစ်ရက်နိ ထိုမြို့ကနီရို့ ပေါလုကို မြင်းတပ်စစ်သားရို့နအတူ ကဲသရိမြို့တို့ ပို့လိုက်လီရေ။ အရာ ရိုးရိုးစစ်သားရို့န လှံတပ်စစ်သားရို့စာ စစ်တပ်တို့ ပြန်လာကတ်လီရေ။ 33မြင်းတပ်စစ်သားရို့ ကဲသရိမြို့တို့ ရောက်ကတ်တေခါ စစ်ဗိုလ်ကြီး ရွီးပီးလိုက်စာ စာစောင်ကို အုပ်ချုပ်သူကြီး ဖေလဇ်အလက်မာ တင်အပ်ရို့ ပေါလုကို သူ့ရှိက ရပ်စီလီရေ။

34အုပ်ချုပ်သူကြီးစာ ထိုစာစောင်ကို ဖတ်ကြည့်ရို့ ပေါလုကို မီးလီရေ၊ “နင် ဇာ ပြည်သားလည်း?” ပေါလုစာ အဖြေပီးလီရေ၊ “အကျွန် ကိလိကိပြည်နယ်သား တစ်ယောက် ဖြစ်ပါရေ။” 35ယင်းခါ အုပ်ချုပ်သူကြီးစာ ပေါလုကို ပြောလီရေ၊ “နင့်ကို အပြစ်တင်သူရို့ ဒေမာ ရောက်ကတ်တေခါ ငါ နင့်စကားကို နားထောင်မည်။” ဟေရုဒ်မင်း ဆောက်ခလီစာနန်းမာ အချုပ်ခန့်တစ်ခန့် ဟိလီရေ။ ယင်းနောက် အုပ်ချုပ်သူကြီးစာ ပေါလုကို ယင်းမာ အစောင့်ထည့်ရို့ ထားဖို့အတွက် စစ်သားရို့ကို အာဏာချလိုက်လီရေ။