Acts 24
ပေါလုကို စစ်ဆေးခြင်း
1ငါးရက် ရွန်ရေခါ မဟာယဇ်ပုရောဟိတ် အာနနိစာ ယုဒဂေါင်းဆောင်ဝါကြီး လိုင်းကေယောက်န တေရတုလုနာမည်န ရှေ့နေတစ်ယောက်ကို ▼▼ရှေ့နေဆိုစာ အဓိပ္ပါယ်ကား တရားဥဗဒေကို ရှင်းပြသူကို ခေါ်ပါရေ။
ခေါ်ရို့ ကဲသရိမြို့တို့ လားကတ်လီရေ။ ထိုမြို့တို့ ရောက်တေခါ သူရို့စာ အုပ်ချုပ်သူကြီး ဖေလဇ်တို့ လားရို့ ပေါလု အကြောင်းကို တိုင်ကတ်လီရေ။ 2– 3ပေါလုကို ခေါ်ယူခရို့ ရောက်တေခါ တေရတုလုစာ ပေါလု အပြစ်ကို အုပ်ချုပ်သူကြီးဘားမာ တင်ပြလီရေ၊ “အသျှင်၊ ကိုယ်ဘင် အုပ်ချုပ်တေအတွက်န အကျွန်ရို့ ကောင်းကောင်း အီးချမ်းသာယာ လုပ်စားရို့ ဟိကတ်ပါရေ။ ကိုယ်ဘင် ညာဏ်ပညာန အကျွန်ရို့ လူမျိုးကို ကောင်းကောင်း တိုးတက်အောင် လုပ်လီပါရေ။ ယင်းအတွက်န အကျွန်ရို့ ဟိသမျ နေရာမာ အမြဲတိုင်း ကိုယ်ဘင်ကို ကျေးဇူးတင်ရို့ နီကတ်ပါရေ။ 4ယေကေလည်း ကိုယ်ဘင်မာ အချိန် မပျက်ရအောင် အကျွန်ရို့ အတို့ဖက်က စကား ပြောပြပါမည်။ အသျှင် အကျွန်ရို့ ပြောဖို့စာ စကားကို ကျေးဇူးပြုရို့ နားထောင်ဖို့အတွက် အကျွန် တောင်းပန်ပါရေ။ 5“အကျွန်ရို့ သိပါစာကား၊ ဒေလူစာ ကောင်းကောင်း ပြသနာ ရှာတတ်သူ တစ်ယောက် ဖြစ်ပါရေ။ သူစာ အမြဲတိုင်း ပြသနာ ရှာရို့ အမျိုးမျိုး နေရာမာဟိစာ ယုဒလူရို့ကို ရန်တိုက်ပီးနီပါရေ။ အရာ ဒေလူစာ နာဇရက်နာမည်န ဘာသာဖျက်အဖွဲ့မာ ဂေါင်းဆောင် တစ်ယောက် ဖြစ်ပါရေ။ 6ဒေလူ ဝိပဿနာကျောင်းကို တိုင်အောင်ပင် မသန့်ရှင်းအောင် လုပ်ဖို့ ကြိုးစားလီရေအတွက်န အကျွန်ရို့ ဒေလူကို ဖမ်းလီစာ ဖြစ်ပါရေ။ ▼▼ပထမဆုံး ရွီးလီစာ ဂရိဘာသာ ကျမ်းစာအဟောင်းတိမာ ဒေ အခန့်ငယ် ၇-မာ စကားတိ ရွီးရို့ မဟိပါ။
7– 8အကျွန်ရို့ ဒေလူကို ဇာဖို့ အပြစ်တင်ကတ်တေလည်းဆိုစာကို အသျှင် ကိုယ်တိုင် စစ်ဆေးရို့ ကြည့်ရေဆိုကေ ဟိသမျ အကြောင်းအရာကို သိရပါလိမည်။” 9ပညာဟိဖက်က ဝင်ပြီးကေ ယုဒလူရို့လည်း၊ “ဒေ စကား အားကုံးစာ မှန်ပါရေ” ဟို့ ထောက်ခံရို့ ပြောကတ်လီရေ။ ပေါလု ကိုယ့်အကြောင်းကို ပြောပြခြင်း
10အုပ်ချုပ်သူကြီးစာ ပေါလုကို လက်ရိပ်ပြရို့ စကားပြောဖို့ အခွင့်ပီးရေခါ ပေါလုစာ လူရို့ ရှိက စကားပြောဖို့ စလီရေ၊ “အသျှင်၊ ကိုယ်ဘင် ဒေ ယုဒလူမျိုးရို့ကို နှစ်ပေါင်းများစွာ အုပ်ချုပ်ရို့ လာရေဆိုစာကို အကျွန် သိပါရေ။ အကျွန် ကိုယ့်အကြောင်းကို ပြောပြဖို့ရရေအတွက်န ကောင်းကောင်း ဝမ်းသာပါရေ။ 11အကျွန် ယေရုရှလင်မြို့တို့ သတင်းဝင်ဖို့ လားလီစာ တစ်ဆယ့်နှစ်ရက်ရာ ဟိပါသိရေ။ ကိုယ်ဘင် ဒေ အကြောင်းကို စုံစမ်းရို့ ကြည့်ရေဆိုကေ အရွယ်သျှေန သိရပါလိမည်။ 12အကျွန့်ကို ဝိပဿနာကျောင်းမာ တစ်ယောက်နလည်း အငြင်းအခုံ ဖြစ်စာကို ဒေ လူရို့ မမြင်လီကတ်ပါ။ အရာ မြို့မာ ဖြစ်စီ၊ ဘာသာရေး တရားဇရပ်မာ ဖြစ်စီ လူရို့ကို ရန်တိုက်ပီးစာကိုလည်း ဒေ လူရို့ မမြင်လီကတ်ပါ။ 13ဒေဂု အကျွန့်ကို အပြစ်တင်ရို့ ပြောကတ်စာ စကားတိကို ဒေ လူရို့ ကိုယ်ဘင်ကို သက်သီ ပြနိုင်ကတ်ဖို့ မဟုတ်ပါ။ 14ယေကေလည်း အကျွန် ကိုယ်ဘင်ဘားမာ ဝန်ခံပါရေ၊ အကျွန် ယေရှု၏ လမ်းစဉ်မာ လားသူတစ်ယောက် အနေန အဖိုးအဖီးအစိုင်လာရို့ ကိုးကွယ်စာ ထာဝရဘုရားကို ကိုးကွယ်ရို့ နီပါရေ။ ထိုလမ်းစဉ်ကို ဒေလူရို့ ဘာသာဖျက်လမ်းစဉ် ဟို့ ပြောကတ်ပါရေ။ အရာ မောရှေ၏ ပညှတ်တရားန ဘုရားသတင်းပို့သူရို့ ရွီးခလီစာ ကျမ်းစာ အားကုံးကိုလည်း အကျွန် ကျုံရို့ လိုက်နာပါရေ။ 15လူဆိုး လူကောင်း အားကုံးသူကို ထာဝရဘုရား သီရာက ပြန်ရှင်ထမြောင့်စီဖို့ဆိုစာ အကြောင်းကို ဒေ လူရို့ မျှော်လင်းနီကတ်စာပိုင် အကျွန်လည်း မျှော်လင်းနီပါရေ။ 16ယင်းအတွက်န အကျွန် အမြဲတိုင်း လူန ထာဝရဘုရား၏ ရှိက ဖြူစင်စာ စိတ်နှလုံးန နီထိုင်ဖို့စာကို ကြိုးစားပါရေ။ 17“ကိုယ့်လူမျိုး ဆင်းရဲသားရို့ကို တန်းကားဖွေသျှာ အလှူပီးဖို့အတွက်န၊ အရာ ထာဝရဘုရားဘားမာ ယဇ်ပူဇော်ဖို့အတွက် နှစ်ပေါင်းများစွာ ကြာရေခါ အကျွန် ယေရုရှလင်မြို့တို့ လာလီပါရေ။ 18အကျွန် ဝိပဿနာကျောင်းထဲမာ စင်ကြယ်ခြင်းမင်္ဂလာကို လုပ်ပြီးရို့ ယဇ်ပူဇော်ရို့နီရေအချိန်မာ ထိုယုဒလူရို့စာ အကျွန့်ကို မြင်လီကတ်ပါရေ။ ယင်းခါ အကျွန့်အနားမာ လူအများကြီးခဲပြီးကေ ရောင်းရင်းသပ်ရို့ မဖြစ်လီပါ။ 19ယင်းခါ အာရှိပြည်နယ်က လာလီစာ ယုဒလူမျိုး လိုင်းကေယောက် ယင်းမာ ဟိလီကတ်ပါရေ။ ထိုယုဒလူရို့ရာ အကျွန့်ကို အပြစ်တင်စရာ ဟိရေဆိုကေ ကိုယ်ဘင်တို့ လာရို့ အကျွန့်ကို အပြစ်တင်ဖို့ သင့်လီပါရေ၊ 20မဟုတ်ကေ ဒေမာ ရောက်ရို့ ဟိသူရို့ ပြောကတ်ပါ၊ အကျွန့်ကို မဟာတိုင်ဘင်အဖွဲ့သားရို့ ရှိက တရားစစ်လီရေခါ ကိုယ်ဘင်ရို့ အကျွန့်မာ ဇာ အပြစ်ရလီကတ်ပါရေလည်း? 21အကျွန် မဟာတိုင်ဘင်အဖွဲ့သားရို့ ရှိက ရပ်ပြီးကေ အားန အော်ရို့ ပြောခလီပါရေ၊ ‘သီသူရို့ ပြန်ရှင်ထမြောင့်ဖို့စာ အကြောင်းကို ကျုံရေအတွက်န အကျွန် ဒေနိခါ ကိုယ်ဘင်ရို့ ရှိက တရားစစ်ဆေး ခံနီရပါရေ။’ ဒေ လူရို့ ထိုအကြောင်း တစ်ခုတည်းကို ယူရို့ရာ အကျွန့်ကို အပြစ်တင်နိုင်ပါရေ။” 22ဖေလဇ်စာ ယေရှု၏ လမ်းစဉ် အကြောင်းကို ကောင်းကောင်း သိထားသူတစ်ယောက် ဟိလီရေ။ ယင်းခါ သူစာ တရားစစ်ဆေးဖို့စာကို ပိတ်ထားရို့ ပြောလီရေ၊ “စစ်ဗိုလ်ကြီး လုသိ ဒေမာ လာရို့ ရောက်တေခါ ငါ နင်ရို့ တရားကို ဆုံးဖြတ်မည်။” 23အုပ်ချုပ်သူကြီးစာ စစ်သရွဲတစ်ရာကိုပိုင်စာ စစ်ဗိုလ်ကို အာဏာချရို့ ပြောလီရေ၊ “နင် ဒေသူကို အချုပ်မာ မထည့်ဘိုင်းန စောင့်ရို့ ထားလီ၊ အရာ ဒေသူမာ အမျိုးအဆွီရို့ ပြုဇုဖို့လာရေဆိုကေ သူရို့ကို မဟန့်လီကေ့။”ဖေလဇ် လင်မယားဘားမာ ပေါလု တရားဟောခြင်း
24လိုင်းကေရက် ကြာရေခါ ဖေလဇ်စာ ကိုယ့်မယား ဒြုသိလကို ယူရို့ လာလီရေ။ ဒြုသိလစာ ယုဒလူမျိုး မိန်းမတစ်ယောက် ဟိလီရေ။ ပေါလုကို ခေါ်ဖို့ ရွှတ်လိုက်ရို့ ရောက်တေခါ ပေါလု ခရစ်တော်ယေရှုကို ကျုံလီစာ အကြောင်းအရာကို ဖေလဇ်စာရို့ လင်မယား နှစ်ယောက်စုံ နားထောင်ကတ်လီရေ။ 25ပေါလုစာ မှန်ကန်စာလမ်းမာ လားခြင်း၊ ကိုယ့်စိတ်ကို ထိန်းသိမ်းခြင်း အရာ နောင်ကာလမာ တရားစစ်ဆေးခံရဖို့စာ အကြောင်းကို ပြောပြလီရေ။ ယင်းခါ သူစာ ထိုစကားကို ကြားရို့ ကြောက်ပြီးကေ ပြောလီရေ၊ “နင် ဒေဂု လားလီဖိ။ နောက်က အချိန်ရရေခါ ငါ နင့်ကို ခေါ်မည်။” 26ဖေလဇ် ပေါလုက တန်းကား အခိုးစား ရဖို့ ထင်လီရေ။ ယင်းအတွက်န သူစာ ပေါလုကို အပြန်ပြန် ခေါ်ရို့ သူန စကား ပြောလီရေ။ 27နှစ်နှစ် ရွန်ရေခါ အုပ်ချုပ်သူကြီး ဖေလဇ် အရာမာ ပေါကိဖေတ္တု ထိုင်လီရေ။ ဖေလဇ် ယုဒလူမျိုးကို နှစ်သက်အောင် လုပ်ဖို့အတွက် ပေါလုကို ထောင်က မရွှတ်ဘိုင်းန ထားဘိုက်ခလီရေ။
Copyright information for
RmzSC