Acts 26

အဂြိပ္ပမင်း ရှိမာ ပေါလု ပြောပြခြင်း

1ယင်းခါ အဂြိပ္ပမင်းစာ ပေါလုကို ပြောလီရေ၊ “ငါ နင့်ကို အခွင့်ပီးရေ၊ နင့်မာ ကိုယ့်အကြောင်းကို ယူရို့ စကားပြောစရာ ဟိရေဆိုကေ ပြောရို့ ရရေ။”

ယင်းခါ ပေါလုစာ အလက်ဆန့်ရို့ ကိုယ့်အကြောင်းကို ပြောလီရေ၊ 2“အိုး အသျှင်မင်းကြီး၊ ယုဒလူမျိုးရို့ အကျွန့်ကို အပြစ်တင်လီစာ အကြောင်း အားကုံးကို အသျှင်မင်းကြီး ရှိက စကားပြောဖို့ အခွင့်ရရေအတွက်န အကျွန် ဒေနိခါ ကိုယ့်ကို ကန်ကောင်းသူ တစ်ယောက် မှတ်ပါရေ။ 3ယုဒလူမျိုးရို့ ထုံးစဉ် အကြောင်းန အငြင်းအခုံ ဖြစ်လီစာ အကြောင်းကို အသျှင်မင်းကြီး အလှပ သိပါရေ။ ယင်းအတွက်န အကျွန့်စကားကို သည်းခံပါရမီစိတ်န နားထောင်ဖို့အတွက် အကျွန် ကိုယ်ဘင်ကို တောင်းပန်ပါရေ။

4“အကျွန် အသျှေကပင် ကိုယ်မွီးဖွားစာ တိုင်းပြည်မာ အရာ ယေရုရှလင်မြို့မာ ကိုယ့်လူရို့န ဇာပိုင် နီထိုင်ရို့ လာရေလည်းဆိုစာကို ဒေ ယုဒလူရို့ အားကုံးသူ သိကတ်ပါရေ။ 5ဒေ လူရို့စာ နှစ်ပေါင်းများစွာ အယင်ကပင် အကျွန့်ကို သိကတ်ပါရေ။ အကျွန်ရို့မာ ယုဒဘာသာရေး ပညှတ်တရားကို အမှန်အကန် လိုက်နာစာ ဖာရိရှဲအဖွဲ့တစ်ဖွဲ့ ဟိပါရေ။ အကျွန် ထိုအဖွဲ့သားအနေန နီထိုင်လီပါရေဆိုစာကို ထိုယုဒလူရို့ လိုရေဆိုကေ သက်သီပီးနိုင်ကတ်ပါရေ။ 6ထာဝရဘုရား အကျွန်ရို့ အဖိုးအဖီးအစိုင်လာရို့ဘားမာ ခံထားလီစာ ဂတိတော်ကို အကျွန် မျှော်လင်းနီရေအတွက်န ဒေဂု တရားစစ်ဆေး ခံနီရပါရေ။ 7ယုဒလူမျိုး တစ်ဆယ့်နှစ်စိုင် ညဉ့်ပါ-ရက်ပါ ကောင်းကောင်း ကြိုးစားအားထုတ်ရို့ ထာဝရဘုရားကို ကိုးကွယ်ရို့ ထိုဂတိတော်ကို ရဖို့ ဟို့ မျှော်လင်းရို့ နီကတ်လီပါရေ။ အသျှင်မင်းကြီး၊ အကျွန်လည်း ထိုဂတိတော်ကို မျှော်လင်းနီရေအတွက်န ယုဒလူရို့ အကျွန့်ကို အပြစ်တင်ကတ်စာ ဖြစ်ပါရေ။ 8သီသူရို့ကို ထာဝရဘုရား ပြန်ရှင်ထမြောင့်စီနိုင်ရေဆိုစာကို ကိုယ်ဘင်ရို့ ဇာဖို့ မဖြစ်နိုင် ဟို့ မှတ်ကတ်ပါစာလည်း?”

ကိုယ်ကျုံစာ အကြောင်းကို ပေါလု ပြောပြခြင်း

9“နာဇရက်မြို့သျှေသား ယေရှုနာမည်ကို ဆန့်ကျင်ရို့ လုပ်နိုင်စာ အလုပ်တိကို အကျွန် ကိုယ်တိုင် လုပ်သင့်ရေ ဟို့ မှတ်လီပါရေ။ 10ယင်းပိုင်တထန် အကျွန် ယေရုရှလင်မြို့မာ လုပ်လီပါရေ။ ယဇ်ပုရောဟိတ်အကြီးရို့က အခွင့်အာဏာရရို့ များကာ ကျုံသူရို့ကို ဖမ်းရို့ ထောင်မာ ထည့်လီပါရေ။ အရာ သူရို့ကို သီဒါဏ်ပီးဖို့ခါလည်း အကျွန် အားပီးလီပါရေ။ 11အကျွန် ဘာသာရေး တရားဇရပ်တိုင်းမာ လားရို့ ကျုံသူရို့ကို အခါပေါင်းများစွာ ဒါဏ်ပီးလီပါရေ။ အရာ ယေရှုကို ဆန့်ကျင်ရို့ စကားပြောဖို့အတွက် သူရို့ကို အားတိုက်လီပါရေ။ အကျွန် သူရို့ကို ကောင်းကောင်း မန်ပါလီရေအတွက်န အခြားပြည်မာဟိစာ မြို့တိတို့ တိုင်အောင်ပင် လားရို့ ညှဉ်းဆဲးလီပါရေ။

12“တစ်ရက်နိ ယင်းပိုင် အကြံန အကျွန် ယဇ်ပုရောဟိတ်အကြီးရို့က အခွင့်အာဏာ ယူရို့ ဒမာသက်မြို့တို့ လားလီပါရေ။ 13အသျှင်မင်းကြီး၊ ယင်းနိ မွန်းတည့်လှောက်မာ အကျွန်ရို့ ဒမာသက်မြို့အနားတို့ ရောက်လီကတ်ပါရေ။ ယင်းခါ ဂေါင်းခင်က နီအရောင်ထက် တောက်ပြောင်စာ အလင်းရောင်တစ်ခု အကျွန်ရို့ လေးဖက်လက်စိမာ ချုပ်ကျလီစာကို အကျွန် မြင်လီပါရေ။ 14ယင်းခါ အကျွန်ရို့ အားကုံးသူ မြေပြင်မာ လဲကျလီပါရေ အရာ အသူလည်း မသိတစ်ယောက်၊ ‘ရှောလု၊ ရှောလု၊ နင် ငါ့ကို ဇာဖို့ ညှဉ်းဆဲနီစာလည်း? နင် စူးခက်ကို အခြီနကျောက်ရို့ ကိုယ့်ကိုကိုယ် ဇာဖို့ အနာပီးစာလည်း?’ ဟို့ ဟေဗြဲဘာသာစကားန ပြောစာအသံကို အကျွန် ကြားရလီပါရေ။

15“ယင်းခါ အကျွန် မီးလီပါရေ၊ ‘အသျှင်၊ ကိုယ်တော် အသူပါလည်း?’

“အသျှင်စာ ပြောလီပါရေ၊ ‘ငါ နင့် ညှဉ်းဆဲခြင်းကို ခံရနီသူ ယေရှု ဖြစ်တေ။ 16နင် ဒေဂု ထ၊ နင့်အခြီကို အားပြုရို့ရပ်။ ငါ နင့်ကို ပြုဇုသူန သက်သီပီးသူအဖြစ် ခန့်ထားဖို့အတွက် ငါ နင့်ဘားမာ အမြင်ခံစာ ဖြစ်တေ။ နင် ငါ့ကို မြင်လီစာ အကြောင်းန နင့်ကို ငါ ရှိတို့ ပြဖို့စာ အကြောင်းတိကို နင် အခြားလူရို့ဘားမာ လားရို့ ပြောပြရဖို့။ 17ယုဒလူမျိုးရို့န ယုဒမဟုတ်သူရို့အလက်က ငါ နင့်ကို ကယ်ဆယ်ဖို့။ 18ထိုလူရို့ မျက်စိကို ဖွင့်ပီးရို့ အမိုက်မှောင်ကနီရို့ အလင်းတို့ ထုတ်ယူခဖို့အတွက် အရာ မာရ်နတ်၏ တန်ခိုးထဲကနီရို့ ထာဝရဘုရားတို့ ပြန်ယူခဖို့အတွက် ငါ နင့်ကို သူရို့တို့ ရွှတ်ဖို့။ သူရို့ ငါ့ကို ကျုံခြင်းကနီရို့ အပြစ် ခွင့်ရွှတ်ခြင်းကို ရရို့ ထာဝရဘုရား ရွီးကောက်ထားသူရို့ နေရာမာ ပိုင်ဆိုင်ခွင့်ကို ရစီချင်ရေ။’

19“အသျှင်မင်းကြီး၊ ဂေါင်းခင်ဘုံက ကိုယ်ထင်ပြရို့ ပြောလီစာ စကားကို အကျွန် မနာခံဘိုင်းန မနီပါသိ။ 20ထာဝရဘုရားတို့ စိတ်လှည့်ရို့ လာဖို့အတွက် အကျွန် လူရို့ဘားမာ ဟောပြောလီပါရေ။ သူရို့စာ အမှန်အကန် စိတ်လှည့်ရို့ လာဗျာ ဟို့ သိဖို့အတွက် ဇာ လုပ်ရဖို့လည်းဆိုစာကို အကျွန် သူရို့ကို ပြောပြလီပါရေ။ ဒေ အကြောင်းကို ယူရို့ ပထမဆုံး ဒမာသက်မြို့သားရို့ဘားမာ ဟောပြောလီပါရေ။ ယင်းနောက် ယေရုရှလင်မြို့န ယုဒပြည်နယ်မာ ဟိသမျ လူရို့န ယုဒမဟုတ်သူရို့ဘားမာလည်း ဟောပြောလီပါရေ။ 21ယင်းအတွက်န ယုဒလူမျိုးရို့ အကျွန့်ကို ဝိပဿနာကျောင်းမာ ဖမ်းရို့ အသီသတ်ဖို့ ကြိုးစားလီကတ်ပါရေ။ 22ယေကေလည်း ထာဝရဘုရား ဒေနိတိုင်အောင် အကျွန့်ကို ကူညီနီပါရေ။ ယင်းအတွက်န အကျွန် ဒေနေရာမာ အကြီး-အသျှေ အားကုံးသူရှိက ရပ်ရို့ သက်သီပီးနီပါရေ။ မောရှေန ဘုရားသတင်းပို့သူရို့ ပြောခလီစာ စကားကို ပယ်ရို့ အကျွန် အပို တစ်ခုလည်း မပြောပါ။ 23မောရှေန ဘုရားသတင်းပို့သူရို့ ပြောခလီစာ စကား ဖြစ်တေကား၊ ခရစ်တော်စာ ဒုက္ခ-ဝေဒနာခံရို့ သီရဖို့ အရာ သူစာ သီသူရို့အထဲက ပထမဆုံး ပြန်ရှင်ထမြောင့်ရို့ ယုဒလူမျိုးန ယုဒမဟုတ်သူရို့ဘားမာ အလင်း နိုင်ငံ၏ သတင်းဆိုစာ ကယ်တင်ခြင်း၏ တရားတော်ကို ကျော်ညာရဖို့။”

အဂြိပ္ပမင်းန ဖေတ္တုရှိမာ ပေါလု စကားပြောခြင်း

24ပေါလု ထိုစကားတိကို ပြောနီတုံးမာ ဖေတ္တုစာ သူ့ကို တားဆီးပြီးကေ အော်ရို့ ပြောလီရေ၊ “ပေါလု၊ နင် ရူးလားခဗျာ။ နင် စာအများကြီး ဖတ်လီရေအတွက်န ရူးလားခဗျာ။”

25ယင်းခါ ပေါလုစာ ပြောလီရေ၊ “အသျှင် ဖေတ္တု၊ အကျွန် ရူးစာ မဟုတ်ပါ။ အကျွန် မှန်ကန်ခြင်းတရားန တန်ဖိုးဟိစာ စကားတိကို ပြောစာ ဖြစ်ပါရေ။ 26ထိုအကြောင်းအရာတိ ဖုံးရို့-ရွှက်ရို့ ဖြစ်လီစာ မဟုတ်ပါ။ ယင်းအတွက်န ဖြစ်လီစာ ဟိသမျ အကြောင်းအရာကို အသျှင်မင်းကြီး ကိုယ်တိုင် အလှပ သိပါရေ။ အကျွန် အသျှင်မင်းကြီးနအတူ မကြောက်မလန့်ဘိုင်း ပပွင့်လလင်း စကားပြောနိုင်ပါရေ။ ထို ဟိသမျ အကြောင်းအရာကို အသျှင်မင်းကြီး မသိဘိုင်းန နီဖို့ ဟို့ အကျွန် မထင်ပါ။ 27အသျှင်မင်းကြီး၊ ကိုယ်ဘင် ဘုရားသတင်းပို့သူရို့ စကားကို ကျုံပါရေ မဟုတ်လော? အသျှင်မင်းကြီး ကျုံရေဆိုစာကို အကျွန် သိပါရေ။”

28ယင်းခါ အဂြိပ္ပမင်းစာ ပေါလုကို မီးလီရေ၊ “နင် ငါ့ကို တစ်နားသျှေမာ ခရစ်ယာန် လုပ်ဖို့ ကြည့်စာလော?”

29ယင်းခါ ပေါလုစာ ပြောလီရေ၊ “အချိန်အနည်းန ဖြစ်စီ၊ အများနဖြစ်စီ ယင်းသျှင့် အရေးမကြီးပါ။ အသျှင်မင်းကြီးနအတူ ဒေနိ ဒေမာ အကျွန့်စကားကို နားထောင်ကတ်စာ လူရို့ အားကုံးသူ ဒေ သံကျိုက်ကြိုးန အချိုင်မခံဘိုင်း အကျွန့်ပိုင် ဖြစ်ဖို့အတွက် အကျွန် ထာဝရဘုရားဘားမာ ဆုတောင်းပါရေ။”

30အဂြိပ္ပမင်းန ဗေရနိတ် ထရေချက်ချင်း အုပ်ချုပ်သူကြီး ဖေတ္တုန ထိုင်ရို့ ဟိကတ်စာ အခြားလူရို့ အားကုံးသူ ထကတ်လီရေ။ 31ယင်းနောက် သူရို့စာ တိုင်ဘင်စာ ယုံးက ထွက်လားခရို့ ကိုယ်ရို့ အချင်းချင်း ပြောကတ်လီရေ၊ “ဒေလူ သီဒါဏ်ခံဖို့စာန ထောင်ကျခံဖို့စာ ဒေလူမာ အပြစ် တစ်ခုလည်း လုပ်စာ မဟိ။”

32အဂြိပ္ပမင်းစာ ဖေတ္တုကို ပြောလီရေ၊ “ဒေလူ ရောမဧကရာဇ်မင်းဘားမာ သျှောက်ရို့ မဟိလီဆိုကေ ရွှတ်လိုက်ဖို့ ရလီဖို့။”