Acts 4

ပေတရုန ယောဟန်ကို စစ်ဆေးခြင်း

1ပေတရုန ယောဟန် လူရို့န စကားပြောနီတုံးမာ ဇဒ္ဒုကဲအဖွဲ့သားရို့၊ ယဇ်ပုရောဟိတ်ရို့ အရာ ဝိပဿနာကျောင်းမာ အစောင့်သားအကြီးစာ သူရို့တို့ လာကတ်လီရေ။ 2ယင်းခါ ယေရှု၏ တန်ခိုးန သီသူရို့ ပြန်ရှင်ထမြောင့်ဖို့စာ အကြောင်းကို ပေတရုန ယောဟန် သွန်သင်ပီးရို့ နီကတ်လီရေ။ ယင်းအတွက်န ထိုလူရို့ အားကုံးသူ ကောင်းကောင်း စိတ်အနှောက်သျှက် ဖြစ်ကတ်လီရေ။ 3အရာ သူရို့စာ ပေတရုန ယောဟန်ကို လားရို့ ဖမ်းကတ်လီရေ။ ယင်းနောက် နီဝင်ရေအတွက်န နောက်တစ်ရက်နိ တိုင်အောင် ထောင်မာ လှောင်ရို့ ထားကတ်လီရေ။ 4ယေကေလည်း ပေတရု ဟောပြောစာ တရားကို ကြားသူရို့အထဲက လူအများကြီး ယေရှုကို ကျုံကတ်လီရေ။ ယင်းအတွက်န ယေရှုကို ကျုံသူ အနည်းအများ ငါးထောင်လှောက် ဖြစ်လီရေ။

5နောက်တစ်ရက်နိ ယုဒလူမျိုးရို့မာ လူကြီးရို့၊ ဂေါင်းဆောင်ဝါကြီးရို့ အရာ ကျမ်းဆရာရို့စာ ယေရုရှလင်မြို့မာ တစ်စုတည်း စုကတ်လီရေ။ 6ယင်းမာ မဟာယဇ်ပုရောဟိတ် အန္နတ်နအတူ သူ့အိမ်သား ကာယာဖ၊ ယောဟန် အရာ အာလေဇန္ဒြု ဟိလီရေ။ အရာ မဟာယဇ်ပုရောဟိတ်အိမ်သား အခြားလူရို့လည်း ဟိကတ်လီရေ။ 7သူရို့စာ ပေတရုန ယောဟန်ကို အလယ်မာချရို့ မီးကတ်လီရေ၊ “နင်ရို့ ဇာ တန်ခိုးန ဒေ အလုပ်ကို လုပ်လီကတ်စာလည်း? အရာ အသူ့နာမည်န ဒေ အလုပ်ကို လုပ်လီကတ်စာလည်း?”

8ယင်းခါ ပေတရုစာ သန့်ရှင်းသောဝိညာဉ်တော်န ပြည့်စုံရို့ သူရို့ကို ပြောလီရေ၊ “ယုဒလူမျိုးရို့မာ လူအကြီးရို့န ဂေါင်းဆောင်ဝါကြီးရို့၊ 9အကျွန်ရို့ အခြီသောင် တစ်ယောက်ကို အကောင်း လုပ်လီရေအတွက်န၊ ‘ဒေသူ ဇာပိုင်ပျင်ရို့ အကောင်း ဖြစ်လီရေလည်း’ ဟို့ ဒေနီခါ ကိုယ်ဘင်ရို့ အကျွန်ရို့ကို စစ်ဆေးနီကတ်ပါရေ။ 10ယင်းပိုင်ဆိုကေ ကိုယ်ဘင်ရို့န ဣသရေလလူမျိုးရို့ အားကုံးသူ ဒေ အကြောင်းကို သိထားကတ်ပါ၊ ထိုနာဇရက်မြို့သျှေသား ယေရှုခရစ်တော်ကို ကိုယ်ဘင်ရို့ ကားတိုင်မာ တင်ရို့ အသီသတ်လီကတ်ပါရေ အရာ ထာဝရဘုရားစာ သူ့ကို သီရာက ပြန်ရှင်ထမြောင့်စီလီပါရေ။ ယေရှု၏ တန်ခိုးန ဒေသူ အကောင်းဖြစ်ရို့ ကိုယ်ဘင်ရို့ ရှိက ရပ်ရို့ ဟိပါရေ။ 11ကျမ်းစာမာ ရွီးရို့ ဟိပါရေ၊ ‘သူစာ လက်သမားရို့ ပယ်ဘိုက်လိုက်စာ ကျောက်လုံးနတူရေ။ ယင်းကျောက်လုံးစာ ဒေါင့်ကတည်စာ အခြေခံ ကျောက်လုံး ဖြစ်လာရေ။’ ထိုကျောက်လုံးစာ ယေရှု ဖြစ်ပါရေ။ 12ဒေ ကမ္ဘာမာ အသူ အကျွန်ရို့ကို ကယ်တင်နိုင်ပါဖို့လည်း? အသျှင်ယေရှုကို ပယ်ရို့ ကယ်တင်နိုင်ဖို့သူ တစ်ယောက်လည်း မဟိပါ။”

13ပေတရုန ယောဟန်စာ စာမတတ်သူန ရိုးရိုးလူ ဟိကတ်လီရေ၊ ယေကေလည်း သူရို့စာ သတ္တိအပြည့်န စကား ပြောနီစာကို မြင်ရို့ ထိုဂေါင်းဆောင်ရို့စာ ကောင်းကောင်း အံ့ဩကတ်လီရေ။ အရာ သူရို့စာ ယေရှုနအတူ ဟိလီရေ ဆိုစာကိုလည်း သိကတ်လီရေ။ 14အခြီသောင်စာ အကောင်းဖြစ်ရို့ ထိုသူရို့ နှစ်ယောက်နအတူ ရပ်ရို့ဟိစာကို မြင်ရို့ ဂေါင်းဆောင်ရို့စာ သူရို့ကို ဆန့်ကျင်ရို့ တစ်ခုလည်း စကားပြောဖို့ မရကတ်လီ။ 15ယင်းအတွက်န ထိုဂေါင်းဆောင်ရို့စာ ယောဟန်န ပေတရုကို မဟာတိုင်ဘင်အဖွဲ့ထဲက ပြင်တို့ ထွက်လားဖို့ အာဏာချကတ်လီရေ။ ယင်းနောက် သူရို့စာ ပေတရုန ယောဟန်ကို ဇာလုပ်ရဖို့လည်း ဟို့ တစ်စုတည်းစုရို့ အကြံခံကတ်လီရေ​။ 16သူရို့စာ ပြောကတ်လီရေ၊ “ငါရို့ ဒေသူရို့ကို ယူရို့ ဇာလုပ်ဖို့လည်း? အကြောင်းကား ဒေသူရို့ လုပ်စာ အံ့ဩဖွယ်အလုပ်ကို ယေရုရှလင်မြို့သားရို့ အားကုံးသူ သိကတ်တေ အရာ ငါရို့လည်း ယင်းအ​ကြောင်းကို ငြင်းဖို့မရ။ 17ယေကေလည်း ဒေ သတင်းစာ လူရို့ဘားမာ အရာလည်း မပြန့်ကျယ်လတ်အောင် အရာ သူရို့နှစ်ယောက် ယေရှု အကြောင်းကို အရာတစ်ခါ တစ်ယောက်ဘားမာလည်း မဟောပြောလတ်အောင် သူရို့ကို တတင်းရရင်း ဟန့်လိုက်ရဖို့။”

18ယင်းနောက် ဂေါင်းဆောင်ရို့စာ ပေတရုန ယောဟန်ကို အထဲတို့ ခေါ်ပြီးကေ အာဏာချရို့ ပြောကတ်လီရေ၊ “နင်ရို့ အရာတစ်ခါ တစ်ယောက်ဘားမာလည်း ယေရှု အကြောင်းကို မပြောကတ်ကေ့ အရာ သွန်သင်မပီးကတ်ကေ့။” 19ပေတရုန ယောဟန် အဖြေပီးကတ်လီရေ၊ “ကိုယ်ဘင်ရို့ အချင်းချင်း စစ်ဆေးရို့ ကြည့်ကတ်ပါ၊ ကိုယ်ဘင်ရို့ အာဏာကို လိုက်နာပါဖို့လော၊ မဟုက်ကေ ထာဝရဘုရား၏ အာဏာကို လိုက်နာပါဖို့လော? 20အကျွန်ရို့ မြင်လီစာတိန ကြားလီစာတိကို လူရို့ဘားမာ မဟောပြောဘိုင်းန မနီနိုင်ပါ။” 21ယင်းခါ ဂေါင်းဆောင်ရို့စာ ပေတရုန ယောဟန်ကို အရာလည်း အများကြီး ခြောက်ရို့ ရွှတ်လိုက်ကတ်လီရေ။ ဂေါင်းဆောင်ရို့စာ လူရို့ကို ကြောက်ရို့ သူရို့နှစ်ယောက်ကို ဇာပိုင် ဒါဏ်ပီးဖို့လည်းဆိုစာကို နည်းလမ်း တစ်ခုလည်း ရှာရို့ မရကတ်လီ၊ အကြောင်းကား ယေရုရှလင်မြို့မာ ဖြစ်ပျက်လီစာ အကြောင်းကို ယူရို့ အားကုံးသူ ထာဝရဘုရားကို ချီမွမ်းကတ်လီရေ။ 22အခြီသောင်စာက အံ့ဩသဖွယ် အကောင်းဖြစ်လီသူစာ အသက်လေးဆယ်ကျော် ဟိလီရေ။

ခရစ်တော်ကို ကျုံသူရို့ ဆုတောင်းခြင်း

23ပေတရုန ယောဟန်စာ မဟာတိုင်ဘင်အဖွဲ့သားရို့က ရွတ်ရို့ ကိုယ့်လူရို့တို့ လားခကတ်လီရေ။ အရာ သူရို့စာ ယဇ်ပုရောဟိတ်အကြီးရို့န ဂေါင်းဆောင်ဝါကြီးရို့ ပြောလိုက်စာ စကားတိကို ကိုယ့်လူရို့ဘားမာ ပြောပြကတ်လီရေ။ 24ထိုစကားကို ကြားရို့ သူရို့ အားကုံးသူ တစ်ညီတည်းစိတ်န ထာဝရဘုရားဘားမာ ဆုတောင်းကတ်လီရေ၊ “အိုး အသျှင်၊ ကိုယ်တော်ကား ဂေါင်းခင်၊ ကမ္ဘာမြေ၊ သမုဒ္ဒရာ၊ ယင်းသျှင့်တိအထဲမာဟိစာ အားကုံးကို ဖန်ဆင်းလီပါရေ။ 25အကျွန်ရို့မာ အဖိုးအဖီးအစိုင်လာ ဒါဝိဒ်မင်းစာ ကိုယ်တော်၏ ကျွန် ဟိလီပါရေ။ သန့်ရှင်းသောဝိညာဉ်တော်၏ တန်ခိုးန ကိုယ်တော် ဒါဝိဒ်မင်းပစက ပြောလီပါရေ၊
‘ယုဒမဟုတ်သူရို့ ဇာဖို့ ရောင်းရင်းသပ်နီကတ်စာလည်း?
တစ်ခုလည်း မဟုတ်ဘိုင်းန လူရို့ ဇာဖို့ မကောင်း​ကြံနီကတ်စာလည်း?
26ကမ္ဘာမာ မင်းရို့ အားကုံးသူ တစ်စုတည်းစုရို့ အဆင်သင့် လုပ်နီကတ်တေ၊
အရာ အုပ်ချုပ်သူရို့လည်း တိုင်ဘင်နီကတ်တေ၊
အကြောင်းကား သူရို့စာ ထာဝရဘုရားန သူရွှတ်လိုက်စာ
ခရစ်တော်ကို ဆန့်ကျင်ဖက် လုပ်ဖို့အတွက် ဖြစ်တေ။’

27“ထိုစကားအတိုင်း ဒေ ယေရုရှလင်မြို့မာ ဟေရုဒ်မင်းန အုပ်ချုပ်သူကြီး ပုန္တိပိလတ်စာ ယုဒမဟုတ်သူရို့န ဣသရေလလူမျိုးရို့ကို ယူရို့ ယေရှုကို ဆန့်ကျင်ရို့ တိုင်ဘင်လီကတ်ပါရေ။ ထိုယေရှုစာ ကိုယ်တော်၏ သန့်ရှင်းစာ ကျွန် ဖြစ်ပါရေ။ ကိုယ်တော် သူ့ကို ခရစ်တော်အဖြစ် ရွီးကောက်လီပါရေ။ 28အယင်ကပင် ဇာဖြစ်ဖို့လည်းဆိုစာကို ကိုယ်တော်၏ တန်ခိုးန စိတ်သဖေါအတိုင်း စီစဉ်ရို့ထားစာပိုင် သူရို့စာ လုပ်လီကတ်ပါရေ။ 29အိုး အသျှင်၊ ဒေလူရို့ အကျွန်ရို့ကို ဇာပိုင် ခြောက်ကတ်တေလည်းဆိုစာကို ကြည့်ပါ။ အကျွန်ရို့ သတ္တိအပြည့်န သူရို့ဘားမာ ကိုယ်တော်၏ စကားတော်ကို ဟောပြောဖို့ရလတ်အောင် ကိုယ်တော်၏ ကျွန်ရို့ကို အားခွန် ပီးပါ။ 30လူရို့မာ ရောဂါတိကို အကျွန်ရို့ အကောင်း လုပ်ဖို့နိုင်လတ်အောင် ကိုယ်တော်အလက်ကို ဆန့်ပီးပါ။ ကိုယ်တော်၏ သန့်ရှင်းစာ ကျွန် ယေရှုနာမည်န အံ့ဩဖွယ်-နိတ်မိလက္ခဏာ အလုပ်တိကို လုပ်ပါ။”

31သူရို့ တစ်စုတည်းစုရို့ ဆုတောင်းကတ်စာ နေရာစာ ဆုတောင်းရို့ပြီးရေခါ ငယင်လုပ်ယောင် တုန်လုတ်လီရေ။ အရာ သူရို့ အားကုံးသူ သန့်ရှင်းသောဝိညာဉ်တော်န ပြည့်စုံရို့ ရဲဝံ့သတ္တိန ထာဝရဘုရား၏ စကားတော်ကို ဟောပြောကတ်လီရေ။

ကျုံသူရို့ ညီညွန့်ခြင်း

32ကျုံသူရို့ အားကုံးသူ စိတ်တစ်ညီတည်း ဟိကတ်လီရေ။ သူရို့စာ တစ်ခုကိုလည်း ကိုယ့်ပစ္စည်း-ဥစ္စာ ဟို့ အသျှင်မခံဘိုင်းန အားကုံးစာကို အသူ ဇာပိုင် လိုရေလည်း ယင်းပိုင် သုံးရို့နီလီကတ်တေ။ 33သူရို့ အားကုံးသူဘားမာ ထာဝရဘုရား၏ မဟာကျေးဇူးတော် ဟိလီရေ။ တမန်တော်ရို့စာ မဟာတန်ခိုးန ယေရှု သီရာက ပြန်ရှင်ထမြောင့်ခြင်း အကြောင်းကို သက်သီပီးရို့ နီလီကတ်တေ။ 34– 35သူရို့မာ လယ်၊ မြေ၊ အိမ် အပို ဟိစာတိကို ရောင်းရို့ တန်းကားတိကို ယူခပြီးကေ တမန်တော်ရို့အလက်မာ အပ်ကတ်လီရေ။ ယင်းနောက် ထိုတန်းကားတိကို တမန်တော်ရို့စာ အသူ ဇာလှောက် လိုရေလည်း ယင်းသူကို ယင်းလှောက် ဝီပီးလီကတ်တေ။ ယင်းအတွက်န သူရို့အဖွဲ့မာ မလုံမလောက်သူ တစ်ယောက်လည်း မဟိလီ။

36 လေဝိအမျိုးအနွယ်က ကုပရုကျွန်းသား ယောသပ်နာမည်န လူတစ်ယောက် ဟိလီရေ။ တမန်တော်ရို့ သူ့ကို ဗာနဗ ဟို့ ခေါ်လီကတ်တေ။ ဗာနဗ အဓိပ္ပါယ်ကား အခြားတစ်ယောက်ကို အားပီးသူ ဟို့ ခေါ်ရေ။ 37သူလည်းသောက် ကိုယ့်မာဟိစာ လယ်တစ်ကွက်ကို ရောင်းရို့ ရစာတန်းကားတိကို ယူခပြီးကေ တမန်တော်ရို့အလက်မာ အပ်လီရေ။