Acts 5

အာနနိန ရှာဖိရေ သီခြင်း

1ယင်းခါ အာနနိန သူ့မယား ရှာဖိရေစာ ကိုယ်ရို့မာဟိစာ လယ်တစ်ကွက်ကို ရောင်းကတ်လီရေ။ 2ထိုလယ်ကို ရောင်းရို့ ရစာတန်းကားက တစ်ဝက်ကို ကိုယ်ရို့အတွက် ချန်ထားလိုက်ကတ်လီရေ။ ယင်းနောက် ကျန်စာတန်းကားတိကို တမန်တော်ရို့အလက်မာ အပ်လီရေ။ ချန်ထားစာ တန်းကားကို သူရို့ လင်မယား နှစ်ယောက်စုံ သိကတ်လီရေ အရာ သူရို့စာ စိတ်တစ်ညီတည်း ဟိကတ်လီရေ။

3ယင်းခါ ပေတရုစာ ပြောလီရေ၊ “အာနနိ၊ နင် ဇာဖို့ မာရ်နတ်ကို နင့် စိတ်နှလုံးမာ နေရာ ပီးစာလည်း? နင် သန့်ရှင်းသောဝိညာဉ်တော်ကို မုတ်သားစကား ပြောပြီးကေ လယ်ရောင်းရို့ ရစာတန်းကားက တစ်ဝက်ကို နင်ရို့အတွက် ချန်ထားလိုက်တေ မဟုတ်လော? 4မရောင်းခင်အယင်က ထိုလယ်ကို နင် ပိုင်ဆိုင်လီရေ မဟုတ်လော? အရာ လယ်ကို ရောင်းရို့ ပြီးရေခါလည်း တန်းကားတိကို နင် လိုစာပိုင် သုံးဖို့ ရလီရေ မဟုတ်လော? ယင်းပိုင်ဆိုကေ နင် ဇာဖို့ ဒေ အလုပ်ကို လုပ်လီစာလည်း? နင် သက်သက် လူဘားမာ မုတ်သားစကားပြောစာ မဟုတ်၊ ထာဝရဘုရားဘားမာ မုတ်သားစကား ပြောစာ ဖြစ်တေ။”

5ထိုစကားကို ကြားရေ ချက်ချင်း အာနနိစာ မြေပြင်မာ လဲရို့ သီလားခလီရေ။ ဒေ အကြောင်းအရာကို ကြားသူရို့ အားကုံးသူ ကောင်းကောင်း ကြောက်ကတ်လီရေ။ 6ယင်းနောက် လူပျိုရို့ ထရို့ အာနနိ အကောင်မာ အဝတ်ရိုက်ကတ်လီရေ အရာ ပြင်တို့ ယူလားရို့ သင်္ချိုင်းမာ သင်္ဂြိုဟ်ကတ်လီရေ။

7လင်သီရို့ သုံးနာရီလှောက် ကြာရေခါ အာနနိ မယား ရှာဖိရေစာ ယင်းနေရာတို့ လာလီရေ၊ ယေကေလည်း ဇာဖြစ်တေလည်းဆိုစာကို သူစာ မသိလီ။ 8ယင်းခါ ပေတရုစာ အာနနိ မယား ရှာဖိရေကို မီးလီရေ၊ “ပြောကြည့်န၊ နင်ရို့ လင်မယား ထိုလယ်ကို ဒေလှောက် တန်းကားန ရောင်းလီကတ်စာလော?” ရှာဖိရေစာ အဖြေ ပီးလီရေ၊ “ဟုတ်ပါရေ။”

9ယင်းခါ ပေတရုစာ ထိုမိန်းမကို ပြောလီရေ၊ “နင်ရို့ စိတ်တစ်ညီတည်း ဖြစ်ရို့ အသျှင်၏ ဝိညာဉ်တော်ကို ဇာဖို့ စုံစမ်းကတ်စာလည်း? ကြည့်၊ နင့်လင်ကို သင်္ဂြိုဟ်ဖို့ လားခသူရို့ လမ်းခဝအနားမာ ရောက်နီကတ်ပျာ။ သူရို့ နင့်ကိုလည်း ပြင်တို့ ယူလားကတ်လိမည်။”

10ထိုစကားကို ကြားရေ ချက်ချင်း ရှာဖိရေစာ ပေတရု အခြီရင်းမာ လဲရို့ သီလားခလီရေ။ ယင်းခါ ထိုလူပျိုရို့ လာရို့ ရှာဖိရေ သီရို့ဟိစာကို မြင်ကတ်လီရေ။ ယင်းနောက် သူ့ကို ပြင်တို့ ယူလားရို့ လင်အနားမာ သင်္ဂြိုဟ်ကတ်လီရေ။ 11ယင်းခါ အသင်းတော်မာ ဟိသမျ လူရို့န အခြားလူရို့လည်း ထိုစကားကို ကြားရို့ ကောင်းကောင်း ကြောက်ကတ်လီရေ။

တမန်တော်ရို့ အံ့ဩဖွယ်အလုပ် လုပ်ခြင်း

12တမန်တော်ရို့စာ လူရို့အထဲမာ အများကြီး အံ့ဩဖွယ်-နိမိတ်လက္ခဏာ အလုပ်တိကို လုပ်ရို့ ပြကတ်လီရေ။ အရာ သူရို့ အားကုံးသူ ယေရုရှလင်မြို့မာဟိစာ ဝိပဿနာကျောင်းမာ ရှောလမုန်နာမည်န ဒန်ခြံတစ်ခုမာ အမြဲတိုင်း တစ်စုတည်းစုရို့ နီလီကတ်တေ။ 13လူရို့စာ တမန်တော်ရို့ကို ကောင်းကောင်း ရိုသေလီကတ်တေ၊ ယေကေလည်း သူရို့န ပေါင်းဖေါ်ဖို့ သတ္တိ မဟိလီကတ်။ 14ယေကေလည်း မိန်းမန ယောက်ကျား အများကြီး အသျှင်ကို ကျုံရို့ အသင်းတော်မာ ပေါင်းကတ်လီရေ။ 15ယင်းထက်မက ပေတရု လမ်းမာ လားရေခါ ရောဂါသေရို့ဘားမာ ပေတရုအရိပ် ကျလတ်အောင် လူရို့စာ သယင်းန ကိုယ်ခင်းမာ ထည့်ရို့ ရောဂါသေရို့ကို ယူခပြီးကေ လမ်းအနားတိမာ ချထားကတ်လီရေ။ 16ယေရုရှလင်မြို့အနားမာ ဟိသမျ ရွာတိက လူအများကြီး ကိုယ်ရို့မာ ရောဂါသေရို့န နတ်ဆိုးကိုင်ရို့ ဒုက္ခ ရသူရို့ကို ယူလာရို့ စုကတ်လီရေ၊ အရာ ထိုရောဂါသေရို့ အားကုံးသူ အကောင်း ဖြစ်ကတ်လီရေ။

တမန်တော်ရို့ကို ညှဉ်းဆဲခြင်း

17တမန်တော်ရို့ လုပ်စာအလုပ်ကို မြင်ရို့ မဟာယဇ်ပုရောဟိတ်န သူ့အဖက်သား ဇဒ္ဒုကဲအဖွဲ့သားရို့စာ ကောင်းကောင်း မန်တက်ကတ်လီရေ။ 18ယင်းအတွက်န သူရို့စာ တမန်တော်ရို့ကို ဖမ်းရို့ ထောင်မာ ထည့်ကတ်လီရေ။ 19ယင်းနိ ညဉ့်မာ ထာဝရဘုရား၏ ဂေါင်းခင်နတ်သားတစ်ပါးစာ ထောင်လမ်းခဝတိကို ဖွင့်ပီးလီရေ အရာ ပြင်တို့ ခေါ်ထုတ်ရို့ ပြောလီရေ၊ 20“လားလီကတ်၊ ဝိပဿနာကျောင်းမာ ရပ်ရို့ ထာဝရအသက်ကို ရဖို့စာ ဟိသမျ အကြောင်းအရာကို လူရို့ဘားမာ ဟောပြောလီကတ်။” 21ထိုဂေါင်းခင်နတ်သား မှာခရေအတိုင်း သူရို့စာ မိုးသောက်စောစောက ဝိပဿနာကျောင်းတို့ လားရို့ သွန်သင်ပီးကတ်လီရေ။

ယင်းခါ မဟာယဇ်ပုရောဟိတ်န သူ့အဖက်သားရို့စာ ဣသရေလလူမျိုးရို့မာ ဂေါင်းဆောင်ရို့ကို မဟာတိုင်ဘင်အဖွဲ့တို့ လာဖို့အတွက် ခေါ်ကတ်လီရေ။ ယင်းနောက် တမန်တော်ရို့ကို ယူခဖို့အတွက် သူရို့စာ ဝိပဿနာကျောင်းမာ အစောင့်သား လိုင်းကေယောက်ကို ရွှတ်လိုက်လီရေ၊ 22ယေကေလည်း ထိုအစောင့်သားရို့စာ ထောင်တို့ လားခကတ်တေခါ တမန်တော်ရို့ကို မတွိကတ်လီ။ သူရို့စာ ပြန်လာရို့ ပြောကတ်လီရေ၊ 23“အကျွန်ရို့ ထောင်မာ လားရို့ ကြည့်ရေခါ လက်ကောက်သီး တတင်းတတ်ရို့ တွိလီပါရေ အရာ လမ်းခဝတိုင်းမာ ထောင်စောင့်သားရို့ ရပ်ရို့ဟိစာကို မြင်ခလီပါရေ၊ ယေကေလည်း လမ်းခဝကို ဖွင့်ရို့ ကြည့်ရေခါ တစ်ယောက်ကိုလည်း မမြင်ရလီပါ။” 24သူရို့ စကားကို ကြားရို့ ဝိပဿနာကျောင်းမာဟိစာ အစောင့်သားအကြီးန ယဇ်ပုရောဟိတ်အကြီးရို့စာ အံ့မောပြီးကေ စဉ်းစားရို့ ပြောကတ်လီရေ၊ “ဒေ အလုပ်အကျိုး ဇာဖြစ်ဖို့လည်း?” 25ယင်းခါ လူတစ်ယောက် လာရို့ ပြောလီရေ၊ “နားထောင်ကတ်ပါ၊ ကိုယ်ဘင်ရို့ ထောင်မာ ထည့်လီသူရို့စာ ဝိပဿနာကျောင်းမာ ရပ်ရို့ သွန်သင်ပီးနီကတ်ပါရေ။” 26ယင်းခါ ဝိပဿနာကျောင်းမာ အစောင့်သားအကြီးစာ ကိုယ့်လက်အောက်ကဟိစာ အစောင့်သား လိုင်းကေယောက်ကို ခေါ်ယူရို့ တမန်တော်ရို့ကို ဖမ်းကတ်လီရေ။ ယင်းခါ အခြားလူရို့ ကျောက်ခဲဘိုက်ဖို့စာကို တွက်ရို့ သူရို့စာ ကြောက်ကတ်လီရေ။ ယင်းအတွက်န တမန်တော်ရို့ကို ကကြမ်းတတမ်း မလုပ်ကတ်လီ။

27တမန်တော်ရို့ကို ဖမ်းယူခရို့ မဟာတိုင်ဘင်အဖွဲ့သားရို့ ရှိက ရပ်စီကတ်လီရေ။ ယင်းခါ မဟာယဇ်ပုရောဟိတ်စာ တမန်တော်ရို့ကို ပြောလီရေ၊ 28“ထိုလူ အကြောင်းအရာကို သွန်သင် မပီးကေ့ ဟို့ ငါရို့ နင်ရို့ကို တတင်းရရင်း အာဏာပီးလီရေ မဟုတ်လော? ယေကေလည်း နင်ရို့ သွန်သင်ချက် ယေရုရှလင်မြို့မာ ပြည့်လားခဗျာ၊ အရာ နင်ရို့ ထိုလူ သီလားခစာ အကြောင်းမာ ငါရို့ကို အပြစ်ချဖို့ ကြည့်ကတ်စာလော?”

29ယင်းခါ ပေတရုန အခြားတမန်တော်ရို့စာ အဖြေပီးကတ်လီရေ၊ “အကျွန်ရို့ လူအာဏာကို လိုက်နာဖို့စာထက်ပင် ထာဝရဘုရား၏ အာဏာကို လိုက်နာဖို့ သင့်ပါရေ။ 30အကျွန်ရို့ အဖိုးအဖီးအစိုင်လာရို့မာ ထာဝရဘုရားစာ ကိုယ်ဘင်ရို့ ကားတိုင်မာ တင်ရို့ အသီသတ်လီစာ ယေရှုကို သီရာက ပြန်ရှင်ထမြောင့်စီလီပါရေ။ 31ထာဝရဘုရားစာ ယေရှုကို မဟာဂေါင်းဆောင်န ကယ်တင်သျှင်အဖြစ် ချီးမြှောင့်ရို့ ကိုယ့်ညာဖက်က ထိုင်ဖို့စာ ဘုန်းသိက္ခာကို ပီးလီပါရေ။ ယင်းအတွက်န ဣသရေလလူမျိုးရို့ကို အပြစ်က စိတ်လှည့်ယူခရို့ ခွင့်ရွှတ်ခြင်းကို ပီးဖို့စာ တန်ခိုးအာဏာ ယေရှုမာ ဟိပါရေ။ 32အကျွန်ရို့ ထို ဟိသမျ အကြောင်းအရာမာ သက်သီခံ ဖြစ်ကတ်ပါရေ။ အရာ သန့်ရှင်းသောဝိညာဉ်တော်လည်း သက်သီခံ ဖြစ်ပါရေ။ ကိုယ့်စကားတော်ကို လိုက်နာသူရို့ကို ထာဝရဘုရားစာ သန့်ရှင်းသောဝိညာဉ်တော်ကို ပီးပါရေ။”

33ထိုစကားကို ကြားရို့ ဂေါင်းဆောင်ရို့စာ ကောင်းကောင်း မန်ပါရို့ တမန်တော်ရို့ကို အသီသတ်ဖို့ ကြည့်ကတ်လီရေ။ 34ယင်းခါ ဖာရိရှဲအဖွဲ့သားရို့အထဲက ဂါမလျေလနာမည်န လူတစ်ယောက်စာ မဟာတိုင်ဘင်အဖွဲ့ထဲမာ ထရို့ ရပ်လီရေ။ သူစာ ကျမ်းဆရာ တစ်ယောက် ဟိလီရေ အရာ သူ့ကို အားကုံးသူ ရိုသေလီကတ်တေ။ သူစာ တမန်တော်ရို့ကို တစ်နားသျှေ ပြင်ကနီဖို့အတွက် အာဏာချလီရေ။ 35ယင်းနောက် သူစာ မဟာတိုင်ဘင်အဖွဲ့သားရို့ကို ပြောလီရေ၊ “ဣသရေလလူမျိုးရို့၊ နင်ရို့ ဒေသူရို့ကို ဇာ လုပ်ဖို့ ကြည့်ကတ်စာလည်းဆိုစာကို သတိထားကတ်။ 36လိုင်းကေရက် အယင်က ထိုဒနာမည်န လူတစ်ယောက် ကိုယ့်ကိုကိုယ် အကြီးအကျယ် ဂေါင်းဆောင်တစ်ယောက် ဟို့ ပြောလီရေ။ သူ့မာ တပည့် လူပေါင်းလေးရာလှောက် ဖြစ်လီရေ။ သူစာ အသီအသတ်ခံရလီရေ အရာ သူ့မာ တပည့်ရို့လည်း အားကုံးသူ ကြင်းလားခကတ်လီရေ။ ယင်းအတွက်န သူလုပ်ဖို့ ကြံလီစာ အလုပ်တိစာ မအောင်မြင်လီ။ 37ယင်းနောက် လူဦးရေ စာရင်းကောက်လီရေခါ ယုဒနာမည်န ဂါလိလဲပြည်နယ်သား တစ်ယောက် လာရို့ လူတစ်ဖွဲ့ကို ခေါ်ယူခရို့ ရန်ဆိုင်ကတ်လီရေ။ သူလည်းသောက် အသီအသတ်ခံရလီရေ အရာ သူ့တပည့်ရို့လည်း အားကုံးသူ ကြင်းလားခကတ်လီရေ။ 38ယင်းအတွက်န ငါ နင်ရို့ကို ပြောရေ၊ နင်ရို့ ဒေသူရို့ကို တစ်ခုလည်း မလုပ်ဘိုင်းန ရွှတ်လိုက်။ သူရို့မာ ရွယ်မှတ်ချက်န အလုပ်တိ လူရွယ်မှတ်ချက်န လူအလုပ် ဖြစ်တေဆိုကေ တစ်ခါလည်း အောင်မြင်လိမည် မဟုတ်၊ 39ယေကေလည်း သူရို့မာ ရွယ်မှတ်ချက်န အလုပ်တိ ထာဝရဘုရား၏ ရွယ်မှတ်ချက်န အလုပ် ဖြစ်တေဆိုကေ နင်ရို့ တားဆီးရို့ နိုင်ကတ်လိမည် မဟုတ်။ နင်ရို့ တားဆီးရေဆိုကေ ထာဝရဘုရားကို ဆန့်ကျင်ရို့ စစ်တိုက်စာနတူကတ်ဖို့။”

40ယင်းခါ ထိုဂေါင်းဆောင်ရို့စာ ဂါမလျေလ စကားကို သဖေါတူကတ်လီရေ။ ယင်းနောက် ထိုဂေါင်းဆောင်ရို့စာ တမန်တော်ရို့ကို အထဲတို့ ခေါ်သွင်းရို့ ကြိမ်ဒါဏ်ပီးဖို့အတွက် အာဏာချလီရေ။ ယင်းနောက် သူရို့စာ၊ “ယေရှု အကြောင်းအရာကို ယူရို့ အရာတစ်ခါလည်း မဟောပြောကတ်ကေ့” ဟို့ အာဏာချရို့ ရွှတ်လိုက်ကတ်လီရေ။ 41တမန်တော်ရို့စာ ယေရှုနာမည်န ညှဉ်းဆဲ ခံဖို့သင့်ရေ ဟို့ မှတ်ကတ်လီရေ။ ယင်းအတွက်န သူရို့စာ ပျော်ရို့ မဟာတိုင်ဘင်အဖွဲ့က ထွက်ရို့ လားခကတ်လီရေ။ 42သူရို့စာ ယေရှုကို ခရစ်တော် ဖြစ်တေ ဟို့ သတင်းကောင်းကို ဟောပြောရို့နီကတ်လီရေ၊ အရာ သူရို့စာ နိတိုင်း ဝိပဿနာကျောင်းန အိမ်တိုင်း လယ်ရို့ သွန်သင်ပီးရို့ နီကတ်လီရေ။