Acts 6
ပြုဇုဖို့သူ ခုနစ်ယောက်ကို ရွီးကောက်ခြင်း
1ယင်းအချိန်ခါ တပည့်ရို့မာ လူဦးရေ ပွါးလာလီရေ။ ယင်းခါ တပည့်ရို့အထဲမာ ဂရိဘာသာစကား ပြောသူရို့စာ ဟေဗြဲဘာသာစကား ပြောသူရို့ကို အပြစ်တင်ကတ်လီရေ၊ အကြောင်းကား နိတိုင်း သုံးဖို့ဇရစ် ဝီပီးလီရေခါ ဂရိဘာသာစကား ပြောစာ မဆမရို့ အဝီ မရကတ်လီ။ 2ထိုစကားကို ကြားရို့ တမန်တော် တစ်ဆယ့်နှစ်ယောက်စာ ဟိသမျ တပည့်ရို့ကို ခေါ်ရို့ ပြောကတ်လီရေ၊ “ထာဝရဘုရား၏ တရားတော်ကို ဟောပြောဖို့စာကို ထားရို့ ငါရို့ စားစရာ ပီးဖို့စာအလုပ်မာ စိတ်ဝင်စားရို့ နီဖို့မသင့်။ 3ညီအစ်ကိုမောင်နမှရို့၊ ကိုယ်ဘင်ရို့အထဲက သန့်ရှင်းသောဝိညာဉ်တော်န ညာဏ်ပညာပြည့်စုံစာ လူခုနစ်ယောက်ကို ရွီးကောက်ကတ်။ သူရို့စာ လူရို့က ရိုသေခြင်းကို ခံရသူ ဖြစ်ကတ်ရဖို့။ ငါရို့စာ သူရို့ကို ပြုဇုဖို့စာအလုပ်မာ တာဝန် ပီးဖို့။ 4အရာ ငါရို့စာ ဆုတောင်းဖို့စာန တရားဟောဖို့စာအလုပ်မာ အချိန်ပီးဖို့။” 5သူရို့အထဲမာ အားကုံးသူ ထိုစကားကို သဖေါတူရို့ ပျော်ကတ်လီရေ။ သူရို့စာ သတေဖန်နာမည်န လူတစ်ယောက်ကို ရွီးကောက်ယူကတ်လီရေ။ သတေဖန်မာ သန့်ရှင်းသောဝိညာဉ်တော်န ကျုံခြင်းတရား အပြည့်အစုံ ဟိလီရေ။ သူ့ကိုအပယ် သူရို့စာ ဖိလိပ္ပု၊ ပြောခေါ်၊ နီကနော်၊ တိမုန်၊ ပါမေန အရာ အန္တိအုတ်မြို့က နိကောလကိုလည်း ရွီးကောက်ယူကတ်လီရေ။ နိကောလစာ ယုဒဘာသာဝင်သူတစ်ယောက် ဟိလီရေ။ 6ယင်းနောက် ထိုခုနစ်ယောက်ကို ခေါ်ရို့ တမန်တော်ရို့ ရှိက ရပ်စီလီရေ။ တမန်တော်ရို့စာ သူရို့အဂေါင်းမာ အလက်တင်ရို့ ဆုတောင်းပီးလီရေ။ 7ယင်းအတွက်န သူရို့စာ ထာဝရဘုရား၏ စကားတော်ကို အများကြီး ဟောပြောဖို့ ရကတ်လီရေ။ အရာ ယေရုရှလင်မြို့မာ အယင်အမြန် တပည့် လူဦးရေ အများကြီး ပွါးလာလီရေ။ ယဇ်ပုရောဟိတ်ရို့အထဲက အများကြီး ခရစ်တော်ကို ကျုံရို့ လက်ခံကတ်လီရေ။ယေရုရှလင်မြို့သားရို့ သတေဖန်ကို ဖမ်းခြင်း
8သတေဖန်စာ ထာဝရဘုရား၏ ကျေးဇူးတော်န တန်ခိုး ပြည့်စုံရို့ လူရို့ဘားမာ အံ့ဩဖွယ်-နိမိတ်လက္ခဏာ အလုပ်တိကို လုပ်ရို့ပြလီရေ။ 9– 10ထိုမြို့မာ ကျွန်က ရွတ်သူရို့အတွက် ဘာသာရေး တရားဇရပ်တစ်ခု ဟိလီရေ။ ထိုဘာသာရေး တရားဇရပ်က ယုဒလူတစ်ဖွဲ့ သတေဖန်န အငြင်းအခုံ လုပ်ကတ်လီရေ။ သူရို့စာ ကုရေနေမြို့၊ အာလေဇန္ဒြူယမြို့၊ ကိလိကိပြည်နယ် အရာ အာရှိပြည်နယ်က လာကတ်သူရို့ ဖြစ်တေ။ ယင်းခါ သတေဖန်စာ သန့်ရှင်းသောဝိညာဉ်တော်န ပြည့်စုံရို့ ပညာန စကားပြောလီရေအတွက်န သူရို့စာ သတေဖန်ကို တစ်ခုလည်း အဖြေပီးဖို့ မနိုင်ကတ်လီ။ 11ယင်းအတွက်န သူရို့စာ အထဲမာအထဲ လူလိုင်းကေယောက်ကို တန်းကားပီးရို့ ဒေပိုင် ပြောဖို့အတွက် စကားထိုးပီးကတ်လီရေ၊ “ဒေလူ ဘုရားသတင်းပို့သူ မောရှေန ထာဝရဘုရားကို တရိုက်ရို့ ပြောနီစာကို အကျွန်ရို့ ကြားရလီကတ်ပါရေ။” 12ဒေပိုင် စကားပြောရို့ သူရို့စာ လူရို့ကို၊ ဂေါင်းဆောင်ဝါကြီးရို့ကို အရာ ကျမ်းဆရာရို့ကို မန်မြှောင့်ပီးကတ်လီရေ။ သူရို့စာ သတေဖန်ကို ဖမ်းရို့ မဟာတိုင်ဘင်အဖွဲ့သားရို့ ရှိတို့ ယူလာကတ်လီရေ။ 13ယင်းခါ သူရို့စာ မုတ်သား သက်သီပီးဖို့အတွက် လူလိုင်းကေယောက်ကို ခေါ်ယူခရို့ မဟာတိုင်ဘင်အဖွဲ့သားရို့ ရှိက စကားပြောဖို့ ခိုင်းလီရေ။ ထိုမုတ်သားသက်သီပီးသူရို့စာ ပြောကတ်လီရေ၊ “ဒေလူ အမြဲတိုင်း ဝိပဿနာကျောင်းန မောရှေ၏ ပညှတ်တရားကို ဆန့်ကျင်ရို့ စကားပြောနီပါရေ။ 14ထိုနာဇရက်မြို့သျှေသား ယေရှုစာ ဒေ ယေရုရှလင်မြို့မာဟိစာ ဝိပဿနာကျောင်းကို ဖျက်ဘိုက်ဖို့ အရာ မောရှေ အကျွန်ရို့ကို ပီးလီစာ ထုံးစဉ်တိကိုလည်း လှည်ဘိုက်လိုက်ဖို့ ဟို့ ဒေလူ ပြောနီစာကို အကျွန်ရို့ ကြားရလီကတ်ပါရေ။” 15မဟာတိုင်ဘင်အဖွဲ့မာ ထိုင်ရို့ ဟိကတ်သူရို့ အားကုံးသူ သတေဖန်တို့ စစိတ်ကြည့်ရို့ နီကတ်လီရေ။ ယင်းခါ သတေဖန်မာ မျက်နှာ ဂေါင်းခင်နတ်သား မျက်နှာပိုင် ဖြစ်လားခစာကို သူရို့ မြင်ရကတ်လီရေ။
Copyright information for
RmzSC