Acts 9

ရှောလု ယေရှုကို ကျုံခြင်း

1– 2ယင်းအချိန်ခါ ရှောလုစာ ယေရုရှလင်မြို့မာ အသျှင်၏ တပည့်ရို့ကို သတ်ဘိုက်လိုက်ဖို့ ဟို့ ခြောက်လီရေ။ အရာ သူစာ ဒမာသက်မြို့မာဟိစာ ဘာသာရေး တရားဇရပ်တိမာ ပီးဖို့အတွက် မဟာယဇ်ပုရောဟိတ်တို့ လားရို့ ထောက်ခံစာ တောင်းလီရေ၊ အကြောင်းကား သူစာ အသျှင်ယေရှု၏ တပည့် မိန်းမမဆို၊ ယောက်ျားမဆို တွိရေဆိုကေ သူရို့ကို ဖမ်းရို့ ယေရုရှလင်မြို့တို့ ယူခဖို့ ရလတ်အောင်အတွက် ဖြစ်တေ။ 3ရှောလုစာ လမ်းမာ လားရို့ လားရို့ ဒမာသက်မြို့အနားတို့ ရောက်လီရေ။ ယင်းခါ ဂေါင်းခင်က ဗြုန်းခနိုင်းပျင်ရို့ တောက်ပြောင်စာ အလင်းရောင်တစ်ခု သူ့လေးဖက်လက်စိမာ ချုပ်ကျလီရေ။ 4ယင်းခါ သူစာ မြေပြင်မာ လဲကျလီရေ အရာ သူ့ကို အသူလည်းမသိတစ်ယောက်၊ “ရှောလု၊ ရှောလု၊ ငါ့ကို ဇာဖို့ ညှဉ်းဆဲနီစာလည်း?” ဟို့ ပြောစာအသံကို ကြားရလီရေ။

5ယင်းခါ ရှောလုစာ မီးလီရေ၊ “အသျှင်၊ ကိုယ်တော် အသူပါလည်း?” အသျှင်စာ ပြောလီရေ၊ “ငါ နင့် ညှဉ်းဆဲခြင်းကို ခံရနီသူ ယေရှု ဖြစ်တေ။ 6နင် ဒေဂု ထရို့ မြို့တို့ လားလီ။ နင် ဇာလုပ်ရဖို့လည်းဆိုစာကို ယင်းမြို့မာ လူတစ်ယောက် နင့်ကို ပြောပြလိမည်။”

7ရှောလုနအတူ ပါလီသူရို့ အားကုံးသူ ပြောစာအသံကို ကြားရကတ်လီရေ၊ ယေကေလည်း တစ်ယောက်ကိုလည်း မမြင်ရကတ်လီ။ ယင်းအတွက်န အံ့မောကျရို့ ရပ်ရို့ နီကတ်လီရေ။ 8ယင်းနောက် ရှောလုစာ မြေပြင်က ထရို့ မျက်စိ ဖွင့်ရို့ ကြည့်ရေခါ တစ်ခုကိုလည်း မမြင်ရလီဗျာ။ ယင်းခါ သူ့အဖက်သားရို့စာ သူ့အလက်ကို ကိုင်ရို့ ဒမာသက်မြို့တို့ ယူလားခကတ်လီရေ။ 9ယင်းမြို့မာ ရှောလုစာ သုံးရက်ပတ်လုံး မျက်စိ မမြင်ရဘိုင်းန ဟိလီရေ အရာ တစ်ခုလည်း မစားမသောက်ဘိုင်းန နီလီရေ။

10ဒမာသက်မြို့မာ ယေရှု၏ တပည့်ရို့အထဲက အာနနိနာမည်န လူတစ်ယောက် ဟိလီရေ။ အာနနိကို အသျှင်စာ ကိုယ်ထင်ပြရို့ ခေါ်လီရေ၊ “အာနနိ။” အာနနိစာ ထူးလီရေ၊ “အသျှင်၊ အကျွန် ဒေမာ ဟိပါရေ။”

11– 12အသျှင်စာ အာနနိကို ပြောလီရေ၊ “နင် ထရို့ ‘ပပြောင့်’ ဟို့ ခေါ်စာ လမ်းတို့ လားလီ။ ယင်းလမ်းနားမာ ယုဒအိမ် ဟိရေ။ ထိုအိမ်မာ တာရှုမြို့သား ရှောလုနာမည်န လူတစ်ယောက်ကို ရှာကြည့်လီ။ ရှောလုစာ ထိုအိမ်မာ ဆုတောင်းရို့ ဟိလီရေခါ သူ့မျက်စိ ပြန်မြင်ရဖို့အတွက် အာနနိနာမည်န လူတစ်ယောက် လာရို့ ကိုယ့်ခန္ဓာမာ အလက် တင်စာကို ကိုယ်ထင်မာ မြင်လီရေ။”

13အာနနိစာ ပြောလီရေ၊ “အသျှင်၊ ရှောလု ယေရုရှလင်မြို့မာ ကိုယ်တော်၏ လူရို့ကို ကောင်းကောင်း ညှဉ်းဆဲနီရေဆိုစာကို လူရို့ ပြောစာကို အကျွန် ကြားဖူးပါရေ။ 14ယင်းသျှင့်ကိုအပယ် ကိုယ်တော်နာမည်န ဆုတောင်းနီသူရို့ကို ဖမ်းရို့ ယူလားဖို့အတွက် မဟာယဇ်ပုရောဟိတ်က အခွင့်အာဏာကို ယူရို့ ဒေမြို့တို့ လာစာ ဖြစ်ပါရေ။”

15– 16ယေကေလည်း အသျှင်စာ အာနနိကို ပြောလီရေ၊ “နင် လားလီ၊ ရှောလု ယုဒမဟုတ်သူရို့၊ သူရို့မာ မင်းရို့ အရာ ဣသရေလလူမျိုးဘားမာ ငါ့အကြောင်းကို ဟောပြောဖို့အတွက် ငါ ရှောလုကို ရွီးကောက်ယူဗျာ။ ငါ့အတွက် ဇာလှောက် ဒုက္ခ-ဝေဒနာကို ခံရဖို့လည်းဆိုစာကို ငါ သူ့ကို ပြဖို့။”

17ယင်းခါ အာနနိစာ ရှောလုနီစာ အိမ်တို့ လားရို့ အိမ်ထဲတို့ ဝင်ရို့ သူ့ခန္ဓာမာ အလက်တင်ရို့ ပြောလီရေ၊ “အစ်ကို ရှောလု၊ ကိုယ်ဘင် ဒေ မြို့တို့ လာရေခါ လမ်းမာ ကိုယ်ထင်မြင်ခသူစာ အသျှင်ယေရှု ဖြစ်တေ။ ကိုယ်ဘင် မျက်စိ ပြန်ရို့ မြင်ရဖို့အတွက် အရာ သန့်ရှင်းသောဝိညာဉ်တော်န ပြည့်စုံဖို့အတွက် အသျှင်ယေရှု အကျွန့်ကို ကိုယ်ဘင်တို့ ရွှတ်လိုက်တေ။” 18– 19ယင်းခါ ချက်ချင်း ရှောလု မျက်စိထဲက ငါးအကြီးပိုင်တစ်ခု ထွက်လားခလီရေ အရာ မျက်စိလည်း ပြန်ရို့ မြင်ရလီရေ။ ယင်းနောက် ရှောလုစာ ထရို့ ရီနှစ်မင်္ဂလာ ခံယူလီရေ အရာ စားရို့သောက်ရို့ အားခွန်ရလီရေ။ ယင်းနောက် ရှောလုစာ ဒမာသက်မြို့မာ တပည့်ရို့နအတူ လိုင်းကေရက် နီလီရေ။

ဒမာသက်မြို့မာ ရှောလု တရားဟောပြောခြင်း

20ယင်းနောက် ရှောလုစာ မနားဘိုင်းန ဘာသာရေး တရားဇရပ်တိမာ လားရို့ ဒေပိုင် ဟောပြောလီရေ၊ “ယေရှုစာ ထာဝရဘုရား၏ သားတော် ဖြစ်တေ။” 21ရှောလု စကားကို ကြားသူရို့စာ အံ့ဩရို့ တစ်ယောက်ကို တစ်ယောက် မီးကတ်လီရေ၊ “ယေရုရှလင်မြို့မာ ယေရှုနာမည်န ဆုတောင်းနီသူရို့ကို ညှဉ်းဆဲလီစာ ဒေလူ မဟုတ်လော? ဒေမာလည်း ယေရှုနာမည်န ဆုတောင်းနီသူရို့ကို ချိုင်ရို့ မဟာယဇ်ပုရောဟိတ်တို့ ယူလားဖို့အတွက် လာစာ မဟုတ်လော?” 22ယေကေလည်း ရှောလုစာ စကားပြောဖို့ အားခွန်န ပြည့်စုံရို့ ယေရှုစာ ခရစ်တော် ဖြစ်တေဆိုစာ အကြောင်းကို သက်သီ ပီးလီရေ။ ယင်းအတွက်န ဒမာသက်မြို့မာ ယုဒလူရို့စာ ငြင်းဖို့ မရကတ်လီ။

23ရက်ပေါင်းများစွာ ကြာရေခါ ယုဒလူရို့စာ ရှောလုကို အသီသတ်ဖို့ ကြံကတ်လီရေ။ 24ယေကေလည်း သူစာ ကိုယ့်ကို ယုဒလူရို့ အသီသတ်ဖို့ အကြံချရို့ မြို့လမ်းခဝတိမာ ညဉ့်ပါ-ရက်ပါ စောင့်နီကတ်စာကို သိလီရေ။ 25တစ်ရက်နိ ညဉ့်မာ ရှောလု တပည့်ရို့စာ သူ့ကို တောင်းတစ်လုံးမာ ထည့်ရို့ မြို့ကို ရန်ထားစာ အုပ်ထရန် အပေါက်က ကြိုးနဆွဲရို့ ချလိုက်ကတ်လီရေ။

ယေရုရှလင်မြို့တို့ ရှောလု ပြန်ရောက်ခြင်း

26ယင်းနောက် ရှောလုစာ ယေရုရှလင်မြို့တို့ လာရို့ တပည့်ရို့န ပေါင်းဖေါ်ဖို့ ကြိုးစားလီရေ။ ယေကေလည်း ရှောလု အမှန် ယေရှု၏ တပည့် ဖြစ်တေဆိုစာကို သူရို့စာ မကျုံရေအတွက်န ကြောက်ကတ်လီရေ။ 27ယင်းခါ ဗာနဗစာ ရှောလုကို တမန်တော်ရို့တို့ ခေါ်ယူခလီရေ။ ဒမာသက်မြို့တို့ လားစာလမ်းမာ ရှောလု အသျှင်ယေရှုကို မြင်လီစာ အကြောင်းကို၊ အသျှင် သူ့ကို ပြောလီစာ အကြောင်းကို အရာ သူစာ ဒမာသက်မြို့မာ ယေရှု၏ အကြောင်းကို မကြောက်မလန့်ဘိုင်း သတ္တိအပြည့်န ဟောပြောလီစာ အကြောင်းကို ဗာနဗစာ တမန်တော်ရို့ဘားမာ ပြောပြလီရေ။ 28ယင်းနောက် ရှောလုစာ ယေရုရှလင်မြို့မာ တမန်တော်ရို့နအတူ နီလီရေ အရာ သူရို့နအတူ လယ်ရို့ အသျှင်၏ အကြောင်းကို မကြောက်မလန့်ဘိုင်း သတ္တိအပြည့်န ဟောပြောလီရေ။ 29ရှောလုစာ ဂရိဘာသာစကား ပြောကတ်စာ ယုဒလူရို့န တိုင်ဘင်ကတ်လီရေ အရာ သူရို့န အငြင်းအခုံ ဖြစ်ကတ်လီရေ။ ယင်းအတွက်န ယုဒလူရို့စာ သူ့ကို အသီသတ်ဖို့ ကြံကတ်လီရေ။ 30ကျုံသူညီအစ်ကိုရို့ ထိုသတင်းကို ကြားရေခါ ရှောလုကို ကဲသရိမြို့တို့ ယူလားခကတ်လီရေ။ ယင်းနောက် ထိုမြို့ကနီရို့ သူ့ကို တာရှုမြို့တို့ ရွှတ်လိုက်လီရေ။

31ယင်းအချိန်ခါ ယုဒပြည်နယ်၊ ဂါလိလဲပြည်နယ် အရာ ရှမာရိပြည်နယ်မာဟိစာ အသင်းတော်တိမာ ငြိမ်းချမ်းခြင်း ဟိလီရေ။ အရာ အသင်းတော် လူရို့စာ ပိုရို့ စိတ်နှလုံး ခိုင်မာလီရေ။ သူရို့စာ အသျှင်ကို ရိုသေကြောက်လန့်ခြင်းန နီထိုင်ကတ်လီရေ အရာ သန့်ရှင်းသောဝိညာဉ်တော်၏ အားပီးခြင်း အသင်းတော်မာ လူဦးရေ တိုးပွါးလာလီရေ။

အဲနေ ရောဂါကောင်းခြင်း

32ပေတရုစာ ဟိသမျ နေရာမာ လယ်ရို့ လုဒ္ဒရွာမာ ထာဝရဘုရား၏ လူရို့တို့ လာလီရေ။ 33ထိုရွာမာ အဲနေနာမည်န လူတစ်ယောက် ဟိလီရေ။ ထိုအဲနေစာ ရှစ်နှစ်ပတ်လုံး တစ်စိတ်နာရောဂါ ဖြစ်ရို့ အိပ်ရာမာ လဲရို့ ဟိလီရေ။ 34သူ့ကို မြင်ရို့ ပေတရုစာ ပြောလီရေ၊ “အဲနေ၊ ယေရှုခရစ်တော် နင့်ကို အကောင်း လုပ်ပျာ။ နင့် အိပ်ရာကို ယူရို့ ထ။” ယင်းခါ အဲနေစာ ချက်ချင်း ထရို့ ရပ်လီရေ။ 35ယင်းအတွက်န လုဒ္ဒရွာန ရှာရုန်အရပ်မာ ဟိသမျ လူရို့စာ အဲနေ ရောဂါကောင်းစာကို မြင်ရို့ အသျှင်ယေရှုကို ကျုံကတ်လီရေ။

ဒေါ်ကာ ပြန်ရှင်ခြင်း

36ယုပ္ပေမြို့မာ တဗိသနာမည်န တပည့်မ တစ်ယောက် ဟိလီရေ။ တဗိသနာမည်စာ ဂရိဘာသာစကားန ဒေါ်ကာ ဟို့ ခေါ်ရေ။ သူစာ လူရို့ကို အမြဲတိုင်း ကျေးဇူးပြုရို့ နီလီရေ အရာ ဆင်ရဲသားရို့ကိုလည်း ကူညီပီးရို့ နီလီရေ။ 37သူစာ ရောဂါဖြစ်ရို့ သီလားခလီရေ၊ အရာ လူရို့စာ သူ့အကောင်ကို ရီချိုးရို့ အိမ်အထက်အခန့်မာ ထားကတ်လီရေ။ 38ယုပ္ပေမြို့အနားမာ လုဒ္ဒရွာ ဟို့ ခေါ်စာ ရွာတစ်ရွာ ဟိလီရေ။ ထိုလုဒ္ဒရွာမာ ပေတရု ဟိစာကို ယုပ္ပေမြို့က တပည့်ရို့စာ ကြားကတ်လီရေ။ ယင်းအတွက်န ပေတရုကို ခေါ်ဖို့အတွက် တပည့်ရို့အထဲက နှစ်ယောက်ကို ရွှတ်လိုက်လီရေ။ ထိုနှစ်ယောက်စာ ပေတရုတို့ လာရို့ တောင်းပန်ကတ်လီရေ၊ “ဆရာ၊ ကျေးဇူးပြုရို့ အကျွန်ရို့တို့ တစ်ခေါက် အယင်အမြန် လာပါ။”

39ယင်းနောက် ပေတရုစာ သူရို့နအတူ လိုက်ရို့ ယင်းတို့ ရောက်တေခါ လူရို့စာ သူ့ကို အိမ်အထက်ခန့်တို့ ခေါ်တင်လီရေ။ ယင်းမာ မဆမရို့ အားကုံးသူ ပေတရု လေးဖက်လက်စိမာ ရပ်ရို့ ငိုကတ်လီရေ အရာ ထိုမဆမရို့စာ ဒေါ်ကာ မသီခင်အယင်က ရက်ခလီစာအင်္ကျီန အခြားအဝတ်တိကို ယူရို့ ပေတရုကို ပြကတ်လီရေ။

40ယင်းခါ ပေတရုစာ အိမ်ထဲမာ ဟိသမျ လူရို့ကို ပြင်တို့ ထုတ်လိုက်ရို့ ထာဝရဘုရားဘားမာ ဒူထောက်ရို့ ဆုတောင်းလီရေ။ အရာ သူစာ သီလားခစာ ဒေါ်ကာ အကောင်ဖက်တို့ လှည့်ကြည့်ရို့ ပြောလီရေ၊ “တဗိသ၊ ထဖိ။” ယင်းနောက် ဒေါ်ကာစာ မျက်စိ ဖွင့်လီရေ အရာ သူစာ ပေတရုကို မြင်ရို့ ထရို့ ထိုင်လီရေ။ 41ယင်းခါ ပေတရုစာ ဒေါ်ကာအလက်ကို ကိုင်ရို့ ရပ်ဖို့ ကူလီရေ အရာ သူစာ ဒေါ်ကာ ပြန်ရှင်စာကို ကျုံသူရို့န မဆမရို့ကို ခေါ်ရို့ ပြလီရေ။ 42ထိုသတင်းကို ယုပ္ပေမြို့မာ ဟိသမျ လူရို့စာ ကြားကတ်လီရေ၊ အရာ လူအများကြီး အသျှင်ယေရှုကို ကျုံကတ်လီရေ။ 43ပေတရုစာ ယုပ္ပေမြို့မာ ရှိမုန်နာမည်န လူတစ်ယောက် အိမ်မာ ရက်ပေါင်းများစွာ နီလီရေ။ ရှိမုန်စာ အရီကို အဆင်သင့် လုပ်သမား တစ်ယောက် ဟိလီရေ။