Colossians 2
1ငါ နင်ရို့အတွက်၊ လောဒိကိမြို့ အသင်းတော်အတွက် အရာ ငါ့ကို မမြင်ဖူးသူရို့ အားကုံးသူအတွက် ကြိုးစားအားထုတ်ရို့ အလုပ်လုပ်နီရေဆိုစာကို ငါ နင်ရို့ကို သိစီချင်ရေ။ 2ငါ သူရို့ စိတ်နှလုံးမာ ရဲဝံ့သတ္တိ ပြည့်စီချင်ရေ အရာ တစ်ယောက်န တစ်ယောက် ချစ်ခြင်းမေတ္တာ ထားစီချင်ရေ။ အရာ ခရစ်တော်၏ အကြောင်းကို နားလည်ခြင်းကနီရို့ ရထားစာ စိတ်ချခြင်းကို အပြည့်အစုံ ရစီချင်ရေ။ ယင်းပိုင်ဆိုကေ သူရို့စာ ထာဝရဘုရား၏ ဖုံးရွှက်စာ မှန်ကန်ခြင်းဆိုစာ ခရစ်တော်ကို သိရကတ်လိမည်။ 3ဟိသမျ ညာဏ်ပညာစာ ခရစ်တော်အထဲမာ ရွှက်ထားရို့ ဟိရေ။ ထိုညာဏ်ပညာတိစာ တန်ဖိုးဟိစာ အမွီဥစ္စာနတူရေ။ 4မဟုတ်မမှန်စာ စကားတိကို ပြောရို့ နင်ရို့ကို တစ်ယောက်လည်း မှားယွင်းစာလမ်းတို့ ယူလားဖို့ မရလတ်အောင် ငါ နင်ရို့ဘားမာ ထိုစကားတိကို ပြောစာ ဖြစ်တေ။ 5ငါ ကိုယ်တိုင် နင်ရို့နအတူ ရောက်ရို့ မဟိကေလည်း ငါ့စိတ်စာ နင်ရို့နအတူ ရောက်ရို့ ဟိရေ။ အရာ နင်ရို့မာ ကောင်းမြတ်စာ အကျင့်သီလန နင်ရို့မာ ခရစ်တော်ကို ကျုံခြင်းတရား ခိုင်မာစာကို မြင်ရို့ ငါ ဝမ်းသာရေ။ခရစ်တော်ကနီရို့ ပြည့်စုံစာ အသက်ကို ရခြင်း
6နင်ရို့ ခရစ်တော်ယေရှုကို အသျှင်အဖြစ် လက်ခံလီကတ်စာပိုင်တထန် ဒေဂု နင်ရို့ သူနတစ်ကိုယ်တည်း ဖြစ်ရို့ အသက်ရှင်နီကတ်။ 7နင်ရို့စာ သွန်သင်ချက်ကို ရရေအတိုင်း ခရစ်တော်အထဲမာ ဝင်ပြီးကေ အမြစ်စွဲရို့ ကိုယ်ရို့ ဘဝကို သူ့အထက်မာ တည်ဆောက်ကတ်။ နင်ရို့မာ ကျုံခြင်းတရားကို တတိုင်းမမြိုင်း ထားကတ် အရာ ထာဝရဘုရားကို အမြဲတိုင်း ကျေးဇူးတင်နီကတ်။ 8နင်ရို့ သတိထားကတ်၊ နင်ရို့ကို တစ်ယောက်လည်း လူ့အတတ်ပညာန ပရိယာယ်ဆင်ရို့ မဟုတ်မမှန်စာ စကားတိကို သွန်သင်ပီးရို့ ကျွန်အဖြစ် ယူလားဖို့ မရစီကတ်ကေ့။ ထိုသွန်သင်ချက်တိ ခရစ်တော်က လာစာ မဟုတ်၊ ယေကေလည်း လူလုပ်စာ စည်းကမ်းန လောကကို အုပ်ချုပ်စာ တန်ခိုးအာဏာသျှင် ဝိညာဉ်တိက လာစာ ဖြစ်တေ။ 9ထာဝရဘုရား၏ ဟိသမျ ပြည့်စုံခြင်းစာ လူ့ဇာတိအရုပ်ဆောင်ရို့ ခရစ်တော်၏ ကိုယ်ခန္ဓာမာ ကျိန်းဝပ်နီရေ။ 10အရာ နင်ရို့လည်း ခရစ်တော်န တစ်ကိုယ်တည်း ဖြစ်ရို့ ထိုပြည့်စုံခြင်းကို ရကတ်ပျာ။ သူစာ ဂေါင်းခင်မာ ဟိသမျ အုပ်ချုပ်သူရို့န အာဏာပိုင်သူရို့ကို အုပ်စိုးနီရေ။ 11အရာ နင်ရို့စာ ခရစ်တော်န တစ်ကိုယ်တည်း ဖြစ်ကတ်တေအတွက်န အရီဖျားလှီးမင်္ဂလာကိုလည်း ခံရကတ်ပျာ။ ဒေ အရီဖျားလှီးမင်္ဂလာစာ လူအလက်န လုပ်လီစာ မဟုတ်၊ ယေကေလည်း ခရစ်တော် ကိုယ်တိုင် လုပ်လီစာ ဖြစ်တေ။ သူစာ နင်ရို့ကို ဝိညာဉ်၏ အရီဖျားလှီးမင်္ဂလာ လုပ်လီရေ။ ယင်းအဓိပ္ပါယ်ကား နင်ရို့အထဲမာဟိစာ ဇာတိပကတိကို ပိုင်းဘိုက်လိုက်ပျာ။ 12နင်ရို့ ရီနှစ်မင်္ဂလာ ခံယူခြင်းကနီရို့ ခရစ်တော်နအတူ သီရို့ သင်္ဂြိုဟ်ခြင်းကို ခံရကတ်ပျာ။ အရာ ခရစ်တော်ကို သီရာက ပြန်ရှင်ထမြောင့်စီလီစာ ထာဝရဘုရား၏ တန်ခိုးကို ကျုံခြင်းကနီရို့ နင်ရို့ ခရစ်တော်နအတူ ပြန်ရှင်ထမြောင့်ကတ်ပျာ။ 13တစ်ချိန်ခါ နင်ရို့မာ အပြစ်အကြောင်းန အရာ နင်ရို့မာ ဇာတိပကတိကို ပိုင်းရို့ မဘိုက်လီစာအကြောင်းန နင်ရို့ ဝိညာဉ်ရေးဖက်က သီရို့ ဟိကတ်လီရေ၊ ယေကေလည်း ထာဝရဘုရားစာ နင်ရို့ကို ခရစ်တော်နအတူ ဘဝအသစ်ကို ပီးလီရေ၊ အကြောင်းကား သူစာ ငါရို့မာ ဟိသမျ အပြစ်ကို ခွင့်ရွှတ်လီရေ။ 14ထာဝရဘုရားစာ ငါရို့မာ အပြစ်တင်စစ်စွဲချက် စာရင်းကို ပယ်ဘိုက်လိုက်ပျာ။ သူစာ ထိုစာရင်းကို ကားတိုင်မာ တင်ရို့ သံမှိုခပ်ပြီးကေ ဖျက်စီးဘိုက်လိုက်ပျာ။ 15ထာဝရဘုရားစာ ဂေါင်းခင်မာ ဟိသမျ ဆိုးယုတ်စာ အုပ်ချုပ်သူရို့န အာဏာပိုင်သူရို့မာ တန်ခိုးအာဏာတိကို သိမ်းယူဘိုက်လိုက်ပျာ။ သူစာ ကားတိုင်မာ ခရစ်တော်၏ သီခြင်းကနီရို့ သူရို့ကို အနိုင်ယူဘိုက်လိုက်ပျာ အရာ ဟိသမျ လူရို့ ရှိက သူရို့ကို အသရေဖျက်ပျာ။နင်ရို့ အောင်ဆုကို တစ်ယောက်လည်း လုဖို့မရစီကေ့
16ယင်းအတွက်န စားသောက်ခြင်း၊ ဘာသာရေးပွဲကို ကျင့်ပခြင်း၊ လကွယ်နိကို ကျင့်ပခြင်း အရာ သတင်းနိကို လိုက်နာခြင်းနပတ်သပ်ရို့ နင်ရို့ကို တစ်ယောက်လည်း အပြစ်တင်ဖို့ မပီးကတ်ကေ့။ 17ထိုအကြောင်းအရာတိစာ နောက်အနာဂါတ်မာ ဖြစ်ပေါ်လာဖို့စာ အကြောင်းအရာ အရိပ်တိ ဖြစ်တေ၊ ယေကေလည်း ခရစ်တော်ရာ အစစ် အကြောင်းအရာ ဖြစ်တေ။ 18ကိုယ်ရို့ ခန္ဓာကို နှိမ့်ချ-ဟန်ဆောင်သူရို့ကို အရာ ဂေါင်းခင်နတ်သားရို့ကို ဝတ်ပြုကိုးကွယ်ဖို့ လိုသူရို့ကို နင်ရို့ အောင်ဆု ရဖို့စာလမ်းကို အတားအဆီး လုပ်ဖို့ မပီးကတ်ကေ့။ သူရို့စာ အမြဲတိုင်း ကိုယ်ရို့ မြင်ရကတ်စာ ကိုယ်ထင် အကြောင်းကို ပြောပြနီကတ်တေ အရာ တစ်ခုလည်း မဟုတ်ဘိုင်းန အကြီးအကျယ် စကားတိကို ပြောနီကတ်တေ၊ အကြောင်းကား သူရို့မာ စိတ်စာ ဇာတိပကတိ အုပ်ချုပ်ခြင်းအောက်မာ ကျရို့ ဟိရေ။ 19သူရို့စာ ကိုယ်ခန္ဓာ၏ အဂေါင်းဆိုစာ ယေရှုခရစ်တော်ကို အားမကိုးကတ်၊ အကြောင်းကား ထိုအဂေါင်း ဦးဆောင်ရို့ ခန္ဓာတစ်ကိုယ်လုံးမာ အင်္ဂါတိ တစ်ခုနတစ်ခု ဆက်ရို့ ဟိကတ်တေဆိုစာကို သူရို့ မသိကတ်၊ အရာ ကိုယ်ခန္ဓာစာ အားခွန်နပြည့်စုံရို့ ထာဝရဘုရား၏ အလိုတော်အတိုင်း ကြီးပွါးနီရေ။ 20နင်ရို့စာ ခရစ်တော်နအတူ အသီခံလီရေအတွက်န ထာဝရဘုရားစာ လောကကို အုပ်ချုပ်စာ တန်ခိုးနပြည့်စုံစာ ဝိညာဉ်တိအလက်က နင်ရို့ကို ချွတ်ဘိုက်လိုက်ပျာ။ ယင်းပိုင်ဆိုကေ နင်ရို့ ဇာဖို့ ဒေဂုပင် လောက၏ ဒလည့်ထုံးစဉ်အောက်မာ နီထိုင်ကတ်စာလည်း? 21– 22အသုံးပြုရို့ ပြုရို့ ပျက်လားခစာ ဝန်တိအကြောင်းနပတ်သပ်ရို့ ဒေပိုင် စည်းကမ်း ဟိရေ၊ “မကိုင်ရ၊ မစားရ၊ မခိုက်ရ။” ထိုစည်းကမ်းတိစာ သက်သက် လူရို့ပီးစာ ပညှတ်ချက်တိန သွန်သင်ချက်တိရာ ဖြစ်တေ။ 23ထိုစည်းကမ်းတိကို ကြည့်ကေ ညာဏ်ပညာန ပြည့်စုံစာပိုင် ထင်ရေ၊ အကြောင်းကား ထိုစည်းကမ်းတိစာ ဂေါင်းခင်နတ်သားရို့ကို ကိုးကွယ်ခြင်း၊ ကိုယ့်ကို နှိမ့်ချခြင်း အရာ ကိုယ့်ခန္ဓာကို နှိပ်စက်ခြင်းနဆိုင်ရေ။ ယေကေလည်း အမှန် ပြောလိုက်ဖို့ဆိုကေ ထိုစည်းကမ်းတိစာ လူ့ခန္ဓာမာ ဇာတိပကတိအပြစ်ကို ထိန်းသိမ်းဖို့ မနိုင်။
Copyright information for
RmzSC