Colossians 4
1အပိုင်သျှင်ရို့၊ နင်ရို့ မှတ်ထားကတ်၊ နင်ရို့မာလည်းသောက် ဂေါင်းခင်ဘုံမာ အပိုင်သျှင် တစ်ယောက် ဟိရေ။ ယင်းအတွက်န နင်ရို့စာ ကိုယ်ရို့မာ ကျွန်ရို့န ရိုးရိုးသားသား ဆက်ဆံကတ် အရာ သူရို့ကို တရားသဖြင့် စစ်ဆေးကတ်။အဆုံး ဩဝါဒပီးခြင်း
2နင်ရို့ အမြဲတိုင်း သတိန ဆုတောင်းနီကတ် အရာ နင်ရို့ ဆုတောင်းကတ်တေခါ ထာဝရဘုရားကို ကျေးဇူးတင်နီကတ်။ 3အရာ ထာဝရဘုရားစာ ငါရို့ကို ခရစ်တော်၏ အကြောင်း ဖုံးရွှက်စာ မှန်ကန်ခြင်းကို ဟောပြောဖို့ အခွင့်ရေး ပီးလတ်အောင် ငါရို့အတွက်လည်း ဆုတောင်းပီးကတ်။ ထိုဖုံးရွှက်စာ မှန်ကန်ခြင်းကို ဟောပြောရေအတွက်န ငါ ထောင်အကျခံနီရရေ။ 4အရာ ငါစာ ထိုဖုံးရွှက်စာ မှန်ကန်ခြင်းကို ပပွင့်လလင်း ဟောပြောဖို့ သင့်ရေအတိုင်း ဟောပြောဖို့ နိုင်လတ်အောင် ဆုတောင်းပီးကတ်။ 5အသင်းတော်ပြင်က လူရို့ကို ညာဏ်ပညာအလိမ္မာန ဆက်ဆံကတ် အရာ ခရစ်တော်၏ အကြောင်းကို သက်သီပီးဖို့စာ ဟိသမျ အခွင့်ရေးကို အသုံးပြုကတ်။ 6နင်ရို့ စကားတိစာ ဆား-ပျားတန်စာ အစားအစာနတူရဖို့။ ယင်းပိုင်ဆိုကေ အသူ့ကို ဇာပိုင် အဖြေပီးရဖို့လည်းဆိုစာကို နင်ရို့ နားလည်ကတ်လိမည်။အဆုံးခေါက် နှုတ်ဆက်ခြင်း
7ငါရို့မာ ချစ်ခင်စာ ညီအစ်ကို တုခိတ်စာ ငါ့သတင်းတိကို ပြောပြလိမည်။ သူစာ သစ္စာနပြည့်စုံစာ ပြုဇုသူတစ်ယောက် ဖြစ်တေ အရာ သူစာ ငါရို့မာ လုပ်ဖေါ်ကိုင်ဖက် အသျှင်၏ ကျွန်လည်း ဖြစ်တေ။ 8ငါရို့ အခြေအနေကို ငါ နင်ရို့ကို သိစီချင်ရေ အရာ သူ့ကို နင်ရို့ဘားမာ အားပီးချက်စကား ပြောစီချင်ရေ။ ယင်းအတွက်န ငါ သူ့ကို နင်ရို့တို့ ရွှတ်လိုက်လီစာ ဖြစ်တေ။ 9ငါ တုခိတ်နအတူ ငါရို့မာ ချစ်ခင်စာ ညီအစ်ကို ဩနေသိမ်းကိုလည်း ရွှတ်လိုက်တေ။ ဩနေသိမ်းစာ သစ္စာန ပြည့်စုံသူ ဖြစ်တေ အရာ သူစာ နင်ရို့အထဲက တစ်ယောက်လည်း ဖြစ်တေ။ သူရို့စာ ဒေ နေရာမာ ဟိသမျ ဖြစ်ပျက်ခြင်းတိကို နင်ရို့ဘားမာ ပြောပြကတ်လိမည်။ 10ငါနအတူ ထောင်အကျခံနီရစာ ညီအစ်ကို အာရိတ္တာခုန ဗာနဗမာ အမျိုးဖြစ်သူ မာကုလည်း နင်ရို့ကို နှုတ်ဆက်ကတ်တေ။ မာကု နင်ရို့တို့ လာရေဆိုကေ နင်ရို့ သူ့ကို ကြိုဆိုလက်ခံလီကတ် ဆိုပြီးကေ ငါရို့ အယင်ကပင် မှာလိုက်စာ စကားတိကို နင်ရို့ ကြားရကတ်ပျာ။ 11ယုတ္တု ဟို့ ခေါ်စာ ယောရှုလည်း နင်ရို့ကို နှုတ်ဆက်တေ။ ယုဒလူမျိုးအထဲက ဒေ သုံးယောက်တည်းရာ ထာဝရဘုရား၏ နိုင်ငံတော်အတွက် ငါနအတူ အလုပ်လုပ်နီကတ်တေ။ သူရို့စာ ငါ့ကို ကောင်းကောင်း အားပီးကူညီလီကတ်တေ။ 12အရာ ဧပဖြလည်း နင်ရို့ကို နှုတ်ဆက်တေ။ သူစာ နင်ရို့ အသင်းတော် လူတစ်ယောက် ဖြစ်တေ အရာ သူစာ ခရစ်တော်ယေရှု၏ ကျွန်တစ်ယောက် ဖြစ်တေ။ သူစာ အမြဲတိုင်း နင်ရို့အတွက် စိတ်ပါ-ကိုယ်ပါ ဆုတောင်းနီရေ၊ အကြောင်းကား သူစာ နင်ရို့ကို ဝိညာဉ်ရေးဖက်က ခိုင်မာစီချင်ရေ အရာ ထာဝရဘုရား၏ ဟိသမျ အလိုတော်ကို အတိကျ သိခြင်းကနီရို့ အပြည့်အစုံ ခိုင်မာစာ ကျုံသူအနေန နင်ရို့ကို တတိုင်းမမြိုင်း နီစီချင်ရေ။ 13ဧပဖြ အကြောင်းကို ငါ ဒေပိုင် သက်သီ ပီးနိုင်ရေ၊ သူစာ နင်ရို့အတွက်၊ လောဒိကိမြို့သားရို့အတွက် အရာ ဟေရပေါလိမြို့သားရို့အတွက် ကောင်းကောင်း ကြိုးစားအားထုတ်ရို့ အလုပ်လုပ်နီရေ။ 14ငါရို့မာ ချစ်ခင်စာ ဆီးဆရာ လုကာန ဒီမာစာ နင်ရို့ကို နှုတ်ဆက်ကတ်တေ။ 15လောဒိကိမြို့မာ ဟိကတ်စာ ကျုံသူညီအစ်ကိုမောင်နမှရို့ကို အရာ နုံဖန သူ့အိမ်မာ တစ်စုတည်းစုရို့ သတင်းဝင်နီကတ်သူရို့ကိုလည်း ငါ နှုတ်ဆက်တေ ဟို့ ပြောလီကတ်။ 16ဒေ စာစောင်ကို နင်ရို့ ဖတ်ပြီးရေခါ လောဒိကိမြို့ အသင်းတော်ကိုလည်း ဖတ်ဖို့ ပီးလီကတ် အရာ လောဒိကိမြို့ အသင်းတော်တို့ ငါ ရွီးရို့ ပီးလီစာ စာစောင်ကိုလည်း နင်ရို့ ဖတ်လီကတ်။ 17အာခိပ္ပုကို ဒေပိုင် ပြောလီ၊ “အသျှင်၏ သာသနာပြုဖို့စာ အလုပ်တာဝန်ကို နင် ရလီရေ။ ထိုအလုပ်ကို ကျီအောင် လုပ်ဖို့အတွက် နင် ကြိုးစားအားထုတ်လီ။” 18ဒေ နှုတ်ဆက်ခြင်း စကားကို ငါ ပေါလု ကိုယ်တိုင် ရွီးလိုက်တေ။ ငါ ထောင်မာ ကျရို့ ဟိရေဆိုစာကို နင်ရို့ မမိကတ်ကေ့။ ထာဝရဘုရား၏ ကျေးဇူးတော် နင်ရို့နအတူ ဟိပါစီ။
Copyright information for
RmzSC