Ephesians 3
ယုဒမဟုတ်သူရို့ဘားမာ ပေါလု သာသနာပြုခြင်း
1ယင်းအတွက်န ငါ ပေါလုစာ နင်ရို့ ယုဒမဟုတ်သူရို့အတွက် ထာဝရဘုရားဘားမာ ဆုတောင်းနီရေ။ ငါစာ ခရစ်တော်ယေရှု၏ အကြောင်းန ထောင်အကျ ခံရနီရေ။ 2ကိုယ့်ကျေးဇူးတော် အကြောင်းကို နင်ရို့ဘားမာ ဟောပြောဖို့အတွက် ထာဝရဘုရား ငါ့ကို တာဝန် ပီးလီရေဆိုစာကို နင်ရို့ ကြားဖူးကတ်ပျာ ဟို့ ငါ ထင်ရေ။ 3ကိုယ့်မာ ဖုံးရွှက်စာ ရွယ်မှတ်ချက်ကို ထာဝရဘုရား ငါ့ကို သိစီဗျာ။ ထိုဖုံးရွှက်စာ ရွယ်မှတ်ချက်ကို ထာဝရဘုရား ငါ့ဘားမာ ဇာပိုင်ပျင်ရို့ ဖေါ်ပြလီရေဆိုစာ အကြောင်းကို ငါ နင်ရို့တို့ စကားတစ်ဖဲ့သျှေ ရွီးလိုက်လီရေ။ 4နင်ရို့ ဒေ စကားတိကို ဖတ်ကြည့်ရေဆိုကေ ခရစ်တော်၏ ဖုံးရွှက်စာ ရွယ်မှတ်ချက် အကြောင်းကို ငါ ဇာ နားလည်ရေလည်းဆိုစာကို နင်ရို့ သိရကတ်လိမည်။ 5ထိုဖုံးရွှက်စာ ရွယ်မှတ်ချက်စာ ခိုက်ဟောင်းက လူရို့ဘားမာ မပေါ်ထွန်းလီ၊ ယေကေလည်း ဒေဂု သန့်ရှင်းသောဝိညာဉ်တော်ကနီရို့ သူ၏ သန့်ရှင်းစာ တမန်တော်ရို့န ဘုရားသတင်းပို့သူရို့ဘားမာ ပေါ်ထွန်းလီရေ။ 6ထိုဖုံးရွှက်စာ ရွယ်မှတ်ချက် ဖြစ်တေကား ဒေပိုင်၊ ယုဒမဟုတ်သူရို့စာ သတင်းကောင်းကနီရို့ ယုဒလူမျိုးရို့နအတူ ထာဝရဘုရား၏ အမွီကို ခံရကတ်ဖို့၊ တစ်ကိုယ်တည်း အင်္ဂါ ဖြစ်ကတ်ဖို့ အရာ ခရစ်တော်ယေရှု၏ လူအနေန ထာဝရဘုရား၏ ဂတိတော် ပဿိကို ခံရကတ်ဖို့။ 7ထာဝရဘုရားစာ ကိုယ့်မဟာတန်ခိုးန ငါ့ကို သနားလီရေ အရာ သူစာ သနားခြင်း၏ ဆုကျေးဇူးအဖြစ် ငါ့ကို သတင်းကောင်းကို ဟောပြောဖို့အတွက် တာဝန် ပီးလီရေ။ 8ငါစာ ထာဝရဘုရား၏ ဟိသမျ လူရို့အထဲမာ အားကုံးသူထက် အသျှေဆုံး ဖြစ်တေ။ ယေကေလည်း အတိုင်းအထွာမဟိစာ ခရစ်တော်၏ အမွီဥစ္စာ အကြောင်း သတင်းကောင်းကို ယုဒမဟုတ်သူရို့ဘားမာ ဟောပြောဖို့အတွက် ထာဝရဘုရား ငါ့ကို တာဝန် ပီးလီရေ။ ထာဝရဘုရားစာ ငါ့ကို သနားကြင်နာရို့ ထိုတာဝန်ကို ပီးလီရေ။ 9အရာ ထိုဖုံးရွှက်စာ ရွယ်မှတ်ချက် ဇာလည်းဆိုစာကို ဟိသမျ လူရို့ဘားမာ နားလည်ပြဖို့အတွက်လည်း ထာဝရဘုရား ငါ့ကို တာဝန် ပီးလီရေ။ ဟိသမျ အားကုံးကို ဖန်ဆင်းစာ ထာဝရဘုရားစာ ထို ရွယ်မှတ်ချက်ကို အစကပင် ဖုံးရွှက်ရို့ ထားလီရေ၊ 10အကြောင်းကား ထာဝရဘုရားစာ ကိုယ့်မာ အမျိုးမျိုး ပုံဇံ ညာဏ်ပညာကို ဒေဂု အသင်းတော်ကနီရို့ ဂေါင်းခင်ဘုံမာ ဟိသမျ အုပ်ချုပ်သူရို့န အာဏာပိုင်သူရို့ဘားမာ ဖေါ်ပြချင်ရေ။ 11ထာဝရဘုရား၏ ရွယ်မှတ်ချက်စာ ထာဝရပတ်လုံးအတွက် ဖြစ်တေ အရာ သူစာ ထို ရွယ်မှတ်ချက်ကို ငါရို့ အသျှင်ခရစ်တော်ယေရှုကနီရို့ ပြည့်စုံအောင် လုပ်လီရေ။ 12ငါရို့စာ ခရစ်တော်န တစ်ကိုယ်တည်း ဖြစ်ခြင်းကနီရို့ အရာ ခရစ်တော်ကို ကျုံခြင်းကနီရို့ ရဲဝံ့သတ္တိအပြည့်န ထာဝရဘုရား၏ ရှိတို့ လားနိုင်ကတ်ပျာ။ 13ယင်းအတွက်န ငါ တောင်းပန်ချင်စာကား၊ နင်ရို့ အကြောင်းန ငါ ဒုက္ခ-ဝေဒနာကို ခံရနီရေ ဆိုပြီးကေ နင်ရို့ စိတ်မပျက်ကတ်ကေ့၊ အကြောင်းကား ငါ ခံရနီစာ ဒုက္ခ-ဝေဒနာတိ အကြောင်းန နင်ရို့ ထာဝရဘုရား၏ ဘုန်းတန်ခိုးကို အဝိငကတ်လိမည်။ဆုတောင်းခြင်းန ခရစ်တော်၏ ချစ်ခြင်းမေတ္တာ
14ယင်းအတွက်န ငါစာ အဖ ရှိက ဒူးထောက်ရို့ ဆုတောင်းနီရေ။ 15ထာဝရဘုရားစာ ဂေါင်းခင်ဘုံန ကမ္ဘာမာ ဟိသမျ အမျိုးအနွယ်ကို တည်ထောင်ရေ။ 16ထာဝရဘုရားစာ ကိုယ့်မာ မဟာဘုန်းတန်ခိုးကို အသုံးပြုရို့ နင်ရို့ စိတ်နှလုံးမာ ဝိညာဉ်၏ တန်ခိုးကို ပီးပတ်စီအတွက် အရာ နင်ရို့ ထိုတန်ခိုးန ပြည့်စုံပတ်စီအတွက် ငါ ဆုတောင်းနီရေ။ 17အရာ နင်ရို့ ကျုံခြင်းတရားကနီရို့ နင်ရို့ စိတ်နှလုံးမာ ခရစ်တော် အပြည့်အစုံ ကျိန်းဝပ်ဖို့အတွက် အရာ နင်ရို့ ရီအနက်မာ ငုတ်စာပိုင် ခရစ်တော်၏ ချစ်ခြင်းမေတ္တာအထဲတို့ ငုတ်ဝင်ရို့ နင်ရို့မာ ဘဝကို တတိုင်းမမြိုင်း တည်ဆောက်နိုင်ဖို့အတွက် ငါ ဆုတောင်းနီရေ။ 18အရာ ခရစ်တော်၏ ချစ်ခြင်းမေတ္တာစာ ကမ်းမဟိ-ယမ်းမဟိ၊ အတိုင်းအထွာမဟိ အရာ အဆုံးအတုံးမဟိဆိုစာကို ထာဝရဘုရား၏ ဟိသမျ လူရို့နအတူ နင်ရို့မာ နားလည်နိုင်ဖို့စာ တန်ခိုး ဟိဖို့အတွက် ငါ ဆုတောင်းနီရေ။ 19ခရစ်တော်၏ ချစ်ခြင်းမေတ္တာကို လူတစ်ယောက်ညာဏ်န မသိနိုင်၊ ယေကေလည်း နင်ရို့စာ ထိုချစ်ခြင်းမေတ္တာကို အတွိအကြုံ ဟိကတ်ပတ်စီအတွက် ငါ ဆုတောင်းနီရေ။ ယင်းပိုင်ဆိုကေ ထာဝရဘုရားက လာစာ ပြည့်စုံစာ ဘဝန နင်ရို့ ပြည့်စုံကတ်လိမည်။ 20ထာဝရဘုရား၏ တန်ခိုးစာ ငါရို့ စိတ်နှလုံးမာ အလုပ်လုပ်နီရေ။ ထာဝရဘုရားစာ ထိုတန်ခိုးကို အသုံးပြုရို့ ငါရို့မာ လိုအပ်ချက်န စဉ်းစားချက်တိထက် ပိုရို့ အလုပ်လုပ်နိုင်ရေ။ 21ခရစ်တော်ယေရှုန အသင်းတော်ကနီရို့ ကမ္ဘာအဆက်ဆက် ထာဝရဘုရား၏ ဘုန်းကြီးပါစီ။ အာမန်။
Copyright information for
RmzSC