Ephesians 4

ခရစ်တော်၏ ကိုယ်ခန္ဓာ တစ်ခုတည်း ဖြစ်ခြင်း

1ငါစာ အသျှင်၏ သာသနာတော်အကြောင်းန ထောင်အကျခံနီရရေ။ နင်ရို့စာ ထာဝရဘုရား၏ ခေါ်ခြင်းကို ခံရကတ်ပျာ။ ယင်းအတွက်န ငါ နင်ရို့ကို တောင်းပန်ချင်စာကား၊ ထာဝရဘုရား၏ ခေါ်ခြင်းကို ခံရကတ်စာန ကိုက်ညီစာပိုင် နင်ရို့ နီထိုင်ကတ်။ 2အမြဲတိုင်း နင်ရို့ စိတ်နှလုံးကို နှိမ့်ချကတ်၊ နုညံ့ခြင်းကို ထားကတ်၊ စိတ်ရှည်ခြင်းကို ထားကတ် အရာ နင်ရို့ ချစ်ခြင်းမေတ္တာစိတ်န တစ်ယောက်ကို တစ်ယောက် သည်းခံကတ်။ 3သန့်ရှင်းသောဝိညာဉ်တော်စာ ငြိမ်းချမ်းခြင်းကနီရို့ နင်ရို့ကို တစ်ညီတစ်ညွန့်တည်း လုပ်တေ။ ထိုစည်းလုံးညီညွန့်ခြင်းကို ကာကွယ်ဖို့အတွက် နင်ရို့ အရေးတကြီး ကြိုးစားကတ်။ 4ထာဝရဘုရား နင်ရို့ကို ခေါ်လီရေအတွက်န နင်ရို့မာ မျှော်လင်းချက် တစ်ခုတည်း ဟိရေ။ ယင်းပိုင်တထန် ကိုယ်ခန္ဓာ တစ်ခုတည်း၊ သန့်ရှင်းသောဝိညာဉ်တော် တစ်ပါးတည်း၊ 5အသျှင် တစ်ပါးတည်း၊ ကျုံခြင်းတရား တစ်ခုတည်း၊ ရီနှစ်မင်္ဂလာ တစ်ခုတည်း၊ 6အရာ အားကုံးသူမာ အဖ ဟို့ ခေါ်စာ ထာဝရဘုရားလည်း တစ်ပါးတည်းရာ ဟိရေ။ သူစာ ဟိသမျ အားကုံးကို အုပ်ချုပ်နီရေ၊ နေရာတိုင်းမာ ဟိရေ အရာ အားကုံးသူ စိတ်နှလုံးမာ ကျိန်းဝပ်နီရေ။

7ယေကေလည်း ခရစ်တော် ဆုံးဖြတ်ရို့ ပီးရေအတိုင်း ငါရို့ အားကုံးသူ အကြီးအကျယ် ဆုကျေးဇူးကို ရကတ်ပျာ။ 8ကျမ်းစာမာ ရွီးရို့ ဟိရေ၊
“သူစာ ဂေါင်းခင်ဘုံတို့ တက်လီရေခါ အချုပ်ခံသူရို့ကို ကိုယ်နအတူ တင်ယူလားခလီရေ၊
အရာ သူစာ လူရို့ကို ဆုကျေးဇူး အများကြီး ပီးလီရေ။”

9သူစာ ဂေါင်းခင်ဘုံတို့ တက်လီရေဆိုစာ စကား အဓိပ္ပါယ် ဇာလည်း? ဒေ စကားကနီရို့ ခရစ်တော်စာ ကမ္ဘာမြေကြီးအထဲတို့ ဆင်းလာလီရေဆိုစာကို သိရရေ မဟုတ်လော? 10ယင်းအတွက်န ခရစ်တော်စာ ကမ္ဘာမြေကြီးအထဲတို့ ဆင်းလာလီရေ အရာ သူစာ ဟိသမျ အားကုံးကို ပြည့်စုံအောင် လုပ်ဖို့အတွက် ဂေါင်းခင်ထက်လည်း အမြင့်ဆုံးနေရာတို့ တက်လီရေ။

11ခရစ်တော်ရာ အသင်းတော်ကို ဒေပိုင် ကြီးကျယ်စာ ဆုကျေးဇူးကို ပီးလီရေ။ သူစာ တစ်ချိုးလူရို့ကို တမန်တော်အဖြစ်၊ တစ်ချိုးလူရို့ကို ဘုရားသတင်းပို့သူအဖြစ်၊ တစ်ချိုးလူရို့ကို သတင်းကောင်း ဟောပြောသူအဖြစ်၊ တစ်ချိုးလူရို့ကို အသင်းတော် ဂေါင်းဆောင်အကြီးအဖြစ် အရာ တစ်ချိုးလူရို့ကို ကျမ်းဆရာအဖြစ် ရွီးကောက်ရို့ ခန့်ထားလီရေ။ 12ထာဝရဘုရား၏ ဟိသမျ လူရို့စာ သာသနာပြုဖို့စာ အလုပ်မာ အဆင်သင့် ဖြစ်အောင်အတွက် ခရစ်တော် ထိုလူရို့ကို ခန့်ထားလီရေ။ အရာ ခရစ်တော်၏ ကိုယ်ခန္ဓာဆိုစာ အသင်းတော် တိုးပွါးပတ်စီအတွက် သူစာ ဒေပိုင် လုပ်လီရေ။ 13ထိုသာသနာပြုခြင်း၏ ရွယ်မှတ်ချက် ဖြစ်တေကား၊ ထာဝရဘုရား၏ သားတော်ကို ကျုံခြင်းကနီရို့ အရာ သူ့ကို သိကျွမ်းခြင်းကနီရို့ ငါရို့ အားကုံးသူကို တစ်ညီတစ်ညွန့်တည်း ဖြစ်စီချင်ရေ၊ ငါရို့ကို ခိုင်မာစာ ကျုံသူ ဖြစ်စီချင်ရေ အရာ ငါရို့ကို အရာလည်း အပြည့်အစုံ ခရစ်တော်ပိုင် ဖြစ်စီချင်ရေ။

14ယင်းခါ ငါရို့ အသျှေနတူကတ်ဖို့ မဟုတ်ပျာ။ လူရို့စာ ပရိယာယ်ဆင်ရို့ အခြားလူရို့ကို မှားယွင်းစာလမ်းတို့ ယူလားဖို့အတွက် မှားယွင်းစာ သွန်သင်ချက်ကို ပီးနီကတ်တေ။ ငါရို့ ခိုင်မာစာ ကျုံသူ ဖြစ်ကတ်တေဆိုကေ ထိုမှားယွင်းစာ သွန်သင်ချက်အထဲမာ ငါရို့စာ လီထရို့ ပြောင်းပြင်းသတ်စာ ရီလှိုင်းလုံးပိုင် ထိုဖက်-ဒေဖက် ယိုင်းရို့ နီကတ်ဖို့ မဟုတ်ပျာ။ 15ယင်းထက်ပင် ငါရို့ ချစ်ခြင်းမေတ္တာစိတ်န ခရစ်တော်၏ မှန်ကန်ခြင်း အကြောင်းကို ပြောကတ်မည် အရာ ဟိသမျ အားကုံးဖက်က ကြီးပွါးရို့ ခရစ်တော်ပိုင် ဖြစ်ကတ်မည်။ ငါရို့စာ ငါရို့မာ ကိုယ်ခန္ဓာ၏ အဂေါင်းဆိုစာ ခရစ်တော်ပိုင် ဖြစ်ကတ်မည်။ 16ကိုယ်ခန္ဓာ တစ်ကိုယ်လုံး ခရစ်တော်ထက်မာရာ တည်ရေ။ ကိုယ်ခန္ဓာ တစ်ကိုယ်လုံးမာ ဟိသမျ အင်္ဂါတိစာ တစ်ခုန တစ်ခု ဆက်ရို့ ဟိကတ်တေ။ ကိုယ်ခန္ဓာမာ အမျိုးမျိုး အင်္ဂါတိ ကိုယ့်မာ ကိုယ့်တာဝန်ကို ထန်းဆောင်ကတ်တေခါ ကိုယ်ခန္ဓာ တစ်ကိုယ်လုံး ကြီးပွါးရေ အရာ ချစ်ခြင်းမေတ္တာန ပြည့်စုံရေ။

ဘဝအဟောင်းကို စွန့်ရို့ ဘဝအသစ်ကို ခံယူခြင်း

17ယင်းအတွက်န အသျှင်၏ လူအနေန ငါ နင်ရို့ကို သတိပီးရို့ ပြောစာကား၊ နင်ရို့ အရာ မကျုံသူရို့ပိုင် မနီထိုင်ကတ်ကေ့ဖိ။ သူရို့စာ ဆိုးယုတ်စာ အကြံညာဏ်န နီထိုင်ကတ်တေ။ 18သူရို့မာ ညာဏ်မျက်စိစာ ကန်းရို့ ဟိရေ။ အရာ သူရို့မာ စိတ်နှလုံး ကျန်းရေအတွက်န သူရို့စာ ထာဝရဘုရား၏ အကြောင်းကို မသိကတ်။ ယင်းအတွက်န သူရို့စာ ထာဝရဘုရားပီးစာ အသက်ကို မရကတ်။ 19သူရို့ စိတ်နှလုံးမာ ရှက်ကြောက်ခြင်းဆိုစာ တစ်ခုလည်း မဟိ။ ယင်းအတွက်န သူရို့မာ အလိုဆန္ဒတိ တစ်ခါလည်း ပြည့်ခြင်းရာ မဟိ အရာ သူရို့စာ အတားအဆီး မဟိဘိုင်းန ဟိသမျ ဆိုးယုတ်-ညစ်ညူးစာ အလုပ်တိကို လုပ်နီကတ်တေ။

20ယေကေလည်း နင်ရို့ကား ခရစ်တော်၏ အကြောင်းနပတ်သပ်ရို့ ယင်းပိုင် သွန်သင်ချက်ကို မရလီကတ်။ 21နင်ရို့စာ ခရစ်တော်၏ အကြောင်းကို ကြားဖူးလီကတ်တေ အရာ နင်ရို့စာ ခရစ်တော်၏ တပည့်အနေန သူ၏ မှန်ကန်ခြင်းတရားကို သင်ယူလီကတ်တေ။ 22နင်ရို့ ရလီကတ်စာ သွန်သင်ချက်စာ ဒေပိုင်၊ နင်ရို့မာ ဘဝအဟောင်းက အကျင့်အဟောင်းတိကို စွန့်ဘိုက်လိုက်ကတ်ရဖို့၊ အကြောင်းကား ထိုအကျင့်အဟောင်းတိစာ လိမ်တတ်စာ အလိုဆန္ဒအကြောင်းန ဟောင်းနွမ်းနီဗျာ။ 23ယင်းတက်စား နင်ရို့မာ စိတ်သဖေါကို အသစ်ပျင်ရို့ ထိုးထွင်ဖို့အတွက် ထာဝရဘုရားကို အခွင့်ပီးကတ်။ 24အရာ ထာဝရဘုရားပီးစာ အကျင့်အသစ်ကို ခံယူကတ်။ ဒေ အကျင့်အသစ်ကို ထာဝရဘုရား၏ ပုံသဏ္ဍာန်နတတူတည်း ဖန်ဆင်းလီရေ။ ယင်းအတွက်န နင်ရို့ ရိုးသားကတ်ရဖို့ အရာ သန့်ရှင်းကတ်ရဖို့။

25ယင်းအတွက်န နင်ရို့ မုတ်သားစကားကို စွန့်ဘိုက်လိုက်ကတ် အရာ တစ်ယောက်ဘားမာ တစ်ယောက် အမှန် စကားကို ပြောကတ်၊ အကြောင်းကား ငါရို့ အားကုံးသူ ကိုယ်ခန္ဓာတစ်ခုတည်း အင်္ဂါ ဖြစ်ကတ်တေ။ 26– 27မန်တက်တေဆိုကေ မန်အငြိုန အပြစ် မလုပ်ကတ်ကေ့။ နင်ရို့ တစ်ခုပိုင်လည်း မာရ်နတ်ကို အခွင့်ရေး ပီးဖို့ မရလတ်အောင် နီမဝင်ခင်အယင်က နင်ရို့မာ မန်ကို ဖြည်ဘိုက်လိုက်ကတ်။ 28ခိုးဖို့ အကျင့်ဟိသူစာ အရာ မခိုးကေ့ဖိ။ ယင်းထက်ပင် သူစာ ရရိုးသသား ကိုယ့်အလက်န အလုပ်လုပ်။ ယင်းပိုင်ဆိုကေ ဆင်းရဲသားရို့ကို ပီးလှူဖို့အတွက် သူ့အလက်မာ တစ်ဖဲ့ဆိုကေလည်း ဟိလိမည်။

29နင်ရို့ ညစ်ညူးစာ စကားတစ်ခွန်းလည်း မပြောကတ်ကေ့။ ယင်းထက်ပင် အခြားလူရို့ ဝိညာဉ်ရေးဖက်က တိုးတက်လတ်အောင် လိုအပ်စာအဆီလှောက် ကောင်းမြတ်စာ စကားတိကိုရာ ပြောကတ်။ ယင်းပိုင်ဆိုကေ နင်ရို့ စကားကို ကြားသူရို့စာ အကျိုးကို ခံရကတ်လိမည်။ 30ထာဝရဘုရား၏ သန့်ရှင်းသောဝိညာဉ်တော်ကို နင်ရို့ ဒုက္ခ မပီးကတ်ကေ့၊ အကြောင်းကား နင်ရို့ လွတ်မြောင့်ခြင်း ရဖို့စာနိတိုင်အောင် ထာဝရဘုရား နင်ရို့ကို ထိုသန့်ရှင်းသောဝိညာဉ်တော်န တံဆိပ်ရိုက်ရို့ ထားဗျာ။ 31ဟိသမျ ခွင့်ရွှတ်ဖို့ စိတ်မဟိခြင်း၊ ဒေါသထွက်ခြင်း၊ မန်တက်ခြင်း၊ အားန အော်ရို့ ရန်တွိခြင်း၊ ဆေးခြင်း အရာ ဟိသမျ မနာလိုခြင်းကို နင်ရို့ စွန့်ဘိုက်လိုက်ကတ်ဖိ။ 32နင်ရို့ တစ်ယောက်ကို တစ်ယောက် သနားကြင်နာကတ်၊ အခြားတစ်ယောက် ဒုက္ခ ကျရေခါ လိုက်ရို့ ကူညီကတ်၊ အရာ ထာဝရဘုရား နင်ရို့ကို ခရစ်တော်ကနီရို့ ခွင့်ရွှတ်စာပိုင် နင်ရို့လည်း တစ်ယောက်ကို တစ်ယောက် ခွင့်ရွှတ်ကတ်။