Galatians 4

နင်ရို့ ကျွန် မဟုတ်ပျာ

1ငါ့စကား အဓိပ္ပါယ်ကား၊ သားတစ်ယောက်စာ ကိုယ့်အဖမာ ဟိသမျ ပစ္စည်း-ဥစ္စာကို ပိုင်ဆိုင်ရေ၊ ယေကေလည်း ထိုသား မကြီးသကြား ကာလပတ်လုံးကို ကျွန်တစ်ယောက်ပိုင် ဖြစ်နီရရေ။ 2သူစာ အဖ သတ်မှတ်ထားစာအချိန် မရောက်သကြား အိမ်ထောင်ကို အုပ်ချုပ်သူရို့န ကြည့်ရှုစောင့်သျှောက်သူရို့လက်အောက်မာ နီရရေ။ 3ယင်းပိုင်တထန် ငါရို့လည်း ဝိညာဉ်ရေးဖက်က အသျှေပိုင် ဟိလီကတ်တေခါ ဒေ လောကမာ အမျိုးမျိုး ဒလည့်ထုံးစဉ်တိအောက်မာ ကျွန်ဖြစ်ရို့ ဟိကတ်လီရေ။ 4ယေကေလည်း အချိန်စိရေခါ ထာဝရဘုရားစာ ကိုယ့်သားတော်ကို လောကတို့ ရွှတ်လိုက်လီရေ။ သူစာ မိန်းမတစ်ယောက်အဝမ်းမာ ကိုယ်ဝန်တည်ရို့ မွီးဖွားခြင်းကို ခံယူလီရေ အရာ ယုဒလူမျိုးရို့ ပညှတ်တရားအောက်မာ နီထိုင်လီရေ။ 5ပညှတ်တရားအောက်မာ နီထိုင်သူရို့ကို ချွတ်ဖို့အတွက် အရာ ငါရို့ကို ထာဝရဘုရား၏ သားသမီးအဖြစ် လက်ခံဖို့အတွက် ထာဝရဘုရားစာ ကိုယ့်သားတော်ကို လောကတို့ ရွှတ်လိုက်လီရေ။ 6နင်ရို့ ထာဝရဘုရား၏ သားသမီး ဖြစ်ကတ်တေအတွက်န ထာဝရဘုရားစာ ကိုယ့်သားတော်၏ ဝိညာဉ်ကို နင်ရို့ စိတ်နှလုံးမာ သွင်းပီးလီရေ။ ထိုဝိညာဉ်စာ ထာဝရဘုရားကို အာဗ္ဗာ ဟို့ ခေါ်ရေ၊ ယင်းအဓိပ္ပါယ်ကား အဖ ဟို့ ခေါ်ရေ။ 7ယင်းအတွက်န နင်ရို့ ကျွန် မဟုတ်ပျာ၊ ယင်းထက်ပင် နင်ရို့စာ ထာဝရဘုရား၏ သားသမီး ဖြစ်ကတ်ပျာ။ နင်ရို့ အမှန် ထာဝရဘုရား၏ သားသမီး ဖြစ်ကတ်တေဆိုကေ ထာဝရဘုရား၏ ဂတိတော်အမွီကို နင်ရို့ ရကတ်လိမည်။

ဂါလာတိပြည်နယ်သားရို့ကို ပေါလု တောင်းပန်ခြင်း

8နင်ရို့ ထာဝရဘုရားကို မသိခင်အယင်က မဟုတ်မမှန်စာ နတ်ဘုရားတိဘားမာ ကျွန် ဖြစ်ရို့ ဟိကတ်လီရေ။ 9ယေကေလည်း နင်ရို့ ဒေဂု ထာဝရဘုရားကို သိကတ်ပျာ။ ယင်းထက်ပင် ထာဝရဘုရား နင်ရို့ကို သိဗျာ ဟို့ ပြောကေပင် ကောင်းဖို့သိ။ ယင်းပိုင်ဆိုကေ လောကမာ အားနည်းစာန အကျိုးမပီးစာ အမျိုးမျိုး ဒလည့်ထုံးစဉ်တိတို့ နင်ရို့ အရာတစ်ပြန် လှည့်ရို့ ဇာဖို့ ကျွန် ဖြစ်ချင်ကတ်စာလည်း? 10နင်ရို့စာ အခါကြီး နိရက်၊ လ၊ ရာသီ အရာ နှစ်ကို အရေးစိုက်ရို့ ကျင့်ပနီကတ်တေ။ 11နင်ရို့အတွက် ငါ ပင်ပန်းခံရို့ လုပ်လီစာ အလုပ်တိ ပျက်ဆုံးလားဖို့ဆိုစာကို ငါ ကြောင်းကြနီရေ။

12ညီအစ်ကိုမောင်နမှရို့၊ ငါ နင်ရို့ပိုင် ဖြစ်လီရေ။ ယင်းအတွက်န နင်ရို့လည်း ငါ့ပိုင် ဖြစ်ကတ်ဖို့အတွက် ငါ နင်ရို့ကို တောင်းပန်ရေ။ နင်ရို့ကား ငါ့ကို တစ်ခုလည်း မတရား မလုပ်လီကတ်။ 13ငါ ခန္ဓာ မကျန်းမာ ဖြစ်လီရေအတွက်န ငါ ပထမခေါက် နင်ရို့ဘားမာ သတင်းကောင်းကို ဟောပြောဖို့ အခွင့်ရေး ရလီရေဆိုစာကို နင်ရို့ သိကတ်တေ။ 14ငါ မကျန်းမာစာ အကြောင်းန ငါ့ကို စွန့်ရို့ လားလတ်အောင် နင်ရို့ စုံစမ်းခြင်းကို ခံရလီကတ်တေ၊ ယေကေလည်း နင်ရို့ ငါ့ကို အားမနာ-မနာလို မလုပ်လီကတ်။ ယင်းထက်ပင် ထာဝရဘုရား၏ ဂေါင်းခင်နတ်သားကို၊ မဟုတ်ကေ ခရစ်တော်ယေရှုကို လက်ခံကတ်စာပိုင် နင်ရို့ ငါ့ကို လက်ခံလီကတ်တေ။ 15နင်ရို့ တစ်ချိန်ခါ ကောင်းကောင်း ဝမ်းသာရို့ ကျေးဇူးတင်လီကတ်တေ၊ ယေကေလည်း ဒေဂု ထိုစိတ်သဖေါ ဇာတို့ ရောက်လားခရေလည်း? ဖြစ်နိုင်ရေဆိုကေ နင်ရို့စာ ကိုယ်ရို့ မျက်စိကို တိုင်အောင်ပင် ထွတ်ရို့ ငါ့ကို ပီးနိုင်လီရေဆိုစာကို ငါ သက်သီ ပီးနိုင်ရေ။ 16ယေကေလည်း ငါ ဒေဂု မှန်ကန်စာ စကားကို ပြောရေအတွက်န ငါ နင်ရို့ ရန်သူ ဖြစ်လားခဗျာလော?

17မှားယွင်းစာ ဆရာရို့စာ နင်ရို့ကို နှစ်သက်အောင် လုပ်ဖို့ ကြိုးစားလီကတ်တေ၊ ယေကေလည်း သူရို့စာ ကောင်းမြတ်စာ ရွယ်မှတ်ချက်န နင်ရို့ကို နှစ်သက်အောင် လုပ်ဖို့ ကြိုးစားလီကတ်စာ မဟုတ်။ ယင်းထက်ပင် နင်ရို့စာ သူရို့အဖွဲ့တို့ ဝင်လတ်အောင်အတွက် နင်ရို့ကို ငါရို့က ခွဲထားဖို့ ကြည့်ကတ်စာ ဖြစ်တေ။ 18ဟုတ်တေ၊ ကောင်းမြတ်စာ ရွယ်မှတ်ချက်န လူရို့ နင်ရို့ကို နှစ်သက်အောင် လုပ်ဖို့ ကြိုးစားရေဆိုကေ ကောင်းရေ။ ယေကေလည်း သူရို့ အမြဲတိုင်း ဒေပိုင် လုပ်နီဖို့ သင့်ရေ၊ သက်သက် ငါ ဟိခါ မဟုတ်။ 19ငါ့ အချစ်သားရို့၊ နင်ရို့ ခရစ်တော်ပိုင် မဖြစ်သကြား ငါ အရာတစ်ပြန် မိန်းမတစ်ယောက် သားမွီးဖွားဖို့ အဝမ်းနာစာပိုင် နင်ရို့အတွက် ငါ့စိတ်နှလုံးမာ ဝေဒနာကို ခံရနီရေ။ 20နင်ရို့ အကြောင်းကို ယူရို့ ငါ့ စဉ်းစားချက်ကို ပြောင်းလှဲဖို့အတွက် ငါ ဒေဂု နင်ရို့တို့ လာရို့ နင်ရို့န ရှိဆိုင် စကားပြောချင်ရေ၊ အကြောင်းကား ငါ အဝီးကနီရို့ နင်ရို့ကို ဇာပိုင် ကူညီဖို့လည်း ငါ မသိ။

ဟာဂရန စာရာ ပုံဥပမာ

21ပြောကြည့်န၊ နင်ရို့ ပညှတ်တရားအောက်မာ နီထိုင်ဖို့ လိုသူရို့ ပညှတ်တရား ဇာ ပြောရေလည်းဆိုစာကို နင်ရို့ ကြားကတ်တေလော? 22ကျမ်းစာမာ ရွီးရို့ ဟိရေ၊ အာဗြဟံမာ သားနှစ်ယောက် ဟိလီရေ။ တစ်ယောက်မာ အမိစာ ကျွန်မ ဖြစ်တေ၊ အခြားတစ်ယောက်မာ အမိစာ လွတ်လပ်စာ မိန်းမဆိုစာ အာဗြဟံ၏ မယားအရင်း ဖြစ်တေ။ 23ကျွန်မမာ သားစာ ပကတိအတိုင်း မွီးဖွားလီရေ၊ ယေကေလည်း လွတ်လပ်စာ မိန်းမမာ သားစာ ထာဝရဘုရား၏ ဂတိတော်အတိုင်း မွီးဖွားလီရေ။

24ထိုမိန်းမ နှစ်ယောက်စာ စာချုပ်နှစ်ခု ရုပ်ပုံ ဖြစ်တေ။ စာချုပ်နှစ်ခုမာ တစ်ခုစာ သိနာတောင်က လာလီရေ။ လူရို့စာ ကိုယ်ရို့ကို ကျွန်လုပ်စာ ပညှတ်တရားကို ထိုသိနာတောင်က ရလီကတ်တေ။ ပထမ စာချုပ်စာ ဟာဂရ ဖြစ်တေ။ 25ဟာဂရစာ အာရပ်ပြည်မာဟိစာ သိနာတောင်နတူရေ အရာ သူစာ ဒေဂုဟိစာ ယေရုရှလင်မြို့နလည်း တူရေ၊ အကြောင်းကား ယေရုရှလင်မြို့န ထိုမြို့သားရို့စာ ပညှတ်တရားဘားမာ ကျွန်ဖြစ်ရို့ ဟိကတ်တေ။ 26ယေကေလည်း ဂေါင်းခင်ဘုံမာဟိစာ ယေရုရှလင်မြို့စာ လွတ်လပ်စာမြို့ ဖြစ်တေ။ ထိုမြို့စာ ငါရို့မာ အမိ ဖြစ်တေ၊ 27အကြောင်းကား ကျမ်းစာမာ ရွီးရို့ ဟိရေ၊
“အိုး သားမဖွားဖူးစာ အမြုံမ၊
နင် ဝမ်းသာစာ တေးခြင်းကို ဆို။
နင် တစ်ခါလည်း သားမွီးဖွားခြင်း ဝေဒနာကို မခံဖူးသိ၊
နင် ဝမ်းသာစာ တေးခြင်းကို အားန ဆို။
အကြောင်းကား လင်ဟိစာ မိန်းမထက်
လင်မဟိစာ မိန်းမမာ သားသမီး အများကြီး ရလိမည်။”

28ညီအစ်ကိုမောင်နမှရို့၊ နင်ရို့စာ ဣဇာက်ပိုင် ထာဝရဘုရား၏ ဂတိတော်အတိုင်း မွီးဖွားလာစာ သားသမီး ဖြစ်ကတ်တေ။ 29ယေကေလည်း ယင်းအချိန်ခါ ပကတိအတိုင်း မွီးဖွားလာစာ အသျှေစာ ▼

▼ပကတိအတိုင်း မွီးဖွားလာစာ အသျှေစာ ဟာဂရသား ဣရှမေလ ဖြစ်ပါရေ။

သန့်ရှင်းသောဝိညာဉ်တော်၏ တန်ခိုးန မွီးဖွားလာစာ အသျှေကို ▼

▼သန့်ရှင်းသောဝိညာဉ်တော်၏ တန်ခိုးန မွီးဖွားလာစာ အသျှေ စာရာသား ဣဇာက် ဖြစ်ပါရေ။

နှိပ်စက်လီရေ။ အရာ ဒေဂုလည်း ယင်းပိုင် ဖြစ်နီရေ။ 30ယေကေလည်း ကျမ်းစာမာ ဇာ ပြောရေလည်း? ကျမ်းစာမာ ပြောရေ၊ “ထိုကျွန်မန သူ့သားကို နှင်ထုတ်လိုက်! အကြောင်းကား ကျွန်မ သားစာ လွတ်လပ်စာ မိန်းမ သားနအတူ အမွီဥစ္စာ ရဖို့ မထိုက်တန်။” 31ယင်းအတွက်န ညီအစ်ကိုမောင်နမှရို့၊ ငါရို့ ကျွန်မ သားသမီး မဟုတ်။ ယင်းထက်ပင် ငါရို့စာ လွတ်လပ်စာ မိန်းမ သားသမီး ဖြစ်ကတ်တေ။