Hebrews 12

ယေရှု၏ ပုံဥပမာကို အမှီပြုကတ်

1ငါရို့ ဒေဂု မြင်ရစာကား၊ ငါရို့ လေးဖက်လက်စိမာ ထာဝရဘုရားကို ကျုံကတ်စာ လူအများကြီး ဟိကတ်တေ။ သူရို့စာ ကိုယ်ရို့မာ ကျုံခြင်းတရားကို သက်သီပြကတ်တေ။ ယင်းအတွက်န ငါရို့စာ သူရို့က သင်ယူကတ်မည် အရာ ငါရို့ကို တားဆီးနိုင်စာ အကြောင်းအရာတိန ငါရို့ကို လဲကျအောင် လုပ်နိုင်စာ အပြစ်တိကို တိုးချဘိုက်ခရို့ ငါရို့ ရှိကဟိစာ အဗြီးပြိုင်ပွဲမာ ဝင်ရို့ မနားဘိုင်းန ဗြီးကတ်မည်။ 2လာကတ်၊ ငါရို့ အဆုံးတိုင်အောင် ဗြီးဖို့နိုင်လတ်အောင် အမြဲတိုင်း အသျှင်ယေရှုကို အမှီပြုရို့ နီကတ်မည်။ သူစာ ပထမကပင် ငါရို့ကို ကျုံခြင်းတရား၏ လမ်းတို့ ဦးဆောင်ရို့ ယူလားရေ အရာ သူစာ ငါရို့မာ ကျုံခြင်းတရားကို အပြည့်အစုံ စင်ကြယ်အောင် လုပ်တေ။ သူစာ ကားတိုင်ကို ရှက်ကောင်းဖွယ်ရာ ဟို့ မမှတ်ဘိုင်းန ကားတိုင်ထက်မာ အသီခံလီရေ၊ အကြောင်းကား သူစာ သီပြီးရေနောက် ရဖို့စာ ပျော်ပါးခြင်းကို စိတ်မာမှတ်ရို့ ထားလီရေ။ ဒေဂု သူစာ ထာဝရဘုရား၏ ပလ္လင်တော် ညာဖက်က ထိုင်ရို့ ဟိရေ။ 3နင်ရို့စာ အားမနည်းရအောင် အရာ စိတ်မပျက်ရအောင် ယေရှု အကြောင်းကို စဉ်းစားရို့ ကြည့်ကတ်။ အပြစ်သေရို့ သူ့ကို ဆန့်ကျင်ရို့ အမျိုးမျိုးပိုင် အသရေရှုတ်ချလီကတ်တေခါ သူစာ သည်းခံရို့ နီလီရေ။ 4နင်ရို့ အပြစ်န စစ်တိုက်ရို့ ဒေဂုလည်း သီဖို့စာပိုင် မဖြစ်ကတ်သိ။

ထာဝရဘုရား ငါရို့မာ အဖပိုင် ဖြစ်ခြင်း

5အဖအနေန ကိုယ့်သားသမီးရို့ကို ထာဝရဘုရား အားပီးချက်စကား ပြောလီစာကို နင်ရို့ မိလားခကတ်ပျာ! သူစာ ပြောလီရေ၊
“ငါ့သား၊ အသျှင်၏ ဆုံးမခြင်းကို နင် အားမနာ မလုပ်ကေ့၊
အရာ သူစာ နင့်ကို အပြစ်တင်ရေခါ နင် စိတ်မပျက်ကေ့။
6အကြောင်းကား အသျှင်စာ ကိုယ်ချစ်သူကို ဆုံးမရေ၊
အရာ သားသမီးအဖြစ် လက်ခံသူတိုင်းကို ဒါဏ်ပီးရေ။”

7နင်ရို့ ဒေဂု ခံရနီကတ်စာ ဆုံးမခြင်းကို အဖ၏ ဆုံးမခြင်း ဟို့ မှတ်ရို့ ခံယူကတ်။ ထာဝရဘုရားစာ နင်ရို့ကို ကိုယ့်သားသမီးရို့ကိုပိုင် ဆုံးမရေ။ အဖ၏ ဆုံးမခြင်းကို မခံရစာ သားသမီး တစ်ယောက်လည်း မဟိ။ 8သားသမီး တစ်ယောက်မကျန် အဖ၏ ဆုံးမခြင်းကို ခံရရေ။ နင်ရို့စာ အဖ၏ ဆုံးမခြင်းကို မခံရကတ်ဆိုကေ နင်ရို့ သားသမီး အရင်း မဟုတ်။ 9ငါရို့ကို ဆုံးမဖို့အတွက် ဒေ လောကမာ ကိုယ့်မာ ကိုယ့်အဖ ဟိကတ်တေ။ ငါရို့စာ ကိုယ်ရို့မာ အဖရို့ကို ရိုသေကတ်တေ။ ယင်းပိုင်ဆိုကေ ငါရို့ ဝိညာဉ်နဆိုင်စာ အဖ၏ ဆုံးမခြင်းကို အရာလည်း ပိုရို့ ခံယူရဖို့ မဟုတ်လော? အကြောင်းကား ထိုဆုံးမခြင်းကို ခံယူရေဆိုကေ ငါရို့စာ အသက်ကို ရကတ်ဖို့။ 10ဒေ လောကမာဟိစာ ငါရို့ အဖရို့စာ ကောင်းရေ ဟို့ ထင်ကတ်တေအတိုင်း တစ်ချက်သျှေအတွက် ဆုံးမကတ်တေ။ ယေကေလည်း ထာဝရဘုရားစာ ငါရို့ ကောင်းကျိုးရေးအတွက် ငါရို့ကို ဆုံးမရေ၊ အကြောင်းကား သူစာ ငါရို့ကို ကိုယ့်သန့်ရှင်းခြင်းကို ရစီချင်ရေ။ 11ငါရို့စာ ဆုံးမခြင်းကို ခံရရေခါ ပျော်ပါးစရာ ဟို့ မထင်ဘိုင်းန ဝမ်းနည်းစရာ ဟို့ ထင်နီကတ်တေ၊ ယေကေလည်း ငါရို့စာ နောက်က ငြိမ်းချမ်းခြင်းန ရိုးသားစာ ဘဝကို ရကတ်တေ။ 12ယင်းအတွက်န နင်ရို့ အားခွန်နပြည့်စုံကတ် အရာ အားပါကတ်။ 13ဝိညာဉ်ရေးဖက်က မကျန်းမာသူရို့စာ ကျန်းမာကတ်ပတ်စီအတွက် နင်ရို့ ကောင်းမြတ်စာ လမ်းမာ လားကတ်။

သတိပီးခြင်းန ဩဝါဒပီးခြင်း

14ဟိသမျ လူရို့န ငြိမ်းချမ်းခြင်းမာ နီထိုင်ဖို့စာကို ကြိုးစားကတ် အရာ သသန့်ရှရှင်း နီထိုင်ဖို့စာကိုလည်း ကြိုးစားကတ်၊ အကြောင်းကား မသန့်ရှင်းဆိုကေ တစ်ယောက်လည်း အသျှင်ကို မြင်ရလိမည် မဟုတ်။ 15သတိထားကတ်၊ ထာဝရဘုရား၏ ကျေးဇူးတော်ကို ခံရဖို့စာက တစ်ယောက်လည်း မကျန်စီကေ့။ အရာ နင်ရို့အထဲက တစ်ယောက်ကိုလည်း ခါးစာအပင်က အမြစ်ထိုးစာပိုင် မဖြစ်စီကတ်ကေ့။ နင်ရို့အထဲမာ ယင်းပိုင်ဇတ်လူ ဟိရေဆိုကေ နင်ရို့မာ ပေါင်းဖေါ်ဆက်ဆံခြင်းကို ပျက်အောင် လုပ်လိမည်။ 16သတိထားကတ်၊ နင်ရို့အထဲက တစ်ယောက်လည်း ကာမဂုဏ်အပြစ်မာ မကျစီကေ့၊ မဟုတ်ကေ ဧသောပိုင် ထာဝရဘုရားကို ရိုသေကြောက်လန့်ခြင်း မဟိသူ မဖြစ်စီကေ့။ ဧသောစာ သားဦအဖြစ် ကိုယ့်အဖမာ ဟိသမျ အမွီဥစ္စာကို ပိုင်ဆိုင်လီရေ၊ ယေကေလည်း သူစာ အစားတစ်ထပ်အကြောင်းန ကိုယ့်ပိုင်ဆိုင်ခွင့်ကို ရောင်းဘိုက်လီရေ။ 17နင်ရို့ သိကတ်တေ၊ သူစာ မျက်ရည်ကျရို့ ကိုယ့်အဖက ပဿိကို ရဖို့အတွက် မေတ္တာရပ်ခံလီရေ။ ယေကေလည်း အဖစာ သူ့ကို ငြင်းပယ်လီရေ၊ အကြောင်းကား သူ့မာ စိတ်လှည့်ရို့ လာဖို့စာ အခွင့်ရေး မဟိလီဗျာ။

18– 19နင်ရို့စာ တောင်အသစ်တစ်တောင်တို့ ရောက်နီကတ်ပျာ။ ဒေ တောင်စာ ဣသရေလလူမျိုးရို့ ရောက်လီစာ သိနာတောင်နမတူ။ အလက်န မတိုက်နိုင် မီးတောက်နီစာ တောင်တို့ နင်ရို့ ရောက်နီကတ်စာ မဟုတ်။ အရာ တတိန်မမှိုင်း ဝမ်းနည်းဖို့ ကောင်းစာနေရာ၊ မုန်တိုင်း တိုက်စာနေရာ အရာ ဘောမှုတ်သံန စကားပြောသံကို ကြားရစာနေရာတို့လည်း နင်ရို့စာ ရောက်နီကတ်စာ မဟုတ်။ ထိုစကားပြောသံကို ကြားရလီသူရို့စာ အရာတစ်ခေါက် စကား မပြောဖို့အတွက် ထာဝရဘုရားကို တောင်းဆိုလီကတ်တေ၊ 20အကြောင်းကား၊ “ဇာ တိရစ္ဆာန်မဆို ဒေ တောင်ကို တိုက်တေဆိုကေ ယင်းတိရစ္ဆာန်ကို ကျောက်ခဲ ဘိုက်ရို့ သတ်ရဖို့” ဟို့ ပီးလီစာ ပညှတ်ချက်ကို သူရို့ မခံနိုင်ကတ်လီ။ 21အမှန် ထိုအကြောင်းအရာတိစာ ကောင်းကောင်း ကြောက်ကောင်းဖွယ်ရာ ဟိလီရေ။ ယင်းထက်မက မောရှေစာ ပြောလီရေ၊ “ငါ ကြောက်ရို့ တုန်နီရေ။”

22ယေကေလည်း ယင်းထက်ပင် နင်ရို့စာ ဇိအုန်တောင်န အသက်သျှင် ထာဝရဘုရား၏ မြို့နားတို့ ရောက်နီကတ်ပျာ။ ထိုမြို့စာ ဂေါင်းခင်ဘုံမာဟိစာ ယေရုရှလင်မြို့ ဖြစ်တေ အရာ နင်ရို့စာ ထောင်သောင်းမက ဂေါင်းခင်နတ်သားရို့ စုရို့ ပျော်နီကတ်စာနေရာတို့ ရောက်နီကတ်ပျာ။ 23နင်ရို့စာ ထာဝရဘုရား၏ သားဦးအဖြစ် ဂေါင်းခင်ဘုံ စာရင်းမာ နာမည်ပါဝင်သူရို့ စုနီကတ်စာနေရာတို့ ရောက်နီကတ်ပျာ၊ ဟိသမျ လူရို့ကို တရားစစ်ဆေးစာ ထာဝရဘုရား၏ အနားတို့ ရောက်နီကတ်ပျာ အရာ အပြည့်အစုံ စင်ကြယ်စာ သူတော်ကောင်းရို့ ဝိညာဉ်တိ စုကတ်စာနေရာတို့ ရောက်နီကတ်ပျာ။ 24နင်ရို့စာ ယေရှုတို့ ရောက်နီကတ်ပျာ။ ထာဝရဘုရားစာ ဒေ ယေရှုကနီရို့ လူရို့န စာချုပ်အသစ်တစ်ခု ထိုးလီရေ အရာ ယေရှုစာ လူရို့ စင်ကြယ်ကတ်ပတ်စီအတွက် ကိုယ့်သွီးကို လူရို့ဘားမာ ဖြန်းလီရေ။ ယေရှု၏ သွီးစာ အာဗေလသွီးထက် ပိုရို့ ကောင်းမြတ်တေ၊ အကြောင်းကား အာဗေလ သွီးစာ အားန အော်ရို့ လက်စားဆပ်ဖို့စာ စကားကို ပြောရေ။ ယေကေလည်း ယေရှု၏ သွီးစာ ခွင့်ရွှတ်ဖို့စာ စကားကို ပြောရေ။

25သတိထားကတ်! စကားပြောစာ အသျှင်ကို နင်ရို့ မငြင်းပယ်ကတ်ကေ့။ မောရှေစာ ထာဝရဘုရား၏ သတိပီးချက် စကားကို ဒေ ကမ္ဘာမာနီရို့ ပြောလီရေခါ ဣသရေလလူမျိုးရို့စာ ငြင်းပယ်လီကတ်တေ။ ယင်းအတွက်န သူရို့စာ အပြစ်ဒါဏ်ကို ခံရကတ်လီရေ။ ယေကေလည်း ဒေဂု ထာဝရဘုရားစာ ဂေါင်းခင်ဘုံကနီရို့ စကား ပြောနီရေ။ နင်ရို့ ထိုစကားတော်ကို နားမထောင်ဘိုင်းန နီရေဆိုကေ ထိုလူရို့ထက် ကြောက်လန့်စရာ အပြစ်ဒါဏ်ကို ခံရဖို့စာက ဇာပိုင်ပျင်ရို့ ရွတ်ကတ်ဖို့လည်း! 26အယင်ကခါ ထာဝရဘုရားစာ ကိုယ့်နှုတ်တော်က စကားတော်အသံန ဒေ ကမ္ဘာကို တုန်လှုတ်လီရေ၊ ယေကေလည်း ဒေဂု ထာဝရဘုရားစာ၊ “ငါ သက်သက် အရာတစ်ပြန် ဒေ ကမ္ဘာကို တုန်လှုတ်ဖို့စာ မဟုတ်သိ၊ ဂေါင်းခင်ကိုလည်း တုန်လှုတ်ဖို့” ဟို့ ဂတိပီးလီရေ။ 27“အရာတစ်ပြန်” ဟို့ ပြောစာစကား အဓိပ္ပါယ်ကား၊ တုန်လှုတ်နိုင်စာ ဝန်တိကို ဖျက်စီးဘိုက်လိုက်ဖို့ ဟို့ ပြောစာ ဖြစ်တေ။ ယင်းအဓိပ္ပါယ်ကား လုပ်စာ ဝန်တိကို ဖျက်စီးဘိုက်လိုက်ဖို့ ဟို့ ပြောစာ ဖြစ်တေ၊ အကြောင်းကား တုန်လှုတ်ဖို့မနိုင်စာ ဝန်တိကို ထာဝရပတ်လုံး တည်မြဲအောင် လုပ်ဖို့အတွက် ဖြစ်တေ။

28ယင်းအတွက်န လာကတ်၊ ထာဝရဘုရားကို ကျေးဇူးတင်ကတ်မည်၊ အကြောင်းကား ငါရို့စာ မတုန်လှုတ်နိုင်စာ နိုင်ငံတစ်ခုကို ရကတ်ပျာ။ အရာ လာကတ်၊ ငါရို့စာ ထာဝရဘုရား နှစ်သက်ဖို့စာပိုင် ရိုသေကြောက်လန့်ခြင်းန သူ့ကို ကိုးကွယ်ရို့ နီကတ်မည်။ 29အကြောင်းကား ငါရို့မာ ထာဝရဘုရားစာ ဖျက်စီးစာ မီးနတူရေ။