Hebrews 2
ကယ်တင်ခြင်းကို ငြင်းပယ်သူ အပြစ်ဒါဏ် ခံရခြင်း
1ယင်းအတွက်န ငါရို့ဘားမာ ဟောပြောလီစာ တရားတော်ကို ငါရို့ အများကြီး စိတ်ဝင်စားကတ်ရဖို့။ ယင်းပိုင်ဆိုကေ ငါရို့ မှန်ကန်ခြင်းလမ်းကို စွန့်ရို့ လားကတ်ဖို့ မဟုတ်။ 2အယင်ကခါ ထာဝရဘုရားစာ ဂေါင်းခင်နတ်သားရို့ကနီရို့ ပညှတ်တရား ပီးလီရေ အရာ ထိုပညှတ်တရား မှန်ရေဆိုစာကို သက်သီပြလီရေ။ ယင်းအတွက်န ထိုပညှတ်တရားကို မလိုက်နာဘိုင်း ငြင်းပယ်လီသူရို့စာ ခံထိုက်စာ အပြစ်ဒါဏ်ကို ခံရကတ်လီရေ။ 3ထာဝရဘုရားစာ ငါရို့အတွက် မဟာကယ်တင်ခြင်းကို ပီးလီရေ။ ထိုကယ်တင်ခြင်းကို ငါရို့ ငြင်းပယ်ရေဆိုကေ ဇာပိုင်ပျင်ရို့ အပြစ်ဒါဏ်က ရွတ်ဖို့စာလည်း? အသျှင်ယေရှုစာ ပထမဆုံး ထိုကယ်တင်ခြင်း အကြောင်းကို လူရို့ဘားမာ ဟောပြောလီရေ။ ယေရှု ဟောပြောစာကို ကြားသူရို့စာ ထိုကယ်တင်ခြင်း မှန်ရေဆိုစာကို ငါရို့ဘားမာ သက်သီပြကတ်လီရေ။ 4ထာဝရဘုရား ကိုယ်တိုင်လည်း နိမိတ်လက္ခဏာ၊ အံ့ဩဖွယ်အလုပ် အရာ တန်ခိုးကနီရို့ ထိုကယ်တင်ခြင်း၏ တရားတော် မှန်ရေဆိုစာကို သက်သီပြလီရေ။ အရာ သူစာ ကိုယ့်အလိုတော်အတိုင်း လူရို့ကို သန့်ရှင်းသောဝိညာဉ်တော်၏ ဆုကျေးဇူး ပီးရေ။ သန့်ရှင်းသောဝိညာဉ်တော်၏ ဆုကျေးဇူးကနီရို့လည်း သူစာ ထိုကယ်တင်ခြင်း၏ တရားတော် မှန်ရေဆိုစာကို သက်သီပြလီရေ။ယေရှု လူ့ဇာတိကို ခံယူခြင်း
5နောက်အနာဂါတ်မာ ဖြစ်လာဖို့စာ ကမ္ဘာအသစ်ကို အုပ်ချုပ်ဖို့အတွက် ထာဝရဘုရား ဂေါင်းခင်နတ်သားရို့ကို အခွင့် မပီးလီ။ ထိုကမ္ဘာအသစ် အကြောင်းကို ငါရို့ ပြောနီကတ်တေ။ 6ကျမ်းစာမာ ရွီးရို့ဟိရေ၊“အိုး ထာဝရဘုရား၊ ကိုယ်တော် ဇာဖို့ လူအကြောင်းကို စဉ်စားနီပါစာလည်း?
အရာ လူ့သား အသူဖြစ်ရို့ ကိုယ်တော် ဒေလှောက် ကြည့်ရှုစောင်မပါစာလည်း?
7ကိုယ်တော် သူ့ကို တစ်နားသျှေအတွက် ဂေါင်းခင်နတ်သားရို့ထက် နှိမ့်ချလီပါရေ။
ယေကေလည်း ကိုယ်တော်စာ ဘုန်းသိက္ခာန ရိုသေခြင်းကို
သရဖူအဖြစ် သူ့အဂေါင်းမာ ဆောင်းလီပါရေ။
8အရာ ဟိသမျ အားကုံးကို သူ့တန်ခိုးအောက်မာ ချထားလီပါရေ။”ထာဝရဘုရားစာ ဟိသမျ အားကုံးကို သူ့အုပ်စိုးခြင်းအောက်မာ ချထားလီရေ။ ယင်းအဓိပ္ပါယ် ဖြစ်တေကား သူမအုပ်စိုးစာ တစ်ခုလည်း မဟိဗျာ။ ယေကေလည်း ဟိသမျ အားကုံးကို သူအုပ်စိုးထားစာကို ဒေဂုပင် ငါရို့ မမြင်ရသိ။ 9ယေကေလည်း ယေရှုကိုကား ငါရို့ မြင်ကတ်တေ။ ထာဝရဘုရားစာ သူ့ကို တစ်နားသျှေအတွက် ဂေါင်းခင်နတ်သားရို့ထက် နှိမ့်ချလီပါရေ။ ယေကေလည်း ဒေဂု ထာဝရဘုရားစာ ဘုန်းသိက္ခာန ရိုသေခြင်းကို သရဖူအဖြစ် သူ့အဂေါင်းမာ ဆောင်းလီရေ၊ အကြောင်းကား သူစာ ထာဝရဘုရား၏ သနားကြင်နာခြင်း အကြောင်းန ဟိသမျ လူရို့အတွက်မာ ဒုက္ခ-ဝေဒနာကို ခံရို့ သီလီရေ။ 10ထာဝရဘုရားစာ ဟိသမျ အားကုံးကို ဖန်ဆင်းလီရေ အရာ သူစာ သားသမီး အများကြီးကို ကိုယ့်ဘုန်းတန်ခိုး ဝီပီးချင်ရေ။ ယင်းအတွက်န သူရို့မာ ကယ်တင်သျှင် ဖြစ်ဖို့အတွက် ထာဝရဘုရားစာ ယေရှုကို ဒုက္ခ-ဝေဒနာ ခံစီလီရေ။ ယင်းပိုင် ယေရှုစာ ထာဝရဘုရား၏ သားသမီးရို့ကို ကယ်တင်ခြင်းလမ်းတို့ ယူလားဖို့စာ အပြည့်အစုံ ဂေါင်းဆောင်တစ်ပါး ဖြစ်လီရေ။ 11ယေရှုကနီရို့ သန့်ရှင်းခြင်းကို ခံရသူရို့စာ ယေရှုန အဖတစ်ဖတည်း ဖြစ်ကတ်တေ။ ယင်းအတွက်န ယေရှုစာ သူရို့ကို ညီအစ်ကို ဟို့ ခေါ်ဖို့ မရှက်။ 12ကျမ်းစာမာ ယေရှုစာ ထာဝရဘုရားကို ပြောလီရေ၊
“အိုး ထာဝရဘုရား၊ အကျွန် ကိုယ့်ညီအစ်ကိုမောင်နမှရို့ဘားမာ
ကိုယ်တော်၏ အကြောင်းကို ပြောပြပါမည်၊
အရာ အသင်းတော်မာ လူရို့ သတင်းဝင်ကတ်တေခါ
ကိုယ်တော်ကို ချီမွမ်းရို့ တေးခြင်း ဆိုပါမည်။” 13ကျမ်းစာမာ သူစာ အရာတစ်ပြန် ပြောလီရေ၊
“ငါ ထာဝရဘုရားကို အားကိုးမည်။”သူစာ အခြားကျမ်းချက် တစ်ခုမာ ပြောလီရေ၊
“ကြည့်၊ ငါ့ကို ထာဝရဘုရား အပ်ပီးသူရို့စာ ငါ့သားသမီးနတူကတ်တေ၊
အရာ သူရို့စာ ငါနအတူ ဟိကတ်တေ။” 14ထိုသားသမီးရို့စာ သွီးသားန ခန္ဓာ ဖြစ်ကတ်တေ။ ယင်းအတွက်န ယေရှုလည်းသောက် ထိုသားသမီးရို့ပိုင်တထန် သွီးသားန ခန္ဓာအဖြစ် မွီးဖွားခြင်းကို ခံယူလီရေ။ အရာ သူကိုယ်တိုင် လူ့သားအဖြစ် အသီခံရို့ သီခြင်းကို ပိုင်ဆိုင်စာ မာရ်နတ်၏ တန်ခိုးကို ဖျက်စီးလီရေ။ 15အရာ သူစာ တစ်သက်ပတ်လုံး သီဖို့စာကို ကြောက်ရို့ ကျွန်အဖြစ် နီထိုင်သူရို့ကို လွတ်မြောင့်ခြင်း ပီးနီရေ၊ 16အကြောင်းကား ဂေါင်းခင်နတ်သားရို့ကို ကူညီဖို့အတွက် အသျှင်ယေရှု ကြွလာလီစာ မဟုတ်၊ ယေကေလည်း အာဗြဟံ၏ အမျိုးအနွယ်သားရို့ကို ကူညီဖို့အတွက် ကြွလာလီစာ ဖြစ်တေ။ 17ယေရှုစာ အားကုံးစာဖက်က ပကတိ လူတစ်ယောက် ဖြစ်ဖို့ ကျလီရေ၊ အကြောင်းကား သူစာ ထာဝရဘုရား၏ ရှိက ကျေးဇူးသျှင်န သစ္စာဟိစာ မဟာယဇ်ပုရောဟိတ်အဖြစ် ကိုယ့်အသက်ကို ယဇ်ပူဇော်ချင်လီရေ။ သူစာ ထိုယဇ်ပူဇော်ခြင်းကနီရို့ရာ လူရို့ အပြစ်ကို ခွင့်ရွှတ်ဖို့ နိုင်လီရေ။ 18သူကိုယ်တိုင် အမျိုးမျိုး အပြစ်သွေးဆောင်ခြင်းန ဒုက္ခ-ဝေဒနာကို ခံရလီရေ။ ယင်းအတွက်န သူစာ အပြစ်သွေးဆောင်ခြင်းကို ခံရသူရို့ကို အမှန် ကူညီမစားနိုင်ရေ။
Copyright information for
RmzSC